Muni Mwaakhaviherye Hai Oohuserya a Piipiliya Oya Vahoolo Ophiyerya Opatisiwa—Nikupa Noopacerya

1. 2 Korinto 3:1-3 onanikhaviherya hai othamalela ekari nryaahuno ya waahusiha achu Piipiliya ophiyerya opatisiwa? (Moone eruku ya ekaapa.)

MUNOONA hai vaavaa oohuserya a ekulucu ya muloko anyu onapatisiweiye? Mweeparipari munnakhala oohakalala. (Mat. 28:19) Nave waakhanle wi ti nyuwaano mmuhusinhe ophiyerya opatisiwa, munnatepa ohakalala! (1 Tes. 2:19, 20) Oohuserya avyaani apatisiwe ari ntoko “ikaaratha sooneerela onamoona,” ohiya pahiru wa yaale aahusinhe nyenya wa muloko woothene.—Mwaalakhanye 2 Korinto 3:1-3.

2. (1) Nikoho taani noochuneya nnaphwanelaahu othokororya, nave ntakhara heeni? (2) Yoohuserya ya Piipiliya tiheeni? (Moone masu a vathi.)

² Ti yoohakalaliha osuwela wi mu iyaakha xexe ivirale, soheecihiwa soohuserya sa Piipiliya sawaakhwana 10.000.000b mweeri ti mweeri veelaponi yoothene. Nave ennaalakhanyeriwa wi variyari va iyaakha seiye achu awaakhwana 280.000 aapatisiwa eyaakha ti eyaaka ntoko anamoona a Yehova ni oohuserya avyaani a Yesu Kristu. Nni ntitelele hai waakhaviherya amilyawu a oohuserya a Piipiliya yaala wi epatisiwe? Woona wi nlelo Yehova ootitelela okhala oopisa murima ni waavaha achu ekari wi ekhala oohuserya a Yesu Kristu, nnachuna opaka soothene ophiyerya nnaweryelaahuvo wi naakhaviherye oya vahoolo ni opatisiwa mwawaakuveya wakhala wooweryeya. Elukuluku ehanle yootepa okhuveya!—1 Kor. 7:29; 1 Ped. 4:7.

3. Tiheeni nnahaalaahu othokororya mmwaha yoola vooloca sa weeciha soohuserya sa Piipiliya?

³ Nthowa nawi waapaka oohuserya ti woochuneya hiihaano, Nikhuuru Noolamulela naahikoha ifiliyale, echu nnaphwanelaahu weera wi naakhaviherye oohuserya a Piipiliya oya vahoolo wi epatisiwe. Mmwaha yoola ni onacharela, nnahaala woona tiheeni nnaphwanelaahu ohuserya orweela wa saweereya sa mapiyoneero, mamisiyonaariyo ni ooweherya a ekulucu.c (Masi. 11:14; 15:22) Awo aathariha echu ahusiha a Piipiliya ni oohuserya aya anaphwanelaaya opaka wi yoohuserya ya Piipiliya ekhale ya mphurelo. Mmwaha yoola nnahaala othokororya ichu thanu, seiho oohuserya oothene anaphwanelaaya opaka wi eye vahoolo ophiyerya opatisiwa.

MUHUSERYEKE ESUMANA TI ESUMANA

4. Tiheeni nnaphwanelaahu osuwela vooloca sa yoohuserya ya Piipiliya enapakiwa mwawaakuveya?

⁴ Anna ni arokora ahu ancipale aneeciha soohuserya sa Piipiliya yeemenle vaate va muchu. Naamwi ola ori mukhalelo waphaama wa otannya nchuno na muchu ntakhara omuhuserya Piipiliya, ovaanela sintoko yoola oneeriwano mwawaakuveya nave akhweya honi weeriweno esumana ti esumana. Wi yunnuwihe nchuno, anna ni arokora akina elukuluku anamusekuryaaya muchu yoowo oonihenrye nchuno, awo anamveka nuumuru na telefoni, wi emurumiheleke muchaka wookhuveya yoowo onaloca sa Piipiliya. Ovaanela mmukhalelo yoola, onanwerya weeriwakano mu miyeeri mincipale nyenya ela heeni emukhaviherye oohuserya oya vahoolo. Apwanne munoona wi oohuserya onanwerya oya vahoolo ni wiiveleela ophiyerya opatisiwa wakhala wi hanamaliha elukuluku ni ikuru sincipale wi ahuserye Masu a Muluku? Akhweya hooye.

