Murehererye Murima Anyu

Vaavaa nnamuhuseryaahu Piipiliya, nnachuna wi muupuwelo wa Yehova ovolowele murima ahu naari omuchu ahu wa mpuwa. Estra oovaha yootakiherya yaphaama vooloca sa mwaha ene yoola, vaavaa ‘aareherenryeiye murima awe wi ahuserye Nlamulo na Yehova.’ (Estr. 7:10) Ti mwawiihai nnahaalaahu orehererya murima ahu?

Ovekela. Mpaceryiheke nnivekelo mwaha ti mwaha wa yoohuserya. Mumveke Yehova wi ookhaviheryeeni wiiwexexa ni opharihela muteko yeeyo muhusenryaanyu.—Sal. 119:​18, 34.

Munnuwihe wiiyeviha. Muluku onnavitha eparipari wa yaale mwawiirumiha anaroromela miruku saya. (Luka 10:21) Musepe opaka otholathola ni yoolakelela ya waacapara akina. Mutoroke muupuwelo anyu wakhala wi owo honiiwanana ni yookhwela ya Muluku.

Nwiriyaneke macipo a Omwene. Macipo aakhalano owerya a oloca mmurimani mwahu, enryehereryaka ntakhara malapelo. Owiriyana ncipo omapacereryo wa nikupa na yoohuserya enanwerya wookhaviheryaani orehererya murima anyu.