Kinnawoona Oororomeleya Eyaaka Vahoolo

Kaahitheya woona wi nkuupuwela wi nthamwene aka aari muchu a malapelo. Miyaano kaahimukoha: “Tiheeni osuwenlaawe vooloca sa Piipiliya?” Owo haawaakhunle mwawaakuveya. Voocharela, aahikileela wi amamaawe yaari Namoona a Yehova, nave wi owo aahihuserya sincipale ni yaawo. Mootikhiniheya, kaahimveka wi akileele sincipale vooloca sa Piipiliya.

Ovaanela wahu waahimaliha iwora sincipale mu ohiyu yoole. Nthamwene aka aahikileela wi Piipiliya onnooniherya wi Satana tonalamulela elapo. (Yoh. 14:30) Akhweya nyuwaano munnasuwela yeela mu okumi anyu woothene, nyenya wa miyo, ela yaari echu evyaani ni yootikhiniha. Ilukuluku soothene kiiwa wi Muluku aphaama tonalamulela elapo. Nyenya eyo yaanakuukhula woona wi tahi yeeyo koonaaka mookumini. Naamwi kaarino pahiru iyaakha 26, kaanoona ichu sincipale saakuukhula.

Apapa aka yaari mulipa oomweeciha aviyawu a Anakhoco o Estatu Unitu. Mwawiihiiha, vaavaa kaaryaaka mmiravo, kaanasuwela phaama wi ekhoco etokweene yanwerya weereya, woona wi anakhoco yaari ooreheryeya weerano yeeyo. Ekhoco yo Viyetinami yeeren’ye vaavaa kaahuseryaaka o Kaliforniya. Kaahivolowa mu nikhuuru na anaxikola yaawo yaakaaha. Mapilisa yaahipacerya oniikara ni ikopo, nave hiyaano naahipacerya ochawa nihoonaka phaama nthowa na mwiixi yoowo yaapharihelaaya. Chiryeene, ele yaari elukuluku ya mawoowo ni yoomwareya. Ahooleli a ipoliitika yaaniiphiwa, achu yaanaakaaha nave yaanawanawana. Achu oothene yaahikhalano miyoonelo soohiyanahiyana vooloca sa yeeyo yaaphwanela weeriwa. Eyo yaahaahaleeliha oothene.

Mu eyaakha ya 1970, kaahipacerya olapa makupa oomoko o Alaska nave kaahikhalano ikhorowa sincipale. Voocharela, kaaya o Lontre, kithumawo moota nave kipacerya weeciha kiyaaka makupa oohico kihilakelenle nipuro nene kaayaakawo. Miyeeri soocharela, kaahichoowela o Afrika. Variyari va mukwaha, kaahaasuwela achu yaawo yaarino yoolakelela emohamoha—ochawa makacamiho aya oothene.

Nthowa na yeeyo koonaaka ni kiiwaaka, nihusiheryo na Mpiipiliyani nawi ichu sa veelaponi inavareryeliwa ni yoopatuxiwa yoonanara yoomunepani, naahikhala neeparipari wa miyaano. Nyenya waakhanle wi tahi Muluku onavareryela elapo, tiheeni owo onapakeiye? Miyaano kaanachuna osuwela yeela.

Mu miyeeri soocharela, kaahiphwanya naakhulo nene. Moovira wa elukuluku, kaahaasuwela ni waasivela alopwana ni athiyana ancipale yaawo naamwi yaarino mikhalelo soothene soohiyanahiyana yaahooniherya nroromelo mwa Muluku mmoha eeparipari.

