Muhemererye wi Nrima Nimalihe Murecele

1. Tiheeni yeeren’ye ni echoko ya Yosefe wa nthowa na nrima?

YAKOPO aanasivela anaawe oothene, nyenya aanatepa omusivela mwanawe mmoha yoowo aarino iyaakha khumi nathanu napiili, iichaniwa Yosefe. Tiheeni asinnawe Yosefe yuupuwelaaya vooloca sa yeela? Awo yapacerya omukhalela nrima nave yaahipacerya omwiica. Yosefe haapanke echu yoohiphwanelela yeeyo yaahaala omweeriha wiiciwa ni asinnawe. Naamwi hiiha, awo yaahimutumiha ntoko kapuro nave yaahinwoka Yakopo, eriki mwanawe oosiveliwa aahikhuuriwa ni mwaasinama ooluwa a mutakhwani. Nrima naahiweeriha asinnawe Yosefe omaliha murecele wa veemusini nave eruuha makacamiho wa atiithi aya.—Map. 37:3, 4, 27-34.

2. Mwawiiwanana ni Galasya 5:19-21, ntakhara heeni nrima nryaaya nawoopiha?

² Mpiipiliyani, nrimab ninnaphwanyeya va elista ya “miteko sa mwiili” seiho sinahaala omweeriha muchu oyeleela ekumi ni ohivolowa mu Omwene wa Muluku. (Mwaalakhanye Galasya 5:19-21.) Mwawooneya nrima mathipelo a mikhalelo mikina sawiipha, ntoko wiicana, owanawana, ni esara.

3. Tiheeni nnahaalaahu othokororya mmwaha yoola?

³ Asinnawe Yosefe yootakiherya ya mukhalelo nrima nnapahulaaya wiiwanana ni omaliha murecele wa veechokoni. Eparipari wi, haavo a hiyo aahaala opaka echu ntoko yeeyo awo yaapankaaya. Nyenya oothene ahu na achu ohiphaameya nave nookhalano murima woowoka. (Yer. 17:9) Ti nthowa nene ikwaha ikina nnakhalaahu anrima. Nnahaala woona sootakiherya sa Mpiipiliyani seiyo inanivaha olopola, nave voocharela, sooleeliherya mmukhalelo nnahaalaahu owaniha nrima ni winnuwiha murecele.

TIHEENI ENATANNYA NRIMA?

4. Ntakhara heeni Afilisti yaanamukhalela nrima Isaki?

⁴ Vaavaa muchu onakhaleiye ooreela. Isaki aari muchu ooreela nave Afilisti yaanamukhalela nrima. (Map. 26:12-14) Ophiyerya wi awo yaahuuheela ihime seiyo saakumiha maahi wi muhuwo awe owuuryeke. (Map. 26:15, 16, 27) Hiiha ntoko Afilisti, mmahiku ahu achu akina annaakhalela nrima yaale arino ikhorowa wapwaha vaya. Tahi wi pahiru achu awo anachuna okhalano ichu sa akina, nyenyatho anachuna wi ehaawe.

5. Ntakhara heeni ahooleli a malapelo yaanamukhalela nrima Yesu?

⁵ Vaavaa muchu onasiveliweiye ni akina. Ahooleli a malapelo a Ayuta yaanamukhalela nrima Yesu, ntakhara wi muloko wa achu waanasiveliwa ni yene. (Mat. 7:28, 29) Yesu amweemelela Muluku nave aanahusiha eparipari. Naamwi hiiha ahooleli a malapelo yaanamwaramwaxa sawootha sawoopiha wi enanarihe mukhalelo waphaama wa Yesu. (Mar. 15:10; Yoh. 11:47, 48; 12:12, 13, 19) Tiheeni nnahuseryaahu ni yaweereya yeela? Mmulokoni aakhalamo anna ni arokora yaawo arino mikhalelo mincipale saphaama nave achu oothene annasiveliwa ni yaawo. Nnaphwanela owaniha moonelo vyakala wa waakhalela nrima anna si yaawo. Ohiya waakhalela nrima, nnaphwanela otakiherya mikhalelo saya.—1 Kor. 11:1; 3 Yoh. 11.

