Apwanne Munnawiriyana Moophwacha Olopola?

1. Tiheeni Yesu onahaaleiye weera moohilekela?

NNAKHALA mu elukuluku yoovila! Moohilekela, Yesu onahaala omuthoriha muchu ti muchu onakhala veelaponi ya vathi. Yesu oonisuweliha yeeyo yaahaala weereyaka veelaponi yavathi ahaakumve wi owo athorihe, owo aahaavahererya oohuserya awe “eneneeryo” ya orwa wawe woohooneya ni “makuchuwelo a mukhalelo yoola wa ichu.” (Mat. 24:3) Yooloherya yeela yoorempwa mu Mateyu ekapitulu ya 24 ni 25 ni saweereya soolikana mu Marku ekapitulu ya 13 ni Luka ekapitulu ya 21.

2. Tiheeni nnahaalaahu othokororya mmwaha yoola, nave ntakhara heeni eyo enanwerya onikhaviherya?

² Yesu oovahererya olopola woochuneya orweela wa maphwanaphwaniho mararu. Ala maphwanaphwaniho vooloca sa ipucepuche ni ipuri, asimwali amiruku ni oolosowa, ni italentu. Niphwanaphwaniho ti niphwanaphwaniho, nnahaala onikhaviherya wiiwexexa wi Yesu onahaala omuthoriha muchu mwawiiwanana ni saweera sawe. Mwaha yoola nnahaala othokororya maphwanaphwaniho yaala, ni woona yeeyo nnahuseryaahu. Niphwanaphwaniho noopacerya nnahaalaahu othokororya ti na ipucepuche ni ipuri.

IPUCEPUCHE NI IPURI

3. Ti liini Yesu onahaaleiye waathoriha achu?

³ Niphwanaphwaniho na ipucepuche ni ipuri, Yesu ooloca wi onahaala waathoriha achu mwawiiwanana ni mukhalelo awo anahaalaaya waakhulela michaka saphaama ni waakhaviherya anna aya oothanliwa. (Mat. 25:​31-46) Variyari va “yoohooxa etokotoko,” owo onahaala opaka othoriha yoola ahaakumve Armaketo. (Mat. 24:21) Hiiha ntoko mukukhula onavalaanyeiye ipucepuche ni ipuri, Yesu onamwaavalaanya yaale anaakhaviherya moororomeleya oomuchara awe oothanliwa wa yaale ahineerano.

4. Mwawiiwanana ni Yesaya 11:​3, 4, ntakhara heeni nnaphwanelaahu ororomela wi Yesu onahaala waathoriha achu mwawookololowa? (Moone tho ekaapa.)

⁴ Yooloherya ya Mpiipiliyani ennooniherya wi ntoko Muthoriha oothanliwa ni Yehova, Yesu onahaala okhala awookololowa mu othoriha wawe. (Mwaalakhanye Yesaya 11:​3, 4.) Owo onnavarerya meecelo, makhalelo ni malocelo a achu—ophitaanyerya mukhalelo awo anaakhalihaaya anna aya oothanliwa. (Mat. 12:​36, 37; 25:40) Yesu onamwaasuwela yaawo avanhe nikhaviheryo wa anna awe oothanliwa ni muteko awe.a Mukhalelo mmoha woochuneyaxa ipucepuche inaakhaviheryaaya anna a Kristu, ori okhaviherya muteko woolaleerya. Yaale anahaala ovahererya nikhaviheryo nenla anamuthorihiwa ntoko “awookololowa” nave anamukhalano ewehereryo ya “ekumi yoohimala” veelaponi ya vathi. (Mat. 25:46; Wup. 7:​16, 17) Ala mareeliho ootikhiniha wa yaale anakhapelela ororomeleya waya! Moorweela wa otitelela okhala oororomeleya variyari va yoohooxa etokotoko ni ovilela, awo annakhapelela masina aya “mu liivuru a okumi.”—Wup. 20:15.

