MWAHA WA EKAAPA​—MUNII MPUHE HAI MUTEKO ANYU

Olapa Mwakuru​—Woovireliwa?

Aleksi onniicha miwiya vaavaa onateexeiye ekaaxa ekina ahelaka mu ekaaro ya empresa onalapeiyewo. Owo onniikoha: ‘Ntakhara heeni kinahooxeyaaka ni muteko yoola woohokola? Kini koopowe liini? Okumi aka waahaala okhala phaama kaahirino murici wa olapa!’

Ntoko Aleksi, ancipale olelo hanasiveliwa olapa mwakuru. Mulipa ooreherya mikukuca awiichaniwa Aaroni ooloca: “Achu ancipale anoona wi ti waphaama olapa ‘vakhaani.’ Muupuwelo aya ti ola: ‘Kinaphara muteko ola kiweheryaka ophwanya muteko mukina waphaama.’”

Ntakhara heeni ancipale anuupuwela wi hanaphwanela olapa mwakuru? Akhweya avoloweliwe ni soovuwiha seiyo inacicimiherya okumi “waphaama” wa muhakhu ni wookhweya. Mateyu yoowo ori mulipa oorehererya onnaloca wi “achu anuupuwela wi wakhala wi muchu onniilipixerya olapa, onakhalano mphurelo vakhaani.” Mulipa oolipelela awiichaniwa Shane onneemererya. Owo onnaloca: “Achu aahiya olapa mwakuru wi ekhaleno yoolivela yawaakhwanela.”

Moohiyana, achu ancipale annakhumelela phaama epuhaka muteko wakuru. Namalapa mmoha ooteka a iyaakha 25 sa oyariwa awiichaniwa Taniyeli onnaloca: “Kinoona wi muteko wakuru ti wa mphurelo, xaxaxa wakhala wi oneeriwano ni soolakelela saphaama.” Antreya, a iyaakha 23 sa oyariwa onneemererya: “Kinneemererya wi opuha ni ohakalala sinniiwanana ni muteko. Olapa vakhaani tahi echu enahaala ovaha ohakalala woolekela​—pahiru enakumiherya oceecheya!”

Achu ntoko Taniyeli ni Antreya yaawenrye hai okhalano moonelo waphaama vooloca sa muteko wakuru? Awo annapharihela malakiheryo a Piipiliya mu okumi aya. Ohiya owatiiha olapa mwakuru, Piipiliya onnaceenyerya owetha ni ovilela. Nyenya Piipiliya onnaloca sincipale ohiya pahiru onceenyerya olapa. Onnanooniherya tho mukhalelo wa opuha muteko ahu.

Malakiheryo taani a Piipiliya anahaala wookhaviheryaani ophwanya ohakalala mmuteko anyu? Ninnoovekaani wi muthokororye makina a yaawo, ntoko enatharihiwaaya mmwaha onacharela.