Muhuserye Orweela wa Iruku

Soolaleeryiwa sahu sookhalano iruku sincipale seiho sinahusiha ipontu soochuneya. Muni mpharihele hai iruku seiha wi sookhaviheryeeni?

• Mvarerye toko iruku muhaakumve waalakhanya mwaha. Iruku inanwerya wooruuhelaani nchuno ni wooceenyeryaani waalakhanya mwaha. Vaavaa nyuwaano munoonaanyu yoolya yoosiva mparathoni, munnakhalano nchuno na olya. Mwawiihiiha, mwiikohe: ‘Tisheeni kinoonaaka?’—Amo. 7:7, 8, PMM.

• Mwaawaalakhanyaka mwaha, muupuwele ntakhara heeni sithanliwaaya iruku seiho. Mwaalakhanye masu anathariha iruku seiho ivahereryiwe. Muthokororye mukhalelo iruku iniiwananaaya ni mwaha ni mukhalelo munahaalaanyu opharihela mu okumi anyu.

• Mmanle waalakhanya, mpharihele iruku wi muupuwelele ipontu soochuneya sa mwaha. Voocharela, nwale miitho anyu nave mweererye wuupuwelela iruku ni yeeyo muhusenryaanyu orweela wa seiho.

• Munoona hai ovarerya wanaawiili iruku sa yoolaleeryiwa yeela nave moone waakhanle wi munnuupuwela yeeyo muhusenryaanyu?