MWAHA WOOHUSERYA 46
Apwanne Munnakhapelela “Yawiisakihano ya Nroromelo” Nanyu?
“Mpharele yawiisakihano ya nroromelo.”—ÉFE. 6:16.
NCIPO 119 Ti Woochuneya Okhalano Nroromelo
YEEYO NNAHAALAAHU OHUSERYAa
1-2. (1) Mwawiiwanana ni Éfeso 6:16, ntakhara heeni nnachunaahu “yawiisakihano ya nroromelo”? (2) Makoho taani nnahaalaahu othokororya?
APWANNE mookhalano “yawiisakihano ya nroromelo”? (Mwaalakhanye Éfeso 6:16.) Moohikhwa minikwa nyuwo mookhalano. Hiiha ntoko yawiisaakihano enakhapelelaaya mwiili woothene, nroromelo nanyu ninnookhapelelaani orweela wa ichu soonanara sa elapo yeela, ntoko ocapaheya, nlala, ni ichu vyakala seiyo sihiniiwanana ni malamulo a Muluku.
2 Nyenya nnakhala “mmahiku ookuchula,” nave nroromelo nahu nnahaala otitelela weehiwa. (2 Tim. 3:1) Muni mwaalikhele hai yawiisaakihano ya nroromelo nanyu wi muroromele wi yoolipa? Nave tiheeni muneeraanyu mpake wi mulipihe nroromelo nanyu? Hankooni nthokororye maakhulo a makoho yaala.
MWAALIKHELE MOOPWACHA YAWIISAAKIHANO ANYU
Emanle owana ekhoco, anakhoco yaanarehererya sawiisaakihano saya nave yaanakhapelela (Moone eparakrafo 3)
3. Tiheeni akhoco yaapakaaya ni sawiisaakihano saya, nave ntakhara heeni?
3 Mu elukuluku ya khalai, akhoco yaanakhalano yawiisaakihano yeeyo yaahuruweliwa ni nnyapara. Akhoco yaanahela makhurwa yawiisaakihano aya wi makupa yaawo saakhalamo mithipo ehinyeele murawa. Wakhala wi mukhoco oosuwela wi yawiisaakihano awe yoonanara, owo aanarehererya wi akhale ooreheryeya ntakhara ekhoco yoocharela. Yootakiherya yeela enaphariheleya hai wa nroromelo nanyu?
4. Ntakhara heeni munnaphwanela waalikhela yawiisaakihano ya nroromelo nanyu, nave muni mweereno hai eyo?
4 Moolikana ni akhoco a ilukuluku sakhalai, munaphwanela waalikhela ni okhapelela yawiisaakihano ya nroromelo nanyu wi mukhale ooreheryeya ntakhara ekhoco. Ntoko Akristu, ninnawaniha ekhoco yoomunepani nave amwiicani ahu minepa soonanara. (Éfe. 6:10-12) Haavo muchu onahaala okhapelela yawiisaakihano anyu mu nipuro nanyu. Muni muroromele hai wi muri ooreheryeya ohoolela saweeha? Yoopacerya, munaphwanela omveka Muluku nikhaviheryo. Voocharela, mpharihele Masu a Muluku wi yookhaviheryeeni woona omuchu anyu hiiha ntoko Muluku onawooneiyeeni. (Ahe. 4:12) Piipiliya oni: “Waaroromele Apwiya [Yehova] ni murima aa woothene; ohiilipihe ni osuwela waa.” (Masi. 3:5, 6) Ni yeela mmuupuweloni, munoona hai opacerya waalikhela soolakelela mpankaanyu hiihaanoru? Ntoko yootakiherya, apwanne moohoolela nikacamiho ntokweene vooloca sa ichu soomwiilini? Apwanne mwaahuupuwela yoororomeliha ya Yehova enaphwanyeya mu Ahebri 13:5 eni: “Nkirwa koohiya, naari woonyanyala mano”? Apwanne yoororomeliha yeela yaahiweerihaani ororomela wi Yehova aahaala wookhaviheryaani? Waakhanle wi ti hiiha, eyo enooniherya wi munnakhapelela yawiisaakihano anyu mmukhalelo waphaama.
5. Tiheeni muneeraanyu moone mmanle waalikhela nroromelo nanyu?
5 Nyuwaano akhweya mootikhiniheya ni yeeyo monnaanyu mmanle waalikhela nroromelo nanyu moopwacha. Munanwerya woona oceecheya yoowo mwahantonko anyu woona khalai. Ntoko yootakiherya, akhweya moosuwela wi wuukhuwa woopwahererya, sawootha, ni sooceecheiha saahinanariha nroromelo nanyu. Waakhanle wi ela yoheereya ni nyuwo, tiheeni muneeraanyu mpake wi nroromelo nanyu ntitelele okhapeleleya?
