Othela Pahiru “Mwa Apwiya” Nlelo ti Wooweryeya?
“Nkinawerya omphwanya oothelanano mmulokoni nave kinnoova wuuluvala kiri muciye.”
“Alopwana akina a mweelapo teepewe, oosivela ni oopwacha. Awo hanaakaaha malapelo aka nave anakhala ntoko taphaamaxa waapwaha anna.”
Alapeli akina a Muluku annapaka sooloca imohamoha. Naamwi hiiha, awo anniiwelela ekano ya murummwa Paulo ya othela pahiru “mwa Apwiya”—ekano yeeyo enaphwanela ohoolelaka meecelo a Akiristu oothene. (1 Akor. 7:39) Vano ntakhara heeni anapakaaya sooloca seiya?
NTAKHARA HEENI AKINA AAKHALANO MINIKWA
Yaale apanke sooloca seiya akhweya anoona wi wookhalavo ohiyana variyari va waaca wa anna ni arokora. Eyo enneereya mu ilapo sincipale. Muthokororye sootakiherya piili: O Koreya, variyari va nikhuuru na Anamoona 100, 57 arokora nave 43 anna. Ennalociwa wi o Kolompiya 66 porsento a Anamoona arokora nave 34 porsento anna.
Mu ilapo sincipale, echu yookacamiha ti yawi asitiithi oohiroromela annaveka ovahiwa yamahala yoowalamela, yeerihaka okhala woovila othela wa anna oohaawa. Athokororyaka makacamiho yaala, murokora onnoona wi tahi wooweryeya omphwanya oothelanano “mwa Apwiya.” Mwawiihiiha owo akhweya onahaala wiikoha: “Apwanne ti woophwanelela wuupuwela wi kinahaala omphwanya oothelanano oophwanelela mmulokoni Weekiristu?”a
OMUROROMELA YEHOVA TI WOOCHUNEYA
Waakhanle wi montoko okhalano muupuwelo yoola, muroromele wi Yehova oosuwela mukhalelo anyu. Mweeparipari, owo onniiwexexa moonelo anyu vooloca sa mwaha yoowo.—2 Math. 6:29, 30.
Naamwi hiiha, Yehova ootikitherya mu Masu awe yooleeliherya ya othela pahiru mwa Apwiya. Ntakhara heeni? Nthowa nawi owo oosuwela wi ti yaphaama wa achu awe. Tahi wi pahiru onachuna waarapeliha alapeli awe wiicela yoowo onarweela wa ochara meecelo oonanara, nyenya tho onachuna wi alapeli awe ekhale oohakalala. Mmahiku a Nehemiya vaavaa Ayuuta ancipale yaathelaaya amalapo yaawo yahaamulapela Yehova, Nehemiya aaloca yootakiherya yoonanara ya Soolomoni. Naamwi Soolomoni “Muluku àmukhwela . . . Nto athiyana amalapo àthenleiye yamwitxaniha yowo ni Muluku.” (Neh. 13:23-26, BNM) Mwawiihiiha wi alapeli awe ekhale phaama, Muluku onnanivaha nlakiheryo na othelana pahiru ni mulapeli eeparipari. (Sal. 19:7-10; Yes. 48:17, 18) Akiristu eeparipari annathamalela ohoolela woosivela wa Muluku nave annaroromela ohoolela wawe. Moorweela wa omwiiwelela ntoko Mulamuleli, awo anamweemererya ntoko Mutokweene a Elapo.—Masi. 1:5.
Moohikhala minikwa nyuwaano munnachuna osepa okhala “ómakiwa mu nipisini” ni muchu yoowo onahaala woorakameelihaani ni Muluku. (2 Akor. 6:14) Akiristu ancipale olelo anniiwelela ohoolela waphaama wa Muluku nave annoona wi aapaka yoothanla yaphaama. Nyenya akina annathanla opaka yoothanla yoohiyana.
