Macipo Mavyaani a Malapelo!
1 Muthukumano wa vayaakhani wa hiihaanoru wa Watch Tower Bible and Tract Society of Pennsylvania, yoowo weeriweno mu 4 a Otupuru a 2014, yaalokohiwa marehereryo a otorokiwa liivuru ahu a macipo. Yoolokoha ela yaari yoohakalaliha! Oothene yaarivovo yaahuupuxeryiwa ochuneya wa macipo mmalapelo ahu.—Sal. 96:2.
2 Akhweya nyuwaano munanwerya okoha, ‘Ntakhara heeni ti woochuneya otoroka macipo?’ Aakhalavo mathowa mancipale. Nthowa noopacerya na oothene, wiiwexexa wahu wa soorepa onanvira oyaaka ohoolo ni orehereya, nave eyo ennavolowela masu a macipo ahu. (Masip. 4:18) Nthowa nikina nnaneeriha otoroka: Masu mancipale aphariheliwe mu liivuru ahu a macipo nryaahuno anarweela mu Tradução do Novo Mundo. Nave masu awo anaphwanela otorokiwa wi yiiwananeke ni masu a Piipiliya muvyaani. Muteko muncipale onahaala ochuneya weeriwa wi eruuhiwe macipo awo mu elukuluku aya, nave tho yoolakeleliwa waacereryiwa vakhaani macipo mavyaani mu liivuru a macipo.
3 Nnaphwanela oweherya ophiyerya liivuru a macipo mavyaani akumihiwe wi nipacerye wiipa? Hooye. Ninnahakalala wooleelaani wi miyeeri sa vakhaani sinacharela, macipo mavyaani anahaala ovonyiwa mu site, jw.org. Vaavaa ncipo nivyaani nnavonyiwaaya, nnahaala okuhiwa omakuchulo wa makupa a muthukumano wa muteko ni masu awi “ncipo nivyaani.”
4 Nnii Nihuserye Hai Macipo Mavyaani: Onachuneya wiilipixerya wi muhuserye. Nlelo, ntoko oomurepa Salmo, nnaphwanela wiipaka ni masu oovuwa mmithukumano “ni ohikhalaru chú.” (Sal. 30:12) Wi muhuserye macipo mavyaani, mucharihe ikano inacharela.
• Muwiriyaneke wiiliwiili macipo ookaravaariwa aniipiwa ni piyano, yaawo anahaala ovonyiwa mu site ahu. Mwaanawiriyana elukuluku yincipale, onahaala okhala wookhweya wuupuwelela.
• Muhuserye masu a ncipo, nave mwaavyaavye okuha mmuruni.
• Mwiipe mucharihaka ncipo nookaravaariwa nniipiwa ni piyano. Mweere yeela ophiyerya okhovelela.
• Variyari va malapelo a echoko mwaavye elukuluku ya vakhaani wi mwiipeke ncipo nivyaani ophiyerya echoko anyu ekhovelele.
5 Wakhala wi ncipo nivyaani nookuhiwa omakuchuwelo wa makupa a muthukumano wa muteko, muloko onaphwanela opacerya owiriyana ncipo nookaravaariwa nniipiwa ni piyano. Voocharela alipa oowiriyana anahaala wiipaka echarihaka ncipo nookaravaariwa nniipiwa ni piyano, hiiha ntoko nneeraahu ni macipo makina.
6 Wuupuwela sa yeela, wiilipixerya wiipa mmithukumano onnaruuhela ohakalala wiiwananiha masu ahu wi nimucicimihe Yehova. Mwa yeela, hinnaphwanela okhalano yookhovelela ya okhala vaate vaavaa nniipiwaaya ncipo noohulela na mithukumano sahu Seekiristu.
7 Aakhalavo makhalelo makina nnaphwanelaahu weera wi nooniherye othamalela wa macipo ahu aweela. Omuthukumano wa ekulucu ni wa muceche, onnarumihiwa muusika wi ohulele nikupa nri noothene. Ikwaha piili vayaakhani, anna ni arokora awiiveleela oorweela mmakupa oohiyanahiyana a elapo annalivela mukwaha ni ikhorowa saya oya o Patterson, New York, wi epake macipo ooreera wi ephariheliwe mmalapelo ahu. Vanthowa na yeela, vaavaa muhooleli a nikupa onaniwopeiye wi nikiraathi mmapuro ahu ni owiriyana muusika orehereryiwe, nnaphwanela wiiwelela yeeyo. Wiiwelela wahu onahaala onikhaviherya orehererya murima ahu wa mahusiheryo anacharela.—Estra 7:10.
8 Wookuchulani wa muthukumano ahu wa olelo, nnahaala wiipa ncipo nimoha na yaawo mavyaani nrino muru “Omwene Onnalamulela.” Ncipo nenla, naaperekhiwa o muthukumano wa vayaakhani wa hiihaanoru, nla naari ncipo navameekhaaya naarehereryiwe wi nivuwihe iyaakha 100 na oyariwa wa Omwene.
9 Macipo mavyaani mweeparipari ichu “saphama” soorweela wa Yehova. (Mat. 12:35a) Hankooni oothene nikhaleno ntoko yoolakelela ahu ohuserya macipo mavyaani ni wiipa ni murima woothene, nimvahaka ncicimiho noophwanelela ni omuthamalela Muluku ahu!—Sal. 147:1