5. Mwawiiwanana ni Luka 14:27-33, echu taani Yesu oceenyenreiye enahaala onikhaviherya mmuteko ahu wa waapaka oohuserya?

⁵ Mu elukuluku ekina Yesu aahithariha orweela mu niphwanaphwaniho nawe, echu yeeyo muchu onaphwaneleiye opaka wi akhale oohuserya a Kristu. Owo aahithariha vooloca sa muchu onachuna oteka muconco awe nave tho sa mwene yoowo onachuna oya okhoconi. Yesu aahiloca wi mulipa ooteka muconco onaphwanela ‘opacerya okilaathi wi acokocele’ wi asuwele waakhanle wi ookhalano soothene sa omaliherya muconco, nave tho wi mwene onaphwanela ‘opacerya okilaathi aavarerye’ anakhoco awe oothene asuwele waakhanle wi anahaala owerya owana ni akhoco akina. (Mwaalakhanye Luka 14:27-33.) Mmukhalelo woolikana Yesu oosuwela wi muchu yoole onachuna okhala oohuserya awe onaphwanela waalikhela moopwacha wi asuwele yeeyo enataphulela okhala oomuchara awe. Wa nthowa nenla nnaphwanela omuceenyerya oohuserya ahu a Piipiliya wi nihuseryeke esumana ti esumana. Nni neereno hai?

6. Tiheeni nnaphwanelaahu opaka wi nimukhaviherye oohuserya ahu a Piipiliya oya vahoolo?

⁶ Munnuwihe soohuserya sa Piipiliya seiho muneecihaanyu mwawaakuveya. Elukuluku munamuxekuryaanyu akhweya munanwerya othokororya soorepa piili ohiya emoharu pahi. Wakhala wi mwaneene a vaate ohooniherya nchuno na ovaanela elukuluku yincipale, mmukohe waakhanle wi wookhalavo mpuro munahaalaanyu okiraathivo wi mutitelele ovaanela. Mukhalelo mwaneene a vaate onahaaleiye waakhulela, onahaala wooniherya waakhanle wi onnachuna ni murima woothene omuhuserya Piipiliya. Mwawiihiiha, wi mmukhaviherye ohuserya mwawaakuveya, munaphwanela omukoha oohuserya anyu waakhanle wi aahaala osiveliwa ohuseryaka ikwaha piili esumana ti esumana. Naamwi hiiha, onnachuneya opaka sincipale ohiiya pahiru ohuserya ekwaha emoha naari piili esumana ti esumana.

MWIIREHERERYE NTAKHARANIKUPA TI NIKUPA NA YOOHUSERYA

7. Muhusiha oni iirehererye hai phaama ntakhara nikupa ti nikupa na yoohuserya ya Piipiliya?

⁷ Ntoko muhusiha, munaphwanela wiirehererya phaama ntakhara nikupa ti nikupa na yoohuserya. Nyuwo munanwerya opacerya waalakhanya yeeyo munayaanyu ohuserya vamoha ni ovareryela soorepa. Mukhapelele mmuupuweloni miyaha soochuneyaxa. Muupuwele vooloca sa muru wa mwaha, miru mikhaani, makoho a yoohuserya, soorepa munayaanyu “waalakhanya,” iruku, ni ixilema seiho inahaala okhaviherya wiiwexexeya phaama mwaha owo. Voocharela, muupuwelelaka mukhalelo wa oohuserya anyu, muthokororye mukhalelo munahaalaanyu omuhusiha, mmukhalelo wookhweya ni wookwakwaleya wi oohuserya anyu awerye wiiwexexa mookhweya, ni opharihela seiho ohusenryeiye.—Neh. 8:8; Masi. 15:28.

8. Masu a murummwa Paulo anaphwanyeya mu Kolosi 1:9, 10 ananihusiha eheeni vooloca sa ovekela ntakhara oohuserya ahu a Piipiliya?