6. Tiyotrefe ooniherya hai wi aakhalano nrima?

⁶ Vaavaa muchu onakhaleiyeno mirici mmarehereryo. Mu nsana noopacerya, Tiyotrefe aanaakhalela nrima anna yaawo yaahoolela Akristu. Owo aachuna “okhala oopacerya” variyari va anna a mmulokoni. Mwawiihiiha, aanamwaramwaxa sawootha wi murummwa Yohani ni anna akina ehicicimihiweke taachu. (3 Yoh. 9, 10) Naamwi nihihaalaka omwaramwaxa sawootha ntoko Tiyotrefe, akhweya nnahaala omukhalela nrima munna yoowo aakhenle murici yoowo nnakhwelaahu, xaxaxa vaavaa nnoona wi nookhalano mavyakelo a waakhwaniherya murici owo ompwaha yene.

7. Tiheeni enahaala weereya wakhala wi nookhalano nrima?

⁷ Nrima nri ntoko mwiri oniiphelela miri mikina. Vaavaa nrima nnapaceryaaya okhalano mitathaari mmurimani mwahu, onamukhala woovila ophola. Nrima nninnuwa ni muupuwelo woohiphwanelela, ntoko ehace, ni wiirumiha. Nrima nnanwerya wiiphelela winnuwa wa mikhalelo saphaama, ntoko osivela, niphwanya ni oreera murima. Vaavaa nnoonaahu wi nrima noopacerya wunnuwa mmurimani mwahu, nnaphwanela ophola. Tiheeni nnaphwanelaahu opaka wi niwanihe nrima?

MUNNUWIHE WIIYEVIHA NI OHAKALALELA

8. Mikhalelo taani saphaama sinahaala onikhaviherya owaniha nrima?

⁸ Nnawerya owaniha nrima moorweela wa nohunnuwiha mikhalelo miili: wiiyeviha ni ohakalala. Wakhala wi murima ahu woosareya ni makhalelo yaala aphaama, nrima hanipaka makupa mmurimani mwahu. Muchu awiiyeviha haniisona okhala oophwanelela waapwaha akina. (Gal. 6:3, 4) Muchu yoowo onahakalala onnaakhwaneliwa ni yeeyo oreiyeno nave haniilikanyiha ni akina. (1 Tim. 6:7, 8) Vaavaa muchu awiiyeviha ni oohakalala onawooneiye akina yaakhelaka echu yaphaama, owo onnahakalala ni yaawo.

9. Mwawiiwanana ni Galasya 5:16; Filipi 2:3, 4, munepa waweela onahaala onikhaviherya opaka eheeni?

⁹ Wi nsepe nrima ni winnuwiha mukhalelo wa wiiyeviha ni ohakalalela, nnaphwanela oveka nikhaviheryo na munepa waweela wa Muluku. (Mwaalakhanye Galasya 5:16; Filipi 2:3, 4.) Munepa waweela wa Yehova onahaala onikhaviherya ovarerya muupuwelo ni meerelo a omuchu ahu wa mpuwa. Nave wakhala wi ti wooheseya, Yehova onahaala onikhaviherya otoroka wi okhale waphaama. (Sal. 26:2; 51:10) Mose ni murummwa Paulo yaakhumelela phaama mu owaniha nrima. Hankooni nthokororye yootakiherya aya.

10. Tiheeni yaahaala omweeriha Mose okhalano nrima? (Moone eruku ya ekaapa.)

¹⁰ Mose aahikhalano olamulelo variyari va nloko na Muluku, nyenya owo haari anrima ntakhara ekari yeela. Ntoko yootakiherya, ekwaha emoha, Yehova aheeriha wi munepa mmohamoha yoowo Mose areiyeno aakawela asitokweene o Isarayeli yaawo yaari moorukurerya mwa musakala yoole achu yaathukumannaayavo. Vahilekenle, Mose aasuwela wi atokweene eeli yaawo yahaakelewo mmusakalani yaahaakhela munepa waweela nave yaapacerya oloca ntoko alipa a miririmo. Mwawiihiiha Yosuwa aahimveka Mose wi aamaalihe wi ehiloceke ichu sa miririmo. Mose aakhulenle hai? Owo haakhalenle nrima nthowa na yeeyo Yehova aapankeiye wa atokweene ale eeli. Moohiyana, Mose aari awiiyeviha nave aari oohakalala ni murici yoowo yaakhenlaaya. (Nam. 11:24-29) Tiheeni nnahuseryaahu orweela wa yootakiherya ya Mose?

