Mpharihele Ixilema wi Mwaahusihe Oohuserya a Piipiliya

Ichu sawooneya sinnatepa otannya murima wa achu nave sinnaakhaviherya wiiwexexa ni wuupuwelela yeeyo ahusenryaaya. Muhusiha ahu Mutokotoko, Yehova, aapharihela ichu sawooneya wi avahe mahusiheryo oochuneya. (Map 15:5; Yer 18:1-6) Emohamoha tho aaheerano Muhusiha Mutokweene, Yesu. (Mat 18:2-6; 22:19-21) Mukhalelo mmoha wa ichu saweemooniwa seiho inooniherya okhala sa mphurelo mu iyaakha sahiihaanoru iri ixilema. Nyuwaano munnapharihela phaama ixilema vaavaa munaahusihaanyu amuhuserya anyu a Piipiliya?

Ixilema khumi soorehereryiwa wi sinikhaviherye ohusiha miyaha inarweela mu eproxura Michaka Yaphaama Yoorweela wa Muluku! Exilema ti exilema eniiwanana ni nikoho nooripelela nnaphwanyeya mu eproxura yeela. Mu ekhankoonya ennakhalavo yoothoonyerya enakeriha wa exilema ti exilema. Mwawaaceererya, sookhalavo ixilema ikina sinathariha miyaha soohiyanahiyana sinaphwanyeya mu Ikaruma Sahu sa Ohusiha.

Apwanne nyuwaano munathokororya mwaha yoowo akhweya ori woovila wa oohuserya anyu wiiwexexa? Naari oohuserya anyu onnahoolela nikacamiho nammoori? Mwaavye exilema mu jw.org® ni JW Broadcasting® wi moone exilema enahaala omukhaviherya. Akhweya onamukhala wa mphurelo woona vamoha nave voocharela othokororya vooloca sa yeeyo.

Mweeri ori woothene, sinnavonyiwa ixilema ivyaani. Vaavaa munoonaanyu, muupuweleke mukhalelo muneeraanyu mpharihele wi mwaahusihe akina.