5. Tinivi nri nihusiheryo na niphwanaphwaniho na ipucepuche ni ipuri, nave taani onaphura wa nenlo?

⁵ Mooniherye nroromelo ni ororomeleya. Niphwanaphwaniho na Yesu vooloca sa ipucepuche ni ipuri nnatikitheryeya xaxaxa wa yaale arino ewehereryo ya veelaponi yavathi. Awo annooniherya nroromelo naya yaakhaviheryaka anna a Kristu mmuteko woolaleerya, ni echarihaka moororomeleya ohoolela wa nikhuuru nikhaani na anna oothaanliwa yaawo Yesu aathanlileiye. (Mat. 24:45) Nyenya yaale arino ewehereryo ya wirimu anaphwanela tho owiriyana moopwacha michaka sa olopola sa niphwanaphwaniho nenla. Ntakhara heni? Nthowa nawi, Yesu onnavareryela meecelo aya, makhalelo aya ni malocelo aya. Nave tho awo anaphwanela wooniherya ororomeleya. Voocharela, Yesu aahiloca maphwanaphwaniho makina meeli yaawo analoca sa olopola wooluluwanya wa oothanliwa. Ninnaphwanya tho maphwanaphwaniho yaala mu Mateyu ekapitulu ya 25. Hankooni nthokororye niphwanaphwaniho na asimwali amiruku ni oolosowa.

ASIMWALI AMIRUKU NI OOLOSOWA

6. Ti mwawiihai asimwali athanu yoonihenryaaya okhala amiruku? (Mateyu 25:​6-10)

⁶ Mu niphwanaphwaniho na asimwali, Yesu ooloca sa asimwali khumi yaawo yaakhumme wi emuthikirerye mulipa oothela. (Mat. 25:​1-4) Oothene yaananwehererya omuhoola mulipa oothela mu efesta ya othela. Yesu ohaaloca athanu a yaawo ntoko “amiruku” nave akina athanu ntoko “oolosowa.” Asimwali amiruku yaari ooreheryeya ni oolipelela. Awo yaari ooreheryeya onweherya mulipa oothela elukuluku eri yoothene, naamwi owo aaphin’ye eriyari ya ohiyu. Mwawiihiiha, awo yaahiruuha ipanthi sa makhurwa wi ikhaviherye omwaleela mu epiphi. Awo yaahikhapelela makhurwa makina wi epharihele wakhala wi mulipa oothela onnalekela. Mwawiihiiha, awo yaari ooreheryeya weeriha ipanthi saya otitelela ovarela. (Mwaalakhanye Mateyu 25:​6-10.) Vaavaa mulipa a othela aaphin’yeiye, asimwali amiruku yaahipwaha ni yoowo eyaaka o efesta ya othela. Mmukhalelo mmohamoha, Akristu oothanliwa yaawo yoonihenrye okhala ooreheryeya etitelelaka okhala oolipelela ni oororomeleya ophiyerya orwa wa Kristu, anamuthorihiwa ntoko aphaama ni ophitaanyiwa vamoha ni mulipa oothela, Yesu, mu Omwene awe wirimu.b (Wup. 7:​1-3) Hanka vooloca sa asimwali oolosowa athanu?

7. Tiheeni yeeren’ye ni asimwali athanu oolosowa, nave ntakhara heeni?

⁷ Moohiyana ni asimwali amiruku, ale oolosowa athanu hiyaari ooreheryeya vaavaa mulipa oothela aaphin’yeiye. Ipanthi saya saahanle vakhaani oxipha, nave awo hiyaakhapelenle makhurwa makina. Vaavaa yaasuwenlaaya wi mulipa oothela aahaala ophiya mwawaakuveya, awo yaacimula eyaaka okula makhurwa. Awo hiyawenrye okookawo mu elukuluku yeeyo mulipa oothela aaphinʼyeiye. Mu elukuluku ene yeele, “Asimwali yaawo yaari ooreheryeya yaavolowa ni yoowo ntakhara efesta ya othela, nave mulako waawaliwa.” (Mat. 25:10) Voocharela, vaavaa asimwali oolosowa yaakoonkaaya nave echunaka ovolowa, mulipa oothela aahaaleela ariki: “miyo nkinoosuwelaani.” (Mat. 25:​11, 12) Asimwali yaale hiyaari ooreheryeya wi enweherye mulipa oothela mu elukuluku aahaaleiye ophiya. Nihusiheryo taani wa oothanliwa?

