Sawuupuxerya sa Muthukumano wa Muceche

◼ Elukuluku ya Mithukumano: Milako sa nipuro inahaala ohuliwa 7:00. Muusika onahaala opacerya 8:20 mmahiku ooraaru. Elukuluku yeeyo oothene hiyo nnaphwanela okiraathi mmipaco sahu wi mithukumano ipacerye mmukhalelo woophwanelela. Muthukumano onahaala omala 15:55 Naneethanu ni Nawoorowa nave Namurunku 14:45.

◼ ‘Mmuthamale Yehova ni Macipo’: Achu a Muluku akhalai yaanamuthamala Yehova ni macipo. Nave macipo annatitelela okhala makupa oochuneya a malapelo eeparipari olelo. (Masi. 28:7) Nikupa nri noothene na muthukumano ahu wa muceche anapacerya ni ncipo nooruma. Ala tahi macipo vyakala, nyenya anarehereryiwa wi enihusihe ni omuthamala Yehova. Mwawiihiiha, vaavaa oohoolela a nikupa onalokoheiye wi ncipo nooruma nnahaala opacerya, ti yaphaama okiraathi, owiriyana ni othamalela, ohiya ochekula. Neerano hiiha nnahaala wooniheryaka othamalela wahu wa anna a nikhuuru na Watchtower orkestra. Ikwaha piili vayaakhani anna ni arokora annalivela mukwaha ni ikhorowa saya oya Patterson, Nova York, wi erehererye macipo aphaama wi nipuheno. Nimanle owiriyana ncipo nooruma, muchu ori oothene onanwerya omuthamala Yehova moorweela wa opacerya wiipa macipo ahu a omwene.

◼ Nipuro na Soowela: Mapuro oothene a muthukumano wa muceche ninnakhalavo nipuro oneemexiwaavo soowela, wa yaale anahaala waakuvela ophiya anahaala ophwanya. Nipuro na soowela wiiliwiili nnakhala nooyeva, mwawiihiiha waahaala okhala waphaama wuuka ikaaro wakhala wooweryeya.

◼ Okuha Mipaco: Vaavaa nipuro nnahuliwaaya wooxixelo ori woothene, ninnoovekaani wi muhichimakele nipuro nookiraathi munachunaanyu ntoko wi munawanela ni anna akina. Ninnoovekaani wi munaapwacha akina, ohiya othokororya pahiru soochuna sahu nyenya sa akina. Munepa wa wiivaha onnanisuwanyeiha ntoko Akiristu eeparipari nave onnaweeriha akina omucicimiha Muluku. (Yoh. 13:34, 35; 1 Akor. 13:5; 1 Pet. 2:12) Mipaco inaphwanela okuhiwa pahiru wa yaale murulaanyuno vamoha, munakhalaanyuno veechokoni, naari ale munaahusihaanyu Piipiliya. Ninnoovekaani wi muhikuhe murupa naari echu ekina va mpaconi. Wiiwelela wanyu malakiheryo yaala anahaala waakhaviherya akina osuwela wi mapuro awo hakhaliweno. Soovahereryiwa mipaco savameekhaaya wa awuuluvala ni ooceecheya. Woona wi mipaco iha ti savakhaani, pahiru muchu mmoha naari apiili yaawo anaakhaviherya tanaphwanela okiraathino.

◼ Mawarelo Oophwanelela: Mawarelo ahu variyari va muthukumano wa muceche anaphwanela okhala oophwanelela, ohiya wooniherya mawarelo a elapo. (1 Tim. 2:9) Naamwi nri mu elukuluku ya wiichuuwa emanle makupa naari ehaakumve makupa, nnachuna osepa mukhalelo ori woothene wa mawarelo oohiphwanelela. Mwa yeeyo, enahaala okhala yaphaama owara ekaraxa ahu ya muthukumano ni ohuuliwa muru ovaha onamoona nakhalano ekari. Mawarelo ahu ni meecelo ahu variyari va muthukumano onoorwa henahaala pahiru waalekecha eekhaikhai wa michaka sa Piipiliya nyenya tho enahaala omuhakalaliha Yehova.​—Sof. 3:17.

