OKUMI WEEKIRISTU

Muwaakhele Phaama Alipa Oowompwa

Mu 23 a Marsu, achu opwaha macikhwi 12 oowompwa anahaala ophiya va Mukonelo. Awo anahaala waakhela onamoona otokweene vaavaa namaloca onahaaleiye othokororya yamahala ya Yehova ya yawoopola ni mareeliho achu anahaalaaya waakhela omwaahiyu! (Isa 11:6-9; 35:5,6; 65:21-23; Yoh 3:16) Nyenya, onaya ovaha onamoona tahi namaloca mukhateiye. Oothene hiyo nookhalano ekari ya opaka makupa moorweela wa owaakhela phaama yaale naawompaahu. (Aro 15:7) Moone mukhalelo wa weerano.

• Ohiya okhala va mpaco anyu muweheryaka opacerya mithukumano, muwaakhele aleco ni ooceecheya moorweela wa waavaha mooni ni ochekulano.

• Vaavaa munaaweheryaanyu yaale mwaawompaanyu, mwaathokororye akina yaawo akhweya aakhenle mwopelo mmukipici. Mwaawope avyaani wi ekiraathe ni nyuwaano, nave muukeno vamoha ncipo ni Piipiliya.

• Wamala muthukumano, mwiivahe elukuluku wi muchekuleno. Wakhala wi elukuluku henaakhwanela wi muchekule phaama, mpake marehereryo wi mmuxekurye owannyawe ehivinrevo mahiku mancipale. Wakhala wi hamusuwenle onakhaleiyewo, munaphwanela oloca: “Kaanachuna wiiwa moonelo anyu vooloca sa muthukumano yoola. Vano nnii niwerye hai woonana?”