Kuxani Yootakiherya ya Alipa Miririmo—Mikeya
1. Nikoho taani Mikeya akhweya uupuwenleiye, nyenya ntakhara heeni olaleerya wawe hiwaari wa mahaleene?
1 ‘Ti liini makuchuwelo a mukhalelo ola wa ichu eneeraaya ephiye?’ Mulipa miririmu Mikeya akhweya aahuupuwela nikoho noolikana vaavaa alaleereiye michaka sa othoriha wa Yehova wa mamwene o Isarayeli ni o Yudeya. Nivano olaleerya wawe hiwaari wa mahaleene. Mu 740 E.E.K. mmahiku a Mikeya, masu a Yehova vooloca wa Samariya yaahaakhwanela. (Mik. 1:6, 7) Ohoolo waya, Yerusalemu aatoloxiwa mu 607 E.E.K. (Mik. 3:12) Nni nimutakiherye hai Mikeya vaavaa nnaweheryaahu waakhwaniheryeya wa othoriha wa Yehova mmahiku ahu?
2. Nnii nooniherye hai opisa-murima vaavaa nnaweheryaahu nihiku na Yehova, nave ntakhara heeni?
2 Khalani Oopisa-murima: Mikeya aarepa: “Nto miyano kinawehererya Apwiya Muluku aka anakivulusà.” (Mik. 7:7 BNM) Mwa yeeyo, Mikeya haaweherya makuchuwelo arimmaala. Owo aahiikhalelaru ntoko mulipa miririmu a Yehova. Vaavaa nnaweheryaahu nihiku na Yehova, hiyo tho nnaphwanela oweiwa “m‵makhalelo awéla ni m‵mathamalelo.” (2 Pet. 3:11, 12) Opisa-murima wa Yehova onnaavaha achu elukuluku ya ocharuwa. (2 Pet. 3:9) Mwawiihiiha, hiyo ninniiwelela olopola woomuluku wi nikuxe yootakiherya ya opisa-murima wa alipa miririmu.—Yak. 5:10.
3. Ntakhara heeni nnaphwanelaahu omveka Yehova munepa awe waweela?
3 Roromelani Olipiha wa Yehova: Naamwi Mikeya aakhanleno orummwa wookacamiha, owo aahaavya olipiha wa Yehova wi aakhwanihe orummwa awe. (Mik. 3:8) Tahi mahaleene Masu a Yehova ananceenyeryaaya omuroromela Muluku wi anlipihe. Owo mwa mahala onnaavaha ikuru ooceecheya wi yaakhwaniherye mirici saya soomuluku. (Sal. 84:5, 7; Yes. 40:28-31) Montoko mukhatinyu olawiha yeela mu okumi anyu wa muteko waweela? Munnamveka Yehova nikhaviheryo na ikuru sa munepa awe waweela moohihiyererya?—Luka 11:13.
4. Yootakiherya taani yaphaama okumi wa Mikeya onanivahaaya olelo?
4 Mu okumi awe, Mikeya aahela yookhwela ya Muluku mu nikupa noopacerya. Owo aathanla otitelela okhala oororomeleya naamwi aarukureryiwe ni mukhalelo woonanara. Moolikana, ororomeleya wahu onneehiwa nihiku nnihiku. Hankooni nlipihe yoothanla ahu ya ‘omwiwelela [Yehova] Muluku ahu mahiku othene’.—Mik. 4:5. (BNM)