EPIIPILIYOTEKA ya Watchtower
EPIIPILIYOTEKA
ya Watchtower
Elomwe
  • PIIPILIYA
  • SOOLALEERYIWA
  • MITHUKUMANO
  • w24 Akostu ipaax. 26-31
  • Nikhaviheryo wa Yaale Aviihiwemo Mmulokoni

Henaphwanyeya exilema mu nikupa nenla.

Munikhurumuwele, yookhala ehesen'ye nichunaka owoonihaani exilema ela.

  • Nikhaviheryo wa Yaale Aviihiwemo Mmulokoni
  • Mulipeleli Alaleyaka Omwene wa Yehova (Oomuhuserya)—2024
  • Miru Mikhaani
  • Miyaha Soophwanaphwana
  • “MUMVIIHEVO MUCHU OONANARA”
  • ATOKWEENE ANAAKHAVIHERYA HAI YAAWO AVIIHIWEMO MMULOKONI?
  • TIHEENI MULOKO ONAPHWANELAAYA WEERA?
  • NTAKIHERYAKA NIPHWANYA NI IKHARARI SA YEHOVA
  • Atokweene Anooniherya Hai Osivela ni Ikharari wa Alipa Oocheka
    Mulipeleli Alaleyaka Omwene wa Yehova (Oomuhuserya)—2024
  • Yehova Onachuna wi Muloko Waakhaliheke Hai Yaale Apanke Yoocheka Etokweene?
    Mulipeleli Alaleyaka Omwene wa Yehova (Oomuhuserya)—2024
  • “Awiichane Atokweene”
    Mulipeleli Alaleyaka Omwene wa Yehova (Oomuhuserya)—2025
  • Otikitherya Murecele ni Weela Mmulokoni
    Ooreheryeya wi yeereno yookhwela ya Yehova
Moone Sincipale
Mulipeleli Alaleyaka Omwene wa Yehova (Oomuhuserya)—2024
w24 Akostu ipaax. 26-31

MWAHA WOOHUSERYA 35

NCIPO 123 Ninnamwiiwelela Yehova ni Marehereryo Awe

Nikhaviheryo wa Yaale Aviihiwemo Mmulokoni

“Onamukhalawo tho ohakalala otokweene wirimu nthowa na mulipa oocheka ocharunwe waapwaha achu awookololowa makhumi mathanu namaxexe ni thanu naxexe, yaawo ohiri woochuneya orukunuxa murima.”—LUKA 15:7.

IPONTU SA VASULU

Mathowa anaweeriha akina oviihiwamo mmulokoni ni mukhalelo atokweene aneeraaya yaakhaviherye ocharuwa ni okookela okhalano mahala a Yehova.

1-2. (1) Yehova onoona hai yoocheka etokweene? (2) Tiheeni Yehova onaweheryeiye vooloca sa alipa oocheka?

YEHOVA tahi Muluku ootumerya; owo onniica yoocheka. (Sal. 5:4-6) Owo onachuna wi ncicimiheke malakiheryo awe awookololowa, yaawo owo otikithenryeiye wa hiyo Mmasu awe. Mweeparipari, Yehova hanaweherya ophaameya wa achu oohiphaameya. (Sal. 130:3, 4) Mu elukuluku emohamoha, owo hanaatumerya ‘achu oonanara murima, nave anapharihela mahala matokweene a Muluku wi etitelele meecelo aya awuuliha muru.’ (Yuta 4) Chiryene, Piipiliya onnaloca sa “otolosiwa wa achu ootakhala murima” mu ekhoco ya Muluku ya Armaketo.—2 Pet. 3:7; Wup. 16:16.

2 Nyenya, Yehova hanachuna wi muchu mmoharu mano atoloxiwe. Ntoko nthokoronryaahu mmiyaha ivirale, Piipiliya onnaloca mookwakwaleya wi owo “onachuna wi oothene erukunuxe murima.” (2 Pet. 3:9) Atokweene a muloko annamutakiherya Yehova vaavaa awo moopisa murima aneereryaaya waakhaviherya alipa oocheka wi etoroke mukhalelo aya ni okookela okhalano mahala a Yehova. Nyenya ikwaha ikina alipa oocheka hanacharuwa. (Yes. 6:9) Akina annatitelela mmeecelo aya oonanara moohipwacha wiilipiserya wawuuluulela wa atokweene ya waakeriha awo woocharuwani. Tiheeni atokweene anaphwanelaaya weera mmukhalelo yoola?

