Owo Aanaasivela Achu

“Ohakalala waka wàri okhala n’atxhu.”​—MASI. 8:31, BNM.

MUNANWERYA OTHARIHA?

Tiheeni enooniherya wi Yesu aakhalano osivela otokweene ni achu?

Mukhalelo Yesu aapharihenleiye ikuru sawe ari veelaponi yavathi enaniroromeliha eheeni sa omwaahiyu?

Yootikhiniha taani ya Yesu munaweheryaanyu?

1, 2. Tiivi eri yawooniherya emoha ya osivela otokweene wa Yesu ntakhara achu?

MWAANA oopacerya a Muluku yaari yawooniherya etokweene ya miruku sa Yehova. Yesu, “mulipa òteka empa,” aari a miruku akhalaka ni Tiithi awe. Nnanwerya wuupuwela ohakalala ni onthamwene Yesu aapuheiye ni Tiithi awe “apatusaka erimu” ni vaavaa “àtikitheryeiye elapo yavathi.” Nyenya, naamwi aasiveliwa ni ichu ihirino okumi, Mwaana oopacerya a Muluku ‘ohakalala wawe wàri okhala n’atxhu.’ (Masi. 8:22-31, BNM) Chiryene, ookhalano ohakalala, naari osivela ntakhara achu yoowo aareiyeno ahaakumve orwa veelaponi yavathi.

² Ntoko yawooniherya ya ororomeleya ni omusivela Tiithi awe, nave tho ntoko osivela otokweene “n’atxhu,” Mwaana Oopacerya a Muluku “áhiyéha mekhiye” nave aarwa ntoko muchu. Owo aaheerano yeeyo wi aveleele “okumi awe oliva wa atchu anchipale.” (Afil. 2:5-8; Mat. 20:28) Eyo yaari yawooniherya ya osivela wawe ntakhara achu! Vaavaa aareiye veelaponi yavathi, Muluku aamvaha ikuru wi apake sootikhiniha seiyo sooniherya osivela wawe otokweene ntakhara achu. Weerano yeeyo yohooniherya ichu sootikhiniha Yesu onahaaleiye opaka moohilekela veelaponi yoothene.

3. Tiheeni nnahaalaahu othokororya hiihaano?

³ Orwa wa Yesu veelaponi yavathi yoomukhaviherya tho olaleerya “mitchaka yaphama ya Omwene wa Muluku.” (Luka 4:43) Yesu aanasuwela wi Omwene yoowo waahaala weeliha nsina na Tiithi awe nave tho waahaala omaliha makacamiho oothene a achu. Hiwaavo minikwa wi muteko wa olaleerya wa Yesu yaari yawooniherya ya opwacha wawe emusi ya achu. Ntakhara heeni eryaaya yookhweleya wa hiyo? Nthowa nawi saweereya seiyo sinnanivaha nroromelo ni ewehereryo vooloca sa omwaahiyu. Hankooni nthokororye sootikhiniha xexe sa Yesu.

“IKURU SA APWIYA SÁRI NI YOWO SAWAPENUSHA”

4. Mutharihe okumana wa Yesu ni mulipa a mareca.

⁴ Orummwa wa Yesu waari wa vanlakani, nave nipuro nawe nivyaani na muteko waari o Kalileya. Mu epooma yeeyo, Yesu aavolowa mu nipuro noothukumana. (Mar. 1:39, 40) Ohoolo wawe aakhalawo mulopwana aarino mareca. Atharihaka mukhalelo wa ereca ya mulopwana yoowo mulipa a murece Luka onamuloca wi aari “ósareya marecha.” (Luka 5:12) “Nave árwa wa Yowo awicheliwa marecha, amveka, amukokhorela, ni olocha ni Yowo, Mwákhwelaka, munawerya okiryeherya.” Mulopwana owo haarino minikwa wi Yesu aakhalano ikuru sa ompenuxa, nyenya echu aachuneiye osuwela waari waakhanle wi Yesu aakhalano nchuno na ompenuxa. Yesu aakhulenle hai yooveka yeeyo? Tiheeni Yesu uupuweleiye vaavaa aamvarenreiye mulopwana yoowo a mareca? Apwanne aari ntoko Afarisi, yaarino moonelo woohiyana vooloca sa makacamiho a achu? Mwaahaala weera eheeni?

