Atokweene Nyu, Munoona Hai Waavyakiha Akina?

“Itxhu sothene sokhalano elukuluku aya.”​—EKLE. 3:1, BNM.

MWAHAALA WAAKHULA HAI?

Tiheeni enaphwanela opakiwa wi evyakihiwe akina, nave ntakhara heeni?

Muloko onakhaviheryeya hai vaavaa atokweene anavyakihaaya?

Vaavaa atokweene anaavyakihaaya akina, enii echarihe hai yootakiherya ya Samuwele?

1, 2. Ooweherya a ikulucu anoona hai miloko mincipale?

OOWEHERYA a ekulucu aamukuchularu muthukumano awe ni atokweene a mmulokoni. Vaavaa aawenheiye ithoi saya, owo aahaasivela akukhula yaala oowetha, akina a yaawo yaari awunnuwelavo oophwanela okhala atiithi awe. Owo tho aahuukhuwa, mwawiihiiha aahaakoha: “Anna, tiheeni mwenraanyu wi mwaavyakihe akina oyano vahoolo mirici mmulokoni?” Awo annuupuwela wi ooweherya a ekulucu variyari va oxekurya wawe wookuchula aahaaceenyerya wiilipixerya waavyakiha akina. Wookuchulani, mutokweene mmoha aaloca: “Mweeparipari, hinenre echu.” Atokweene akina yaaheemererya tho.

² Waakhanle wi nyuwaano mwa mutokweene, munnawerya waanyiherya yeeyo yeeren’ye mmuthukumano yoole? Aai chiryene. Ooweherya a ikulucu orukurerya elapo ahoona wi mmiloko mincipale, onnachuneya wiilipixerya otokweene wa waavyakiha anna​—amiravo ni awunnuwelavo​—wi ekhaviherye okhapelela muhuwo. Ela ennakumiherya makacamiho. Ntakhara heeni eneereyaaya hiiha?

3. (a) Soorempwa inooniherya hai ochuneya wa ovyakiha, nave ntakhara heeni oothene hiyo ninnaphwanela othokororya yeeyo? (Moone masu a vathi.) (b) Ntakhara heeni atokweene ancipale anoona okhala woovila waavyakiha akina?

³ Ntoko mukukhula, moohikhwa minikwa munnasuwela wi ovyakiha ti woochuneya.a Moosuwela wi annachuneya anna ancipale wi ekhapelele muloko okhala woolipa omunepani ni opaceryiha miloko mivyaani. (Mwaalakhanye Yesaya 60:22.) Moosuwela tho wi Masu a Muluku annooceenyeryaani “wahusiha akinatho.” (Mwaalakhanye 2 Timoteo 2:2.) Naamwi hiiha, ntoko atokweene aromoliwe woopaceryani, nyuwaano akhweya munahaala woona okhala woovila weerano yeeyo. Mmanle othokororya soothowa sa emusi anyu, muteko, mirici sa muloko ni miyaha mikina sawaakuveya, akhweya hamukhalano elukuluku ya waavyakiha akina mmulokoni. Woona wi ti hiiha, hankooni nthokororye ochuneya waya waavyakiha akina.

OVYAKIHA TI WOOKHWELEYA

4. Nthowa taani nneeriha wi ovyakiha okhale woovila?

⁴ Nthowa taani nnaweeriha atokweene akina woona okhala woovila okhalano elukuluku ya ovyakiha? Akhweya akina annuupuwela: ‘Ovyakiha ti wookhweleya, nyenya tahi echu yawaakuveya ntoko miyaha mikina mmulokoni seiyo ihinaphwanela ohiiwa. Naamwi kihivyakinhe, muloko onahaala oyaaka vahoolo.’ Naamwi miyaha mikina ichuneyaka othokororyiwa mwawaakuveya, olekela ovyakiha onahaala onanariha mukhalelo waphaama woomunepani wa muloko.

5, 6. Tiheeni nnahuseryaahu mu yootakiherya ya xoofero ni moonelo awe wa orehererya mutore, nave eyo enaphariheleya hai ni ovyakiha mmulokoni?

⁵ Nkuupuwelani yootakiherya ela: Xoofero oosuwela wi ekaaro awe yaariki etitelele olapa, onaphwanela wiiliwiili otoroka makhurwa. Owo akhweya onahaala wuupuwela wi eyo tahi yoochuneya wakhala wi oosareiha etankhi ni tiisele. Wakhala wi hamuhenle tiisele mu tankhini, mwawaakuveya ekaaro enahaala omaala. Owo akhweya onnuupuwela: ‘Wakhala wi nkaanono elukuluku ya otoroka makhurwa, mutore onahaala otitelela olapa mweelukuluku vakhaani.’ Tiivi eri yawoopiha? Wakhala wi xoofero onnahiya orehererya mutore, nihiku nikina ekaaro enahaala onanara moomalela. Wakhala wi eyo yoheereya, owo onahaala omaliha elukuluku yincipale ni ikhorowa wi areherihe ekaaro wi ekookele olapa. Nnahuserya eheeni?