⁸ Ntoko makupa a wiirehererya wanyu, mvekele wa Yehova vooloca sa oohuserya anyu ni yeeyo eri yoochuneya wa yoowo. Mumveke Yehova wi ookhaviheryeeni ohusiha orweela Mpiipiliyani mmukhalelo yoowo onahaala otannya murima wa oohuserya anyu. (Mwaalakhanye Kolosi 1:9, 10.) Mwiikohe waakhanle wi yookhalavo echu eri yoovila wa oohuserya anyu wiiwexexa naari weemererya. Muupuweleke wi yoolakelela anyu ori omukhaviherya oohuserya anyu oya vahoolo wi apatisiwe.

9. Muhusiha oni amukhaviherye hai oohuserya awe a Piipiliya wiirehererya phaama ntakhara yoohuserya? Mutharihe.

⁹ Nnaweherya wi orweela mu yoohuserya ya Piipiliya yookilaatheya enahaala omukhaviherya muchu othamalela yeeyo Yehova ni Yesu amweerenlaaya nave onahaala ochuna ohuserya sincipale. (Mat. 5:3, 6) Wi aphwanye mphurelo wawaaca vaavaa onahusihiweiye, oohuserya onaphwanela otikitheryeya mu seiho onahusereiye. Wi mmukhaviherye weerano yeeyo, munaphwanela omutharihela ntakhara heeni ti yoochuneya wa yene wiirehererya woosiilo ntakhara nikupa ti nikupa na yoohuserya moorweela wa waalakhanya ni wuupuwelela vooloca sa mwaha owo ni mukhalelo onahaaleiye opharihela seiho ohusenryeiye. Muni mmukhaviherye hai oohuserya anyu wiirehererya? Murehererye mwaha vamoha ni oohuserya anyu wi mmooniherye mukhalelo wa weerano.d Mmutharihele mukhalelo wa ophwanya maakhulo ooluluwanya ni mukhalelo wa oceka masu a vakhaani yaawo onahaaleiye wuupuwelelaka. Voocharela mmuceenyerye ovahaka maakhulo orweela mmasu awe. Vaavaa onavaheiye naakhulo munahaala osuwela waakhanle wi owo ohiiwexexa phaama mwaha owo. Nyenya yookhalavo tho echu ekina munaphwanelaanyu omuceenyerya oohuserya anyu opaka.

MMUHUSIHE OOHUSERYA ANYU OLOCA NI YEHOVA NIHIKU TI NIHIKU

10. Ntakhara heni oryaaya woochuneya omuceenyerya oohuserya omwaalakhanya Piipiliya nihiku ti nihiku, nave tiheeni onaphwaneleiye opaka wi akumihe mphurelo mu waalakhanya wawe?

¹⁰ Mu waaceererya ohuserya esumana ti esumana ni muhusiha awe, oohuserya a Piipiliya onahaala ophwanya mphurelo moorweela wa opaka ichu ikina nihiku ti nihiku mukhateiye. Owo onaphwanela olocaka ni Yehova. Mwawiihai? Moorweela wa onwiriyana ni oloca ni Yehova. Owo onanwerya oloca ni Muluku moorweela wa omwaalakhanya Piipiliya nihiku ti nihiku. (Yos. 1:8; Sal. 1:1-3) Mmooniherye mukhalelo wa opharihela “Yoohoolela ya waalakhanya wa Piipiliya” ya wimpirimiiriwa, yeeyo enaphwanyeya mu jw.org.e Wi mmukhaviherye ophwanya mphurelo mu omwaalakhanya wawe Piipiliya, mmuceenyerye wuupuwelela yeeyo Piipiliya onamuhusiheiye vooloca sa Yehova ni mukhalelo onahaaleiye opharihela mookumini mwawe yeeyo onahusereiye.—Saw. 17:11; Tiy. 1:25.

11. Oohuserya oni awerye hai osuwela ovekela moophwanelela wa Yehova, nave ntakhara heni eryaaya yoochuneya wa yoowo ovekela moohihiyererya wa Yehova?