“MUMVIIHEVO MUCHU OONANARA”

3. (1) Tiheeni Piipiliya onaloceiye sa yeeyo enaphwanela weeriwa wa alipa oocheka oohicharuwa? (2) Vaavaa muchu onakhooceiye ocharuwa, ntakhara heeni nnanwerya oloca wi owo orimuthanla oviihiwamo mmulokoni?

3 Vaavaa mulipa oocheka ohinacharuweiye, atokweene hanakhalano yoothanla ekina voohikhala ochariha ohoolela onaphwanyeya mu 1 Akorintu 5:13 yoowo oni: “Mumviihevo muchu oonanara variyari vanyu.” Mulipa oocheka orimuthanla yookhumelela yeeyo; mwawiihiiha, owo onahepha yeeyo aanleiye. (Aka. 6:7) Ntakhara heeni nnalocaahu yeela? Nthowa nawi owo ookhooca wiilipiserya wawuuluulela wa atokweene wa omukeriha woocharuwani. (2 Mam. 17:12-15) Owo ohooniherye moorweela wa saweera sawe wi hanachuna wiiwelela malamulo a Yehova.—Malam. 30:19, 20.

4. Ntakhara heeni enapakiwaaya yoolokoha vaavaa mulipa oocheka ohinachuruwa onaviihiweiyemo mmulokoni?

4 Vaavaa mulipa oocheka oohicharuwa onaviihiweiyemo mmulokoni, ennapakiwa yoolokoha oleeliwaka muloko wi owo tahi Namoona a Yehova.a Yoolakelela ya yoolokoha yeela tahi omuuliha muru mulipa oocheka. Moohiyana, eyo enapakiwa wi muloko owerye ochariha olopola wa mu Soorempwa vooloca sa ‘omaala okhala’ ni muchu yoowo, “naari olya mano ni” yoowo. (1 Ako. 5:9-11) Ohoolela yoola onavahereryiwa ni mathowa aphaama. Murummwa Paulo oorepa: “Yooruruvaliha vakhaani ennaruruvaliha ephepa yoothene yaweetheiwa.” (1 Ako. 5:6) Alipa oocheka ahinacharuwa ananwerya waaceecheiha yaale aniilipixerya okhala mwawiiwanana ni malakiheryo awookololowa a Yehova.—Mas. 13:20; 1 Ako. 15:33.

5. Ti mwawiihai nnaphwanelaahu omoonaka muchu yoowo oviihiwemo mmulokoni nave ntakhara heeni?

5 Vano, nnaphwanela omoonaka hai muchu yoowo oviihiwemo mmulokoni? Naamwi nihihaalaka okhalaka vamoha ni yoowo, nnaphwanela omoonaka owo ntoko epucepuche yoorimeela, ohiya ntoko echu ehirino ewehereryo. Wakhala wi epucepuche yoorimeela, eyo ennawerya okooka. Muupuwele wi, epucepuche yeela yoorimeela yaahiiveleela wa Yehova. Moothananiha, owo hakhanle mwawiiwanana ni wiiveleela yoola mu elukuluku yeeyo, nave eyo yoomweeriha wiihela va yawoopiha. (Ese. 18:31) Nyenya, woona wi nlelo yookhalavo elukuluku nave Yehova onnachuna wooniherya ikharari, ninnaweherya wi muchu owo onahaala otorokeya. Ti mwawiihai atokweene aneeraaya emukhaviherye mulipa oocheka yoowo oviihiwemo mmulokoni?

ATOKWEENE ANAAKHAVIHERYA HAI YAAWO AVIIHIWEMO MMULOKONI?

6. Tiheeni atokweene anahaalaaya weera wi emukhaviherye yoole oviihiwemo mmulokoni?

6 Vaavaa muchu onaviihiweiye mmulokoni, apwanne atokweene annamaala weererya omukhaviherya yoowo wi amukookele Yehova? Tahi yeeyo! Vaavaa mulipa oocheka oohicharuwa onaleeliweiye wi onahaala oviihiwamo mmulokoni, ekomisau ya atokweene enahaala omutharihela yeeyo owo onaphwaneleiye opaka wi akookele mmulokoni. Nto atokweene anahaala opaka sincipale. Mmikhalelo mincipale, awo anahaala omuleela mulipa oocheka wi yaahaala osiveliwa othukumana ni yoowo wanaawiili imanle ovira miyeeri vakhaani wi yoone waakhanle wi owo ootoroka murima awe. Wakhala wi sivinre miyeeri vakhaani muchu oheemererya othukumana ni yaawo wanaawiili, awo anahaala omuceenyerya ocharuwa ni okookela mmulokoni. Naamwi owo ahitoronke murima awe mu elukuluku yeeyo, atokweene anahaala opaka owetha waya wi eloce ni yoowo omwaahiyu.

