EPIIPILIYOTEKA ya Watchtower
EPIIPILIYOTEKA
ya Watchtower
Elomwe
  • PIIPILIYA
  • SOOLALEERYIWA
  • MITHUKUMANO
  • wp15 1/3 ipaax. 4-7
  • Okhwa ni Ovinya wa Yesu—Onookhaviheryaani Hai

Henaphwanyeya exilema mu nikupa nenla.

Munikhurumuwele, yookhala ehesen'ye nichunaka owoonihaani exilema ela.

  • Okhwa ni Ovinya wa Yesu—Onookhaviheryaani Hai
  • Mulipeleli Alaleyaka Omwene wa Yehova​—2015
  • Miru Mikhaani
  • Miyaha Soophwanaphwana
  • Achu hiyaapakiwe wi ekhweeke
  • Aatamu ookhwa nthowa na ohimwiiwelela Muluku
  • Hiyaano ninnakhwa nthowa nawi nrwenle wa Aatamu
  • Yesu oovaha okumi awe wi nikhale okhala wookhala
  • Yesu ooviihiwa mookhwani akina tho anahaala oviihiwa
  • Wi nikhale okhala wookhala, nnaphwanela omuroromela Yesu
  • Mwiicani Ookuchula Okhwa Onarwa Apahuliwa
    Mulipeleli Alaleyaka Omwene wa Yehova—2014
  • Muluku Aampaka Mulopwana ni Muthiyana Oopacerya
    Ohuserye Miyaha sa Piipiliya
  • Achu Okhwa Ari Woowi?
    Piipiliya Onahusiha Eheeni Chiryene?
  • Ntakhara Heeni Yesu Aahooxeya Nave Akhwa?
    Mulipeleli Alaleyaka Omwene wa Yehova—2016
Mulipeleli Alaleyaka Omwene wa Yehova​—2015
wp15 1/3 ipaax. 4-7

MWAHA WA EKAAPA | YESU ONANOOPOLA MU EHEENI?

Okhwa ni Ovinya wa Yesu Onookhaviheryaani Hai

“Omuroromele Apwiya Yesu, nave onarwa-ovuluwa.”​—Saweriwa Tarummwa 16:31.

Masu yaala aphaama yaalociwe ni murummwa Paulo ni Sila wa mulipa ooweherya ikariposo o Maketooniya epooma ya Filipi. Masu yaala anataphulela eheeni? Wi niiwexexe ntakhara heeni omuroromela Yesu onniiwanana ni woopoliwa wookhwani, woopaceryani nnaphwanela ohuserya ntakhara heeni ninnakhwa. Muthokororye yeeyo Piipiliya onahusiheiye.

Achu hiyaapakiwe wi ekhweeke

“Apwiya Muluku, yámukusa mutxhu ni emukuha omatxa ya w’Edeni wi alimeke ni alipeleleke yeyo. Vanonto Apwiya Muluku yàmulamulela mutxhu ole eriki: ‘Oni onalya sawima sa miri sa mmatxani, nto ohilye sawima sa mwiri yole onasuweliha yaphama ni yonanara. Walya sa yowo onamukhwa!’”​—Maphatxuwelo 2:15-17, BNM.

Muluku aamukuha mulopwana oopacerya, Aatamu, mu emaca ya Eeteni, parataiso veelaponi yavathi waarimo axinama ancipale ni miri saphaama. Saakhalamo miri saavaha sawiima Aatamu aaphwaneleiye olya mootaphuwa. Nyenya Muluku aamuleela wi haaphwanela olya yawiima ya mwiri mmoha, amulopolaka wi eereiye alye, aahaala okhwa.

Apwanne Aatamu aahiiwexexa yoolopola yeela? Owo aasuwela yeeyo yaataphulela okhwa; aanawoona axinama ekhwaaka. Waakhanle wi Aatamu aapatuxiwe wi akhwe, yoolopola yeela ya Muluku hiyi ekhaleno yootaphulela. Ohiya yeeyo, Aatamu aasuwela wi waakhanle wi oomwiiwelela Muluku moorweela wa ohilya yawiima, aahaala okhalano okumi woohimala​—haahaala okhwa.

