Mwiiwe Nsu na Yehova Voothevene Muraanyuvo
“Ni maru anyu munamwiwa nsu otxuli wanyu: Ti yola mphiro.”—ISA. 30:21, (BNM.)
MWAHAALA WAAKHULA HAI?
Satana oneererya hai onanariha nsu na Yehova?
Soothitimanela taani sa murima inawerya ovolowela onwiriyana wahu Yehova?
Tiheeni nnaphwanelaahu weera wi naakhele ohoolela wa Muluku?
1, 2. Yehova onaloca hai ni akapuro awe?
VOOVIRA wa mwaha wa Piipiliya, achu yaanaakhela ohoolela wa Yehova mmikhalelo soohiya hiyana. Wa akina, Muluku aalonceno orweela wa ankeelo naari orweela wa sawoona naari sooloha, seiyo sawooniherya yeeyo yahaala weereya omwaahiyu. Yehova tho aahaavaha muteko wawooneya. (Nam. 7:89; Esek. 1:1; Tan. 2:19) Achu akina yaahaakhela ohoolela orweela wa achu yaamweemelela Yehova yaarumeela mu nikupa na veelaponi yavathi na marehereryo awe. Moohipwacha mukhalelo achu a Yehova yaakhenlaaya masu awe, yaale yiiwelenle sooleeliherya sawe yaareelihiwa.
2 Olelo, Yehova onnaahoolela achu awe orweela wa Piipiliya, munepa awe waweela, ni muloko. (Saw. 9:31; 15:28; 2 Tim. 3:16, 17) Ohoolela yoowo nnaakhelaahu orweela wa yoowo ti wawiiweya ophiyerya wi ori ntoko ‘maru ahu aniiwa nsu oculi wahu eriki: Ti yola mphiro wawokololowa, muchareke!’ (Isa. 30:21, BNM.) Chiri, Yesu tho onnavuwiha nsu na Yehova wa hiyo vaavaa onahooleleiye muloko orweela wa “kapuro óroromeleya” ni amiruku. (Mat. 24:45) Nnaphwanela wiiwelela ohoolela yoola ni murima woothene, okumi woohimala onahaala orweela wa wiiwelela wahu.—Ahe. 5:9.
3. Tiheeni yaahaala ovolowela mukhalelo nnaakhulelaahu ohoolela wa Yehova? (Moone eruku yoopacerya.)
3 Satana Musaserya onachuna onanariha ohoolela woovuluxa okumi yoowo nnaakhelaahu orweela wa Yehova. Opwaha yeeyo, ‘murima wa wootha’ onanwerya ovolowela mukhalelo nnaakhulelaahu ohoolela wa Yehova. (Yer. 17:9) Mwawiihiiha, hankooni nthokororye mummo nneeraahu nivoothe sookwaculiha seiyo inanihiiha owiriyana nsu na Muluku. Hankooni tho nthokororye mummo olocihana phaama ni Yehova onahaalaaya okhapelela onthamwene ahu ni yoowo moohipwacha mikhalelo sahu.
OVOOTHA MAVYAKELO A SATANA
4. Satana oneererya hai ovolowela muupuwelo wa achu?
4 Satana onneererya ovolowela muupuwelo wa achu orweela wa ovuwiha miseelo soowoka ni soohuweliha. (Mwaalakhanye 1 Yohane 5:19.) Mwa waaceererya miseelo soorempwa, elapo yoothene—ophitaanyerya makupa oorakamela a elapo yavathi—yoosareya moorweela wa raatio, TV, ni interneti. Naamwi ikaruma seiya sooniheryaka ichu sookhweleya, wiiliwiili sinnooniherya meecelo ahiniiwanana ni meecelo a Yehova. (Yer. 2:13) Ntoko yootakiherya, ikhankoonya sa michaka ni mathatelo sinnaloca sa othelana wa achu oophwanaphwana mwiikho ntoko yaweemereryeya, nave achu ancipale anoona wi yeeyo Piipiliya onaloceiye sa othelana wa achu oophwanaphwana mwiikho yootepa.—1 Akor. 6:9, 10.
