YOOHUSERYA 14
Ovuwiha Nyaha sa Vasulu
ECHU YAWEERA: Mwaakhaviherye achu athukumanne ochariha mwahaanyu, nave mooniherye mookwakwaleya mukhalelo mwaha wookhweleya oniiwananaaya ni yoolakelela anyu ni ya mwaha.
MUKHALELO WAWEERANO:
● Mukhaleno yoolakelela. Musuwele waakhanle wi yoolakelela ya mwaha anyu ori oleela, olekecha naari waaceenyerya achu athukumanne, nave voocharela mwiiwananihe moophwanelela. Muroromele wi nyaha soothene sohookhaviheryani ophwanya yoolakelela anyu.
Mwiikohe: ‘Makoho taani achu athukumanne akhweya aryaayano vooloca sa mwaha yoola? Mmukhalelo taani wa operekha waahaala oweeriha opaka makoho yaawo?’ Voocharela mwaavyaavye oloca mwaha mwawiiwananiha wi achu athukumanne ewerye woocharihani, owiiwexexani ni weemererya sooleeliherya.
● Mucicimiherye muru wa mwahaanyu. Variyari va mwaha anyu muloceke echu munahusihaanyu moorweela wa wuuluulela masu ookhweleya a mwaha naari opharihela masu oolikana.
● Mvuwihe mwaha anyu mookwakwaleya nave mookhweya. Muthanlele nyaha sookhweleya pahiru seiho iniiwanana ni echu munahusihaanyu nave eyo enanweerihani ohusiha phaama nave mu elukuluku yeemereryiwe. Mukukuce nyaha sookhweleya, mpaceryihe mwaha ti mwaha mookwakwaleya, mmaaleke vaavaa munacuphelaanyu mwaha mukina, musiviheke mwaacuphelaka mwaha mukina wookhweleya.
Akhweya mpacerye mwaha anyu mulocaka nyaha sookhweleya wi mwaakhaviherye achu athukumanne woocharihani naari muuluulele seiyo wuukuchulani wi mwaakhaviherye wuupuwelela.