7. Ti mwawiihai atokweene anooniheryaaya niphwanya na Yehova vaavaa anamukhaviheryaaya muchu oviihiwemo mmulokoni?

7 Atokweene anahaala wiilipiserya otakiherya niphwanya na Yehova vaavaa awo anamuthokororyaaya muchu yoowo oviihiwemo mmulokoni. Ntoko yootakiherya, khalai Yehova haaweherya wi achu awe, Aisarayeli, echaruwe ahaakumve owo weererya waakhaviherya yaawo. Moohiyana, owo aanapaceryiha owaavya yaawo ehaakumve wooniherya eneneeryo vyakala ya ocharuwa. Ntoko noonnaahu mmwaha wanaawiili wa miyaha seiya, Yehova aahooniherya niphwanya nawe moorweela wa omuleela mulipa a miririmu Oseya wi amukookele mwaariye yoowo aatitelela ocheka. (Ose. 3:1; Mal. 3:7) Emutakiheryaka Yehova, atokweene Eekristu mweeparipari annachuna wi mulipa oocheka acharuwe, nave awo haneeriha okhala woovila wi owo eereno yeeyo.—Mwaalakhanye Yeremiya 3:12.

8. Niphwanaphwaniho na Yesu vooloca sa mwaana oorimeela, nnanikhaviherya hai wiiwexexa niphwanya ni ikharari sa Yehova? (Luka 15:7)

8 Muupuwele niphwanaphwaniho na Yesu na mwaana oorimeela, ntoko ethokororyiwaaya mmwaha wanaawiili wa miyaha seiya. Vaavaa aamonneiye ociiwene mwanawe akookelaka owaani, tiithi ‘aamuchimakela, amukhupaarela, nave amvaha epeexu.’ (Luka 15:20) Moone wi tiithi haawehenrye wi mwanawe apacerye oveka nikhurumuwelo. Moohiyana, tiithi taapaceryinhe, hiiha ntoko tiithi vyakala oosivela aahaaleiye weerano. Atokweene anniilipiserya wi yooniherye moonelo mmohamoha wa yaale apherunwe. Awo anachuna wi yaale emuhin’ye Yehova emukookele yoowo. (Luka 15:22-24, 32) Onnakhalawo ohakalala wirimu vaavaa mulipa oocheka onakookeiye, navetho onnakhalavo ohakalala veelaponi yavathi!—Mwaalakhanye Luka 15:7.

9. Tiheeni Yehova onaaceenyereiye alipa oocheka weera?

9 Ntoko noonnaahu ophiyerya vaava, ti yawooneya wi Yehova hanaweemererya alipa oocheka oohicharuwa. Nyenya owo hanahiya waakhaviherya alipa oocheka. Owo onachuna wi awo ekooke. Miyoonelo sa Yehova vooloca alipa oocheka oocharuwa sohooniheryiwa mu Oseya 14:4 [eversikulu 5, PMM] “Kinarwa kaapenusha aIsarayeli wa oreca aya wookookela oculi. Mu olokoha waka nkaamwaakhwela, ntakhara esara aka yeele yookupha.” Esuwelaka mukhalelo Yehova oniisooneiye, atokweene annaavya matorokelo vyakala yaawo anooniherya wi muchu oopacerya ocharuwa. Nave nla nceenyeryo ntokweene wa yaawo amuhin’ye Yehova wi ekooke moohilekela.

10-11. Ti mwawiihai atokweene aneeraaya yeererye waakhaviherya yaale eviihiwemo mmulokoni khalai?