IRLANTA OOMOKO—“ELAPO YA IPOMPA NI AKAPUCHI”

Vaavaa kaakookenlaaka o Lontre, kaahichekula ni amamaawe nthamwene aka nave awo yaahikivaha Piipiliya. Voocharela, vaavaa kaakelaaka o Amistartau, Niterlanti, Namoona a Yehova mmoha aahikoona kimwaalakhanyaka Piipiliya vathi va maliixo a mmuxeweni nave owo aahikikhaviherya ohuserya sincipale. Voocharela kaaya o Tuplini, Irlanta, nave kaahiphwanya efiliyale ya Anamoona a Yehova. Kaahimana nsele noohoolo. Weiwo kaahimusuwela Artur Mateus, munna mmoha a miruku ni a mavyakelo. Kaahimveka yoohuserya ya Piipiliya nave owo aaheemererya ohuserya ni miyaano.

Kaahipacerya ohuserya ni nchuno ntokweene nave kaari oorehereya owaalakhanya aliivuru ni irevista saavonyiwa ni Anamoona a Yehova. Nave tho mweeparipari, kaanamwaalakhanya Piipiliya vameekheiye. Kaanakhala ootikhiniheya! Ophiyerya tho mmithukumano sa muloko, kaanawoona anamwane evahaka maakhulo a makoho yaawo alopwana oohuserya yaaryaayano mu iyaakha sincipale, ntoko: ‘Ntakhara heeni sinneereya ichu soonanara? Muluku taani? Tiheeni eneereya mookhwani?’ Asinthamwene aka oothene yaari pahiru Anamoona a Yehova. Eyo yaari yookhweya woona wi nkaamusuwenleru muchu mukina mu elapo yeele. Awo yaahikikhaviherya omusivela Yehova ni ochuna opaka yookhwela awe.

Mu 1972 kaahipatisiwa. Eyaakha emoha ohoolo waya, kaahikhala piyoneero nave kaahithaamela mmuloko mukhaani wo Newuri, makupa oomoko o Irlanta. Kaahaalukaara empa ya maluku yaakhala omwaako. Weiwo saahikhalawo imope vakhiviru, nave kaaniivyakiha ni miyaha saka ohoolo waya. Yaakhala ntoko wi yaanawiriyana moomaaleleya vaavaa saalyaaya munyepu. Iho hisaakivaha ikano, nyenya saanakikhaviherya woona mukhalelo kaahaalaaka waawehaka alipa oowiriyana. Mu 1974, kaahithanliwa ntoko piyoneero avameekheiye nave kaanalapa ni Nixel Piti, yoowo aakhanle nthamwene mu okumi aka woothene.

Mu elukuluku yeele waahikhalawo owanawana otokweene o Irlanta Oomoko. Makupa yaale akina yiichana “elapo ya ipompa ni akapuchi.” Yaari yawunlaana owoona achu ewanaka mumphironi, achu yoopeliwaka nave ikaaro iphuwaka. Makacamiho ilukuluku sincipale yaakhumelela mu ipoliitika ni mu ikerexa. Nyenya, Akatolika ni achu a Ikerexa ikina yaahisuwela wi Anamoona a Yehova hiyakhaviherya ipoliitika, mwawiihiiha naanawerya olaleerya mootaphuwa ni mookhapeleleya. Achu a elapo yeele, ilukuluku sincipale yaanasuwela ti liini nave ti woowi waahaalaaya okhalawo owanawana, nave yaananleela wi nihiyewo.

