Ninnamwarya Otokweene Woothene Onawana ni Osuwela wa Muluku!

1. Olopola taani murummwa Paulo aarepenleiye Akristu oothanliwa?

“MUHITXHARIHE,” murummwa Paulo oolopola. Ohichariha eheeni? “Muhitxharihe makhalelo a elapo yela.” (Aro. 12:2, BNM) Masu yaala, Paulo aarepela Akristu a nsana noopacerya. Ntakhara heeni Paulo ayaaka waavaha olopola wooluluwanya ntoko yoola, alopwana ni athiyana yaawo yiiveleenle wa Muluku nave yaathanliwe ni munepa waweela?—Aro. 1:7.

2-3. Satana oneererya hai onihuweliha wa Yehova, nyenya nni niphole hai muupuwelo woonanara yoowo nryaahuno?

² Paulo aari awuukhuwa nthowa nawi Akristu akina yaakhala ntoko wi yaahipacerya ovoloweliwa ni muupuwelo wooriipiheya ni watheru yoowo elapo ya Satana yaavuwihaaya. (Éfe. 4:17-19) Ela enanwerya weereya ni muchu ori oothene a hiyo. Satana tori mulamuleli a mukhalelo yoola wa ichu, nave onanwerya opharihela mikhalelo soohiyanahiyana wi anivolowele. Ntoko yootakiherya, wakhala wi nnachuna okhala ookhweleyaxa naari oovuwa, owo onampharihela seiho eereryaka onihuweliha wa Yehova. Satana onanwerya opharihela ichu naahusenryaahu owaani, osikola, navetho orweela wa achu yaale anirukurenrye wi aneerihe wuupuwelaka ntoko yene.

³ Apwanne ti yooweryeya wa hiyo ophola ichu seiye siri “soolipa” mmuupuweloni mwahu? (2 Kor. 10:4) Moone mukhalelo Paulo onaakhuleiye nikoho nenla: “Ninnamwarya mupuwelo awisona ni otokwene wothene onawana ni osuwela wa Muluku. Nave ninnera wi mupuwelo a atxhu emwiweleleke Kristu.” (2 Kor. 10:5, BNM) Aai, nnikhaviheryo na Yehova nnanwerya otoroka muupuwelo vyakala woonanara. Hiiha ntoko murece onamalihaaya ovolowela wa evenenu, Masu a Muluku ananwerya omaliha ovolowela wa evenenu ya elapo ya Satana.

“MUTATUSHIWE MMUUPUWELO”

4. Matorokelo taani ancipale a hiyo nipankaahu vaavaa neemerenryaahu eparipari woopaceryani?

⁴ Nkuupuwelani matorokelo yaawo mpankaanyu muculi vaavaa mweemerenryaanyu woopaceryani eparipari ya Masu a Muluku nave mulakelela omurumeela Yehova. Wa ancipale a hiyo, eyo yaavolowela ohiya meerelo makina oonanara. (1 Kor. 6:9-11) Ninnatepa omuthamalela Yehova onikhaviherya ovootha meerelo yaala oonanara!

5. Ichu taani Piili sinaromoliwa mu Aroma 12:2?

⁵ Naamwi hiiha, hannaphwanela wuupuwela wi noomalela opaka matorokelo. Naamwi naahin’ye opaka soocheka itokotoko seiho naakhovelenlaahu nihaakumve opatisiwa, nlelo nnaphwanela okhala oovyaka wi nsepe echu vyakala yeeyo yaahaala oneeriha okookela ichu seiye naapakaahu khalai. Nni neereno hai eyo? Paulo onnaakhula: “Muhitxharihe makhalelo a elapo yela. Mutatuse murima anyu, wi murukunuse mupuwelo anyu.” (Aro. 12:2, BNM) Mwawiihiiha nnaphwanela opaka ichu piili. Voopacerya, hinnachuna ‘otxhariha makhalelo a elapo yela’ naari ovoloweliwa ni elapo yeela. Yanaawiili nnachuna ‘otatusa murima ahu’ moorweela wa otoroka muupuwelo ahu.

