Taani Onatannya Makacamiho?

Waakhanle wi tahi Muluku onatannya makacamiho, vano ntakhara heeni elapo esaren’yaaya ikhoco, ireca soohipenuxeya, ipahu sa maphacuwelo, etala, ni ohaawa ohinamala? Masu a Muluku, Piipiliya, annaloca ichu inatannya makacamiho aachu. Hankooni noone.

1. Nrima, Miiko ni Wiicana. “Atxhu akina àkhalano otokwene, eniha akina ekhalaka òhosiwa.” (Eklesiyaste 8:9) Ancipale annahooxeya nthowa na ohiphaameya, nrima ni onanara murima wa achu akina.

2. Saweereya Soohiwehereryeya. “Orèriwa ni otakhaliwa, honamuthanla mutxhu.” (Eklesiyaste 9:11) Ela tiwi, muchu akhweya onaphwanyeya va nipuro noohiphwanelela mu elukuluku yoohiphwanelela mwawiihiiha epahu enanwerya omphwanya. Vakina vaya, akhweya muchu haano ekaasoope naari oohesa.

3. Mulamuleli Oonanara Murima a Elapo Yeela. Piipiliya onnaloca mookwakwaleya nthowa nene nneeriha okhalavo makacamiho mancipale: “Elapo yothene ennatxhonkiwa ti mutakhali.” (1 Yohani 5:19) “Mutakhali” yoopatuxiwa yoomunepani nsuwenlaahu ntoko Satana Musaserya. Owo aari munkeelo a Muluku, nyenya “halekenle mwa eparipari.” (Yohani 8:44) Ohiya waakiha eparipari, owo aahimmwareela Muluku. Ankeelo tho akina yaapaka makupa a Satana mu omwareya yoola wi yaavye soochuna saya. Mwawiihiiha awo yaakhala masololo. (Maphatxuwelo 6:1-5) Ovinyerya vaavaa, Satana ni masololo awe ti yaapacenryaaya olamulela elapo mmukhalelo woonanara. Nave mmahiku ahu yaala, opwaha khalai ninnoona sookhumelela soonanara sa yeeyo. Musaserya ootepa onyeenyeya nave “munyenka a elapo yothene emakiwe.” Ti nthowa nene Piipiliya onaloceiye: “Otakhaliwa ti wa elapo” (Wupulula 12:9, 12) Chiryene, Satana mulamuleli oonanara. Owo onnatepa ohakalala vaavaa onawooneiye achu ehooxeyaka. Tahi Muluku onatannya makacamiho a achu, nto ti Satana.

NKUUPUWELANI: Pahiru muchu oonanara murima ni owariwe ti Satana taahaala waahooxaka achu ahirino nthowa. Nyenya Piipiliya onnaloca wi “Muluku ti osivela.” (1 Yohani 4:8, Nlakano Nahihano) Osivela mukhalelo woochuneyaxa wa Muluku. Mwawiihiiha, “Muluku, owerya sothene, hanera itxhu sonanara ni s’ohokololowa.”—Yobi 34:10.

Nyenya akhweya nyuwaano munanwerya wiikoha: ‘Ophiyerya liini Muluku onahaaleiye weemererya wi Satana atitelele ni olamulelo awe woonanara?’ Ntoko nimanlaahu woona, Muluku onniica ichu soonanara nave onnatepa osooseya vaavaa onanooneiye nihooxeyaka. Ohiya yeeyoru, Piipiliya onnanceenyerya ariki: “Mmukuherye yowo oteteiwa wanyu wothene, ntakhara ti yowo onokhapelelani.” (1 Pedro 5:7) Muluku onnatepa onisivela nave ookhalano owerya wa omaliha makacamiho ni ohookololowa woothene. Mwaha onacharela onahaala othokororya sincipale vooloca sa mwaha yoola.a