8-9. Nihusiheryo taani oothanliwa anaphwanelaaya ohuseryavo wa niphwanaphwaniho na asimwali? (Moone tho eruku.)

⁸ Mooniherye okhala ooreheryeya ni awiilipelela. Yesu haaloherya wi yaahaala okhalavo makhuuru meeli a oothanliwa—akhweya nimoha naahaala okhala nooreheryeya ophiyerya omakuchuwelo wa mukhalelo yoola wa ichu, nave nikina nahaari nooreheryeya. Moohiyana ni yeeyo, owo aathariha yeeyo yaahaala weereya ni oothanliwa wakhala wi awo hiyaahaala okhala ooreheryeya wi evilele moororomeleya ophiyerya omakuchuwelo. Mmukhalelo yoola, awo hiyaahaala waakhela nchuwelo naya. (Yoh. 14:​3, 4) Ela ti yoothananiha! Moohipwacha ewehereryo ahu yaari ya wirimu naari veelaponi yavathi, oothene ahu nnaphwanela owiriyanaka moophwacha niphwanaphwaniho nenla na asimwali. Mmoha ti mmoha a hiyo onaphwanela owiriyana moopwacha ni okhala ooreheryeya wi awerye ovilela ophiyerya omakuchuwelo.—Mat. 24:13.

⁹ Amanle oloca niphwanaphwaniho na asimwali wi acicimiherye ochuneya waya okhala ooreheryeya ni awiilipelela, Yesu aahiloca tho niphwanaphwaniho na italentu. Niphwanaphwaniho nenla ninnathariha ochuneya waya okhala oowetha.

ITALENTU

10. Ti mwawiihai akapuro eeli yoonihenryaaya okhala oororomeleya? (Mateyu 25:​19-23)

¹⁰ Mu niphwanaphwaniho na italentu, Yesu aahiloca sa akapuro eeli yaawo yaari oororomeleya wa pwiya aya ni mmoha aahiri oororomeleya. (Mat. 25:​14-18) Akapuro oopiili yaahooniherya okhala oororomeleya moorweela wa olapa moowetha wi yaaceererye soochuna sa pwiya aya. Ahaakumve weeca mukwaha, owo aahaakawela italentu—ikhorowa sincipale. Akapuro eeli oororomeleya yaari oowetha nave yaanapharihela ikhorowa mwa miruku. Yookhumeleleene? Vaavaa pwiya aya aakoonkeiye, awo yiiha yaacerenrye ikhorowa seiyo owo aavaherenryeiye. Pwiya aya aahaathamalela—awo yaahivolowa “mu ohakalala wa pwiya [aya].” (Mwaalakhanye Mateyu 25:​19-23.) Hanka vooloca sa kapuro aneeraru? Tiheeni owo eenreiye ni ikhorowa seiyo pwiya awe aamwinnyaleiye?

11. Tiheeni yeeren’ye ni kapuro “ooporora”, nave ntakhara heeni?

¹¹ Kapuro aneeraru aahaakhela etalentu emoha, nyenya aari “ooporora.” Pwiya awe aaweherya wi owo apharihele etalentu mwa miruku. Ohiya weerano yeeyo, owo aahikacela nlici. Vaavaa pwiya awe aakoonkeiye, owo haarino echu yawaaceererya wi amukookiherye. Kapuro yoola haarino mukhalelo waphaama. Ohiya oveka nikhurumuwelo nthowa na ohaaceereryavo yoohiyeryiwa ya pwiya awe, kapuro aamwiichana moohookololowa pwiya awe ntoko “muchu ookacamiha.” Kapuro yoola haawaakhenle weemereryiwa wa pwiya awe. Opwaha yeeyo, aahaakhiwa etalentu nave aahiikariwa vaate va pwiya awe.—Mat. 25:​24, 26-30.