⁶ Atokweene annakhapelela miteko mincipale sookhweleya seiyo inachuneya orehereryiwa mwawaakuveya, oheerano saahaala weeriha wi muloko opahuwe. Hiiha ntoko yootakiherya ya xoofero onasuweleiye wi onaphwanela osareiha etankhi ni tiisele, atokweene anaphwanela “othalela eri yaphama.” (Fil. 1:10, BNM) Nyenya, atokweene akina anakhala ooweiwa ni miyaha mikina seiyo ineeriha okhala woovila waavyakiha akina​—weiwo ori ntoko orehererya mutore. Nyenya wakhala wi atokweene hanavyakiha, moohilekela muloko hokhalano anna oophwanelela yaawo yaahaala opaka miteko sookhweleya.

7. Nnaphwanela owoona hai atokweene aniivaha elukuluku wi evyakihe?

⁷ Nnaphwanela osepa wuupuwela wi ovyakiha tahi wookhweleyaxa. Atokweene arino moonelo waphaama nave anamaliha elukuluku yaavyakihaka anna ari amiruku nave mareeliho eeparipari wa muloko woothene. (Mwaalakhanye 1 Petro 4:10.) Muloko onaphura hai?

MEERELO A NAMIRUKU

8. (a) Tiheeni enaweeriha atokweene waavyakiha akina? (b) Mirici taani sawaakuveya atokweene yaawo anarumeela ntoko “akhaviheryi” aryaayano? (Moone ekaaxa “Muteko Mutokotoko.”)

⁸ Atokweene arino mavyakelo anaphwanela osuwela wi wuuluvala onahaala okukuca miteko yaapharaaya ntakhara muloko. (Mik. 6:8) Nave tho anaphwanela wuupuwela wi “orèriwa ni otakhaliwa, honamuthanla mutxhu” eyo enahaala oruuha matorokelo ootutuxa mu owerya waya okhapelela mirici mmulokoni. (Ekle. 9:11, 12, BNM; Yak. 4:13, 14) Mwawiihiiha yuukhuwaka ni okhala phaama wa ipucepuche sa Yehova, atokweene a miruku annamaliha elukuluku ni amiravo wi yuukeno mavyakelo aphwannyaaya mu orumeela waya.​—Mwaalakhanye Salmo 71:17, 18.

9. Yaweereya taani yoomwaahiyu eneeriha wi ovyakiha okhale wookhweleya?

⁹ Nthowa taani nikina nneeriha wi atokweene yaawo anaavyakiha akina ekhale nreeliho wa muhuwo? Awo annaakiha muloko. Mwawiihai? Wiilipixerya wa atokweene wa waavyakiha akina onneeriha wi ekhalevo anna ancipale ooreheryeya yaawo anahaala okhaviherya muloko okhala wootikitheryeya ni wawiiwanana, ohiya pahiru hiihaano nyenya xaxaxa vaavaa eneeraaya ephiye yoohooxa etokotoko. (Esek. 38:10-12; Mik. 5:5, 6) Mwawiihiiha, atokweene nyu oosiveliwa, ninnooceenyeryaani wi opacerya olelo ovyakiha okhale makupa a orummwa wanyu.

10. Wi akhaleno elukuluku ya waavyakiha akina, tiheeni mutokweene onaphwaneleiye weera?

¹⁰ Ninnasuwela wi elukuluku munamalihaanyu muthokororyaka miteko sookhweleya mmulokoni ennaweerihaani okutuphuwa. Naamwi hiiha munaphwanela opharihela elukuluku yeeyo wi muvyakihe. (Ekle. 3:1) Weerano hiiha enahaala okhala ya miruku.

MPAKE MAREHERERYO OOPHWANELELA

11. (a) Tiheeni eri yawooneya vooloca sa sooleeliherya sa ovyakiha ivahiwe ni atokweene a ilapo soohiyana? (b) Mwawiiwanana ni Masiposipo 15:22, ntakhara heeni ti yamphurelo othokororya sooleeliherya sa atokweene akina?

