OKUMI WEEKRISTU
Mukhaleno Ephoole Omwaryamwasa Sawootha
Olelo, miyaha sinanwerya omwaramwaxeya wa macikhwi a achu mwawaakuveya, mu aradio, mu televisau, ni mu interneti. Yaale anamulapela “Muluku awookolowa” hanaphwanela omwaramwasaka miyaha satheru, naamwi ekhanle wi eparipari. (Sal 31:5; Muk 23:1) Sawootha seiho sinamwaramwasiwa wa akina mwawaakuveya sinanwerya okumiherya ohooxeya otokotoko. Vaavaa munaalikhelaanyu mwaha wi moone waakhanle wi ti weeparipari, mwiikohe:
‘Mwaha ola wookhalano mathipelo?’ Yoowo onooleelani mwaha owo onanwerya ohikhalano mathipelo oothene. Vaavaa muchu onaloceiye mwaha wa muchu mukina, muchu onaphwanela osuwela wi mwaha owo horwa otorokeya, pahiru okhalano ekaasoope vaavaa muhinasuwelaanyu mapacereryo a mwaha yoowo. Nthowa na yaale arino mirici mmulokoni annacicimihiwa nthowa na masu aya arino mathipelo, awo annakhalano ekaasoope vooloca sa omwaryamwasa miyaha satheru
‘Ola mwaha woonyemula?’ Waakhanle wi owo onnanyemuliha nikhuuru naari nsina na muchu, ti yaphaama ohiyano vahoolo.—Masi 18:8; Fil 4:8
‘Ola mwaha weeparipari?’ Mukhaleno ekaasoope vaavaa muniwanyu naari munasuwelaanyu miyaha satheru
MOONE EXILEMA MUNI NWERYE HAI OSEPA OWAAPA AKINA? VOOCHARELA MWAAKHULE MAKOHO ANACHARELA:
Mwawiiwanana ni Masiposipo 12:18, wiicela taani masu oophoreiha anakumiheryaaya?
Filipi 2:4 onanikhaviherya hai okhalano moonelo woophwanelela vooloca sa akina?
Tiheeni nnaphwanelaahu weera vaavaa enalociwaaya akina mmukhalelo woonanara?
Nihaakumve omwaryamwasa mwaha vooloca sa akina, makoho taani nnaphwanelaahu wiipakela?