Akina anuupuwela wi mwiri waasiphela okonihana, nyenya tahi yeeyo. Yehova, aachuna wi Aatamu ni mwaariye Haava ‘eyareke nave erelane’ nave wi ‘esareye ,mw’elapo ya vathi nave ekhale asinène.’ (Maphatxuwelo 1:28, BNM) Chiryene, yoolopola yaaloca sa mwiri weeparipari. Yehova iichana “mwiri yole onasuweliha yaphama ni yonanara” woona wi mwiri owo weemelela ophwanelela wawe olakelela yeeyo eri yaphaama ni yoonanara ntakhara achu. Moorweela wa ohilya yawiima ya mwiri yoole, Aatamu aahaala wooniherya ohiya pahiru wiiwelela, nyenya tho omuthamalela wawe Yoowo aampatunxe nave amureeliha.

Aatamu ookhwa nthowa na ohimwiiwelela Muluku

“Apwiya Muluku yàlotxa ni mulopwana eriki: ‘Vano weyano . . . olyilawe yawìma kòhihenryaka, . . . oni onàmulapela olya wà ophiyerya nihiku onerawe otxhikele vatxheyani vavale wakhumalawevo: ntakhara weyano wa ntxhupi nave vantxhupini onamukòkelavo.’”​—Maphatxuwelo 3:17, 19, BNM.

Aatamu aalya mwiri yoole aalopoliweiye wi ahilye. Ohiiwelela wawe wari mwaha mutokotoko. Iwo waari omwaryeya, ohithamalela ichu soothene saphaama Yehova aamvanheiye. Moorweela wa olya yawiima, Aatamu aamukhooca Yehova, athanlaka meecelo awiilamulela, yaawo yaakumihenrye sookhumelela soowaawa.

Ntoko Yehova aalonceiye, Aatamu ookhwa. Muluku aampatunxe orweela “vatxheyani” nave aahimuleela wi “vantxhupini onamukòkelavo.” Aatamu haakhanle mmukhalelo mukina naari ni mwiili mukina. Mu okhwa, owo haarino okumi ori ntoko echaya yeeyo aapakiweiyeno.​—Maphatxuwelo 2:7, BNM; Eklesiyaste 9:5, 10.

Hiyaano ninnakhwa nthowa nawi nrwenle wa Aatamu

“Ntakhara awe, ntoko otcheka wávolowilaya mwilaponi ya vathi mwa mutchu mmoha, ni okhwa mwa otcheka; mwawihihá okhwa wáháphiyerya atchu othene, ntakhara wi othene yátcheka.”​—Aroma 5:12.

Ohiiwelela wa Aatamu​—naari ocheka​—waahaala okhalano sookhumelela itokotoko. Moorweela wa ocheka, Aatamu aahiyeleela okumi wa yoowo mukhateiye, ohiya okumi wa iyaakha 70 naari 80, nyenya okumi woohimala. Chiryene, vaavaa Aatamu aachenkeiye, aayeleela ophaameya nave aahaala waaraviha ohiphaameya anamwane awe oothene.

Oothene hiyo na anamwane a Aatamu. Woona wi nrwenle wa yoowo, hiyaano hinaano yoothanla, noorava mwiili woohiphaameya yoowo onacheka ni okhwa. Paulo oothariha phaama nikacamiho nahu. Owo oorepa: “Miyo ka a mwíli, ótumihiwa kapuro a otcheka. Mutchu óháwa miyo; tani anakakihe m’mwílini mwa okhwa wu?” Paulo aahaakhula nikoho nawe: “Kinnamuthamala Muluku, mwa Yesu Kristu Apwiyahu.”​—Aroma 7:14, 24, 25.

Yesu oovaha okumi awe wi nikhale okhala wookhala

“Atithi ámuruma Mwana akhale Mvulusha élapo ya vathi.”​—1 Yohane 4:14.

Yehova oopaka marehereryo anahaala ovootha sookhumelela sa yoocheka ni onitaphula mu okapuro wa okhwa. Mwawiihai? Yehova oomurumiha Mwanawe oosiveliwa wirimu aayariwa ntoko muchu oophaameya hiiha ntoko Aatamu. Nyenya moohiyana ni Aatamu, Yesu ‘hátchenkeru.’ (1 Petro 2:22) Woona wi aari oophaameya, haaphwanela okhwa nave anwerya wiikhalelaru ntoko muchu oophaameya.

Naamwi hiiha, Yehova aaheemererya wi Yesu iiphiwe ni amwiicani awe. Mahiku mararu ohoolo waya, Yehova aamukookiherya okumi woomunepani wi awerye okookela wirimu. Wirimu, Yesu aaperekha wa Muluku esisapo ya okumi awe woophaameya wi oopole yeeyo Aatamu aayeleenleiye wa yoowo mukhateiye ni wa anamwane awe. Yehova aaheemererya mukucho yoowo, eerihaka wi yaale anamuroromela Yesu yaakhela okumi woohimala.​—Aroma 3:23, 24; 1 Yohane 2:2.

