Makoho a Alipa Waalakhanya
Apwanne masu awi “munamwaakhapelela yaawo,” anaphwanyeya mu Salmu 12:7, anaaloca “oothoiwa” (eversiikulu 5) naari wa “masu a Yehova” (eversikulu 6)?
Masu alociwe woopaceryani ihilociwe iversiikulu seiya, anooniherya wi iversikulu iha inaaloca achu.
Mu Salmu 12:1-4, ninnaalakhanya wi “achu oororomeleya aacakanela variyari va achu.” Vano mmuthokororye Salmu 12:5-7, iversikulu inavolowela mwaha.
“‘Wa nthowa na ohooxiwa wa oothoiwa,
Wa nthowa na wuupulela wa oohaawa,
Miyaano kinamvinya ni weeravo echu.’
‘Miyaano kinamwaavuluxa wa yaale anaakhaliha mwa munyemu.’
Masu a Yehova taweela;
Ari ntoko eparata erehereryiwe mumvekhoni wa oloko, yaweelihiwa, ikwaha thanu napiili.
Munamwaakhapelela yaawo, khwoo Yehova;
Munarwa mmwaakiha mmoha ti mmoha a yaawo wa muyareriwo yoola okhala wookhala.”
Va eversikulu 5 ennooniherya yeeyo Muluku onaloceiye vooloca sa “oothoiwa.” Owo onamwaavuluxa.
Eversikulu 6 ennaaceererya wi “masu a Yehova taweela,” ‘ntoko eparata erehereryiwe.’ Ola ori moonelo yoowo Akristu oororomeleya aneemereryaaya moomalela.—Sal. 18:30; 119:140.
Vano muthokororye eversikulu enacharela, Salmu 12:7: “Munamwaakhapelela yaawo, khwoo Yehova; Munarwa mmwaakiha mmoha ti mmoha a yaawo wa muyareriwo yoola okhala wookhala.” Taani “yaawo” analociwa?
Woona wi eversikulu 7 enacharela ni masu anii: “masu a Yehova,” achu akina ananwerya ophiyerya makuchuwelo “yaawo” anaahiwa masu a Muluku. Nave noosuwela wi Muluku oomukhapelela Piipiliya moohipwacha wiilipixerya otokweene wa amwiicani wa onwatiiha ni omutoloxa.—Yes. 40:8; 1 Pet. 1:25.
Mwawiihiiha, yeeyo enalociwa mu eversiikulu 5 mweeparipari ti yoolikana. Yehova ookhalano owerya nave onahaala otitelela waakhaviherya ni waavuluxa “oothoiwa” ni yaale “anahooxiwa.”—Yupu 36:15; Sal. 6:4; 31:1, 2; 54:7; 145:20.
Nyenya, taani “yaawo” analociwa mu eversikulu 7?
Salumu yoola onnooniherya wi “yaawo”, analociwa achu.
Salmu 12:1 ohooniherya vanlakani mukhalelo “achu oororomeleya” yaawo akhweya yaawokiwe. Mwawiihiiha, ninnaphwanyamo masu awi Yehova onamwaavinyerya yaale anapharihela moonanara nlumi naya. Salmu onnanlipiha wi nnaphwanela omuroromela Muluku wi onamweeravo echu ntakhara achu awe, woona wi masu awe taweela.
Mwawiihiiha eversikulu 7 enaloca wi Yehova onahaala waakhapelela ni owaakiha “yaawo,” eyo tiwi, wa yaawo anahooxiwa ni oonanara.
Masu ataphuleliwe “yaawo” annalikana ni masu Masoretiku a Hepraiku. Seputuaginta Kreka onapharihela “hiyaano” ikwaha piili va eversiikulu 7, yeeyo enaathoonya oororomeleya yaawo anathoiwa nave anahooxiwa. Wookuchula, eversiikulu 7 enaloca wi oororomeleya anahaala okhapeleliwa “wa muyareryiwo yoola,” wa achu yaawo anavuwiha ichu soonanara. (Sal. 12:7, 8) Mu Tarkums Aramaiku va eversikulu 7 eni: “Nyuwo APWIYA, munahaala waakhapelela awookololowa, munahaala owaakiha yaawo orweela wa muyareryiwo yoola okhala wookhala. Mmakupa oothene anneecamo aweera soonanara ntoko mututhu yoowo onanuula nikhami na anamwane a achu.” Eyo ennaaceererya yawooniherya yawi Salmu 12:7 hanaloca masu a Muluku.
Ntoko nonnaahu, eversikulu ela ennavahererya ewehereryo wa “achu oororomeleya” wi Muluku onamweeravo echu.