5. Nnii niwerye hai osepa ohuwelihiwa ni miseelo sa Satana?
5 Yaale anasivela ekhaikhai ya Muluku enii ewerye hai osepa ohuwelihiwa ni miseelo sa Satana? Enii ewerye hai ohiyaniha yaphaama ni yoonanara? Moorweela wa ‘othokororya masu a Muluku’! (Sal. 119:9) Masu oorempwa a Muluku aakhalano ohoolela woochuneya onanikhaviherya ohiyaniha miseelo seeparipari ni miseelo soohuweliha. (Masi. 23:23) Aromolaka Soorempwa, Yesu aaloca wi “Mutchu harwa-akhala ni okumi ni epauru, nyenya ni masu othene ókhuma mwano mwa Muluku.” (Mat. 4:4) Hiyaano nnaphwanela ohuserya opharihela malakiheryo a Piipiliya mu okumi ahu. Ntoko yootakiherya, Moose ahaakumve orepa nlamulo na Yehova vooloca sa mararuwo, mmiravo Yoosefe aaniiwexexa wi meecelo yaawo yaari yoocheka wa Muluku. Owo haachuna omuchekela Yehova vaavaa mwaara a Potifare aamvenkeiye weera yeeyo yaari yoonanara. (Mwaalakhanye Mapacereryo 39:7-9.) Naamwi aanakhinyereryiwa ni mwaara a Potifare, Yoosefe heemerenrye wi nsu nawe nimuciye maaru wa nsu na Muluku. Wi niwerye ohiyaniha yaphaama ni yoonanara nnaphwanela owiriyana nsu na Yehova ni okhooca miseelo soohuweliha sa Satana.
6, 7. Tiheeni nnaphwanelaahu weera wi nsepe ekano yoonanara ya Satana?
6 Elapo yoosareya ni mahusiheryo oonanara a malapelo ophiyerya achu ancipale wuupuwela wi olosowa waavya malapelo eeparipari. Nyenya, Yehova oheeriha wi ohoolela wawe okhale woophwanyeya wa yaale anachuna wiiphwanyerya. Nnaphwanela omuthanla yoowo nnahaalaahu onwiriyana. Vawoona wi honaweryeya owiriyana masu meeli elukuluku emohamoha, nnaphwanela ‘osuwela nsu’ na Yesu ni onwiriyana yoowo. Ti yoowo othanliwe ni Yehova wi ahoolele ipucepuche Sawe.—Mwaalakhanye Yohane 10:3-5.
7 Yesu aaloca: “Weheryani yeyo muniwanyu.” (Mar. 4:24) Ekano ya Yehova ti yawiiweya ni yaphaama, nyenya hiyaano nnaphwanela owiriyana yeeyo orweela wa orehererya murima ahu wi naakhele ekano yeeyo. Wakhala wi hanniikasopa, nnanwerya owiriyana ekano yoonanara ya Satana ohiya owiriyana ekano yoosivela ya Muluku. Muheemererye wi macipo eelapo, iviitiyu, sawooniheryiwa mu TV, aliivuru, asinthamwene, anamahusiha, naari awiichaniwa anamiruku elamulele okumi anyu.—Akol. 2:8.
8. (a) Murima ahu onawerya hai oneeriha wuuwela mmavyakelo a Satana? (b) Tiheeni enahaala weereya ni hiyo wakhala wi hinnapwacha ineneeryo soolopola?