MWIIKHAPELELE ORWEELA WA WUUKHUWA WOOPWAHERERYA, SAWOOTHA, NI SOOCEECHEIHA
6. Sootakiherya taani ikina sa wuukhuwa waphaama?
6 Mikhalelo mikina sa wuukhuwa ti saphaama. Ntoko yootakiherya, ninnakhala awuukhuwa wi nimuhakalalihe Yehova ni Yesu. (1 Kor. 7:32) Wakhala wi noopaka yoocheka etokotoko, ninnakhala awuukhuwa nichunaka orehererya onthamwene ahu ni Muluku. (Sal. 38:18) Ninnakhala tho awuukhuwa noovaka omuukhula oothelana ahu ni waakhapelela achu aveemusini vahu ni akhwiihu a munroromeloni.—1 Kor. 7:33; 2 Kor. 11:28.
7. Mwawiiwanana ni Masiposipo 29:25, ntakhara heeni hannaphwanela owoova achu?
7 Mmakupa makina, wuukhuwa woopwahererya onanwerya opahula nroromelo nahu. Ntoko yootakiherya, nnamukhala awuukhuwa moopwahererya nthowa na ohikhalano yoolya naari soowara. (Mat. 6:31, 32) Wa nthowa na yeeyo, nnamukhala otikitheryeya mu waavya ichu soomwiilini. Ophiyerya wi nnamunnuwiha nchuno na osivela ikhorowa. Wakhala wi noheemererya ela weereya, nroromelo nahu wa Yehova nnahaala oceecheya nave nnahaala ohooseya ni epahu etokotoko yoomunepani. (Mar. 4:19; 1 Tim. 6:10) Naari nnamukhalano wuukhuwa woopwahererya vooloca sa okhalano weemererya wa akina. Voocharela nnamukhala awoova nthowa na onyemuliwa naari wiikariwa ohiya woova omuthananiha Yehova. Wi niikhapelele wa yawoopiha yeela, nnaphwanela omveka Yehova wi anivahe nroromelo ni olipa murima nnachunaahu wi nihoolele nikacamiho nenna.—Mwaalakhanye Masiposipo 29:25; Luka 17:5.
(Moone eparakrafo 8)b
8. Nnaphwanela waakhulela hai sawootha?
8 Satana yoowo ori “tiithi a wootha,” onnaapharihela achu awe wi emwaramwaxe sawootha vooloca sa Yehova ni anna ni arokora ahu. (Yoh. 8:44) Ntoko yootakiherya, alipa oomwaryeya annavuwiha sawootha nave annakhoromanya eparipari vooloca sa marehereryo a Yehova mu isaiti naari orweela mu televisau ni mmikhalelo mikina. Sawootha iho iri variyari va “mavaka oovarela” a Satana. (Éfe. 6:16) Tiheeni nnaphwanelaahu weera wakhala wi muchu oopacerya onileela sawootha ntoko seiha? Hannaphwanela owiriyana! Ntakhara heeni? Nthowa nawi nookhalano nroromelo mwa Yehova nave ninnaaroromela annihu. Mweeparipari, ninnasepa olocihana ni alipa oomwaryeya. Hinnamweemererya muchu naari echu vyakala, ophitaanyerya ochuna osuwela ichu wi sineerihe ovaanyihana ni yaawo.
9. Oceecheya onanivolowela hai?
9 Sooceecheiha inanwerya onyikalela vathi nroromelo nahu. Nnaphwanela othokororyaka makacamiho ahu. Mweeparipari, hiyaahaala okhala yaphaama ohithokororya. Nave mu elukuluku ekina nnamukhala ooceecheya. Nyenya hannaphwanela wuupuwelaka makacamiho ahu elukuluku yoothene. Wakhala wi noheerano eyo, nnahaala oyeleela ewehereryo yoohakalaliha yeeyo Yehova onivanheiye. (Wup. 21:3, 4) Moonelo wooceecheya onamunyikalela vathi ikuru sahu nave onimaaliha omurumeela Yehova. (Masi. 24:10) Nyenya eyo eheereye ni hiyo.
10. Tiheeni muhusenryaanyu orweela wa ekaarata erempwale ni murokora?
10 Muthokororye mukhalelo murokora mmoha o Estatu Unitu onalipiheiye nroromelo nawe vaavaa onamukhapeleleiye iyawe yoowo oniiceliwa ereca etokotoko. Mu ekaarata aarepenleiye o nipuro ntokweene, owo aariye: “Nikacamiho nahu ti noovelaveliha nave ninnaceecheiha mu ilukuluku, nyenya nroromelo nahu ti noolipa. Kinnathamalela ichu soothene Yehova onanivaheiye wi nlipihe nroromelo nahu nave sinceenyerye. Ninnachuna chiryene ekano yeela ni nlipiho. Ela ennanikhaviherya otitelela omurumeela Yehova ni ovilela saweeha seiyo Satana onaphariheleiye wi anceecheihe.” Noohuserya orweela wa masu a murokora yoola wi nnanwerya ovootha sooceecheiha! Mwawiihai? Moone saweeha sanyu ntoko weereryiwa onarweela wa Satana. Muroromele wi Yehova onahaala woohakararyaani. Nave muthamalele yoolya yoomunepani yeeyo owo onavahereryeiye.