5. Tiheeni yaamweerinhe Yesu oloca “Kinnakhwela,” vaavaa aampenunxeiye mulipa a mareca?

⁵ Mwawooneya, mulopwana yoola a mareca hiiwelenle Nlamulo na Moose na okhuwela “Kòthanyeya! Kòthanyeya!” Yesu haalonce yeeyo. Moohiyana, aari awuukhuwa ni mulopwana owo ni soothowa sawe. (Onam. 13:43-46, BNM) Hinnasuwela phaama ene yeeyo Yesu uupuweleiye, nyenya nsuwenle yeeyo yaari mmurimani mwawe. Ni oreera murima, Yesu aapaka yootikhiniha. Ookolaka ntata nawe aamutannya mulipa a mareca, ni nsu nooniheryaka owerya ni opwacha, Yesu aaloca: “Kinnakhwela, nkaryeheryeya. Nave vavo marecha yámvinyerya.” (Luka 5:13) Ikuru sa Yehova saahooneya​—ohiya pahiru nthowa na Kiristu opaka sootikhiniha nyenya tho nthowa na Yesu wooniherya osivela otokweene ntakhara achu.​—Luka 5:17.

6. Tiheeni eri yawooneya vooloca sa sootikhiniha Yesu aapankeiye, nave tiheeni inooniheryaaya?

⁶ Ikuru sa Muluku saamukhaviherya Yesu opaka sootikhiniha soohiyanahiyana. Yesu aampenuxa, ohiya pahiru mulipa a mareca nyenya ireca ni makacamiho oohiyanahiyana variyari va achu. Piipiliya onnanleela: “Wawihihá wi muloko’wo wátikhina, vawona óhuluma yulumaka, órakala sam’mwílini epenuwaka, ni órakala mecho yechaka, ni évasi yonaka.” (Mat. 15:31) Wi apake saweereya seiya sa oreera murima, Yesu haaraceeliha makupa a mwiili. Owo aapenuxa mapuro oohiyanahiyana a mwiili yaawo yaarino makacamiho! Yesu aanaapenuxa achu, mu ilukuluku ikina ari ocai. (Yoh. 4:46-54) Sootakiherya seiya sootikhiniha inooniheryaaya eheeni? Vano, ntoko Mwene onalamulela wirimu, Yesu ookhalano ohiya pahiru ikuru nyenya tho nchuno na oruuha openuxa wawaakhwanela. Ohuserya mukhalelo Yesu aakhaviheryeiye achu onnanivaha nroromelo wi mu elapo yahiihaano, yooloherya ya Piipiliya enahaala okhwaanela: “Anarwa-amuleva óhawa ni ekwasuni.” (Sal. 72:13) Chiryene, ni nchuno noorweela mmurimani, Yesu onahaala weeravo echu wi aakhaviherye achu oothene.

“NKAVINYA, TESHA NIPHA NÁ, WECHE”

7, 8. Mutharihe yaweereya yaamweerinhe Yesu omphwanya mulopwana aaheeca va nchaca niichaniwa Petisaita.

⁷ Saavira miyeeri vakhaani Yesu amanle okumana ni mulopwana a mareca o Kalileya. Mikwaha sawe sa olaleerya michaka yaphaama ya Omwene wa Muluku saanamweeriha weeca o Kalileya ophiyerya o Yuteya. Achu yaawo Yesu aalaleeryeiye yaaphiyerya macikhwi. Yesu aanachuna olaleerya michaka yaphaama wa alipa oohaawa, waataphula oowaleliwa ni waahakalaliha achu oohooxiwa.​—Yes. 61:1, 2; Luka 4:18-21.

⁸ Nihiku na Nisani naaphiya. Mu wiiwelela nlamulo na Tiithi awe, Yesu aaya o Yerusalemu wi ampake Paskha. Epooma yaari yaphaama vaavaa achu yaaphiyaaya wi empake Paskha. Omokoni wa empa naakhalawo nchaca niichaniwa Petisaita, vaava Yesu aamphwanya mulopwana awiiceliwa.

9, 10. (a) Tiheeni yaaweeriha achu okhala mu nchaca? (b) Tiheeni Yesu aapankeiye waacamela nchaca, nave enanihusiha eheeni? (Moone eruku yoopacerya.)

⁹ Nikhuuru na achu awiiceliwa ni ooceecheya yaanathukumana mu nchaca. Tiheeni yaaweeriha okhala vaava? Awo yeemererya wi muchu awiiceliwa akhala va nipuro nenlo elukuluku maahi yaakhumaaya, aahaala openuwa mootikhiniha. Nkuupuwelani achu yaakhala vaava! Moohikhwa minikwa, awo hiyaarino ewehereryo, nave yaanuukhuwa. Nyenya tiheeni yaamweerinhe Yesu mulopwana oophaameya yoowo ahaarino nikacamiho noomwiilini waacamela nipuro nlo? Ni oreera murima, Yesu aamwaacamela mulopwana yoowo aapacenrye wiiceliwa Yesu ahaakumve orwa veelaponi yavathi.​—Mwaalakhanye Yohane 5:5-9.

