Mukhale Awiiyeviha Vooloca sa Ichu Muhisuwenlaanyu

1. Mavyakelo taani Yehova onivanheiye, nave ntakhara heeni?

YEHOVA onipatunxe ni mavyakelo awuupuwela, ohuserya ichu ivyaani ni wiiwexexa mukhalelo wa opharihela seiyo nihusenryaahu. Ntakhara heeni onipatunxeiye mmukhalelo yoola? Owo onachuna wi ‘niphwanye masuwelelo a Muluku’ nimulapaka yoowo ni mavyakelo ahu a wuupuwela.—Mas. 2:1-5; Aro. 12:1.

2. (1) Mikhalelo taani nnaphwanelaahu wiiwexexa? (Yupu 37:​23, 24) (Moone tho eruku.) (2) Ntakhara heeni ela ti yaphaama wa hiyaano?

² Eparipari wi Yehova onipatunxe ni mavyakelo a ohuserya, naamwiihiiha sookhalavo ichu sincipale nihisuwenlaahu. (Mwaalakhanye Yupu 37:23, 24.) Muupuwele yootakiherya ya Yupu. Yehova aahimpakela makoho mancipale Yupu yaawo yoonihenrye wi saakhalavo ichu seiyo aahisuwenleiye. Ovaanela yoola waahimukhaviherya Yupu waaceererya wiiyeviha wawe ni orehererya mukhalelo awe wa wuupuwela. (Yupu 42:3-6) Hiyaano tho ninnaphura vaavaa mwa wiiyeviha nnooniheryaahu wi hinsuwenle soothene. Wiiyeviha yoola onahaala onceenyerya ororomela wi Yehova onahaala onuupululela chiryene yeeyo nnachunaahu osuwela wi nipake soolakelela saphaama.—Mas. 2:6.

3. Tiheeni nnahaalaahu othokororya mmwaha yoola?

³ Mmwaha yoola, nnahaala othokororya ichu savakhaani seiyo nihisuwenlaahu ni makacamiho yaawo nnahaalaahu ohoolela nthowa na ohikhalano sooleeliherya soothene. Nnahaala othokororya tho ntakhara heeni ti waphaama ohisuwela ichu ikina. Othokororya ipontu seiha onahaala olipiha nroromelo nahu wi Yehova, ‘torino masuwelelo awaakhwanela,’ chiryene onnanleela yeeyo nnachunaahu osuwela.—Yupu 37:16.

HANSUWENLE NIHIKU MAKUCHUWELO ANAHAALAAYA OPHIYA

4. Mwawiiwanana ni Mateyu 24:​36, echu taani emoha ya seiho nihisuwenlaahu?

⁴ Mwaalakhanye Mateyu 24:36. Hiyaano hansuwenle nihiku makuchuwelo a mukhalelo yoola wa ichu anahaalaaya ophiya. Naamwi Yesu ari veelaponi ya vathi haasuwela “nihiku ni elukuluku ene.”a Voocharela Yesu aahaaleela oohuserya awe wi Yehova Mwaneene a Elukuluku, onnakhapelela elukuluku ya saweereya ikina ‘mu owerya wawe wa olamulela.’ (Saw. 1:​6, 7) Yehova ootikitherya elukuluku yoophwanelela wa mukhalelo yoola wa ichu, nyenya hinaano mavyakelo a osuwela tiliini enahaalaaya weereya.

5. Woona wi hinsuwenle nihiku na makuchuwelo, eyo enahaala onivolowela hai?

⁵ Mwawiiwanana ni yeeyo Yesu aaloceiye, hiyaano hanasuwela ophiyerya elukuluku taani nnaphwanelaahu oweherya wi makuchuwelo ephiye. Nthowa na yeeyo, akhweya nnanwerya oyeleela oopisa wahu murima naari oceecheya wakhala wi noomaliha elukuluku yincipale niweheryaka nihiku na Yehova. Akhweya onamukhala woovila wakhala wi amusi naari asinthamwene ahu annantheya nthowa na ohiphiya makuchuwelo. (2 Pet. 3:​3, 4) Ti wooweryeya woona wi, waakhanle wi noosuwela nihiku enahaala ophiya makuchuwelo, waahaala okhala wookhweya okhala oopisa murima nave tho waahaala okhala wookhweya ovilela makacamiho.