11. Atokweene a mmulokoni eni emutakiherye hai Mose?

¹¹ Nyuwaano mwa mutokweene a mmulokoni? Apwanne nikhuuru na atokweene nohintoko woovekaani wi mmuvyakihe munna mukina wi akhapeleleke murici yoowo onoosivelaani? Ntoko yootakiherya, akhweya mookhalano ekari ya weeciha yoohuserya ya Mulipeleli esumana ti esumana. Nyenya wakhala wi mwa muchu awiiyeviha ntoko Mose, hamunahaala okhala awoopopiheya wakhala wi moovekiwa wi mmuvyakihe munna mukina wi akhaleno murici yoowo. Ohiya yeeyo, munahaala ohakalala omukhaviherya munna mukina.

12. Ti mwawiihai anna ni arokora akina oonihenryaaya wiiyeviha ni ohakalalela?

¹² Muupuwele echu ekina yeeyo anna awuuluvala anahoolelaaya. Akina a yaawo anarumeela ntoko oohoolela a nikhuuru na atokweene mu iyaakha sincipale. Nyenya vaavaa anakhalaayano iyaakha 80, mooreera murima awo annamuhiyerya murici yoola munna mukina. Ooweherya ekulucu anneerano emohamoha. Vaavaa awo anakhalaayano iyaakha 70, mwa wiiyeviha anneemererya ohiya murici aya wa weeceeca nave anneemererya murici mukina. Mu iyaakha sahiihaanoru, mapetelita orukurerya elapo yoothene, yaahivekiwa ohiya orumeela o Peteli wi yapake miteko mikina. Anna ni arokora yaala oororomeleya hanakuha mathowa wa yaale anaphara muteko yoowo yaapakaaya khalai.

13. Tiheeni yaahaala omweeriha Paulo waakhalela nrima arummwa khumi napiili?

¹³ Murummwa Paulo yootakiherya ekina yaphaama oonihenrye wiiyeviha ni ohakalala. Paulo heemerenrye wi nrima nunnuwe mmurimani mwawe. Naamwi alapaka elukuluku yawaaca mmuteko woolaleerya, owo aaloca ni wiiyeviha woothene ariki: “Miyo kiri mukhaani a arummwa nave honakiphwanela weeriwa murummwa.” (1 Kor. 15:9, 10) Arummwa khumi napiili yaakhala vamoha ni Yesu elukuluku aareiye veelaponi, nyenya Paulo aakhanle Mukristu Yesu amanle okhwa ni oviihiwa mookhwani. Naamwi ohoolo waya aathanliwe okhala “murummwa a amalapo,” Paulo hatonko okhalano ekari ya okhala mmoha a arummwa khumi napiili. (Aro. 11:13; Saw. 1:21-26) Ohiya waakhalela nrima arummwa ale khumi napiili nthowa na ekari yaapunhaaya ya okhala vamoha ni Yesu, Paulo aanahakalala ni mirici seiho aareiyeno.

14. Wiiyeviha ni ohakalala ni yeeyo nryaahuno oni onikhaviherye hai?

¹⁴ Hiiha ntoko Paulo, wiiyeviha ni ohakalala onamunikhaviherya waacicimiha yaale yaakhenle mirici mmarehereryo a Yehova. (Saw. 21:20-26) Yehova ohaathanla alopwana wi ehooleleke mmulokoni. Eparipari wi awo achu ohiphaameya, nyenya Yehova onawoona okhala “samahala wa atchu.” (Éfe. 4:8, 11, NN) Mwawiihiiha ti wookhweleya waacicimiha anna yaawo athanliwe ni ochariha mwawiiyeviha malakiheryo yaawo ananivahaaya. Neerano hiiha nnahaala omwaacamela Yehova ni okhapelela murecele ni annihu.