8 Satana oosuwela wi nookhalano soothitimanela soocheka, nave owo onneererya oneeriha wi niiwelele seiyo. Vaavaa Satana onaneeheiye mmukhalelo yoola, onakhala woovila okhapelela ororomeleya wahu. (Yoh. 8:44-47) Nnii niwerye hai ovootha nikacamiho nenla? Mmuthokororye muchu yoowo onateteiwa ni soohakalaliha sa hiihaano ophiyerya weera echu yeeyo uupuweleiye wi hi eere. (Arom. 7:15) Tiheeni enakeriha mmukhalelo yoola woothananiha? Mwawooneya, muchu owo aapacerya vakhaani-vakhaani ociya maaru awe wa nsu na Yehova. Akhweya aahesa woona ineneeryo soolopola sa yeeyo yeereya ni murima awe naari aathanlile ohipwacha seiyo. Ntoko yootakiherya, owo akhweya aapacerya ohiya ovekela, oceecheya mu orummwa, naari oyeleela mithukumano. Moovira wa elukuluku, owo aahiiwelela yoochuna awe ni weerano yeeyo aasuweleiye wi yaari yoonanara. Hiyaano nnanwerya osepa epahu yeela wakhala wi ninnatitelela owiriyana ineneeryo soolopola ni weeravo echu moohilekela wi nookolole miyaha. Nave wakhala wi ninnawiriyana nsu na Yehova, hanrwa niwiriyana miruku soomwaryeya.—Masi. 11:9.
9. Ntakhara heeni waakuvela osuwela soothitimanela soocheka ti woochuneyaxa?
9 Osuwela ereca woosiilo enanwerya ovuluxa okumi wa muchu. Moolikana, hiyaano nnanwerya orapela epahu wakhala wi nohaakuvela osuwela soothitimanela sahu seiyo saahaala onikeriha mu yaweeha. Vaavaa nnasuwelaahu soothitimanela seiho, ti wamiruku weeravo echu moohilekela—nihaakumve ophariwa va “murakhoni wa musaserya, yowo onaphara ni olakelela wawe.” (2 Tim. 2:26) Tiheeni nnaphwanelaahu weera noona wi noheemererya ohuwelihiwa ni muupuwelo ni soochuna sahu wa yeeyo Yehova onachuneiye wa hiyo? Moohilekela, nnaphwanela okookela wa yoowo mwa wiiyeviha, ohula maaru ahu wi niwiriyane ekano awe ni murima ahu woothene. (Yes. 44:22) Nnaphwanela osuwela wi opaka yoothanla yoonanara enamunihokola vancipale ophiyerya ohooxeya ni sookhumelela soonanara mmukhalelo wa ichu yoola. Ti waphaama osepa ohuwela moorweela wa weeravo echu moohilekela wi nsepe yoocheka etokweene!
OVOOTHA WIIRUMIHA NI NRIMA
10, 11. (a) Wiirumiha onooneya hai? (b) Tiheeni nnahuseryaahu orweela wa meecelo oonanara a Koora, Tatani, ni Apiramu?
10 Hiyaano nnaphwanela osuwela wi murima ahu onanwerya onihuweliha. Soothitimanela sahu soocheka sinnanivolowela mwakuru! Ntoko yootakiherya, muthokororye wiirumiha ni nrima. Moone ti mwawiihai mikhalelo seiya inaweryaaya ovolowela owiriyana wahu nsu na Yehova ni onikeriha mmeecelo awoopiha. Muchu awiirumiha ookhalano moonelo wawiicukhula mukhateiye. Owo onuupuwela wi onanwerya weera yeeyo onachuneiye nave wi haavo mukina onaphwanela omuleela echu yaweera. Mwawiihiiha owo onanwerya wuupuwela wi hanaphwanela ohooleliwa naari ovahiwa ikano ni Akiristu akhwaawe, asitokweene, naari marehereryo a Muluku. Wa muchu ntoko yoowo, oruma wa nsu na Yehova honiiweya phaama.
11 Variyari va mukwaha wa mutakhwani wa Aisarayeli, Koora, Tatani, ni Apiramu yaamwaryeela olamulelo wa Moose ni Aaroni. Nthowa na wiirumiha, oomwaryeya ale yaapaka marehereryo aya ootaphuwa wi emulapele Yehova. Yehova aakhulenle hai? Owo aahaatoloxa. (Nam. 26:8-10) Yaweereya ela ennanihusiha echu etokotoko! Ommwareela Yehova onnaruuha epahu. Hankooni nuupuwele tho wi “wikusererya onnamuwiha mutxhu.”—Masi. 16:18, BNM; Yes. 13:11.