Naamwi hiihaa, saanakhalawo mikhalelo sawoopiha. Nihiku nimoha, miyaano ni Tinis Karikani, yoowo tho aari piyoneero, naahilaleerya mu epooma yawaacamela yeeyo yaahaariwo Anamoona a Yehova, weiwo naaphiyalaahuwo mu ekwaha emoha pahi. Muthiyana mmoha aahinootherya wi na anakhoco oovitheya o Inklatera, akhweya nthowa nawi haavo a hiyo aasuwenle oloca ntoko yaawo. Wootheriwa wuuwu waahinoopopiha. Waakhaknle wi muchu pahiru ohooniherya oreera murima wa anakhoco, owo anwerya wiiphiwa ni kapuchi naari woopeliwa va nikutha. Vaavaa naaryaahu vaate nriiryiwe nave nri mukhatiihu niweheryaka ekaaro, naahoona ekaaro ekina yeemelaka vachu aawiriwamo chaaya weiwo aariwo muthiyana yoole aanoothenrye. Owo aahiya wa alopwana eeli yaari mukaaro nave analoca ni yaawo anthoonyaka. Voocharela, mulopwana eeciha ekaaro aaheeciha vakhaani-vakhaani aniphwanya nave apacerya onikoha vooloca sa elukuluku ikaaro saahaalaaya ovira. Vaavaa ekaaro yaaphin’yaaya, awo yaahiloca ni mulipa aweeciha. Hiyaano hinaawiiwale yeeyo awo yaalocaaya. Woona wi hiyaawenlemo achu akina, hiyaano naahilekecheya wi yaahipakiwa marehereryo wi niipheliwe ocai wa epooma. Nyenya tahi yeeyo yeeren’ye. Nimanle owela mukaaroni, kaahimukoha mulipa a weeciha: “Alopwana ale eri wile, yookohaani vooloca sa hiyo?” Owo aahaakhula: “Miyaano kohoosuwelaani, nave kohaaleela yaawo. Muhuukhuwe. Nyuwaano muri ookhapeleleya.”

Mu eyaakha ya 1976 va muthukumano wa ekulucu wa etistrutu o Tuplini, kaahimusuwela Paulina Lomaxi, piyooneera avameekheiye yoowo aaxekurya orweela o Inklatera. Owo aari murokora a nroromelo, awiiyeviha ni oosivela. Owo ni munnawe Ray yaahisuwela eparipari mu okumi aya woothene. Eyaakha emoha ohoolo waya, miyaano ni Paulina naahithelana nave ntitelela mmuteko wa opiyoneero wavameekhaaya o Palimena, Irlanta Oomoko.

Voocharela naahilapa mmuteko wa weeceeca, naarumeelaka annihu o Pelfaste, Lontonteri, ni mmakupa makina awoopiha. Naahilipiheya woona nroromelo na anna ni arokora ahu yaawo yaahin’ye sookhovelela soolipa sa malapelo atheru, nthalu ni wiica wi emurumeele Yehova. Yehova chiryeene aahaareeliha ni waakhapelela yaawo!

Miyaano kaahikhala o Irlanta mu iyaakha khumi. Voocharela, mu eyaakha ya 1981 naahiwompwa wi nivolowe mu eturma 72 yo Kiliyati. Nimalinhe exikola, naahithanleliwa o Sera Leyowa, Makupa Onakhuma Echeku ya Murupi o Afrika.

SERA LEYOWA—ANNA YAARI OOROROMELEYA NAAMWI YAARI OOHAAWA

Hiyaano naakhala mu empa ya mamisiyonaario vamoha ni achu 11 ooreera murima. Naanamuuka mwanakhu mmoha, ikwartu soorapamo raru, telefoni mmoha, maakina mamoha oocapano ni awuumihano. Okwateya wa enerxiya waaneereya wiiliwiili nave ehilokohiwe. Makhule yaahisareya mpa nave inowa saaneeca warmasiya.

Naamwi mukhalelo ahu wa okumi wahikhanle woophwanelela, naanapuha vancipale muteko ahu woolaleerya. Achu yaanamucicimiha Piipiliya nave yaanawiriyana moomaaleleya. Ancipale yaanamuhuserya Piipiliya nave yaanakhala Anamoona a Yehova. Achu a vanipuroni yaakiichana “Senhor Roberto.” Paulina iichaniwa “Senhora Roberto.” Nyenya ohoolo waya, woona wi kaanalapa ilukuluku sincipale ofiliyale, kaanaya mmuteko woolaleerya mu ikwaha sa vakhaani, mwawiihiiha achu yaahipacerya omwiichana Paulina “Senhora Paulina.” Miyaano kaahikhala “Senhor Paulina.” Paulina aanasiveliwa ni yeela!

