MWAHA WA EKAAPA | MUNNIISOONA OKHALA AWAATAANA NI MULUKU?
Moosuwela Nave Munnapharihela Nsina na Muluku?
Mwanwerya omuupuwela nthamwene yoowo muhisuwenlaanyu nsina nawe? Hooye. Muthiyana a Pulkaro oniichaniwa Irina olonceiye, “Hori wooweryeya muchu waataana ni Muluku wakhala wi hasuwenle nsina nawe.” Moohakalala, ntoko elociwaaya mmwaha ovinre, Muluku onachuna wi mukhale awaataana ni yene. Nyenya, moorweela wa Piipiliya, owo onniitheteya wa nyuwo ariki: “Miyaano ka Yehova. Nla ti nsina naka.”—Yesaya 42:8, Tradução do Novo Mundo.
Apwanne Yehova onnapwacha waakhanle wi mosuwela naari munnapharihela nsina nawe naari hooye? Muthokororye ela: Nsina na Muluku, noorempwa ni ileetera xexe mu Eheepri nsuweliwe ntoko Tetrakrama, ninnaphwanyeya mu Soorempwa soopacerya sa Eheepri ikwaha 7.000. Nlo ninnaromoliwa ikwaha sincipale opwaha nsina nikina Mpiipiliyani. Mweeparipari eyo yawooniherya wi Yehova onachuna wi nsuwele nave nipharihele nsina nawe.a
Achu akina annoona wi nthowa na Muluku okhala aweela ni a ikuru soothene, waahaala okhala oyeleela ncicimiho opharihela nsina nawe. Mweeparipari waahaala okhala woonanara ophariheliwa nsina na Muluku moohiphwanela, hiiha ntoko waahaalaaya okhala woonanara opharihela nsina na nthamwene anyu moohiphwanela. Nyenya, yoochuna ya Yehova eri wi yaale anamusivela ecicimiheke nave elokoheke nsina nawe. (Salmo 69:30, 31; 96:2, 8) Muupuwele wi Yesu aahaahusiha oomuchara awe ovekela: “Atithihu a Wirimu, Nsina nanyu nèlihiwe.” Nnanwerya opaka makupa mu weeliha nsina na Muluku orweela wa osuweliha nenlo. Weera yeeyo ennanaataaniha ni yoowo.—Mateyu 6:10.
Piipiliya onnooniherya wi Muluku onnampwacha yoole ‘onatxitximiha’ nsina nawe. (Malakiya 3:16, BNM) Vooloca sa muchu yoowo, Muluku onnaroromeliha: “Kiniriaka kimvulushe, . . . ntakhara onnasuwela nsina naka. Anarwa-akikhuwelela Miyo nave kinarwa-kimwakhula; M’masoso kiniriaka kikhaleno vamoha.” (Salmo 91:14, 15) Osuweliha ni opharihela nsina na Muluku ti woochuneya wakhala wi ninnachuna opuha onthamwene ni yoowo.
[Nsu na vathi]
a Moohiciha, Apiipiliya anceene haano nsina na Muluku, naamwi nlo niphwanyeyaka ikwaha sincipale mu Soorempwa sa Eheepri, isuweliwe ntoko Nlakano Nakhalai. Awo anaraceeliha ni masina a ncicimiho ntoko “Apwiya” naari “Muluku.” Wi muhuserye sincipale vooloca sa mwaha yoola, moone ipaaxina 195-197 sa liivuru Piipiliya Onahusiha Eheeni Chiryene? olaleeryiwe ni Anamoona a Yehova.
[Yooleeliherya va epaaxina 4]
Moorweela wa Piipiliya, Muluku onniitheteya wa nyuwo ariki: “Miyaano ka Yehova. Nla ti nsina naka.”—Yesaya 42:8, NM.
[Eruku va epaaxina 4]
Onthamwene onapacerya achu apiili osuwela nsina na mukina ni mukhwaawe. Mosuwela nsina na Muluku?