12, 13. (a) Mvahe yootakiherya enooniherya wi nrima ninnaruuha epahu. (b) Tharihani mummo nrima nnaweryaaya wunnuwa mwawaakuveya wakhala wi hinikwateleliwe.
12 Muthokororye tho, mwaha wa nrima. Muchu a nrima wiiliwiili onnaluluwa nave onnavirelela meecelo aphaama. Naamani mutokweene aanakhoco Aasiiriya amanle openuxiwa mareca awe, aamvaha mulipa miririmo Eliya samahala, nave Eliya aakhooca. Nyenya, mulapeli a Eliya, Kehasi, aakhalela nrima samahala ihe. Kehasi aahiilocela mukhateiye: “Eryaya evelevelo wi Muluku okhala, mi kinammutxhimakela Naamani ni kinamwera wi ekhale onereiye akivahe!” Ocai wa Eliya, aamuchimakela Naamani ootha wi aveke “ikhorowa vamoha ni ikuwo pili saphama.” Tiheeni yeeren’ye nthowa na Kehasi weerano yeela ni omootherya mulipa miririmu a Yehova? Mareca a Naamani yaamuhokola nanrima Kehasi!—2 Mam. 5:20-27, BNM.
13 Nrima nnapacerya vakhaani-vakhaani, nyenya wakhala wi hinikwateleliwe, nlo ninnannuwa mwawaakuveya ni omvootha muchu. Yaweereya ya Piipiliya ya Akani ennooniherya ikuru sa nrima. Moone wunnuwa wawaakuveya wa nrima na Akani. Owo aahi: “Konne veri va muhakhu wa mukhotxoni ekuwo yorèra ya Senaar, isiklo sa eprata masana meli ni ekopo emoha ya eworo ya isiklo makhumi mathanu; wa nthowa na nrima, kòkusa seiho.” Ohiya okhooca yoochuna yoonanara, Akani aahiiya ichu saphaama nave aavitha mmuxakalani mwawe. Vaavaa yoocheka ya Akani yuupululiwaaya, Yosuwa aamuleela wi Yehova aahaala omuruuhela epahu. Akani ni echoko awe yaahiiphiwa ni maluku nihiku nenle. (Yos. 7:11, 21, 24, 25, BNM.) Nrima yawoopiha yamutano enawerya onivolowela. Mwawiihiiha, hankooni ‘nikhapelele osepa okhalela nrima wothe wene.’ (Luka 12:15) Naamwi ilukuluku ikina ninnakhalano muupuwelo woonanara naari waanyiherya sa mwiikho, ti waphaama wiilipixerya wi niheemererye wi soochuna sahu sinnuwe ophiyerya weerano yoocheka.—Mwaalakhanye Yakopo 1:14, 15.
14. Tiivi eri yaphaama weera wakhala wi nohoona mwa hiyo mathitimanelo a wiirumiha ni nrima?
14 Wiirumiha ni nrima sinnaruuha epahu. Wuupuwelela sookhumelela sa meecelo oonanara enahaala onikhaviherya oheemererya wi soothitimanela seiya sivolowele nsu na Yehova. (Malamulo 32:29) Mpiipiliyani, Muluku eeparipari onnanleela meecelo aphaama, mphurelo wa ochara meecelo yaawo, navetho onnaloca sookhumelela sa meecelo oonanara. Wakhala wi murima ahu onnanipurula wi neere echu moorweela wa wiirumiha naari nrima, ti wamiruku wuupuwelela sookhumelela sene! Ti waphaama othokororya ti mwawiihai yoocheka yaahaalaaya onivolowela hiyo, oosiveliwa ahu, ni xaxaxa onthamwene ahu ni Yehova.