6. Tiheeni nnahuseryaahu orweela wa masu a Yesu anaphwanyeya mu Mateu 12:43-45?

⁶ Otatusa yoowo Paulo aaheiye onnavolowela sincipale opwaha ichu sawooneya. Eyo ennavolowela makupa ahu othene. (Moone ekaaxa “Apwanne Nootorokeya Moomalela Naari Ntoroken’ye Vakhaani?”) Nnachuna otoroka moomalela muupuwelo ahu—omuchu ahu wampuwa, moonelo, ni soochuna. Mwawiihiiha muchu ti muchu a hiyo onaphwanela wiikoha: ‘Apwanne matorokelo kinapakaaka kinachuna okhala Mukristu a nsina pahiru, naari Mukristu eeparipari?’ Ohiyaniha ti woochuneya. Mmasu awe yaawo arempwe mu Mateu 12:43-45, Yesu oothariha yeeyo enaphwanela opakiwa. (Mwaalakhanye.) Masu yaala annanihusiha echu yoochuneya: henaakhwana pahiru wiica muupuwelo woonanara; nnaphwanela oraceeliha muupuwelo woonanara ni muupuwelo yoowo Muluku oneemereryeiye.

“MUTATUSHIWE MMUUPUWELO AHIIHAANO”

7. Nni ntoroke hai omuchu ahu wampuwa?

⁷ Apwanne ti yooweryeya otoroka mathitimanelo ahu naari omuchu ahu wampuwa? Masu a Muluku annaakhula: “Mutatuxiwe mmuupuwelo ahiihaano mwa munepa, munware muchu ahihano, oopatushiwa oophwanaphwana ni Muluku, mwa wookololowa ni weela murima woorweela mweeparipari.” (Éfe. 4:23, 24) Aai, ti yooweryeya otoroka omuchu ahu wampuwa, nave tahi yookhweya weerano. Nnaphwanela opaka sincipale opwaha okhooca nchuno ni meerelo oonanara. Nnaphwanela otoroka “muupuwelo.” Eyo enavolowela otoroka minkhela sahu, meecelo ahu, ni seiho sinaneeriha opaka echu. Weerano yeeyo onnachuneya owetha.

8-9. Yaweereya ya Munna mmoha enooniherya hai ochuneya waya otoroka yeeyo nryaahu mpuwa?

⁸ Hankooni nthokororye yaweereya ya munna mmoha yoowo aari muchu a nlala. Amanle ohiya okhala mvona ni owaniha, owo aahiphwanelela opatiso, avaha onamoona waphaama mmuceche mukhaani yoowo aakhaleiyewo. Nyenya nihiku nimoha osekuwa, mu mahiku vakhaani amanle opatisiwa, owo aahihoolela yaweeha yoohiwehereryeya. Mvona mmoha aahirwa vaate vawe nave anamulika munna owo. Voopaceryani munnihu owo aakhooca munkhela awe wa owana. Nyenya vaavaa mvona owo aapacenryeiye onyemula nsina na Yehova, eyo yaahimwaalula murima munnihu muvyaani. Owo aahikhumela vaate nave aammana mvona. Ntakhara heeni aaheerano yeela? Naamwi yoohuserya awe ya Piipiliya yaamukhavihenrye munna owo okhooca nchuno nawe na owana, owo haatoronke muupuwelo awe wakhalai. Mmasu makina, owo haatoronke omuchu awe wampuwa.

⁹ Naamwiihiiha, munna owo haavelavenle. (Masi. 24:16) Nnikhaviheryo na atokweene, owo aahititelela oya vahoolo mwaphaama. Ohoolo waya aahiphwanelela okhala mutokweene a mmulokoni. Amanle okhala mutokweene, vaate va Empa ya Omwene, owo aahihoolela tho yaweeha yoolikana ni yeele aakumanneiyeno wuupaceryani. Mvona mmoha aahala vakhaani ommana mutokweene a mmulokoni. Vano tiheeni munnihu ole eenreiye? Moomaaleleya, mmukhalelo wawiiyeviha, munnihu aahiloca ni mvona, aahimukhaviherya omaala , ophiyerya omuhoola owannyawe. Ntakhara heeni owo aakhulenleiye moohiyana? Mweeparipari munnihu aahitoroka muupuwelo awe. Owo aahikhala muchu a murecele, ni awiiyeviha. Eyo yaahiruuha ncicimiho wa Yehova!