Mwawiihiiha Yesu ookookiha yeeyo Aatamu aayeleenleiye. Yesu aahooxeya ni okhwa wi niwerye okhala mwawiikhalelaru. Piipiliya onii: “Yesu, ntakhara a masóso a okhwa . . . wi ni ikharari sa Muluku alawihe okhwa mu nipuroni mwa mutchu phyakala.”​—Ahebri 2:9.

Yoovaha yeela ennooniherya sincipale vooloca sa Yehova. Malakiheryo awe eekhaikhai aaheeriha wi achu oohiphaameya yoopowe. Osivela ni ikharari sawe soomweeriha opaka echu yoovila wa yoowo mukhateiye​—omvaha Mwanawe okhala yawoopola.​—Aroma 5:6-8.

Yesu ooviihiwa mookhwani akina tho anahaala oviihiwa

“Kristu óvíhiwa wukhwani yawima yamulepulo ya yawo enarupa. Vawi ntoko okhwa wárúlaya mwa mutchu, [mmoha] ovinya wukhwani wárúletho mwa mutchu [mmoha]. Vawi ntoko mwa Adamu othene ennokhwa, mwawihihátho mwa Kristu othene ennakhalihiwa akumi.”​—1 Akorinto 15:20-22.

Hiwaavo minikwa wi Yesu aakhala nave akhwa, nyenya tiheeni enooniherya wi owo ooviihiwa mookhwani? Variyari va sawooniherya sincipale yookhalavo yeeyo enooniherya wi amanle oviihiwa aahooneya wa achu ancipale mu ilukuluku ni mapuro oohiyana. Ekwaha emoha, aahooneya wa achu opwaha 500. Murummwa Paulo aarepa wa Akorinto, wi yaawo yeerenle onamoona ichu seiyo nlelo yaari akumi, yooniheryaka wi awo yanwerya oloca mukhalelo yoonnaaya ni yiiwalaaya.​—1 Akorinto 15:3-8.

Yawooneyaxa ti yawi, vaavaa Paulo aarempeiye wi Kiristu aari “yawima yamulepulo” wa yaawo yaahaala oviihiwa, owo ooniherya wi akina tho yaahaala oviihiwa. Yesu aaloca wi elukuluku yaahaala ophiya vaavaa “othene ari m’mahiyeni” yaahaalaaya ‘okhuma.’​—Yohane 5:28, 29.

Wi nikhale okhala wookhala, nnaphwanela omuroromela Yesu

“Vawi Muluku ásivela elapo ya vathi wawihihá, wi ávaha Mwana’we óyariwa mekhiye, wi yowo anaroromela ahirimele, nyenya akhaleno okumi wohimala.”​—Yohane 3:16.

Makupa oopacerya a Piipiliya analoca opacerya wa okhwa ni oyeleeleya wa Parataiso. Makupa ookuchula analoca elukuluku okhwa onahaalaaya omalihiwa ni vaavaa Muluku onahaaleiye omureherya Parataiso veelaponi yavathi. Achu anahaala owerya okhala mwawiikhalelaru ni oohakalala. Yawupulula 21:4 onii: “Hevarwa-vakhalatho okhwa.” Eceenyeryaka ororomeleya wa masu yaala, everso 5 ennaloca: “Masu ala ari óroromeleya ni éparipari.” Yeeyo Yehova onaroromeliheiye, onnakhwaaniherya chiryene.

Nyuwaano munneemererya wi “masu ala ari óroromeleya ni éparipari”? Muhuserye sincipale vooloca sa Yesu Kiristu, nave mmuroromele. Wakhala wi moheerano, munahaala weemereryiwa ni Yehova. Munahaala waakhela ohiya pahiru mareeliho mancipale hiihaanoru, nyenya tho munahaala okhalano ewehereryo ya okumi woohimala Mparataiso veelaponi yavathi, vaavaa okhwa oneeraaya ohikhalevo, “nave hevarwa-vakhalatho iyinlo, nari wunla, nari sawichela.”

    Soolaleeryiwa sa Lomwe (1995-2024)
    Okhumavo
    Ovolowa
    • Elomwe
    • Ovaha
    • Orehererya
    • Copyright © 2025 Watch Tower Bible and Tract Society of Pennsylvania
    • Malakiheryo a Opharihela
    • Malakiheryo a Sookhuweya
    • Configurações de Privacidade
    • JW.ORG
    • Ovolowa
    Ovaha