¹¹ Hiihaanoru, nikhuuru nimoha na atokweene yaawo anakhalano mphurelo wa waakhaviherya anna wunnuwa omunepani yaakohiwa tiheeni anapharihelaaya wi yaakhaviherye akina.b Naamwi mikhalelo sa anna yaala ihiyanaka, ekano yaavanhaaya yaari yoolikana. Tiheeni eyo enooniheryaaya? Ovyakiha orino mathipelo a Piipiliya onnaphariheleya wa oohuserya “vothe vene’vo m’miloko yothene”​—ntoko yeeren’yaaya mmahiku a murummwa Paulo. (1 Akor. 4:17) Mwawiihiiha, mmwaha yoola ni onacharela, nnahaala othokororya sooleeliherya seiyo atokweene yaawo yaapharihenlaaya. (Masi. 15:22) Mmukhalelo wookwasa, miyaha inahaala waaloca yaale anavyakiha ntoko “ahusiha” nave yaale anahusihiwa ntoko “oohuserya.”

12. Tiheeni muhusiha onaphwaneleiye orehererya, nave ntakhara heeni?

¹² Muhusiha onaphwanela opaka marehereryo oophwanelela wi avyakihe. Ntoko namalima onaphwaneleiye orehererya emaca naari echaya, ahaakumve waala mmiso, moolikana muhusiha onaphwanela orehererya naari olipiha murima wa oohuserya ahaakumve omuhusiha mukhalelo muvyaani. Ahusiha anapaka hai marehereryo oophwanelela a waavyakiha akina? Moorweela wa ochariha mukhalelo mmohamoha yoowo weeriweno ni mulipa a miririmo akhalai. Mukhalelo taani?

13-15. (a) Murici taani mulipa a miririmu Samuwele aakhenleiye? (b) Samuwele aakhwanihenrye hai murici awe? (Moone eruku yoopacerya.) (c) Ntakhara heeni yaweereya yeela ya Piipiliya vooloca sa Samuwele eryaaya yookhweleya wa atokweene olelo?

¹³ Nihiku nimoha iyaakha 3.000 oculi, Yehova aamuleela mulipa a miririmo awuuluvala Samuwele: “Omèlo, elukuluku ene yela kinamoruhela mulopwana a nihimo na Beniyamini. Omutxikitxhele yowo ntoko mwene a nloko na Isarayele.” (1 Sam. 9:15, 16, BNM) Samuwele ahoona wi muteko awe ntoko muhooleli waahimala nave wi Yehova aamuruma wi amuthanle yoowo aahaala omuraceela. Akhweya Samuwele aahuupuwela: ‘Kini kimureherye hai mulopwana owo ntakhara muteko yoola?’ Aahuupuwela yaweera nave aapaka marehereryo.

¹⁴ Nihiku noocharela, vaavaa Samuwele aamonneiye Sawuli, Yehova aaloca ni mulipa a miririmo: “Ti yola mulopwana kolènlaka.” Samuwele aapharihela muteko marehereryo awe. Aanwopa Sawuli wi alye va nipuroni na aleco. Aahimvaha Sawuli ni mukhaviheryi awe nipuro naphaama ni yoolya yeeyo aakhapelenleiye nave Samuwele aaloca: “Ela eri va yele kakhapelenlaka mekhayavo. Olye!” Voocharela, Samuwele ni Sawuli yaaheeca eyaaka omunlaanoni wa epooma, elocaka. Samuwele aachuna opharihela phaama elukuluku ya olya ni weeca woohakalaliha. Mwawiihiiha aanwopa Sawuli wi arwe mu nipuro nawe noocukhuwa. Mu elukuluku yaphaama ya ohiyu, Samuwele aatitelela oloca ni Sawuli, ophiyerya okona. Mmeeloni mwaya, Samuwele aamuthanla Sawuli, amukhupaarela, nave amvaha sooleeliherya ikina. Voocharela aamurowiha Sawuli​—ooreheryeya wa saweereya soohoolo.​—1 Sam. 9:17-27; 10:1, BNM.

¹⁵ Omuthanla mulopwana wi akhale muhooleli a nloko, tahi emohamoha omuvyakiha munna wi akhale mutokweene naari murummwa oorumeela mmulokoni. Naamwi hiiha, atokweene olelo anamukumiha mphurelo moorweela wa meerelo a Samuwele. Hankooni nthokororye meeli.

AHUSIHA AWIIVELEELA ASINTHAMWENE EEPARIPARI

16. (a) Moonelo taani Samuwele aareiyeno vaavaa Aisarayeli yaamuchunaaya mwene? (b) Tiheeni yaamweerinhe Samuwele omuthanla Sawuli?

¹⁶ Mwiiveleele, ohiya woovelela. Vaavaa Samuwele iiwaleiye wi Aisarayeli yaamuchuna mwene, owo aahuukhuwa nave aahuupuwela wi aakhoociwa ni achu awe. (1 Sam. 8:4-8) Mweeparipari aahoovelela weera yeeyo achu yaachunaaya ophiyerya wi mu ikwaha chaaru Yehova aamuleela wi awiriyane. (1 Sam. 8:7, 9, 22) Naamwi hiiha, Samuwele heemerenrye wi ikuhu ni nrima sitikitheryeye mmurimani mwawe nthowa na mulopwana yoowo aahaala omuraceela. Vaavaa Yehova aamulenleiye wi amuthanle Sawuli, mulipa a miririmo aahiiwelela, ohiya nthowa na okhinyereryiwa, nyenya aaheerano ni mirima woothene nthowa na osivela.