6. Ntakhara heeni ti yaphaama ohisuwela ti liini makuchuwelo anahaalaaya ophiya?

⁶ Mweeparipari, nthowa na ohinileela nihiku na makuchuwelo, Yehova onnanivaha ekari ya wooniherya wi nnamurumeela owo woona wi ninnamusivela ni omuroromela yoowo. Hiyaano hannamurumeela Yehova ntikitheryeyaka mu nihiku ntoko wi nroromelo nahu nookhalano nihiku nnahaalaaya okotelavo. Ohiya otikitheryeyaxa mu “orwa wa nihiku na Yehova” enamukhala yaphaama otikitheryeya mu ichu seiyo inahaala weereya mu nihiku nenlo naphiya. Neerano hiihaa, nnahaala okhala awaacameleya wa Yehova, ni winnuwiha nroromelo nahu mwa yoowo ni opakaka eri yoothene wi nimuhakalalihe.—2 Pet. 3:​11, 12.

7. Ichu taani nsuwenlaahu?

⁷ Ti waphaama otikitheryeya wa yeeyo nsuwenlaahu—wi mahiku okuchula epacenrye 1914. Yehova oonivaha sooloherya sa Mpiipiliyani seiho sihinooniherya pahiru eyaakha, nyenya tho sinnanooniherya mookwakwaleya mukhalelo elapo yaahaalaaya okhala ovinyerya mu 1914. Mwawiihiiha, hiyaano nri oolekecheya wi “nookhuveela nihiku ntokotoko na Apwiya.” (Sof. 1:​14, PMM) Nave tho noosuwela muteko yoowo Yehova onachuneiye wi nipakeke, ori olaleerya “michaka saphaama sa Omwene” wa achu ancipale. (Mat. 24:14) Michaka seiya sinnalaleiwa mu ilapo sawaakhwana 240 ni ilocelo opwaha miili. Tahi woochuneya osuwela “nihiku ni elukuluku ene” wi nipake owetha wahu mmuteko yoola woochuneyaxa.

HANNASUWELA YEEYO YEHOVA ONAHAALEIYE WEERA

8. Masu awi “muteko wa Muluku eeparipari,” enataphulela eheeni? (Eklesiyaste 11:5)

⁸ Hiyaano tahi wi ikwaha soothene ninnasuwela “muteko wa Muluku eeparipari.” (Mwaalakhanye Eklesiyaste 11:5.) Masu yaala enaahiwa yeeyo Yehova onapakeiye hiiha tho oneemereryeiye wi aakhwaniherye yoolakelela awe. Hiyaano hanisuwenle mathowa oothene enamweeriha Yehova weemererya echu weereya naari mukhalelo owo onahaaleiye weeravo echu wi anikhaviherye. (Sal. 37:5) Piipiliya onnalikanyiha ohisuwela “muteko wa Muluku eeparipari” ni ohiiwexexa winnuwa wa mwaana mmirimani mwa muthiyana orupanle. Ophiyerya wi masiyentista nlelo heniiwexexa moomalela mukhalelo eyo eneereyaaya. Mmukhalelo mmohamoha, hiyaano hinniiwexexa mwawaakhwanela mukhalelo Yehova onahaaleiye weeravo echu.

9. Woona wi hansuwenle mukhalelo Yehova onahaaleiye weeravo echu, tiheeni enahaala weereya?

⁹ Nthowa na ohisuwela mukhalelo Yehova onahaaleiye weeravo echu ntakhara hiyo, nnanwerya opacerya woovelela. Akhweya nnanwerya woovelela wiilipixerya wi nipake sincipale mmuteko wa Yehova, ntoko yootakiherya, okhweiha okumi ahu naari othaamela weiwo oriwo othowa otokweene wa alaleeryi a Omwene. Nnanwerya wuupuwela wi Yehova hananreeliha wakhala wi hiniwenrye waakhwaniherya soolakelela sahu, wakhala wi hannoona sookhumelela saphaama mmuteko woolaleerya, naari wakhala wi ninnahoolela makacamiho mmuteko vyakala yoowo nnakhaviheryaahu mmarehereryo.