¹¹ Mmuceenyerye oohuserya anyu a Piipiliya oloca ni Yehova moorweela wa ovekela nihiku ti nihiku. Mvekele orweela vathi va murima, omapacereryo ni omakuchuwelo wa yoohuserya anyu, mvekele ni yoowo nave ntakhara yoowo. Vaavaa owo onawiriyaneiye mavekelo anyu, owo onahaala ohuserya mukhalelo wa ovekela ookhumela vathi va murima, amvekaka Yehova Muluku orweela mwa nsina na Yesu Kristu. (Mat. 6:9; Yoh. 15:16) Mwaanyiherye mukhalelo omwaalakhanya Piipiliya nihiku ti nihiku (onwiriyana Yehova) ni ovekela (oloca ni Yehova) onahaalaaya omukhaviherya oohuserya a Piipiliya omwaacamela Muluku! (Tiy. 4:8) Wunnuwiha makhalelo yaala anahaala omukhaviherya oohuserya anyu a Piipiliya oya vahoolo ophiyerya wiiveleela ni opatisiwa.

MMUKHAVIHERYE WUNNUWIHAONTHAMWENE AWE NI YEHOVA

12. Muhusiha oni amukhaviherye hai oohuserya awe wunnuwiha onthamwene awe ni Yehova?

¹² Yeeyo oohuserya onasuweleiye orweela Mpiipiliyani enaphwanela otannya ohiya pahiru muupuwelo awe nyenya tho murima awe. Ntakhara heeni? Nthowa nawi murima ahu—yeeyo enaphitaanyerya muupuwelo, nchuno, ni moonelo—sinnanceenyerya opaka ichu vyakala. Yesu aanaahusiha achu ichu sincipale nave awo yaanasiveliwa ohuserya orweela wa yoowo. Nyenya achu yaamuchara Yesu nthowa nawi aanatannya murima aya. (Luka 24:15, 27, 32) Oohuserya anyu a Piipiliya onaphwanela omoonaka Yehova ntoko muchu eepariparai, yoowo onaphwaneleiye olipihano onthamwene ni omoonaka owo ntoko Tiithi, Muluku, ni Nthamwene awe. (Sal. 25:4, 5) Elukuluku muneecihaanyu yoohuserya ya Piipiliya, mooniherye mikhalelo saphaama sa Muluku ahu. (Muk. 34:5, 6; 1 Ped. 5:6, 7) Moohiphwacha mwaha taani munathokororyaanyu, ilukuluku soothene mooniherye mikhalelo saphaama sa Yehova. Mmukhaviherye oohuserya anyu a Piipiliya, othamalela mikhalelo saphaama sa Yehova, osivela, oreera murima, nniphwanya. Yesu aalonce wi “nlamulo ntokotokosha ni noopacerya” ti “waakhweleke Apwiya Muluku aa.” (Mat. 22:37, 38) Mweererye omukhaviherya oohuserya anyu a Piipiliya omusiveleka Yehova mwawiiseela.

13. Mvahe yootakiherya emoha mmukhalelo oohuserya anyu a Piipiliya oneereiye ahuserye mikhalelo saphaama sa Yehova.

¹³ Vaavaa munavaanelaanyu ni oohuserya anyu, mmutharihele ntakhara heeni munnamusivela Yehova. Ela enahaala omukhaviherya oohuserya anyu a Piipiliya, osuwela wi owotho onaphwanela wunnuwiha osivela ni onthamwene awe ni Yehova. (Sal. 73:28) Ntoko yootakiherya, mu yoolaleeryiwa munapharihelaanyu mu yoohuserya ya Piipiliya, apwanne aakhalamo masu naari yoorepa enooniherya echu vyakala vooloca sa Yehova, osivela wawe, miruku, ekhaikhai, naari owerya, mikhalelo seiho itannyile murima anyu? Mmuleele ela oohuserya anyu a Piipiliya, nave mweerihe wi, asuwele wi nlo nthowa nimoha nnaweerihaani omusivela Tiithiihu a wirimu. Yookhalavo echu ekina oohuserya a Piipiliya ori oothene onaphwaneleiye opaka wi aye vahoolo ophiyerya opatisiwa.

