Tiheeni Piipiliya Onanihusiheiye Vooloca sa Mwaneene?

1. Ntakhara heeni ninnamuthamalela Yehova nthowa na onivaha Piipiliya?

NINNAMUTHAMALELA vancipale Yehova Muluku nthowa na onivaha Piipiliya! Orweela Mpiipiliyani, owo onnanivahererya ikano sa miruku seiho inanikhaviherya osuwela yeeyo nnaphwanelaahu weera vaavaa nnahoolelaahu makacamiho olelo. Owo tho onnanivaha ewehereryo yaphaamaxa ntakhara omwaahiyu. Echu yoochuneyaxa, Yehova onnampharihela Piipiliya wi anileele mikhalelo mincipale sa omuchu awe. Vaavaa nnuupuwelelaahu mikhalelo sawe saphaama ninnatannyeya murima nave ninnachuna okhala asinthamwene awe awaacameleya.—Sal. 25:14.

2. Mmikhalelo taani soohiyanahiyana Yehova iisoneihaleiye wa achu?

² Yehova onachuna wi achu emusuwele yoowo. Khalai, owo aahiisooneiha wa achu moorweela wa sooloha, sawoona, ophiyerya tho ankeelo. (Nam. 12:6; Saw. 10:3, 4) Hinaahaala owerya ohuserya sooloha, sawoona naari michaka seiho saarweenle wa ankeelo waakhanle wi iho hisaarempwale. Ti nthowa nene Yehova aareiyeno alopwana ‘yaarepa mu liivuru’ yeeyo owo aachuneiye wi nsuwele. (Yer. 30:2) Woona wi “iphiro sa Muluku ti saphaama” naari soophaameya, hiyaano nnanwerya ororomela wi mukhalelo yoola wa oloca ni hiyaano ti waphaamaxa ni wamphurelo.—Sal. 18:30, PMM.

3. Ti mwawiihai Yehova eerinheiye wi Piipiliya akhale ophiyerya olelo? (Yesaya 40:8)

³ Mwaalakhanye Yesaya 40:8, PMM. Masu a Muluku yaahivahererya ohoolela waphaama wa alopwana ni athiyana oororomeleya iyaakha macikhwi macikhweene. Ti mwawiihai ela yaaryaaya yooweryeya? Nla nikoho naphaama, woona wi wuupaceryani Piipiliya aarempwe mu iroolo soovyavyaala ni sawaakuvela onyaanyeya. Mwawiihiiha hinaanono iroolo soopacerya sa Piipiliya olelo. Nyenya Yehova aahipaka owetha wawe wi achu epake ikoopiya sa liivuru yoola aweela. Naamwi achu yaapaka ikoopiya yaari oohiphaameya, awo yaari oororomeleya. Ntoko yootakiherya, alocaka sa Soorepa sa Ehepiri, mulipa oohuserya mmoha oorepa: “Noolekecheya wi hisaavo ikoopiya sa aliivuru akhalai inavuwiha muchaka moororomeleya.” Naamwi evinre elukuluku yincipale, nave saaphariheliwe iroolo soovyavyaala ni achu epanke ikoopiya yaari oohiphaameya, hiyaano nnanwerya ororomela wi masu nnaalakhanyaahu Mpiipiliyani olelo ennavuwiha muupuwelo wa Mwaneene, Yehova.

4. Tiheeni nnahaalaahu othokororya mmwaha yoola?

⁴ Yehova onnanivaha “yamahala yoothene yaphaama ni yoovaha yoothene yoophaameya.” (Tiy. 1:17) Piipiliya emoha ya samahala saphaama Yehova onanivaheiye. Vaavaa muchu onanivaheiye yamahala, yamahala eyo ennooniherya wi muchu owo oonisuwela phaama nave tho onnasuwela soothowa sahu. Ela tho enneereya ni Namavaha a Piipiliya. Vaavaa nnaalikhelaahu yamahala yeela, ninnahuserya sincipale vooloca sa Yehova. Ninnahuserya wi owo oonisuwela nave onnasuwela phaameene soothowa sahu. Mmwaha yoola, nnahaala othokororya mukhalelo Piipiliya onooniheryeiye mikhalelo miraru sa Yehova: Miruku, wookololowa ni osivela wawe. Wuupaceryani, hankooni nthokororye mukhalelo Piipiliya onooniheryeiye miruku sa Muluku.