Apwanne munnakhapelela “yawiisaakihano ya nroromelo” nanyu? (Moone eparakrafo 11)c
11. Wi naalikhele mukhalelo wa nroromelo nahu, makoho taani nnaphwanelaahu wiipakela?
11 Apwanne mohoona wi nroromelo nanyu ninnachuneya olipihiwa? Variyari va miyeeri vakhaani ivirale, apwanne moowerya ovootha wuukhuwa woopwahererya? Apwanne mookhooca owiriyana naari waakhulana ni achu oomwaryeya vooloca sa sawootha seiyo awo anamwaramwaxaaya? Nave apwanne moowerya ovootha sooceecheiha? Waakhanle wi tihiiha, nroromelo nanyu nri mmukhalelo waphaama. Nyenya nnaphwanela okhapelela nthowa nawi Satana ookhalano mavaka makina yaawo owo oneereryeiye opharihela wa hiyo. Vano hankooni nthokororye nimoha na mavaka yaawo.
MWIIKHAPELELE ORWEELA WA WIITHUKUMANYERYA
12. Wiithukumanyerya onahaala oneeriha opaka eheeni?
12 Wiithukumanyerya onamuneeriha okhala awaakanyeryeya nave nihikhapelele yawiisaakihano ya nroromelo nahu. Murummwa Paulo ooloca: “Haavo mukhoco onaweiwa ni muteko mukina, voohikhala omuhakalaliha yoowo omurempe onakhoco.” (2 Tim. 2:4) Mweeparipari, akhoco o Roma hiyeemereryiwa wiivoliiherya mmuteko naari mu nakoso vyakala. Tiheeni yeereya waakhala wi mukhoco haacharinhe yooveka yeela?
13. Ntakhara heeni nakhoco haaphwanela wiivoliiherya ni nakoso?
13 Muupuwele yaweereya ela. Nikhuuru na akhoco ninnamaliha wooxixelo woothene niivyakihaaka ni malema aya, nyenya mukhoco mmoha oophwahavo. Mukhoco owo ori ooweiwa opooma atumihaka yoolya o musika. Oxekuwa, akhoco annamaliha elukuluku erehereryaka mavakaaya nave enolaka malema aya. Nyenya mukhoco yoole onatumiha yoolya onamaliha elukuluku arehereryaka yoolya wi atumihe mu nihiku nnacharela. Wooxixelo, amwiicani annaphiya wi ehiphele epooma. Nakhoco taani ori ooreheryeya wi awanihe nave akhaleno weemererya wa muhooleli a akhoco? Nakhoco taani mwaahaalaanyu omuthanla okhala mmakupa anyu? Apwanne ti yoole ori oomaaleleya nave iireherenrye naari ti yoole aaweiwe nnakoso?
14. Woona wi na anakhoco a Kristu, tiheeni eri yoochuneyasa wa hiyaano?
14 Hiyo nri ntoko akhoco yaale aphaama. Echu yookhweleya vancipale wa hiyo ori waahakalaliha ahooleli ahu, Yehova ni Yesu. Waahakalaliha awo, nnoona okhala echu yookhweleya opwaha echu vyakala elapo ya Satana eneeraaya enivahe. Hiyaano ninnapaka owetha wahu ni ikuru sahu wi nimulapele Yehova ni okhapelela ohiya pahiru yawiisaakihano ya nroromelo nahu, nyenya tho makupa makina a mavaka ahu oomunepani.
15. Olopola taani murummwa Paulo onivanheiye, nave ntakhara heeni?
15 Hiyaano hanaphwanela ovolola! Ntakhara heeni? Murummwa Paulo oolopola wi “yaawo anachuna okhala a muhakhu” anahaala ‘ohuwela ehiye nroromelo.’ (1 Tim. 6:9, 10) Masu awi ‘ohuwelihiwa’ enooniherya wi, nnamukhala awaakanyeryeya neereryaka ophwanya ichu soomwiilini seiyo ihiri soochuneya. Nnahaala ohela murima ahu va yawoopiha ya “soochunachuna sincipale soololo.” Ohiya weemererya ichu iho ovolowa mmurimani mwahu, nnaphwanela woona iho ntoko ikhanlaaya—mavaka yaawo eni eceecheihe nroromelo nahu.
