Oosiveliwa ni Irevista—Oophwanelela Opaceryano Soohuserya sa Piipiliya
1. Ntakhara heeni moovira va elukuluku marehereryo a Yehova annaaceenyerya alipa oolaleerya wi ekhaleno oosiveliwa ni irevista?
1 Achu ancipale hanasiveliwa omuhuserya Piipiliya ni hiyaano, nyenya awo annasiveliwa waalakhanya irevista sahu. Mwawiihiiha marehereryo a Yehova moovira wa elukuluku annaaceenyerya alipa oolaleerya wi ekhaleno oosiveliwa ni irevista. Vaavaa achu anaalakhanyaaya irevista sahu, wiiliwiili sinnaweeriha ochuna Masu a Muluku. (1 Pet. 2:2) Mu elukuluku ekina, mu yeeyo anaalakhanyaaya annaphwanyavo echu enaloca sa mukhalelo aya eweerihaka weemererya yoohuserya ya Piipiliya.
2. Nnahaala wunnuwiha nchuno na yaale anasiveliwa ni irevista sahu mwawiihai?
2 Ohela Maahi Mmiso wa Eparipari: Ohiya pahiru okawa irevista, mumvoliiherye namakhala mu ovaanela nave mweererye opaka onthamwene ni yoowo. Ela enahaala wookhaviheryaani osuwela makhalelo, soochuna, ni soororomela sawe, yeeyo enahaala oweerihaani oloca ni yoowo mwa miruku. (Masi 16:23) Mwiirehererye wa erevisita eri yoothene. Wakhala wooweryeya, mwawaakuveya mvuwihe eponto ni yoorepa enarweela mu irevista, muhelaka maahi mmiso wa eparipari mmurimani mwawe. (1 Akor. 3:6) Murepe etaata ya khata erevisita, ni yoolaleeryiwa yeeyo mumvanhaanyu, mwaha ni yoorepa muthokoronryaanyu.
3. Ikwaha hai nnaphwanelaahu okookela waaxekurya yaale ari oosiveliwa ni irevista?
3 Okookelawo Ikwaha Hai?: Nyuwano munaphwanela okookelawo khata mweeri wi mmukerihele irevista sookuchula. Nyenya, mwawiiwanana ni makhalelo anyu nari ochuna wa khata muchu, nyuwano poti olakelela okookelawo ikwaha sincipale. Ntoko yootakiherya, esumana emoha nari piili mmanleene ovaha irevista, munaphwanela okookelawo ni oloca, “Mi koohapuwa wi mwawaakuveya kiloce iponto sinakhumela mu erevista koohiyenryaakani”. Ela enahaala otan‵nya nchuno na waalakhanya mwaha. Wakhala wi owo ohaalakhanya, nyuwano poti omukoha tiheeni onuupuweleiye vooloca sa mwaha nave muthokororye mwa waakuveya. Nari wakhala wi owo onnasiveliwa waalakhanya soolaleeryiwa sahu, nyuwano poti okookelawo nave mumvahe etratato, eproxura, nari liivuru nnamvahaahu mweeri yoowo.
4 Moovira wa elukuluku, tiheeni nnaphwanelaahu weera wi noone waakhanle wi yaale anasiveliwa waalakhanya irevista annachuna yoohuserya ya Piipiliya?
4 Muhiweherye wi namakhala oovekeeni yoohuserya. Mmpacerye yeenyu ene. Naamwi owo aakhoonce yoohuserya ya Piipiliya khalai, moovira wa elukuluku nyuwano poti otheteye “Perguntas Bíblicas Respondidas” enarweela mu A Sentinela nave moone waakhanle wi onnachuna othokororya ni nyuwano. Akhweya munanwerya opaceryiha yoohuserya ya vamukhorani. Nyenya, wakhala wi hamunawerya opaceryiha yoohuserya, nyuwano poti okookela omuruuhela irevista wi munnuwihe nchuno nawe.