PIIPILIYA ONNOONIHERYA MIRUKU SA MULUKU

5. Mukhalelo taani mmoha Piipiliya onooniheryeiye miruku sa Muluku?

⁵ Yehova onnasuwela wi ninnachuna ikano sawe sa miruku. Nave yamahala awe, Piipiliya, soosareyamo miruku sawe. Ikano sa Mpiipiliyani sinnaavolowela mwaphaama achu. Piipiliya onnatoroka ikumi. Vaavaa aliivuru oopacerya a Piipiliya yaarempwaaya, Mose aahiloca wa achu a Muluku, Aisarayeli: “Tahi wi masu ala hanaphuriha echu hooye, nto ari okumi anyu.” (Malam. 32:47, PMM) Yaale yiiwelela soorempwa, yaanawerya okhumelela phaama nave yaanakhalano okumi woohakalaliha. (Sal. 1:2, 3) Naamwi Piipiliya arempwe mu iyaakha sincipale muculi, owo nivano ookhalano owerya wa otoroka ikumi sa achu. Ntoko yootakiherya, mu jw.org, mu miyaha “Piipiliya Onnatoroka Ikumi,” munamphwanya sootakiherya opwaha 50 sa achu yaawo epanke matorokelo matokweene nave ekhalano okumi waphaama olelo nthowa na opacerya ochariha ikano sa Piipiliya.—1 Ate. 2:13.

6. Ntakhara heeni nnalocaahu wi Piipiliya toohiyana ni aliivuru akina?

⁶ Haavo liivuru onalikana ni Piipiliya. Ntakhara heeni? Woona wi Mwaneene a liivuru yoola, Yehova Muluku, toowerya woothene, ta wiikhalelaru nave ta mirukuxa ompwaha muchu ori oothene. Aliivuru ancipale akina annatitelela waalakhanyiwa naamwi alipa a waarepa ekhwile. Nave moovira wa elukuluku miruku sinaphwanyeya mu aliivuru yaawo hasinaphariheleya. Moohiyana, malakiheryo a miruku anaphwanyeya Mpiipiliyani ta wiikhalelaru, nave awo ahooniherya wi tamphurelo wa achu anakhala mu ilukuluku soohiyana. Vaavaa nnamwaalakhanyaahu liivuru yoola aweela ni wuupuwelela yeeyo nnahuseryaahu, Mwaneene onnapharihela owerya wa munepa awe waweela wi onikhaviherye woona mukhalelo wa ochariha ikano sa Mpiipiliyani mu okumi ahu. (Sal. 119:27; Mal. 3:16; Ahe. 4:12) Mweeparipari, Mwaneene a Piipiliya ori ooreheryeya wi ookhaviheryeeni. Ela enaphwanela onceenyerya omwaalakhanya Piipiliya moohihiyererya!

7. Ti mwawiihai Piipiliya aaweerinheiye achu a Muluku okhala awiiwanana khalai?

⁷ Yookhalavo echu ekina yeeyo enooniherya wi Mpiipiliyani sookhalamo miruku sa Muluku. Piipiliya onnaakhaviherya achu a Muluku okhala awiiwanana. Vaavaa Aisarayeli yaavolonwaaya mu Elapo ya Nlakano, awo yaahikhala mmapuro oohiyanahiyana. Akina yaatotha ihopa, akina yaaphuwa inama, nave akina yaari alipa oolima. Aisarayeli yaakhala mmakupa ammoori mookhweya yaanwerya ohiya waapwacha Aisarayeli akhwaaya yaawo yaakhala mmakupa makina a elapo. Nyenya Yehova aahipaka marehereryo wi Aisarayeli ekhaleke vamoha ikwaha sincipale wi ewiriyaneke waalakhanyiwa ni otharihiwa wa Masu awe yaarempwe. (Malam. 31:10-13; Neh. 8:2, 8, 18) Mwaanyiherye mukhalelo Aisarayeli oororomeleya yiisoonaaya vaavaa awo yaaphiyaaya o Yerusalemu nave akhweya yaawoonaaya amilyawu a akhwaaya a munroromeloni oorweela mmakupa oothene a elapo! Mmukhalelo yoola, Yehova aanaakhaviherya yaawo otitelela okhala awiiwanana. Voocharela, vaavaa muloko Weekristu waatikitheryiwaaya, owo waahikhalano alopwana ni athiyana yaaloca ilocelo soohiyana nave akina a yaawo yaari ooreela ni akina yaari oohaawa. Nyenya woona wi awo yaanasivela Soorepa, yaari awiiwanana mu omulapela waaya Muluku eeparipari. Achu yaale yaakhanle Akristu yaanwerya wiiwexexa Masu a Muluku pahiru nnikhaviheryo na akhwaaya a munroromeloni ni moorweela wa othukumana vamoha ni yaawo.—Saw. 2:42; 8:30, 31.

