Opiyoneero

Hiyaano ninnapharihela phaama ikuru sahu vaavaa nnatikitheryaahu soolakelela mmuteko wa Yehova. (1Kor 9:26) Soolakelela sinnanikhaviherya opharihela phaama elukuluku ahu ehaakumve ophiya makuchuwelo a mukhalelo yoola wa ichu. (Éfe 5:15, 16) Variyari va malapelo anyu a echoko, munaphwanela othokororya soolakelela taani mwaahaalaanyu osiveliwa okhalano mu eyaakha evyaani ya muteko enoorwa. Wi yookhaviheryeeni, yoochariha yeela ya mithukumano yookhalano miyaha seiho munaphwanelaanyu wuupuwelela ni mavekelo vooloca sa soolakelela.—Tiy 1:5.

Ntoko yootakiherya, apwanne emusi yaanwerya olapa vamoha wi emukhaviherye muchu mmoha wi akhale piyoneero ookilaatheya? Waakhanle wi himwaano mavyakelo mweererye osuwela iwora inachuneya, nave muloce ni mapiyoneero makina yaawo arino mikhalelo soolikana ni sawinyu. (Masi 15:22) Akhweya, munanwerya omukoha piyoneero mmoha variyari va malapelo anyu a echoko. Voocharela mumpake prokrama anyu wakhala wooweryeya. Waakhanle wi mwaari piyoneero khalai, muthokororye mikhalelo sanyu wi moone waakhanle wi sinnaweemereryaani weerano eyo hiihaano.

Apwanne muchu mmoha a veemusini vanyu aanwerya okhala piyoneero ookhaviherya mu mweeri mmoha naari sincipale? Waakhanle wi himwaano ikuru sincipale, nyuwaano munanwerya okhala ntoko piyoneero ookhaviherya wi mmaliheke elukuluku vakhaani va nihiku mmuteko woolaleerya. Waakhanle wi elukuluku anyu henaweemereryaani wi mulaleerye veeri va esumana nthowa na muteko anyu wa elukuluku yoothene naari oxikola, akhweya nyuwaano munanwerya othanla mweeri orino iferiyaato naari orino isumana thanu. Mmurepe kalentaariyu vaavaa munapakaanyu marehereryo wi mukhale piyoneero ookhaviherya nave mmurepele prokrama anyu.—Masi 21:5.

MOONE EXILEMA MUKHALE OOLIPA MURIMA . . . NYUWO MURI PIYONEERO, NAVE VOOCHARELA MWAAKHULE NIKOHO NLA:

• Tiheeni nnahuseryaahu ni yaweereya ya Murokora Aamand vooloca sa mukhalelo Yehova onaasiveleiye ni waakhapelela yaale anapaka owetha waya wi ekhale mapiyoneero?