10 Hanka vooloca sa achu yaawo aviihiwemo mmulokoni khalai, akhweya iyaakha sincipale muculi? Achu yaawo akhweya aamaala opaka yoocheka yeeyo yaaweerinhe oviihiwamo mmulokoni. Mmikhalelo mikina, awo akhweya hanuupuwelaru mathowa yaaweerinhe ovihiwamo mmulokoni. Moohipwacha mukhalelo ene, atokweene anahaala weererya owaavya ni waaxekurya achu yaala. Variyari va oxekurya, atokweene anahaala ovekela ni yaawo ni waaceenyerya okookela mmulokoni. Mweeparipari, wakhala wi muchu okhumme mmulokoni mu iyaakha sincipale, moohikhwa minikwa owo ootepa oceecheya omunepani. Mwawiihiiha, wakhala wi owo onnooniherya wi onnachuna okookela mmulokoni, atokweene ananwerya opaka marehereryo wi munna naari murokora eeciheke yoohuserya ni yoowo, naamwi ahikookiheryiwe mmulokoni. Mmikhalelo soothene, atokweene tenahaala omuthanlaka munna naari murokora wi eeciheke yoohuserya ya Piipiliya.

11 Etakiheryaka niphwanya na Yehova, atokweene annachuna owaavya ni waakhaviherya ancipale wakhala wooweryeya wi esuwele wi mulako ti woohuleya ene wi awo ekooke. Vaavaa mulipa oocheka onooniheryeiye ocharuwa nave ahiya meecelo awe oonanara, owo onanwerya okookiheryiwa mmulokoni moohilekela.—2 Ako. 2:6-8.

12. (1) Mmikhalelo taani atokweene anaphwanelaaya okhalano ephoole? (2) Ntakhara heeni hannaphwanela wuupuwela wi tahi wooweryeya wa anamacheka akina waakhela ikharari sa Yehova? (Moone tho enoota.)

12 Mmikhalelo mikina, atokweene anaphwanela okhalano ephoole ehaakumve omukookiherya muchu mmulokoni. Ntoko yootakiherya, wakhala wi muchu aaviihiwe mmulokoni nthowa na omukoniha mwaana naari omwareya naari wakhala wi owo oheererya omaliha othela, atokweene anaphwanela ororomela wi owo ocharuwa chiryene. (Mal. 2:14; 2 Tim. 3:6) Awo anaphwanela okhapelela muhuwo. Mu elukuluku emohamoha, nnaphwanela osuwela wi Yehova onahaala weemererya okooka wa mulipa oocheka vyakala yoowo onooniherya ocharuwa weeparipari nave omaanle wiivoliiherya mmeecelo oonanara. Mwawiihiiha, naamwi ori woochuneya atokweene okhalano ephoole ni yaawo yaakhalinhe akina moonanara, awo hanaphwanela opwaha mphimo elocaka wi anamacheka akina herwaru yaakhela ikharari sa Yehova.b—1 Pet. 2:10.

TIHEENI MULOKO ONAPHWANELAAYA WEERA?

13. Ohiyana taani orivo variyari va mukhalelo nnamukhalihaahu muchu yoowo osameliwe ni atokweene ni mukhalelo nnamukhalihaahu muchu yoowo oviihiwemo mmulokoni?

13 Ntoko nthokoronryaahu mmwaha ovirale, ikwaha ikina ennapakiwa yoolokoha wi muchu oosameliwa. Mmukhalelo yoola, nnanwerya otitelela okhala vamoha ni yoowo, nsuwelaka wi owo oocharuwa nave oohiya meecelo awe oonanara. (1 Tim. 5:20) Owo nlelo onnapaka makupa a muloko nave onnachuna nlipiho nenlo nnarwa wa okhala vamoha ni Akristu akhwaawe. (Ahe. 10:24, 25) Nyenya, mukhalelo onnahiyana vakhaani ni muchu yoowo oviihiwemo mmulokoni. Hiyaano ninnamaala “okhala vamoha” ni muchu yoowo “naari olya mano ni muchu ntoko yoowo.”—1 Ako. 5:11.

14. Akristu eni epharihele hai yawuupuxerya-ya-murima aya evyakihiwe ni Piipiliya vaavaa anaakhalihaaya yaale eviihiwemo mmulokoni? (Moone tho eruku.)