“NCHARIHEKE ICHU SA MURECELE”

15. Tiheeni nnaphwanelaahu opaka wi niwanihe nrima?

¹⁵ Wakhala wi noheemererya wi nrima nunnuwe, nlo nnahaala wuumiha murecele ni wiiphelela moomalela. Mwawiihiiha, nnaphwanela ophola nrima mmurimani mwahu ni osepa oweeriha akina okhala anrima. Meerelo yaala taphaama wakhala wi ninnachuna ochariha malakiheryo Yehova onivanheiye: “Nchariheke ichu sa murecele ni soolipihana mukina ni mukhwaawe.” (Aro. 14:19) Nyenya tiheeni nnaphwanelaahu weera wi naakhaviherye akina owaniha nrima? Nave nni nunnuwihe hai murecele?

16. Nni naakhaviherye hai akina owaniha nrima?

¹⁶ Mukhalelo ni meerelo ahu ananwerya waavolowela akina. Elapo yeela ennaaceenyerya achu wi ekhaleno “soochuna sa mwiili.” (1 Yoh. 2:16) Nyenya mukhalelo ola onnavuwiha nrima. Mwawiihiiha, ti yaphaama ohimaliha elukuluku nlocaka ichu seiho nryaahuno naari seiho nnachunaahu othuma. Eyo enahaala oweeriha akina ohunnuwiha nrima mmurimani mwaya. Mukhalelo mukina onahaala onikhaviherya owaniha nrima ori okhala awiiyeviha ni ocicimiha murici yoowo nryaahuno mmarehereryo. Omaliha elukuluku nlocaka ichu nneeraahu mmuteko wa Yehova enneeriha wi nrima nunnuwe mwa akina. Echu nnaphwanelaahu opaka ori waapwacha akina ni othamalela ichu soothene saphaama anapakaaya. Mmukhalelo yoola nnahaala waakhaviherya akina wi ekhale oohakalala ni wunnuwiha murecele mmulokoni.

17. Tiheeni asinneeni Yosefe yaaweryaaya opaka, nave ntakhara heeni?

¹⁷ Nnanwerya ovootha ekhoco ya owaniha nrima! Muupuwele wanaawiili yootakiherya ya asinneeni Yosefe. Ivinrevo iyaakha sincipale emanle omukhaliha moonanara Yosefe, awo yaahimphwanya o Yikuputu. Nyenya Yosefe ahaakumve wiisuwanyeiha wa asinnawe, owo aahiweererya achunaka owoona waakhanle wi awo aatoroka mukhalelo aya. Elukuluku ya olya, Yosefe aahimvaaha munneeni mukhaani Peniyamini, yoolya yawaaca waapwaha asinnawe akina. (Map. 43:33, 34) Naamwi hiiha, hiyaavovo yawooniherya yawi awo yaanamukhalela nrima Peniyamini. Moohiyana, awo yaahooniherya wi yaanampwacha munnaya vamoha ni Atiithaaya Yakopo. (Map. 44:30-34) Moorweela wa ophola nrima mmurimani mwaya, asinnawe Yosefe, yaahiwerya otikitherya murecele veechokoni vaya. (Map. 45:4, 15) Wakhala wi hiyaano tho noophola mmurimani mwahu moonelo vyakala wa nrima, nnahaala okhaviherya okhapelela murecele veemusini vahu ni mmulokoni.

18. Mwawiiwanana ni Tiyako 3:17, 18, tiheeni enahaala weereya wakhala wi nohunnuwiha murecele?

¹⁸ Yehova onachuna wi niilipiherye owaniha nrima nave nunnuwihe murecele. Wi nipake ichu seiha piili onnachuneya wiilipiserya vancipale. Ntoko nthokoronryaahu mmwaha yoola, nookhalano mathitimanelo anrima. (Tiy. 4:5) Nave nnakhala mu elapo yeeyo enaceenyerya nrima. Nto waakhala wi nohunnuwiha wiiyeviha ni ohakalala ni waapwacha akina, hinni neemererye wi nrima nunnuwe. Moohiyana, nnahaala okhala achu a murecele nave yawiima yeekhaikhai enahaala wunnuwa.—Mwaalakhanye Tiyako 3:17, 18.