NLELO TI WOOWERYEYA
Maggy,b murokora o Australiya, onnathariha yeeyo yeeren’ye vaavaa aapacenryeiye wuuryiwa ni oohiroromela: “Kaanayelela mithukumano sincipale pahiru wi kikhale ni yoowo. Makupa aka oomunepani yaakukuceya.” Ratana o Intiya aalekecheya ni nthamwene awe ooxikola yoowo aapacenrye omuhuserya Piipiliya. Owo aahooniherya yeeyo nthowa nawi aachuna omuurya Ratana. Ratana aahiya eparipari nave aaya mu malapelo makina wi awerye otheliwa.
Yootakiherya ekina ti ya Ndenguè o Camarões. Aarino iyaakha 19 atheliwaka. Iyawe aamuroromeliha wi aahaala omweemererya opaka malapelo awe mootaphuwa. Nyenya ivinre isumana piili emanle othela, iyawe aamuwatiiha oya mmithukumano Seekiristu. Ndenguè onnaloca: “Kaaniisoona okhala meekhaaka ni oothanana. Kaaphiyerya woona wi nkaawerya ovareryela okumi aka. Kaakhala awuukhuwa elukuluku yoothene.”
Chiryene, tahi wi oohiroromela oothene anakhala oowali ni oohiphimelela. Naamwi muhihooxeyaka ni sookhumelela sa othelana ni oohiroromela, onthamwene anyu ni Tiithi anyu oosivela a wirimu waahaala ovoloweliwa hai? Mwaahaala wiisoona hai osuwela wi himwiiwelenle ekano yeeyo Muluku ovanheiye wi mukhale phaama? Opwaha soothene owo aahaala woona hai vooloca sa yoothanla anyu?—Masi. 1:33.
Anna ni arokora orukurerya elapo anneemererya wi othela pahiru “mwa Apwiya” echu yaphaamaxa. Ale ari aciye aalakelela ohakalaliha murima wa Muluku moorweela wa othela pahiru ni mulapeli eeparipari. Murokora mmoha o Xapau yoowo ori muciye awiichaniwa Michiko aakhinyeereryiwa ni amusi awe wi atheliwe ni oohiroromela. Owo aavilela yaweeha, nave onnaakhaviherya asinthamwene ni asuweli awe waaphwanya oothelanano mmulokoni. Owo onnaloca: “Kaatitela wuupuwela mukhataaka wi, woona wi Yehova toohakalala, ohakalala wahu honarweela wa othela naari hooye. Kinneemererya tho wi owo onnakhwaniherya soochuna sa murima ahu. Mwawiihiiha naamwi nihiweryaka omphwanya oothelanano naamwi nichunaka othela naari otheliwa, ti yaphaama okhala muciye mu elukuluku yoowehererya.” (1 Tim. 1:11) Moovira wa elukuluku, Michiko aatheliwa ni munna eepewe, nave ori oohakalala nthowa na opixa wawe murima.
Anna akina annaweherya tho omphwanya oothelanano. Mmoha a yaawo ti Bill o Australiya. Onnaloca wi vakina vaya aanalekecheya ni athiyana a okhwipi wa muloko. Nave aanasepa waataana ni yaawo. Ntakhara heeni? Owo haachuna weera echu yeeyo yaahaala omweeriha okhala “ómakiwa mu nipisini” vamoha ni oohiroromela. Mu iyaakha sincipale, owo aanooniherya nchuno wa arokora vakhaani, nyenya awo hiyaampwacha. Bill aaweherya iyaakha 30 wi amphwanye murokora oophwanelela. Bill onnaloca: “Nkaano ekeerelani.” Owo onnathariha: “Kinnoona okhala ooreeliheya ntakhara ninnaya vamoha mu olaleerya, ninnahuserya vamoha nave ninnamulapa Muluku vamoha. Kinnahakalala okhala vamoha ni asinthamwene a mwaaraka ntakhara awo alapeli a Yehova. Ninniilipixerya mu othela wahu nipharihelaka malakiheryo a Piipiliya.”