10. Tiheeni enavolowela mu opaka matorokelo yaala?

¹⁰ Matorokelo ntoko yaala haneereya mookhweya, nyenya onnachuneya wiilipiserya otokweene. Nnaphwanela ‘wiilipisa’ nlapaka mwakuru mu iyaakha sincipale. (2 Ped. 1:5, NN) Matorokelo awo heni yeereye pahiru nthowa nawi ninnamurumeela Yehova mu elukuluku yincipale. Nnaphwanela wiilipiserya mwakuru wi nipake matorokelo a omuchu ahu wampuwa. Sookhalavo mikhalelo mincipale seiyo sinahaala onikhaviherya opaka matorokelo si yaawo. Hankooni nthokororye mikina sa seiyo.

NNI NTOROKE HAI MUUPUWELO AHU?

11. Ovekela oni onikhaviherye hai otoroka muupuwelo ahu?

¹¹ Mukhalelo woopacerya ni woochuneyaxa, ti nivekelo. Nnaphwanela ovekela hiiha ntoko mulipa masalumu eenreiye: “Mukipatusherye murima waweela, Muluku. Mulipihe tho munepa aka.” (Sal. 51:10) Nnaphwanela weemererya wi ninnaphwanela opaka matorokelo a muupuwelo ahu nave nimveke Yehova wi anikhaviherye. Nni nroromele hai wi Yehova onamunikhaviherya opaka matorokelo? Nnanwerya olipiheya orweela wa yoororomeliha ya Yehova yeeyo aapankeiye wa Aisarayeli awiirumiha mmahiku a Esekiyeli: “Kinamwaavaha murima mmoha, kihelemo mpuwa mwaya munepa wa hihano . . . kihelemo murima weetheyi [eyo tiwi, murima wookhweya ochariha ohoolela wa Muluku].” (Ezek. 11:19) Yehova aari ooreheryeya waakhaviherya Aisarayeli opaka matorokelo, navetho owo ori ooreheryeya onikhaviherya.

12-13. (1) Mwawiiwanana ni Salumu 119:59, tiheeni nnaphwanelaahu wuupuwelela? (2) Makoho taani munaphwanelaanyu wiipakela?

¹² Wuupuwelela ori mukhalelo wanaawiili woochuneya. Vaavaa nnaalakhanyaahu moopwacha Masu a Muluku nihiku ti nihiku, nnaphwanela omaliha elukuluku nuupuwelelaka, naari wuupuwela mwawiiseela, xaxaxa vooloca sa muupuwelo ni moonelo yoowo nnaphwanelaahu otoroka. (Mwaalakhanye Salumu 119:59; Ahe. 4:12; Tiy. 1:25) Nnaphwanela osuwela muupuwelo ni moonelo vyakala ovoloweliwe ni miruku seelapo. Moororomeleya neemererye sooceecheya sahu nave voocharela niilipiherye ovootha seiho.

¹³ Mwawiihiiha, mwiikohe: ‘Apwanne kookhalano nrima na vakhaani mmurimani mwaka?’ (1 Ped. 2:1) ‘Apwanne kinnakhala awiirumiha nthowa na nipuro kiyariwaakawo, mahusiheryo, naari waaca wa ikhorowa kiryaakano?’ (Masi. 16:5) ‘Apwanne kinuupuwela wi achu yaale ahirino ichu soolikana ni seiho kiryaakano, naari ari oohiyana mwiili ni miyaano kinawoona wi tahi echweenevo?’ (Tiy. 2:2-4) ‘Apwanne kinnakuseya murima ni ichu seiho elapo ya Satana enavahaaya?’ (1 Yoh. 2:15-17) ‘Apwanne kinnahakalala ni mathatelo oocapaheya naari a nlala?’ (Sal. 97:10; 101:3; Amo. 5:15) Maakhulo a makoho yaala anahaala ohiya vanlakani makupa yaawo munaphwanelaanyu wiilipiserya otoroka. Vaavaa nnaweryaahu otoroka muupuwelo naari moonelo woolipa, nnahaala omuhakalaliha Tiithi ahu awirimu.—Sal. 19:14.