16. Mwaha onalociwa mu Marko 10:17-22 onaphwanela oneeriha wuupuwelela makoho taani?
16 Akhweya mookhalano ikhorowa sawaakhwanela wi muthume ichu sincipale. Apwanne ti yooheseya othuma ichu seiyo nnachunaahu, nyenya sihiri soochuneya? Tahi yeeyo. Nyenya muupuwele makoho ala: ‘Naamwi kirino ikhorowa wi kithume echu, apwanne kookhalano elukuluku ni ikuru wi kipharihele nave kikhapelele? Apwanne kookhalano ineneeryo sa oteteiwa ni ichu seiyo kiryaakano? Apwanne oteteiwa weiwo ni ichu kiryaakano, onahaala okeeriha okhala ntoko mmiravo ole aaheemerenrye nwopelo wa Yesu?’ (Mwaalakhanye Marko 10:17-22.) Moohikhwa minikwa, echu yaphaama ori okhweiha okumi ni omaliha elukuluku ahu ni ikuru soochuneya nipakaka yookhwela ya Muluku!
MUTITELELE OPHARELA YAWIISAAKIHANO YA NROROMELO NANYU
17. Tiheeni nihinaphwanelaahu ocuwala?
17 Muhicuwale wi nri mu ekhoco. Nnaphwanela okhala ooreheryeya mahiku oothene wi niwanihe. (Wup. 12:17) Anna ni arokora hanahaala oteesa yawiisaakihano ya nroromelo nahu mu nipuro nahu. Murici wa opharela moolipa ti wawihu.
18. Ntakhara heeni anakhoco a ilukuluku sa khalai yaapharelaaya moolipiha yawiisaakihano aya?
18 Mu ilukuluku sa khalai, nakhoco yoowo ooniherya olipa murima elukuluku ya ekhoco aanaakhela ophwanelela. Nyenya akookela owaani ahirino yawiisaakihano, owo aanuuliheya muru. Mulipa a miyaha o Roma Tasitu oorepa: “Oyeleela yawiisaakihano ori munyemu mutokweene.” Ti nthowa nene anakhoco yaapharelaaya moolipiha yawiisaakihano aya.
Murokora mmoha onnawerya opharela moolipiha yawiisaakihano ya nroromelo nawe woona wi onnaalakhanya Masu a Muluku, onnaphwanyeya mmithukumano ni onnapaka owetha wawe mmuteko woolaleerya (Moone eparakrafo 19)
19. Nni nipharele hai moolipiha yawiisaakihano ya nroromelo nahu?
19 Hiyaanotho nnaphwanela opharela moolipiha yawiisaakihano ya nroromelo nahu. Mwawiihai? Moorweela wa ophwanyeya mmithukumano sahu ni olocaka sa Yehova ni Omwene awe wa akina. (Ahe. 10:23-25) Ohiya yeeyo, nnaphwanela omwaalakhanyaka Piipiliya mahiku oothene ni ovekela wi Yehova anikhaviherye opharihela yeeyo owo onanihusiheiye. (2 Tim. 3:16, 17) Napaka yeela, hinaavo nivaka na Satana nnahaala onitoloxa moomalela. (Isa. 54:17) “Yawiisaakihano ya nroromelo” nahu enahaala onikhapelela. Nnahaala okhala aweemeleleya, vamoha ni anna ni arokora. Nave nnahaala opaka ichu sawaaca opwaha ovootha wahu nihiku ti nihiku—nnamukhalano ekari ya omoona Yesu avoothaka ekhoco ntakhara Satana ni masololo awe.—Wup. 17:14; 20:10.
NCIPO 118 “Atxereryà Mwa Hiyo Nroromelo”
a Akhoco yaaroromela yawiisaakihano aya wi yiikhapelele wa echu yawoopiha. Nroromelo nahu nnalikana ni yawiisaakihano. Nave hiiha ntoko mukhoco aaphwaneleiye okhapelela yawiisaakihano awe, hiyaano nnaphwanela okhapelela nroromelo nahu wi nroromele wi ninnatitelela okhala noolipa. Mwaha ola onathokororya yeeyo nneeraahu nipake wi nroromele wi “yawiisakihano ya nroromelo” nahu eri mmukhalelo waphaama.
b ERUKU VA EPAAXINA: Emusi emoha enamoona televisau vaavaa onakhumelelaaya muchaka onarweela wa alipa oomwaryeya elocaka sawootha vooloca sa Anamoona a Yehova.
c ERUKU VA EPAAXINA: Moohilekela tiithi onnanwala televisau. Ohoolo waya, mu malapelo eechoko, tiithi onnampharihela Piipiliya wi alipihe nroromelo na emusi awe.