12. Akapuro oororomeleya eeli enaweemelela taani?

¹² Akapuro eeli oororomeleya anaweemelela Akristu oororomeleya oothanliwa. Pwiya, Yesu, onnaawopa awo ‘ovolowa mu ohakalala wa pwiya aya.’ Awo annaakhela nchuwelo naya wirimu, oviihiwa mookhwani woopacerya. (Mat. 25:​21, 23; Wup. 20:5) Mmakupa makina, yootakiherya yoonanara ya kapuro ooporora enaalopola Akristu oothanliwa. Mwawiihai?

13-14. Nihusiheryo taani oothanliwa anahuseryaaya wa niphwanaphwaniho na italentu? (Moone tho eruku.)

¹³ Mooniherye okhala oowetha. Mu niphwanaphwaniho na italentu hiiha ntoko niphwanaphwaniho na asimwali, Yesu hooniherya wi oothanliwa yaahaala okhala ooporora. Ohiya yeeyo, owo aaloca sa yeeyo yaahaala weereya wakhala wi nihiku nikina awo aayeleela mvai aya. Awo yaahaala ohiya “wiichaniwa ni othanliwa [waya],” nave hiyaahaala weemereryiwa ovolowa mu Omwene wa wirimu.—2 Pet. 1:10.

¹⁴ Maphwanaphwaniho a Yesu vooloca sa asimwali ni italentu ennahiya mookwakwaleya wi Akristu oothanliwa anaphwanela okhala ooreheryeya ni awiilipelela, nave tho okhala oowetha ni anthiti. Apwanne Yesu aahiloca echu ekina yeeyo yaahala okhala olopola wa oothanliwa? Aai, owo oheerano! Masu a Yesu enaphwanyeya mu Mateyu 24:​40, 41 analoca tho sa othoriha wookuchula wa oothanliwa.

TAANI ONAHAALA ‘OKUXIWAVO’?

15-16. Ti mwawiihai Mateyu 24:​40, 41 onathariheiye ochuneya waya oothanliwa okhala oovareryela?

¹⁵ Ahaakumve oloca sa maphwanaphwaniho mararu, Yesu oothariha othoriha wookuchula wa oothanliwa yoowo waahaala wooniherya taani eemereryiwa. Owo aahiloca sa alopwana eeli elapaka mmacani ni athiyana eeli exilaka vanxiloni. Mmikhalelo soothene, oopiili enakhala ntoko wi enaphara muteko mmoharu yoowo, nyenya Yesu ooloca wi “onamukuxiwa mmoha nave mukina onamuhiiwa.” (Mwaalakhanye Mateyu 24:​40, 41.) Voocharela, owo aahaaveka oomuchara awe ariki: “Titelelani olipelela, woona wi hamunasuwela nihiku nene oneereiye arwe Pwiya anyu.” (Mat. 24:42) Yesu aaloca echu yoolikana amanle othariha niphwanaphwaniho na asimwali. (Mat. 25:13) Apwanne masu yaala anniiwanana? Enakhala ntoko wi aai. Pahiru yaale athanliwe mweeparipari ni oororomeleya, anahaala ‘okuxiwa,’ moorweela wa waakheliwa ni Yesu mu Omwene wa wirimu.—Yoh. 14:3.

¹⁶ Mooniherye wiilipelela. Oothanliwa yaawo eni ehititelele wiivareryela omunepani hethukumanyiwa vamoha ni “oothanliwa” akina. (Mat. 24:31) Mwawaaceererya, achu oothene a Muluku, moohipwacha ewehereryo aya, anaphwanela woonaka masu a Yesu ntoko olopola wi etitelele okhala awiilipelela ni otitelela okhala oororomeleya.

17. Ntakhara heeni hannaphwanela okhala awuukhuwa wakhala wi Yehova oolakelela waathanla achu a elukuluku ahu yeela?

¹⁷ Noomusuwela phaama Yehova, ti nthowa nene nnaroromelaahu othoriha wawe. Hannakhala awuukhuwa wakhala wi Yehova ohaathanla oororomeleya avakhaani mu iyaakha sahiihaanoru.c Ninnuupuwela yeeyo Yesu aalonceiye vooloca sa anamuteko a ewora yaneekhumi nammoha mu niphwanaphwaniho nawe na emaca. (Mat. 20:​1-16) Yaale yaawompwale olapa mmacani oxekunwevo yaahaakhela ekhorowa emohamoha ni yaale yaapacenrye olapa wooxiixelo. Mmukhalelo mmohamoha, moohipwacha elukuluku oothanliwa ethanliwaaya, awo enahaala waakhela nchuwelo naya wirimu wakhala wi aathorihiwa ntoko oororomeleya.