MMUCEENYERYE OOHUSERYA ANYU WI APHIYEKE MMITHUKUMANO SA MULOKO

14. Ahebri 10:24, 25 tiheeni onanleeleiye vooloca sa mithukumano sa muloko seiho inahaala omukhaviherya oohuserya ahu a Piipiliya oya vahoolo?

¹⁴ Oothene ahu ninnachuna wi oohuserya ahu eye vahoolo ophiyerya opatisiwa. Mukhalelo mmoha woochuneya nneeraahu naakhaviherye oohuserya ahu, ori moorweela wa waaceenyerya wi ephiyeke mmithukumano sa muloko. Ahusiha a Piipiliya a mavyakelo alonce wi oohuserya a Piipiliya yaawo anaphiya mmithukumano annaya vahoolo mwawaakuveya. (Sal. 111:1) Ahusiha akina annaatharihela oohuserya wi, sookhalavo ichu sincipale anahaalaaya owerya ohuserya mmithukumano seiyo ahinahaalaaya ohuserya mu yoohuserya ya Piipiliya. Mwaalakhanye Ahebri 10:24, 25 vamoha ni oohuserya anyu, nave mmooniherye mphurelo onahaaleiye ophwanya vaavaa oneereiye aphiye mmithukumano. Mmoonihe exilema Tiheeni Eneereya mu Empa ya Omwene?f Mmukhaviherye oohuserya anyu woonaka mithukumano ntoko echu yoochuneya mookumini mwawe.

15. Tiheeni nnaphwanelaahu opaka wi nimuceenyerye oohuserya a Piipiliya wi aphiyeke mmithukumano moohihiyererya?

¹⁵ Tiheeni munaphwanelaanyu opaka wakhala wi oohuserya anyu a Piipiliya hanaphiya mmithukumano naari onnacompela ophiya mmithukumano? Moolucuwa, mmuleele yeeyo muhusenryaanyu mmuthukumano ovinre hiihaano. Vaavaa onooneiye mukhalelo munoonaanyu mithukumano owo tho onamukhalano nchuno na ophiya mmithukumano. Mumvahe Mulipeleli naari Okumi ni Muteko Ahu Weekristu—Yoochariha ya Mithukumano yeeyo enahuseryiwa. Mmooniherye miyaha inahaala othokororyiwa mu esumana enacharela nave mmukohe makupa taani amusivenle variyari va mithukumano. Yeeyo oohuserya anyu a Piipiliya onahaleiye wiiwa ni woona mmuthukumano awe woopacerya enamukhala yoohiyana ni yeeyo iiwaleiye mmithukumano sa malapelo makina. (1 Kor. 14:24, 25) Owo onahaala othukumana ni akina yaawo arino yootakiherya yaphaama nave tho anahaala omukhaviherya oya vahoolo wi apatisiwe.

16. Tiheeni nnaphwanelaahu opaka wi naakhaviherye oohuserya ahu oya vahoolo ophiyerya opatisiwa, nave tiheeni nnahaalaahu ohuserya mmwaha onacharela?

¹⁶ Nni nimukhaviherye hai oohuserya oya vahoolo ophiyerya opatisiwa? Nnanwerya omukhaviherya oohuserya a Piipiliya ori oothene woonaka yoohuserya awe ntoko echu yoochuneyaxa moorweela wa omuceenyerya wi ahuseryeke esumana ti esumana nave tho wiirehererya ntakhara nikupa ti nikupa na yoohuserya. Nnachuna tho omuceenyerya olocaka ni Yehova nihiku ti nihiku navetho wunnuwiha onthamwene awe ni Yoowo. Ninnachuna omuceenyerya oohuserya ahu a Piipiliya ophiyaka mmithukumano moohicompela. (Moone ekaaxa “Yeeyo Oohuserya a Piipiliya Onaphwaneleiye Opaka wi Aye Vahoolo Ophiyerya Opatisiwa.”) Hiiha ntoko mwaha onacharela onahaalaya othariha, sookhalavo ichu thanu ahusiha a Piipiliya anaphwanelaaya opaka wi yaakhaviherye oohuserya aya oya vahoolo ophiyerya opatisiwa.