Anna ancipale yaari oohaawa, nyenya Yehova aanakhapelela soothowa saya, ikwaha ikina, mmikhalelo sootikhiniha. (Mat. 6:33) Kinnamuupuwela murokora mmoha yoowo aarino ikhorowa pahiru wi athumeno yoolya ya nihiku nenle wa yene ni mwanawe, nyenya owo aahimvaha soothene munna yoowo iiceliwa nave aahirino ikhorowa wi athumeno murece wa malaariya. Voocharela, mu nihiku nene nenle muthiyana mmoha aahiphiya moohiwehereryeya wa murokora yoole nave amuliva wi arehererye miihi awe. Saaheereya mikhalelo mincipale sootikhiniha ntoko seiha.

NIXERIYA—NIHUSERYAKA SOOKHOVELELA IVYAANI

Naahikhala o Sera Leyowa mu iyaakha 9. Voocharela, naahikerihiwa Opeteli ya o Nixeriya. Vano naari mu efiliyale etokweene. Miyaano kaapaka muteko mmohamoha kaapharaaka ofiliyale yo Sera Leyowa, nyenya wa Paulina yaari matorokelo matokweene ni oovila. Mu miyeeri soothene owo aanamaliha iwora 130 mmuteko woolaleerya, nave aahikhalano soohuserya sa Piipiliya saaya vahoolo. Vano owo aahithanleliwa muteko wa osona ikuwo, nave aanamaliha mahiku awe asonaka ikuwo saahuunwe. Aahimaliha elukuluku yincipale wi iikhovelelihe ni matorokelo, nyenya ancipale yaanamuthamalela vancipale ntakhara muteko aaphareiye, nave owo aanaavya ikari sa waalipiha Mapetelita akhwaawe.

Sookhovelela so Nixeriya saari ivyaani wa hiyo, nave naaphwanela ohuserya sincipale. Mu ekwaha emoha, munna mmoha aahiphiya o eskritoriyu waka wi akisuwelihe murokora mmoha yoowo amanle weemereryiwa orumeela Opeteli. Vaavaa kookonlaaka ntata naka wi kimvahe mooni, owo aahikikokhorela. Kaahikhala ootikhiniheya! Mwawaakuveya, kaahuupuwela soorepa piili: Saweeriwa ti Arummwa 10:25, 26 ni Wupulula 19:10. Kaahiikoha: ‘Apwanne kinaphwanela omuleela wi hanaphwanela weerano yeela?’ Mu elukuluku emohamoha, kaahuupuwela wi owo aaheemereryiwa wi arumeeleke Opeteli, mwawiihiiha, aanasuwela yeeyo Piipiliya onahusiheiye.

Kaahikhala awaakanyeryeya mu ochekulela yoole, nave ohoolo waya kaahipaka otholathola wavakhaani. Kaahihuserya wi murokora ole aachariha yeeyo mu elukuluku yeele nivano yaapakiwa mmakupa makina a elapo. Alopwana tho yaahaala okokhora mmukhalelo mmohamoha. Ole waari mukhalelo wa wooniherya ncicimiho. Hiwaari mukhalelo wa malapelo, nave sookhalamo sootakiherya ntoko seiha Mpiipiliyani. (1 Sam. 24:8) Kaari oohakalala woona wi mu ohipwacha waka nkaalonce echu yeeyo yaahaala omuuliha muru murokora aka.

Naahaasuwela achu ancipale o Nixeriya yaawo yaari oororomeleya variyari va iyaakha. Muthokororye yaweereya ya Isaiah Adagbona.a Owo aahusenrye eparipari ari mmiravo, nyenya ohoolo waya aahiphwanyiwano ereca ya ilepa. Owo aahirumiheliwa o nipuro nenlo yaakhapeleliwamo achu a ilepa, nave weiwo Namoona a Yehova aari pahiru yoowo. Naamwi iiciwa, aahaakhaviherya achu opwaha 30 yaawo yaarino ilepa weemererya eparipari nave aahipaceriha ni ohoolela muloko mu nipuro nenle.

