Munnakumihavo Mphurelo wa Eproxura Muthokororye Yoorepa ya Nihiku?

Apwanne sookhovelela sanyu soomunepani sinnavolowela waalakhanya yoorepa ya Piipiliya ya nihiku ni muru ene mu eproxura Muthokororye Yoorepa ya Nihiku? Waakhanle wi hooye, mwanwerya weerano eyo ntoko yookhovelela anyu? Ancipale annathokororya yoorepa omapacereryo wa nihiku, mwawiihiiha, awo annawerya wuupuwelelaka epharaka miteko saya sa nihiku ti nihiku. (Yos 1:8; Sal 119:97) Mphurelo taani muncipale nneeraahu nikhaleno moorweela wa waalakhanya Yoorepa ya nihiku? Mwaalakhanye makupa makina a Piipiliya vooloca sa yoorepa yeeyo wi musuwele mwaha woothene. Mwiilipixerye wuupuwelela okwakwaleya wa nlakiheryo nnavuwihiwa va yoorepa. Voocharela, mpharihele nlakiheryo nlo mu okumi anyu. Vaava Masu a Muluku eneeraaya evolowele soolakelela sanyu, awo anahaala ohoolela ekumi anyu nave mweeparipari munamukhalano mphurelo.—Sal 119:105.

Imusi sa o Peteli orukurerya elapo yoothene, annathokororya eproxura Muthokororye Yoorepa ya Nihiku wooxixelo, ehakumve opacerya olapa. Mu iyaakha sa hiihaanoru, miyaha sincipale inaperekhiwa wa anna o Peteli, sinnaphwanyeya mu JW Broadcasting^® makupa ani MITHUKUMANO NI SAWEEREYA. Ti liini monnaanyu exilema emoha wa sincipale inaphwanyeya mmakupa yaala? Akhweya exilema emoha yooloca sa mwaha yoowo mwaachunaanyu. Ntoko yootakiherya, mmukhalelo taani yaweereya ya Loti, enaweryaaya ovolowela okumi anyu?

MOONE EXILEMA MUHISIVELE ELAPO YA VATHI (1YOH 2:15), NAVE VOOCHARELA MWAAKHULE MAKOHO ANACHARELA:

• Nlakiheryo taani na Mpiipiliyani nenlo naari mathipelo a mwaha wa Malapelo a Wooxixelo?

• Ti mwawiihai yaweereya ya Loti enooniheryaaya yawoopiha erivovo ya osivela elapo naari ichu seelapo?—Map 13:12; 14:12; 19:3, 12, 13, 24-26

• Nnooniherya hai wi ninnamusivela Yehova ohiya osivela elapo naari ichu seelapo?