OKUMI WEEKIRISTU

Nyuwaano Munnampharihela JW Library?

JW Library ekaruma ya mahaleene app (software application) yeeyo enahaala wookhaviheryaani omukumiha Piipiliya mu interneti ni soolaleeryiwa sikina, ntoko ixilema, macipo ooruma, wi mukhaleno mu telefone anyu, tapuleti, naari komputatore.

MUKHALELO WA OMPHWANYA: Mvolowe mu interneti, nave muye makupa onatumihiwamo ikaruma sa ikhankoonya (app store) munahaala omphwanya JW Library nave mmuhele mu ekhankoonya anyu. Ti wooweryeya ohela ekaruma yeela mu ikhankoonya soohiyanahiyana. Nlelo muri mu interneti, muhule ekaruma nave muthanle soolaleeryiwa munachunaanyu okhalano mu ekhankoonya anyu wi mukumihe. Wakhala wi himwaano interneti owannyu, akhweya mumpharihele a Empa ya Omwene, naari mu nipuro nikina. Wakhala wi mookhalano yoolaleeryiwa mu ekhankoonya anyu, munahaala waalakhanyaka muhivolonwe mu interneti. Woona wi sinnapakiwa soolaleeryiwa ivyaani, nyuwaano munaphwanela omukumihaka JW Library ahiihaano orino soolaleeryiwa ivyaani.

NTAKHARA HEENI TOOCHUNEYA? Ti wookhweya ompharihela JW Library mu yoohuserya ya muchu mukhateiye, ni mmithukumano sahu. Ekaruma ela tho, ti yamphurelo mmuteko wa olaleerya, xaxaxa mu olaleerya woohilakelela.