KENIYA—ANNA YAARI OOPIXA MURIMA NI MIYAANO

Mu 1996 naahithanliwa wi narumeele o efiliyale yo Keniya. Ela yaari ekwaha aka yoopacerya okookela mu elapo yeeyo kaaxekunryaaka, yeele kiloncaaka woopaceryani. Hiyaano naakhala Opeteli. Weiwo yaahikhalawo akhole ancipale. Awo yaaniiya sawiima seiho arokora yaakhapelelaaya. Nihiku nimoha, murokora mmoha yoowo aakhala Opeteli, aahihiya nxanela nawe noohuleya nene. Vaavaa aakonkeiye, owo aahiphwanya nikhuuru na akhole elyaaka yoolya yeeyo yaaphwannyaaya okwartu wawe. Owo aahituthuwa nave akhuwela acimakelaka vaate. Akhole yaahikhuwela tho nave ecupha vaxanela.

Miyaano ni Paulina naarumeela mmuloko wa Esuwayili. Nimalinhe elukuluku vakhaani, kaahithanliwa wi keeciheke Yoohuserya ya Liivuru ya Muloko (olelo eniichaniwa Yoohuserya ya Piipiliya ya Muloko). Nyenya, miyaano nkaaloca phaama elocelo aya. Woona wi kaaniirehererya woosiilo ntakhara yoohuserya, kaanawerya waalakhanya makoho. Nyenya wakhala wi maakhulo yaavahereryiwa hayiiwanana ni yeeyo yaarempwe, miyaano nkaawerya wiiwexexa. Ela hiyaari echu yoophwanelela! Kaanakhala oothanana ntakhara anna ni arokora. Kaahikhala ootikhiniheya woona wi awo moopisa murima ni mwawiiyeviha, yaanakeemererya weecihaka yoohuserya ya muloko.

ESTATU UNITU—NROROMELO MU ELAPO YOOREELA

Hinaamalinhe eyaakha o Keniya. Voocharela, mu eyaakha ya 1997 naahiwompwa wi naarumeeleke Opeteli yo Prokili, Nova York. Vano naakhala mu elapo yeeyo achu yaaryaayano ichu sincipale soomwiilini, seiho sirino makacamiho aya. (Mas. 30:8, 9) Nyenya, naamwi mu elapo ntoko yeela, anna ni arokora ahu annooniherya nroromelo ntokweene. Anna ni arokora ahu annapharihela elukuluku ni sookhalano saya, ohiya wi ereele akaneene, nyenya wi ekhaviherye muteko waphaama wa marehereryo a Yehova.

Moovira wa iyaakha, nohoona nroromelo na Anamoona a Yehova akhwiihu mmikhalelo soohiyanahiyana. O Irlanta, naahoona nroromelo na anna ni arokora naamwi ehoolelaka owanawana. O Afrika, naahoona nroromelo na anna ni arokora naamwi yaari oohaawa ni oovalaanyeya. O Estatu Unitu, naahoona nroromelo na anna ni arokora naamwi yaakhala mu elapo yooreela. Yehova chiryeene onnakhala oohakalala vaavaa onaweheiye veelaponi yavathi nave anawoona achu awe yooniheryaka osivela wa yoowo mmikhalelo soothene!

Iyaakha sinnachimaka ntoko “sikano oochavano ikuwo.” (Yupu 7:6, PMM) Hiyaano vano nnalapa vamoha ni akina o nipuro ntokweene o Warwick, Nova York, nave ninnapuha otitelela orumeela ni achu yaawo anasivelana mweeparipari mukina ni mukhwaawe. Vano nri oohakalala ni oosiveliwa opaka yeeyo nnaweryaahu wi nimukhaviherye Mwene ahu, Yesu Kristu, yoowo moohilekela onahaala waavaha nchuwelo achu ancipale oororomeleya.—Mat. 25:34.