8. Ti mwawiihai Piipiliya onaweeriheiye achu a Yehova okhala awiiwanana olelo?

⁸ Muluku ahu a miruku onnatitelela waahusiha ni owiiwananiha achu awe moorweela wa Piipiliya. Mpiipiliyani Sinnaphwanyeyamo iparipari soothene vooloca sa Yehova seiho nnaphwanelaahu oosuwela. Hiyaano wiiliwiili ninnakhala vamoha mmithukumano sahu sa muloko, sa ikulucu, ni sa miceche wi niwiriyane waalakhanyiwa ni otharihiwa wa soorempwa. Mwawiihiiha Piipiliya ekaruma yoochuneyaxa yeeyo Yehova onaphariheleiye wi aakhaviherye achu awe ‘omulapela yoowo mwawiiwanana.’—Sof. 3:9, TNM.

9. Mukhalelo taani ori woochuneya wi niiwexexe muchaka wa Mpiipiliyani? (Luka 10:21)

⁹ Muthokororye yaawooniherya ekina vooloca sa miruku sa Yehova. Owo ahikhalano makupa mancipale a Soorempwa saarepiwe mmukhalelo yoowo waahaala okhala wookhweya wiiwexexiwa pahiru ni achu awiiyeviha. (Mwaalakhanye Luka 10:21.) Achu a mapuro oothene annamwaalakhanya Piipiliya. Mulipa oohuserya mmoha ooloca wi achu ancipale annamwaalakhanya Piipiliya ompwaha liivuru mukina, nave tho awo annamwaalakhanya moopwacha ompwaha liivuru mukina. Nyenya pahiru achu awiiyeviha mweeparipari tanamwiiwexexa ni opharihela yeeyo onaloceiye.—2 Ako. 3:15, 16.

10. Mukhalelo taani mukina Piipiliya onooniheryeiye miruku sa Yehova?

¹⁰ Hiyaano ninnahuserya miruku sa Yehova Mpiipiliyani mmukhalelo mukina. Yehova hanapharihela soorempwa pahiru wi anihusihe ntoko nikhuuru nyenya tho wi amuhusihe ni omuhakararya mmoha ti mmoha a hiyo. Vaavaa nnaalakhanyaahu Masu a Yehova, ninnawerya woona wi owo onampwacha mmoha ti mmoha a hiyo. (Yes. 30:21) Vaavaa mwaahoolenlaanyu nikacamiho, ikwaha kavi mwaalakhannyaanyu Yoorepa nave moona wi yaarepeliwe nyuwo? Mweeparipari, Piipiliya orempwe wi amilyawu aachu eweryeke omwiiwexexa yoowo. Vano ntakhara heeni sooleeliherya sinaphwanyeya Mpiipiliyani sinaphariheleyaaya wa nyuwaano? Ela ti yooweryeya pahiru nthowa nawi Mwaneene a Piipiliya ta mirukuxa wirimu ni veelaponi yavathi.—2 Tim. 3:16, 17.