14 Apwanne yeeyo nthokoronryaahu enataphulela wi nnaphwanela ohimpwachaka moomalela muchu yoowo oviihiwemo mmulokoni? Hooye! Chiryene hannaphwanela othata ni yoowo. Nto Akristu ananwerya opharihela yawuupuserya-ya-murima aya evyakihiwe ni Piipiliya wi elakelele waakhanle wi anahaala onwopa muchu yoowo oviihiwemo mmulokoni, akhweya mmusi naari achu yaawo naapankaahuno onthamwene khalai wi aphiye mmithukumano sa muloko. Hanka wakhala wi muchu owo oophiya mmithukumano? Khalai hiyaano hinaamulocela muchu yoowo. Wanaawiili, Mukristu ti Mukristu onaphwanela opharihela yawuupuserya-ya-murima awe evyakihiwe ni Piipiliya mmwaha yoola. Akina ananwerya omulocela naari omwaakhela muchu owo mmithukumano. Nyenya hannaphwanela omaliha elukuluku nichekulaka naari opakano onthamwene ni muchu yoowo.

Iruku: 1. Murokora mmoha onamulikaarela muthiyana yoowo oviihiwemo mmulokoni nave onnanwopa wi aphiye mmithukumano sa Muloko. 2. Murokora ni aiyawe annamulocela muthiyana yoowo ophin’ye mmithukumano.

Akristu ananwerya opharihela yawuupuxerya-ya-murima aya evyakihiwe ni Piipiliya vaavaa analakelelaaya waakhanle wi anahaala onwopa muchu yoowo ooviihiwe mmulokoni naari omwaakhela muchu yoowo vaavaa onaphiyeiye mmithukumano moorweela wa omulocela pahiru (Moone eparakrafu 14)


15. Anamacheka a mukhalelo taani analociwa mu 2 Yohani 9-11? (Moone tho ekaaxa “Apwanne Yohani ni Paulo Yaaloca sa Yoocheka Emohamoha?”)

15 Akina ananwerya wiikoha: ‘Mano, Piipiliya hanaloca wi Mukristu yoowo onamulocela muchu ntoko yoowo onnuukano miteko sawe soonanara?’ (Mwaalakhanye 2 Yohani 9-11.) Ekontestu ya yoorepa yeela ennooniherya wi ohoolela yoola enaahiwa alipa oomwareya ni akina yaawo anaceenyerya ni ovuwiha meecelo oonanara. (Wup. 2:20) Mwawiihiiha, wakhala wi muchu onnamwaramwaxa mahusiheryo awootha naari soocheka ikina, atokweene heni epake marehereryo a omusekurya muchu yoowo. Mweeparipari, yookhalavo ewehereryo wi muchu owo onahaala ocharuwa. Niweheryaka elukuluku yeeyo, hiyaano hinnahaala omulocelaka muchu yoowo naari mano onwopa wi aphiye mmithukumano sa muloko.

Apwanne Yohani ni Paulo Yaaloca sa Yoocheka Emohamoha?

Mu ekaarata awe yanaawiili yooveereliwa, murummwa Yohani aarepa: “Wakhala wi muchu oorwa wa nyuwaano nave ahiruuha mahusiheryo yaala, muhimwaakhele vaate vanyu, naari mano omulocela. Tiwi, yoole onamulocela, onnuukano miteko sawe soonanara.”—2 Yoh. 10, 11.

Moorweela wa oloca wi Akristu hanaphwanela “omulocela,” apwanne Yohani aaceererya masu a murummwa Paulo anaphwanyeya mu 1 Akorintu 5:11 a ‘omaala okhala vamoha’ ni achu yaawo aviihiwemo mmulokoni? Apwanne Yohani ni Paulo yaaloca sa yoocheka emohamoha? Mwawooneya hooye.

Arummwa yaala yaaloca sa mikhalelo miili soohiyana sa yoocheka. Paulo aarempe vooloca sa mulopwana yoowo aapanke ocapaheya. Iyaakha 43 ohoolo waya, Yohani aarempe alocaka sa alipa oomwareya ni akina yaawo yaaceenyerya ni ovuwiha mahusiheryo atheru ni meecelo oonanara. Ntoko yootakiherya, akina yaahusiha wi Yesu haari Kristu.—1 Yoh. 2:22; 4:2, 3.

Vaavaa Yohani aarempeiye ekaarata awe, omwaryeya wiiso omwaramwaxen’ye. Owo aahisuwela wi hi awerye waamaaliha yaawo moomalela. Nyenya, hiihaa ntoko arummwa akina, owo ari mulipa ‘oohiiha’ yoowo eerinhe wi alipa oomwaryeya ehuutuwele muloko woothene.—2 Ate. 2:7.

