Munna Muvyaani A Nikhuuru Noolamulela

MU NIHIKU Naneeraru woosiiselo, 24 a Yaneru a 2018, emusi ya Epeteli yo Estatu Unitu ni yo Kanata yaahihakalala wiiwa yoolokoha yavameekhaaya: Munna Kenneth Cook, Jr aahivolowa mu Nikhuuru Noolamulela na Anamoona a Yehova.

Munna Cook oyariwe ni aphuiwale o Pensilvaniya, o E.U.A. Owo aahusenrye eparipari ni nthamwene awe oosikola mu elukuluku yaakwaaxaaya mahusiheryo avasulu nave aapatisiwa mu 7 a Yunyu a 1980. Owo aapacenrye muteko wa elukuluku yoothene ntoko piyoneero ookilaatheya mu 1 a Setempuru a 1982. Amanle orumeela ntoko piyoneero mu iyaakha piili, aahiwompwa o Peteli, nave aapacenrye muteko awe o Epeteli yo Wallkill, Nova York mu 12 a Otupuru a 1984.

Mu iyaakha 25 soocharela, Munna Cook aahirumeela mu miteko soohiyanahiyana ntoko wimprimiri navetho mu Etepartamentu ya Echoko yo Peteli. Owo aahithelana ni Jamie mu 1996, nave Jamie aahikhala vamoha ni iyawe erumeelaka o Peteli yo Wallkill. Mu Tesempuru a 2009, Munna ni Murokora Cook yaahithaamiheryiwa o Paterson Nova York, Nipuro na Mahusiheryo a Torre de Vigia, weiwo Munna Cook aahithanliwa wi alapeke mu Etepartamentu Yoorepa Miselo. Mu Apirili a 2016, amanle ochika o Wallkill, Munna ni murokora Cook yaarumiheliwa o Brooklyn, Nova York. Miyeeri mithanu ohoolo waya, awo yaahirumiheliwa o nipuro nivyaani ntokotoko na Anamoona a Yehova o Warwick, Nova York. Mu Yaneru a 2017, Munna Cook aahithanliwa orumeela ntoko mukhaviheryi a Nikhuuru Noorepa na Nikhuuru Noolamulela.