PIIPILIYA ONNOONIHERYA WOOKOLOLOWA WA MULUKU

11. Ti mwawiihai Muluku oonihenryeiye ohikhalano nthalu vaavaa aarepiweiye Piipiliya?

¹¹ Wookololowa mukhalelo mukina wa Yehova. (Malam. 32:4) Muchu yoowo ori awookololowa haano nthalu, nave tho Yehova haano nthalu. (Saw. 10:34, 35; Aro. 2:11) Ninnawerya woona ohikhalano wawe nthalu moorweela wa othokororya eparipari yawi Piipiliya aarempwe mu ilocelo seiho achu ancipale yaaweryaaya oloca mu elukuluku yeele. Aliivuru oopacerya 39 a Piipiliya yaarempwale mu Ehepiri, elocelo yeeyo yaari yookhweya wiiwexexiwa ni achu a Muluku mu elukuluku yeele. Nyenya, mu elukuluku ya Akristu oopacerya, achu ancipale yaaloca Ekiriki, mwawiihiiha aliivuru ookuchula 27 a Mpiipiliyani yaarempwale mu elocelo yeeyo. Yehova haalakelenle wi Masu awe erempwe pahiru mu elocelo emoha. Olelo achu awaacamela apilyawu 8 ari veelaponi yavathi annaloca ilocelo sincipale soohiyanahiyana. Vano ti mwawiihai achu ancipale aneeraaya ehuserye vooloca sa Yehova?

12. Mukhalelo taani mmoha onaphwanyeya mu Taniyeli 12:4 onaakhwanela mmahiku yaala ookuchula?

¹² Moorweela wa mulipa a miririmu Taniyeli, Yehova aahiroromeliha wi mu elukuluku yookuchula, ‘masuwelelo’ eeparipari anaphwanyeya Mpiipiliyani yaahaala ‘waacereryeya.’ Ancipale yaahaala omwiiwexexaka Piipiliya. (Mwaalakhanye Taniyeli 12:4, PMM.) Echu emoha yaahaala waakhaviherya ancipale omwiiwexexa Piipiliya ori wi Piipiliya ni soolaleeryiwa inathipeleya Mpiipiliyani saahaala otaphuleliwa, wimprimiriwa ni okaiwa wa achu ancipale. Piipiliya liivuru yoowo otaphuleliwe ni okaiwe vancipale mu elapo yoothene. Piipiliya otaphuleliwe ni alipa a nakoso, toowalamelaxa mu ilukuluku soothene. Achu a Yehova annataphulela Masu a Muluku, anteero naari makupa aya mu ilocelo opwaha 240, nave muchu vyakala onanwerya okhalano ekoopiya ahilimveru echu. Ntoko yookhumelela, achu a maloko oothene annahuserya “michaka saphaama . . . sa Omwene” makuchuwelo ehaakumve ophiya. (Mat. 24:14) Muluku ahu awookololowa onachuna waavaha ekari achu ancipale wakhala wooweryeya wi emusuwele yoowo moorweela wa waalakhanya Masu awe. Ela enneereya nthowa nawi onnanisivela vancipale oothene ahu.

PIIPILIYA ONNOONIHERYA OSIVELA WA MULUKU

13. Ntakhara heeni nnalocaahu wi Piipiliya onnooniherya osivela wa Yehova? (Yohani 21:25)

¹³ Piipiliya onnooniherya wi Mwaneene ookhalano mukhalelo mutokweene—osivela. (1 Yoh. 4:8) Muthokororye yeeyo Yehova ohenleiye Mpiipiliyani ni yeeyo ohihenleeiyemo. Owo onnanivahererya yeeyo nnaachunaahu wi nikhaleno onthamwene ni yoowo, wi nikhaleno okumi woohakalaliha olelo, nave tho wi niphwanelele waakhela ekumi yoohimala omwaahiyu. Nyenya, woona wi Yehova onnanisivela, owo hanivanhe sooleeliherya sincipale seiho nihinachunaahu wi nimurumeele yoowo.—Mwaalakhanye Yohani 21:25.

14. Mukhalelo taani mukina Piipiliya onooniheryeiye wi Muluku onnanisivela?

¹⁴ Yehova tho onnooniherya osivela moorweela wa oloca ni hiyo mmukhalelo yoowo onancicimiha. Mpiipiliyani, owo hananleela yeeyo ene nnaphwanelaahu weera naari nihinaphwanelaahu weera mmikhalelo soothene sa okumi ahu. Moohiyana, owo onnapharihela saweereya sa okumi, masu a miririmu ootikhiniha, ni ikano soophara muteko wi anikhaviherye opaka soolakelela saphaama. Mmikhalelo seiha, Masu a Muluku annanceenyerya omusivela ni omwiiwelela yoowo ni murima ahu woothene.