Mwawiihiiha, Yohani aahaalopola Akristu akhwaawe osepa ovoloweliwa ni alipa oohuweliha yaala ni ahusiha oowoka. Owo aahaaleela Akristu wi hiyaaphwanela owaakhela achu ntoko yaala mmavaate mwaya naari mano waalocela yaawo. Waakhanle wi awo aamulocela mulipa oomwaryeya, yaahaala okhala yookhweya wa yoowo opaceryiha oloca sa miruku sawe soowoka. Echu emohamoha enanwerya weereya wakhala wi muchu onnawaakhula alipa oomwaryeya moorweela wa komputatore naari ovolowa mu isaaite saya. Oothene yoole aahaala omulocela mulipa oomwaryeya aahaala ‘wuukano miteko sawe soonanara.’

Nto moohiyana, Paulo aarempe sa mulopwana yoowo aaphwanela oviihiwa mmulokoni wa nthowa na opaka ocapaheya, hiihaa ntoko enooniheryiwaaya mu 1 Akorintu ekapitulu 5. Nto mulopwana ola mwawooneya haari mulipa oomwareya naari mano haaceenyerya mahusiheryo makina yaavuhana ni malakiheryo a Muluku. (Mulikanyihe ni Wupulula 2:20.) Mwawiihiiha, vaavaa Paulo aalonceiye wa anna ni arokora mmulokoni wi emaale okhala vamoha ni yoowo, ophiyerya ohilya ni yoowo, owo haachuna oloca wi awo hiyaaphwanelaru omulocela.

NTAKIHERYAKA NIPHWANYA NI IKHARARI SA YEHOVA

16-17. (1) Tiheeni Yehova onachuneiye wi alipa oocheka yeere? (Esekiyeli 18:32) (2) Atokweene eni yooniherya hai wi annalapa ni Yehova vaavaa aneereryaaya waakhaviherya alipa oocheka?

16 Tiheeni nihusenryaahu mmwaha yoola waneethanu? Yehova hanachuna wi muchu vyakala atoloxiwe! (Mwaalakhanye Esekiyeli 18:32.) Owo onachuna wi alipa oocheka yaataane ni yoowo. (2 Ako. 5:20) Ti nthowa nene Yehova ilukuluku soothene onaaceenyeryeiye alapeli awe yaawo amuhin’ye wi echaruwe ni okookela wa yoowo. Atokweene a muloko aakhalano ekari ya olapa vamoha ni Yehova vaavaa awo aniilipiseryaaya waakeriha alipa oocheka woocharuwani.—Aro. 2:4; 1 Ako. 3:9.

17 Mwaanyiherye ohakalala onakhalawo wirimu vaavaa alipa oocheka anacharuwaaya! Tiithi ahu a wirimu, Yehova, onnahakalala vancipale ikwaha soothene epucepuche awe yoorimeela enakookelaaya mmulokoni. Omusivela wahu Yehova onnatitelela wunnuwa vaavaa nnuupuwelelaahu sa niphwanya nawe, ikharari ni mahala awe matokweene.—Luka 1:78.

MWAAHAALA WAAKHULA HAI?

  • Ntakhara heeni akina onnachuneya oviihiwamo mmulokoni?

  • Atokweene eni etakiherye hai niphwanya na Yehova?

  • Yoolakelela taani Mukristu onaphwaneleiye opaka vooloca sa muchu yoowo oviihiwemo mmulokoni?

NCIPO 111 Mathowa Ananeeriha Ohakalala

a Vano hinnaloca wi muchu ohiikariwa mmulokoni. Mwawiiwanana ni masu a Paulo anaphwanyeya mu 1 Akorintu 5:13, vano nnahaala waalocaka ntoko muchu oviihiwemo mmulokoni.

b Mwawiiwanana ni Piipiliya, yoocheka yoohiwerya oleveleliwa tahi yoocheka vyakala, nto yoocheka yeeyo epakiwe ni moonelo woomwaryeya, yoowo onavuhana moomalela ni Muluku. Wakhala wi muchu oopaka yoocheka si yeeyo, tahi hiyo nnahaala omuthoriha.—Mar. 3:29; Ahe. 10:26, 27.

    Soolaleeryiwa sa Lomwe (1995-2024)
    Okhumavo
    Ovolowa
    • Elomwe
    • Ovaha
    • Orehererya
    • Copyright © 2025 Watch Tower Bible and Tract Society of Pennsylvania
    • Malakiheryo a Opharihela
    • Malakiheryo a Sookhuweya
    • Configurações de Privacidade
    • JW.ORG
    • Ovolowa
    Ovaha