¹⁰ Munnawerya waanyiherya miitho a mulopwana ehirino ewehereryo vaavaa Yesu aamukonheiye wakhala wi aanachuna openuwa? Naakhulo naari nawaakuveya. Mulopwana owo aanachuna okhala phaama nyenya hoona mukhalelo ene, woona wi haarivo muchu oomukeriha mu nchaca. Yesu aamulamulela mulopwana weera echu yoohiweryeya​—okuxa niphaani nawe nave eece. Mu wiiwelela masu a Yesu, mulopwana aakuxa niphaani nawe nave aapacerya weeca. Yawooniherya taani yoohakalaliha yeeyo Yesu onahaaleiye opaka mu elapo ya hiihaano! Mu yootikhiniha yeela, nohoona oreera murima wa Yesu. Yesu aamukhaviherya mulopwana aaheeca. Yootakiherya ya Yesu enaphwanela onceenyerya owaavya achu mu ekulucu ahu yaawo ari ookacamiheya nthowa na ichu soonanara ineereya mweelaponi.

“ATANNYILE TANI SOWARA SAKA?”

11. Marko 5:25-34 onavuwiha hai epewe ya Yesu ntakhara yaale aanahooxeya ni ireca?

¹¹ Mwaalakhanye Marko 5:25-34. Mu iyaakha 12, muthiyana aanakhala mu wuuliwa muru. Ereca awe yaanavolowela mukhalelo woothene wa okumi, ophitaanyerya malapelo awe. Muthiyana owo “áhona sovoreya sinchipale ni alipa-mureche anchipale, alivela sothene áriyeno,” naamwi hiiha owo aamvira atepaka. Nihiku nimoha, muthiyana owo aakhalano yoolakelela yoohiyana wi akhale phaama. Aahuupuwela omwaacamela mulopwana iichaniwa Yesu. Muthiyana aavolowa mu nikhuuru nave aatannya niveru na yoowara ya Yesu. (Onam. 15:19, 25, BNM) Yesu aahoona wi ikuru saakhuma mwa yene, nave aakoha taani aamutannyile. “Nyenya muthiana owo áhóva ni othukumela . . . arwa, amukokhorela, amuléla yeparipari yothene.” Asuwelaka wi aari Tiithi awe a wirimu Yehova, yoowo aampenunxe muthiyana, Yesu aamweerela epewe, alocaka: “Mwana mwa muthiana we nroromelo ná nihovulusha weyo; rowa m’murecheleni, okhale ópenuwa yawukhulá.”

12. (a) Mwawiiwanana ni yeeyo nthokoronryaahu, munahaala omuthariha hai Yesu? (b) Yesu onivanhe yootakiherya taani?

¹² Yesu aari eepewe! Nohoona wi epewe yookhalano nipuro mmurimani mwawe wa yaale anahooxeya ni ireca. Satana onachuna oneeriha wuupuwela wi naachu oohiphwanelela. Moorweela wa sootikhiniha sawe, Yesu ohooniherya vanlakani wi onnanthokororya ni makacamiho ahu. Chiryene, Yesu Mwene ni Mutokweene Eephepa a ikharari! (Ahe. 4:15) Tahi yookhweya wa hiyaano wiiwexexa moonelo wa yaale anahooxeya ni ireca soohipenuxeya, xaxaxa wakhala wi hanintonko ohooxeya ni seiyo. Nnaphwanela wuupuwela wi Yesu aahiihela mu nipuro na areca naamwi ahintonko wiiceliwa. Yootakiherya ya Yesu enanwerya onceenyerya weerano emohamoha, ophiyerya nnawarelaahu.​—1 Pet. 3:8.

“YESU ÁHINLA”

13. Ovinya mookhwani wa Lasaro woonihenrye eheeni vooloca sa omuchu wa Yesu?

¹³ Murima wa Yesu waanasooseya nthowa na ohooxeya wa akina. Aathanana vancipale ni ohooxeya wa akina vaavaa nthamwene awe Lasaro aakhwileiye, Yesu “áháha-iphumu m’munepani, úkhuwa mwanene” Yesu aathanana mmukhalelo yoowo naamwi aasuwela wi mwawaakuveya aahaala omukookiherya okumi Lasaro. (Mwaalakhanye Yohane 11:33-36.) Owo huuliwe muru wooniherya othanana wawe otokweene. Achu yaari vaava yaahoona osivela Yesu aareiyeno ni Lasaro ni amusi awe. Yesu aahooniherya epewe moorweela wa opharihela ikuru Muluku amuvanheiye wi amukookiherye okumi nthamwene awe!​—Yoh. 11:43, 44.

