Kuxani Yootakiherya ya Alipa a Miririmo—Hapakukhi
1. Ntakhara heeni nnaphwanela wiilikanyiha ni mulipa a miririmu Hapakukhi?
1 Vaavaa nnahoolelaahu makacamiho a elapo ela yoonanara, nnanwerya wiisoona ntoko Hapakukhi, yoowo aamukonhe Yehova: “Munakòniheryani sohokololowa? Onaweryeya hai munan’weha pahi sohòsa?” (Hab. 1:3; 2 Tim. 3:1, 13) Wuupuwelela michaka sa Hapakukhi ni yootakiherya awe ya nroromelo, enahaala onikhaviherya okhala oovilela vaavaa nnaweheryaahu nihiku noothoriha na Yehova.—2 Ped. 3:7.
2. Nnii nooniherye hai wi nnakhala mu nroromelo olelo?
2 Okhala mu Nroromelo: Ohiya okhala ooteteiwa ni makacamiho awe, Hapakukhi aahiikhalelaru a wiilipelela omunepani ni a mvai. (Hab. 2:1) Yehova aamuroromeliha mulipa a miririmu wi masu awe yaahaala waakhwaniheryeya mu elukuluku yoophwanelela wi “mulipa a wookololowa onamukhala wa nthowa na ororomeleya wawe.” (Hab. 2:2-4) Ela enataphulela eheeni wa Akiristu anakhala mmahiku ookuchula? Echu yoochuneyaxa ohiya osuwela ti liini makuchuwelo anahaalaaya ophiya ori okhala oolekecheya wi anahaala ophiya chiryene. Nroromelo ninnaneeriha okhala oolipelela ni okuha mmakupa oopacerya muteko wa olaleerya.—Ahe. 10:38, 39.
3. Ntakhara heeni nnaphwanela wiikhalelaru mu ohakalala wahu wa omurumeela Yehova?
3 Ohakalala Mwa Yehova: Vaavaa Koki a Makoki onahaaleiye waahiphela achu a Yehova, nroromelo nahu nnahaala weehiwa. (Ezek. 38:2, 10-12) Owanawana onnaruuha makacamiho, ophiyerya tho wa yaale anavootha. Yoolya ennamala. Sookhalano sinnayeleeleya, nave makhalelo a okumi annatorokeya. Nnii neere heeni vaavaa makacamiho anahaalaaya opacerya? Hapakukhi aahoolela makacamiho mancipale, nyenya aari oolakelela wiikhalelaru mu ohakalala wawe wa omurumeela Yehova. (Hab. 3:16-19) “Ohakalala onarwa w’Apwiya [Yehova]” onahaala onikhaviherya ovootha makacamiho a omwaahiyu.—Neh. 8:10; Ahe. 12:2.
4. Ohakalala taani nnahaalaahu okhalano omwaahiyu?
4 Yaale Yehova onahaaleiye waakhapelela mu nihiku nawe noothoriha, anahaala otitelela ohuserya Malamulo a Muluku. (Hab. 2:14) Ooviihiwa anahaala tho ohuserya vooloca sa Yehova. Ovinyerya hiihaano, nikhale oolakelela opharihela ekari eri yoothene wi nloce sa Yehova ni akina wa waaleela miteko sawe!—Sal. 34:1; 71:17.