17. Atokweene olelo anatakiherya hai moonelo wa Samuwele, nave ohakalala taani anaakhelaaya?

¹⁷ Ntoko Samuwele, atokweene oosuwela annooniherya mukhalelo waphaama wa yaawo anaavyakihaaya. (1 Pet. 5:2) Atokweene yaawo hanoovelela waavyakiha akina yoovaka wi anahaala okhalano mirici mmulokoni yaawo anaahusihaaya. Ahusiha aphaama annawoona oohuserya, ohiya ntoko alipa a mapokha, nyenya ntoko “ókhaviheryanano”​—soovaha sa esisapo mmulokoni. (2 Akor. 1:24; Ahe. 13:16) Nave ohakalala taani ahusiha yaala oosuwela ahirino nrima anakhalaayano vaavaa anawoonaaya oohuserya epharihelaka mavyakelo aya wi ekhaviherye muloko!—Saw. 20:35.

18, 19. Atokweene enii ereherye hai murima wa oohuserya, nave ntakhara heeni weerano yeeyo ti ya mphurelo?

¹⁸ Mukhale nthamwene ohiya pahiru muhusiha. Nihiku Samuwele aamonneiye Sawuli anwerya okuxa echupa ya makhurwa, wi amiinele muru wa Sawuli nave amurowihe mwene muvyaani​—amuthanlile, nyenya ahireheryen’ye mwawaakhwanela. Nyenya, Samuwele mweepewe aahiivaha elukuluku wi areherye vakhaani vakhaani murima wa Sawuli. Pahiru emanle olya, weeca ni wiichuuwa waphaama mulipa a miririmo aahoona wi yaahiphiya elukuluku ya omuthanla Sawuli.

¹⁹ Moolikana, muhusiha olelo onaphwanela opaceryiha ovyakiha wawe moorweela wa ovahererya elukuluku yaphaama ni opaka onthamwene ni oohuserya. Marehereryo oophwanelela wi mutokweene apake onthamwene anahaala ohiyana mwawiiwanana ni elapo, nipuro, mikhalelo ni sookhovelela. Nyenya, moohipwacha nipuro munakhalaanyuwo, wakhala wi mwa mutokweene ooweiwa, mwiivahe elukuluku wi mmalihe ni oohuserya, weerano hiiha, munamala oloca wa yoowo, “weyaano ori ookhweleyaxa wa miyo.” (Mwaalakhanye Aroma 12:10.) Naamwi ehilociwe masu yaala, anahaala wiiwexexiwa mookwakwaleya ni othamaleliwa vancipale ni oohuserya mmapuro oothene.

20, 21. (a) Mwaahaala omuthariha hai muhusiha a mphurelo? (b) Tiheeni enahaala othokororyiwa mmwaha onacharela?

²⁰ Atokweene, musuwele wi: Muhusiha a mphurelo tahi yoole pahiru onasiveliwa waavyakiha akina nyenya ti yoole onamusivela muchu onamuvyakiheiye. (Mulikanyihe ni Yohane 5:20.) Mukhalelo yoola wa ahusiha onnaakuvela osuweliwa ni oohuserya nave onnavolowela mwakuru waakhulela ovyakiha onaakheleiye. Mwawiihiiha, atokweene nyu ookhweleya, vaavaa munavyakihaanyu, muhikhale pahiru muhusiha​—nyenya nthamwene.​—Masi. 17:17; Yoh. 15:15.

²¹ Amanle oreherya murima wa oohuserya, mutokweene onachuna omvaha ovyakiha woophwanelela. Meerelo taani mutokweene onaphwaneleiye opharihela? Eyo enahaala othokororyiwa mmwaha onacharela.

[Masu a vathi]

[Ekaaxa va epaaxina 13]

Muteko Mutokotoko

MMAKUPA makina a elapo, miloko mincipale sinnawaakhela “akhaviheryi”​—anna ni arokora yaawo arule moorakamela. Anamoona yaala awiiyeviha annuuka mmuteko wa ohaca woomunepani. Nyenya tiheeni yaahaala weereya waakhanle wi alaleeryi yaala a Omwene aahiya elapo? Mmiloko mincipale, hiyaahaala okhalavo anna oophwanelela wi yeecihe mirici mmulokoni. Mwawiihiiha, “akhaviheryi” yaawo anarumeela ntoko atokweene aakhalano muteko mutokotoko​—wa waakhaviherya anna a vanipuroni wi ekhale akukhula a muhuwo.