MUKHAPELELE OLOCIHANA WAPHAAMA NI YEHOVA
15. Yootakiherya ya Yesu enanihusiha eheeni vooloca sa olocihana ni Yehova?
15 Yehova onnachuna wi nikhale phaama. (Sal. 1:1-3) Owo onnavaha ohoolela mu elukuluku nnachunaahu. (Mwaalakhanye Ahepri 4:16.) Naamwi Yesu aari oophaameya, owo aanalocihana ni Yehova nihiku nnihiku, nave owo aanavekela moohihiyererya. Yehova aamukhaviherya ni omuhoolela mmikhalelo sootikhiniha. Yehova aahaarumiha ankeelo wi emurumeele, aamvaha munepa Awe waweela wi omukhaviherye, nave aamuhoolela waathanla arummwa 12. Naahiiweya nsu na Yehova wirimu, nooniheryaka omukhaviherya Wawe ni omweemererya Yesu. (Mat. 3:17; 17:5; Mar. 1:12, 13; Luka 6:12, 13; Yoh. 12:28) Ntoko Yesu, ninnachuna omiinela murima ahu wa Muluku mu nivekelo. (Sal. 62:7, 8; Ahe. 5:7) Orweela wa nivekelo, hiyaano nnanwerya olocihana ni Yehova ni ochara meecelo a okumi anamucicimiha yoowo.
16. Nnii naakhele hai nikhaviheryo na Yehova wi niwerye owiriyana nsu nawe?
16 Naamwi Yehova avahaka ikano sawe mwa mahala, owo hanamukhinyererya muchu ochara iho. Nnaphwanela oveka munepa awe waweela, nave owo onahaala onivaha. (Mwaalakhanye Luka 11:10-13.) Ti yaphaama ‘oweherya miwelo ahu.’ (Luka 8:18) Ntoko yootakiherya, yahaala okhala owoka omveka Yehova wi anikhaviherye ovootha mathitimanelo a meecelo oonanara nlelo ntitelelaka woona epwitikiri naari woona iviitiyu soonanara. Chiri nnaphwanela okhala mmapuro naari mmikhalelo orimo munepa wa Yehova. Hiyaano noosuwela wi munepa awe ori mmithukumano sa muloko. Arummwa ancipale a Yehova annasepa epahu orweela wa onwiriyana Yehova mmithukumano mwahu. Ntoko yookhumelela, awo annasuwela soochuna soonanara inannuwa mmurimani mwaya nave annatoroka meecelo aya.—Sal. 73:12-17; 143:10.
MUTITELELE OWIRIYANA NSU NA YEHOVA
17. Ntakhara heeni ti yawoopiha wiiroromela mukhatiihu?
17 Mmuthokororye Mwene Tavite a Isarayeli akhalai. Ari mmiravo, owo aamvootha Mfilisteu nakuru Koliyati. Tavite aakhala nakhoco, mwene, mukhapeleli, ni namalakelela a nloko. Nyenya vaavaa Tavite iroromenleiye mukhateiye, murima awe waanwoka nave apaka yoocheka etokweene ni Patesepa, ophiyerya opaka marehereryo wi iyawe, Uriya, iiphiwe. Vaavaa aalakiweiye, mwawiiyeviha Tavite aaheemererya yoocheka awe nave aatikitherya onthamwene awe ni Yehova.—Sal. 51:4, 6, 10, 11.
18. Tiheeni enii enikhaviherye otitelela owiriyana nsu na Yehova?
18 Hankooni niwiriyane ekano enaphwanyeya mu 1 Akorinto 10:12 nave nihikhale awiiroromela. Nthowa na ohiwerya “othanla ephiro yaphama” ilukuluku ikina nnahaala owiriyana nsu na Yehova naari nsu na Mwiicani awe. (Yer. 10:23, BNM.) Hankooni nivekeleke moohihiyererya, ochara ohoolela wa munepa waweela, ni owiriyana phaama nsu na Yehova ilukuluku soothene.