14, 15. (a) Tiheeni enooniherya wi Yehova ookhalano nchuno ntokweene na omaliha makacamiho a achu? (b) Ntakhara heeni nsu nawi “m’mahiyeni [anuupuweliwa]” ti noophwanelela?

¹⁴ Piipiliya onamuthariha Yesu ntoko “eneneryosha ya makhalelo [a Mpatuxa].” (Ahe. 1:3) Mwawiihiiha, moorweela wa sootikhiniha sawe, Yesu ohooniherya wi yene ni Tiithi awe aakhalano nchuno na omaliha ireca ni okhwa. Nchuno nenla ntokweene opwaha ovinya mookhwani onalociwa Mpiipiliya. Yesu aaloca: “Nihiku ninnorwa, nenlo othene ari “m’mahiyeni [anuupuweliwa]” enarwa . . . ekhuma.”​—Yoh. 5:28, 29.

¹⁵ Yesu opharihela wawe nsu “m’mahiyeni [anuupuweliwa]” ti noophwanelela, woona wi onaphitaanyerya muupuwelo wa Muluku. Muluku a Owerya Woothene, Yoowo opatunxe elapo yoothene onanwerya wuupuwelela mukhalelo woothene wa muchu okhwile, ophitaanyerya omuchu awe ni ichu aasuwenleiye opaka. (Yes. 40:26) Nave tahi pahiru onnawerya wuupuwela nyenya wi owo ni Mwanawe annachuna weerano yeeyo. Ovinya mookhwani wa Lasaro ni mukina onaphwanyeya Mpiipiliya onnooniherya wi onahaala weereya mmukhalelo wawunlaana mu elapo yahiihaano.

SOOTIKHINIHA SA YESU NI NYUWO

16. Yaale enii yooniherya ororomeleya Weekiristu ekari taani anahaalaaya waakhela?

¹⁶ Wakhala wi nootitelela wooniherya ororomeleya Weekiristu, nnahaala weerela onamoona yootikhiniha etokweene​—yootikhiniha ya ovuluwa mu yoohooxa etokotoko. Evinre ekhoco ya Armaketo, sootikhiniha sincipale inahaala weereya, achu anahaala okhalano okumi woophaameya. (Yes. 33:24; 35:5, 6; Yaw. 21:4) Nkaanyiheryani owoona achu oohoona yoonaka, achu oorakala ekhanle phaama, oohiiwa yiiwaka. Ni mathowa aphaama Yehova onahaala omuruuha Armaketo wi areherye okumi. Yaale anahaala ovuluwa, anahaala okhalano muteko wa opaka. Awo anahaala okhalano nchuno na olapa, wi yeerihe elapo okhala parataiso.​—Sal. 115:16.

17, 18. (a) Tiheeni yaari yawooniherya etokotoko mu sootikhiniha sa Yesu? (b) Ntakhara heeni munnaphwanela wiilipixerya wi mvolowe mu elapo yahiihaano ya Muluku?

¹⁷ Openuxa Yesu opankeiye khalai onnaalipiha achu “muloko mtokotoko” olelo, waaceereryaka ohakalala waya wa openuxiwa ireca saya. (Yaw. 7:9) Openuxa yoowo waahooniherya othanana wawe otokotoko nave tho waahooniherya osivela otokweene Muluku ni Mwanawe aryaayano ni achu. (Yoh. 10:11; 15:12, 13) Epewe ya Yesu ennooniherya opwacha Yehova oreiyeno ni mmoha ti mmoha a akapuro awe.​—Yoh. 5:19.

¹⁸ Achu ancipale annahooxeya. (Arom. 8:22) Ninnachuna elapo yahiihaano ya Muluku, mwemmo onii ohikhalemo makacamiho ntoko onaroromeliheiye. Malakiya 4:2 onnanleela wi yaale enii epenuxiwe anahaala ocupha ntoko imope inakhuma mu nikhola, ohakalala nthowa na woopoliwa mu okapuro wa ohiphaameya. Othamalela otokotoko wa Muluku ni nroromelo wa soolaiherya sawe inahaala oneeriha opaka echu yookhweleya hiihaano wi niphwanelele ovolowa mu elapo yahiihaano. Ohakalala taani nryaahuno osuwela wi sootikhiniha Yesu aapankeiye ari veelaponi yavathi sinnooniherya woopowa yoowo achu anahaalaaya opuha moohilekela vathi va olamulelo wa Mesiya!