14. Ntakhara heeni waathanla asinthamwene aphaama eraaya echu yookhweleya?

¹⁴ Waathanla asinthamwene aphaama ori mukhalelo waneeraru woochuneya. Moohipwacha waakhanle wi ninnasuwela naari hooye, ninnavoloweliwa mwakuru ni asinthamwene ahu. (Masi. 13:20) Omutekoni naari osikola, ninnarukureryiwa ni achu yaawo ahinahaala onikhaviherya okhalano muupuwelo woomuluku. Mwawiihiiha, nnawerya waaphwanya asinthamwene aphaama mmithukumano sahu Seekristu. Mmithukumano, ti mwemmo nnahaalaahu oceenyeryiwa, naari olipihiwa, mu “osivela ni mwa miteko yaphaama.”—Ahe. 10:24, 25.

MUKHALE “OOLIPIHIWA MU NROROMELO”

15-16. Satana oneererya hai otoroka muupuwelo ahu?

¹⁵ Muupuwele wi, Satana ori oolakelela otoroka muupuwelo ahu. Owo onnapharihela mikhalelo mincipale wi anihuwelihe mu eparipari ya Masu a Muluku.

¹⁶ Satana onnatitelela opaka nikoho nimohamoha nenlo aampakenleiye Eva mu emaca ya Eteni: “Evelevelo wi Muluku ooloca wi  . . ?” (Map. 3:1) Mu elapo yeela enalamuleliwa ni Satana, wiiliwiili ninniiwa makoho yaawo yaahaala oneeriha okhwa minikwa soororomela sahu, ntoko: ‘Apwanne Muluku haneemererya othelana achu a mwiikho woolikana? Munoona wi Muluku hanachuna chiryene wi mmuupuweleke Nataale naari nihiku na oyariwa? Mano, eparipari wi Muluku anyu onnawatiiha moomalela ovahereryiwa nikhami? Apwanne Muluku onaweherya wi muhaataaneke ni oosiveliwaanyu iikariwe mmulokoni?’

17. Tiheeni nnaphwanelaahu opaka wakhala wi muchu onnapaka makoho vooloca sa soororomela sahu eereryaka otannya minikwa? Nave mwawiiwanana ni Kolosi 2:6, 7 teevi eni ekhumelele?

¹⁷ Nnaphwanela olekecheya ni soororomela sahu. Wakhala wi hinnaphwanya maakhulo a makoho oochuneya vooloca sa soororomela sahu, nnampacerya okhwa minikwa waakhanle wi yeeyo nneemereryaahu ti yeeparipari. Minikwa seiho inahaala okhoromanya muupuwelo, ni nroromelo nahu. Vano, tiheeni nnaphwanelaahu opaka voocharela? Masu a Muluku annanleela wi nnaphwanela otoroka muupuwelo ahu, wi neererye woona “okhwela wa Muluku, wi ti waphaama woohakalaliha ni wa waakhwanela.” (Aro. 12:2) Moorweela wa ohuserya moohihiyererya, nnahaala weererya woona iparipari seiyo nihusenryaahu Mpiipiliya. Nave nnamulekecheya chiri wi malamulo a Yehova tawookololowa. Voocharela, hiiha ntoko mwiri orino mitathari soolipa, nnahaala okhala oothipeleya phaama, eyo tiwi “oolipihiwa mu nroromelo.”—Mwaalakhanye Kolosi 2:6, 7.

18. Tiheeni enahaala onikhaviherya ovootha ovolowela wa evenenu ya elapo ya Satana?

¹⁸ Haavo muchu onahaala olipiha nroromelo nanyu, mwa yeeyo mutitelele otatusa mukhalelo anyu muvyaani wa wuupuwela. Mvekeleke moohihiyererya; mvekaka nikhaviheryo na munepa wa Yehova. Muupuwelele mwawiiseela; mutitelele waalikhela muupuwelo anyu ni meerelo anyu. Nwaavye asinthamwene aphaama; mwaathanle asinthamwene aphaama yaawo anahaala wookhaviheryaani otatusa muupuwelo anyu. Wakhala wi moheerano yeela, munahaala ovootha ovolowela wa evenenu ya elapo ya Satana nave munamukhumelela phaama mu omwarya “mupuwelo awisona ni otokweene woothene onawana ni osuwela wa Muluku.”—2 Kor. 10:5, BNM.