◼ Mukhalelo Waphaama wa Opharihela Ikhankoonya: Ninnooniherya makhalelo aphaama variyari va mithukumano moorweela wa onwala naari omurehererya telefone naari ekhankoonya ekina wi sihaanyakule akina. Wakhala wi munapharihela maakina ookumiha iruku, eviitiyu, taapuleti naari ekhankoonya ekina, nnaphwanela waathokororyaka akina moorweela wa ohiwaakanyerya naari owiikicha akina. Hiyaano tho nnanwerya wooniherya makhalelo aphaama moorweela wa osepa orepa michaka naari email variyari va muthukumano.

◼ Yoolya ya Mitiya: Ninnoovekaani wi muruuhe yoolya yookhweya ohiya okhuma va nipuro na muthukumano wa muceche wi mwaavye yoolya variyari va ewora ya wiichuuwa. Yookuxerya ekhaani enaweryeya okuhiwa vathi va mpaco enaphwanela ophariheliwa muteko. Sookuxerya itokotoko sa soolya ni sookuxerya sa vitru hasineemereryiwa va nipuro na muthukumano wa muceche.

◼ Sooveleela: Hiyaano nnanwerya wooniherya othamalela marehereryo a muthukumano wa muceche moorweela wa opaka sooveleela soochuna va muthukumano wa muceche wi nikhaviherye muteko wa veelaponi yoothene. Exeeki eri yoothene enaphwanela orempwa “Associação das Testemunhas de Jeová de Moçambique.”

◼ Murece: Wakhala wi nyuwaano moolamuleliwa murece, ninnoovekaani wi mukuxe wawaakhwanela, ntakhara wi va muthukumano wa muceche hokhalavo.

◼ Isapatu: Ti yaphaama owara isapatu soophwanelela, inahaala wookhaviheryaani weeca mwaphaama.

◼ Soorepela Queira Visitar (S-43): Yoorepela Queira Visitar enaphwanela ophariheliwa wi nrepe miselo vooloca sa nchuno nri noothene nnaphwanyiwa mu olaleerya wa vanlakani variyari va muthukumano wa muceche. Soorepela inaphwanela oveleeliwa o Nipuro na Aliivuru naari ovahiwa namarepa a muloko mwakookela owaani.

◼ Irestaurante: Mucicimihe nsina na Yehova moorweela wa meecelo anyu aphaama mu irestaurante. Muware mmukhalelo onamphwanelela Mukiristu. Mwaarowaka mvahe yamahala wakhala wi yookhoveleliwa.

◼ Marehereryo a Ohaya: Nihiku na muthukumano wa muceche nihaakumve ophiya, Nikhuuru na ohaya ninnapacerya opaka marehereryo wi yaathokororye oothene yaale anaveka nipuro. Nrehereryo nenla ninnaacererya ohakalala nnalawihaahu moorweela wa okhala vamoha ntoko Akiristu. Nyenya, nuupuwelaka wi “sothe sene sereye mophwanelela ni mokwasulela,” nave wi onaphitaanyerya okhala phaama wa akina, sawuupuxerya vakhaani ti soochuneya. Yaale ari aleco vaate va munna anaphwanela okhala oohakalala ni yeeyo anavahiwaaya ni wiiwelela yeeyo enavekiwaaya. Awo anaphwanelela orehererya ekwartu nihiku nnihiku ehaakumve oya o muthukumano wa muceche ni ehaakumve orowa. Okhala muleco vaate va munna honamaliha murici wa muchu ti muchu othokororya yoolya awe ni yoowela. Mwawiihiiha, muchu ti muchu onaphwanela wiirehererya mmukhalelo yoola. Wiiwanana wahu ni wiiwexexa miyaha seiya enneeriha wi mulipa owaakhela aleco ooniherye ovaha wawe moochuna, ohiya va okhinyereryiwa. Mmukhalelo mmohamoha, yaale anakhala va nipuro na muthukumano wa muceche anaphwanela wiiwanana ni athoonyeryi wi nipuro na muthukumano ntitelele okhala naweela nihiku nnihiku.​—1 Akor. 14:40.

◼ Muteko Wawiiveleela: Muchu onachuna wiiveleela onaphwanela olokoha o Nikhuuru na Muteko Wawiiveleela va muthukumano wa muceche. Anamwane arino iyaakha sa oyariwa vathi 16 ananwerya tho okhaviherya phaama moorweela wa olapa ehooleliwaka ni tiithi, mukhapeleli, naari mutokweene mukina eemereryiwe ni tiithi naari mukhapeleli.