15. (1) Ti mwawiihai Yehova onooniheryeiye wi onnaapwacha yaale anaalakhanya Masu awe? (2) Mu eruku, saweereya taani sa Mpiipiliyani mwaana a mwaamuthiyana, munna ori mmiravo ni murokora awunnuwelavo enuupuwelelaaya? (Map. 39:1, 10-12; 2 Mam. 5:1-3; Luka 2:25-38)

¹⁵ Piipiliya onnooniherya wi Yehova onnanikhapelela vancipale. Mwawiihai? Mmasu awe soosareyamo saweereya sa mukhalelo achu aniisoonaaya. Ninniiwexexa miyoonelo sa saweereya seiho sa Mpiipiliyani woona wi achu awo yaari “oolikana ni hiyo.” (Tiy. 5:17) Echu yoochuneyaxa, moorweela wa othokororya mukhalelo owo aakhaliheiye achu ntoko hiyo, ninnakhala ooreheryeya wiiwexexa moomalela wi “Yehova ookhalano niphwanya ntokweene nave taikharari.”—Tiy. 5:11.

16. Tiheeni nnahuseryaahu vooloca sa Yehova vaavaa nnaalakhanyaahu saweereya sa Mpiipiliyani sa achu yaawo yaapanke soohesa? (Yesaya 55:7)

¹⁶ Piipiliya onnooniherya osivela wa Yehova ntakhara hiyo mmukhalelo mukina. Soorepa sinnaniroromeliha wi Muluku ahu harwa aninyanyala vaavaa nnapakaahu soohesa. Aisarayeli yaanamuchekela Yehova wiiliwiili, nyenya vaavaa awo yaacharuwaaya mweeparipari, Muluku aanaakhurumuwela. (Mwaalakhanye Yesaya 55:7, PMM.) Akristu oopacerya yaanasuwela tho wi Muluku aanaasivela yaawo vancipale. Mooveereliwa, murummwa Paulo aahaaceenyerya akhweiye a munroromeloni wi ‘emulevelele ni omuhakararya’ mulopwana mmoha yoowo aapanke soocheka itokweene nyenya acharuwa. (2 Ako. 2:6, 7; 1 Ako. 5:1-5) Ennanlipiha osuwela wi Yehova hanaanyanyala alapeli awe pahiru nthowa na opaka yoohesa! Moohiyana owo aanasiveliwa waakhaviherya yaawo, waalaka, nave aanaawopa wi ekookele okhala asinthamwene awe. Owo onnaroromeliha weerano emohamoha wa anamacheka oothene oocharuwa olelo.—Tiy. 4:8-10.

MVAHE ESISAPO ‘YAMAHALA YAPHAAMA’ YA MASU A MULUKU

17. Ntakhara heeni Piipiliya yamahala yaphaamaxa?

¹⁷ Yehova oonivaha yamahala yaphaamaxa. Ntakhara heeni Piipiliya ti yamahala yeeyo? Ntoko nihusenryaahu, Piipiliya onnooniherya miruku, wookololowa ni osivela wa Muluku. Liivuru yoola onnooniherya wi Yehova onachuna wi nimusuwele yoowo. Owo onachuna wi nikhale asinthamwene awe.

18. Ti mwawiihai nneeraahu nooniherye wi ninnathamalela ‘yamahala yaphaama’ ya Yehova, Piipiliya?

¹⁸ Hiyaano hannaphwanela ocuwala wi Masu a Muluku ‘yamahala yaphaama.’ (Tiy. 1:17) Mwawiihiiha hankooni ntitelele wooniherya othamalela ntakhara yamahala yeela. Nnahaala weerano yeela moorweela wa waalakhanya masu awe aweela ni wuupuwelela yaawo. Vaavaa nneerahuno yeela, nnaphwanela ororomela wi Mwaneene a Piipiliya onahaala oreeliha wiilipiserya wahu nave wi ‘nnamphwanya nsuweliho na Muluku.’—Mas. 2:5, TNM.