NWIRIYANEKE MOOPWACHA OLOPOLA

18-19. Mahusiheryo taani ni olopola nthokoronryaahu?

¹⁸ Tiheeni nthokoronryaahu? Wa yaale enawehererya okhala ni okumi okhala wookhala veelaponi yavathi, niphwanaphwaniho na ipucepuche ni ipuri ninnaloca sa ochuneya waya otitelela okhala a nroromelo ni oororomeleya wa Yehova—hiihaano ni variyari va yoohooxa etokotoko yeeyo enaacamela. Mu elukuluku yeeyo, Yesu onamwaathoriha oorormeleya ntoko oophwanelela waakhela “ekumi yoohimala.”—Mat. 25:46.

¹⁹ Nave tho nohoona maphwanaphwaniho meeli yaawo anavahererya olopola wa oothanliwa. Mu niphwanaphwaniho na Yesu vooloca sa asimwali amiruku ni oolosowa, athanu a yaawo yaahooniherya okhala amiruku. Awo yaari ooreheryeya ni oolipelela, ooreheryeya wi enweherye mulipa oothela mu elukuluku eri yoothene. Nyenya asimwali oolosowa hiyaari awiirehererya. Mwawiihiiha, mulipa oothela aahaakhooca ovolowa mu efesta ya othela. Hiyaano tho nnaphwanela okhala ooreheryeya wi ninweheryeke mu elukuluku eri yoothene ophiyerya wi Yesu amalinhe makuchuwelo a mukhalelo yoola wa ichu. Ohiya yeeyoru, mu niphwanaphwaniho na Yesu vooloca sa italentu, nohaathokororya akapuro eeli oororomeleya yaawo yaari oowetha ni oovyaka. Awo yaalapa moowetha ntakhara pwiya aya nave yaahaakhela weemereryiwa wawe. Nyenya, kapuro ooporora aahikhoociwa. Tiheeni nnahuseryaahu? Nnaphwanela okhala ooweiwa mmuteko wa Yehova ophiyerya omakuchuwelo. Wookuchulani, noothokororya mukhalelo oothanliwa anaphwanelaaya otitelela okhala oolipelela wi ewerye ‘okuxiwa’ ni Yesu ntakhara nchuwelo naya na wirimu. Ni ewehereryo etokweene yeeyo anahakalalelaaya, moorweela wa ‘othukumanyiwa waya vamoha’ ni Yesu wirimu. Emanle ekhoco ya Armaketo, awo anamukhala ntoko mulipa ootheliwa mu othela wa Mwaasaana Eepucepuche.—2 Ate. 2:1; Wup. 19:9.

20. Tiheeni Yehova onahaaleiye weera wa yaale anahaala owiriyana olopola wawe?

²⁰ Naamwi othoriha waacamelaka mwawaakuveya, hinaano mathowa a okhala awoova. Wakhala wi nootitelela okhala oororomeleya, Tiithi ahu oosivela a wirimu onahaala onivaha “owerya woopwahaxa” wi hiyaano ‘nikophole . . . wi niwerye weemela vamiithoni va Mwaana a muchu.’ (2 Ako. 4:7; Luka 21:36) Moohipwacha ewehereryo ahu yaari ya wirimu naari veelaponi yavathi, nnahaala omuthamalela Tiithi ahu wakhala wi ninnawiriyana moopwacha olopola yoowo onaphwanyeya mmaphwanaphwaniho a Yesu. Moorweela wa mahala matokweene a Yehova, masina ahu ‘anamurempwa mu liivuru’ ookumi.—Tan. 12:​1, PMM; Wup. 3:5.