VAAVAA MUNANWEHERYAANYU YEHOVA
Tiheeni munaphwanelaanyu weera vaavaa munaweheryaanyu okhapelela wa Yehova? Echu emoha ori wuupuwela ntakhara heeni muhithenlaanyu naari muhitheliwaanyu. Waakhanle wi ti nthowa na ekano ya Piipiliya ya othela pahiru “mwa Apwiya,” nyuwaano munnaphwanela othamaleliwa nthowa na ocicimiha nlamulo noomuluku. Muroromele wi Yehova onnahakalala ni yoolakelela anyu ya wiiwelela Masu awe. (1 Sam. 15:22; Masi. 27:11) Munaphwanela otitelela ‘ominela murimányu’ wa Muluku mu nivekelo. (Sal. 62:8) Mavekelo anyu anahaala okhala a mphurelo vaavaa munamvekaanyu ni murima woothene ni moohihiyererya. Onthamwene anyu ni Muluku onahaala olipa nihiku nnihiku vaavaa munakhalaanyu oororomeleya moohipwacha okhinyererya wa mpuwa naari wa vaate yoowo munakumanaanyuno. Muroromele wi Oowerya Woothene onnaapwacha alapeli awe oothene nave wi nyuwaano mookhalano esisapo vamiithoni vawe. Owo onnathokororya soothowa ni sawuukhula sanyu. Hanaroromeliha omvaha oothelanano. Naamwi hiiha, waakhanle wi chiryene munnachuna othela, Muluku oosuwela mukhalelo waphaama wa waakhwaniha soochuna sanyu soophwanelela.—Sal. 145:16; Mat. 6:32.
Ilukuluku ikina munamoona ntoko namarepa a salmo Tavite yoowo aariye: “Akuvani mukakhule, Yehova, munepa aka onnakokhowa. Muhivithe ethoi anyu wa miyo.” (Sal. 143:5-7, 10) Mu ilukuluku seiyo, mumvahe Tiithi anyu a wirimu ekari ya owooniheryaani yoochuna awe wa nyuwo. Mweereno yeeyo moorweela wa wiivaha elukuluku wi mwaalakhanye Masu awe ni wuupuwelela yeeyo mwaalakhannyaanyu. Munahaala osuwela malamulo awe ni woona meerelo awe ni achu awe akhalai. Moorweela wa onwiriyana, nyuwaano munahaala ororomela miruku sawe ni omwiiwelela.
Echu taani ekina enahaala weeriha wi iyaakha sanyu sa okhala muciye sikhale soohakalaliha ni sa mphurelo? Mpharihele ociye anyu wi mukhaleno mikhalelo soomunepani ntoko miruku, ovaha, owetha, ohakalala, omoova Muluku ni meecelo aphaama—mikhalelo seiyo ti soochuneya wi okumi wa echoko okhale woohakalaliha. (Map. 24:16-21; Rute 1:16, 17; 2:6, 7, 11; Masi. 31:10-27) Mpacerye waavya Omwene moorweela wa olaleerya ni weerano miteko mikina Seekiristu; weerano yeeyo enahaala owaakihaani. Bill, oromoliwe woopaceryani onnaloca sa iyaakha seiyo aareiye muciye: “Iyaakha saavira mwawaakuveya! Kaapharihela elukuluku yeele mmuteko wa Yehova ntoko piyoneero.”
Aai, othela pahiru “mwa Apwiya” nlelo ti wooweryeya. Wiiwelela ohoolela yoola onahaala oweerihaani omucicimiha Yehova ni ophwanya ohakalala woohimala. Piipiliya onii: “Óréla mutchu yowo onamova Yehova, óhakalala winchipale ni malamulo awe. M’pa mwawe munarwa-mukhala’mo michapara ni muhakhu: Nave ekhaikhai awe ennikhalelaru okhala wokhala.” (Sal. 112:1, 3) Mwawiihiiha muumelele nlamulo noomuluku na othela pahiru “mwa Apwiya.”
[Masu a vathi]
a Naamwi nlocaka mwaha ola mmoonelo wa murokora, malakiheryo mamohamoha annaphariheleya wa munna.
b Masina makina aatorokiwa.