10. Mikhalelo taani soochuneya nnaphwanelaahu winnuwiha nthowa na ohisuwela mukhalelo Yehova onahaaleiye weeravo echu?

¹⁰ Ohisuwela mukhalelo Yehova onahaaleiye weeravo echu, mweeparipari onahaala onikhaviherya winnuwiha mikhalelo saphaama ntoko wiiyeviha ni wiichacala. Ninnawerya wooniherya wi Yehova ilukuluku soothene oosuwela yeeyo eri yaphaama. (Yes. 55:​8, 9) Nave tho ninnaaceererya nroromelo nahu mwa Yehova ni ohuserya omuroromela yoowo wi nikhumelele phaama. Vaavaa nnakhalaahuno sookhumelela saphaama mmuteko woolaleerya naari mmuteko vyakala mmarehereryo, ninnamvaha ncicimiho yoowo onaphwanela waakhela—Yehova. (Sal. 127:1; 1 Ako. 3:7) Naamwi ichu ihikhumelelaka ntoko naaweheryaahu, nnaphwanela wuupuwelela wi nlelo Yehova orino ovareryela. (Yes. 26:12) Hiyaano nnapaka makupa ahu nave ninnaroromela wi Yehova onahaala opaka makupa awe. Nnaphwanela ororomela wi owo onahaala onihoolelaka, naamwi ohiri mmukhalelo wootikhiniha ntoko eereleiye khalai.—Saw. 16:​6-10.

11. Ichu taani soochuneya nsuwenlaahu vooloca sa Yehova?

¹¹ Hiyaano noosuwela wi ilukuluku soothene Yehova toosivela, awookololowa ni amiruku. Echu ekina nsuwenlaahu tiyawi Yehova onnatepa ovaha esisapo yeeyo nneeraahu ntakhara yoowo ni wa anna ni arokora ahu. Nave hinaano minikwa wi ilukuluku soothene Yehova onnaareeliha yaawo ari oororomeleya wa yoowo.—Ahe. 11:6.

HANNASUWELA YEEYO ENAHAALA WEEREYA OMEELO

12. Tiheeni nnahuseryaahu mu Tiyaku 4:​13, 14?

¹² Mwaalakhanye Tiyaku 4:​13, 14. Eparipari nsuwenlaahu tiyawi, hannasuwela yeeyo enahaala weereya nihiku na omeelo. Mu elapo nnakhalaahu, ninnahoolela “elukuluku ni ichu soohiwehereryeya.” (Ekl. 9:11) Wa nthowa na yeeyo, hannasuwela waakhanle wi nnahaala owaakhwaniherya apalanu ahu, naari mano waakhanle wi nnahaala okhala akumi wi niwaakhwaniherye apalanu ahu.

13. Nniisoona hai wa nthowa na ohisuwela soothene seiho inahaala weereya muhoolo?

¹³ Onanwerya okhala woovila wa hiyaano ovilela nthowa na ohisuwela phaameene echu enahaala weereya omwaahiyu. Mwawiihai? Akhweya hiyaano nnanwerya okhala awuukhuwaxa ni yeeyo enahaala weereya omeelo, nave eyo enanneeriha oyeleela ohakalala wahu. Okumi ahu onanwerya otorokeya mwawaakuveya, nave eyo enanwerya oniruuhela wiicela ni onyeenyeya. Nave vaavaa ichu ihineereyaaya ntoko naaweheryaahu nnanwerya okhala ooceecheya ni awaakanyeryeya.—Mas. 13:12.

14. Ohakalala wahu onarweela mu eheeni? (Moone tho iruku.)

¹⁴ Vaavaa nnavilelalaahu makacamiho, nnanwerya wooniherya wi moohipwacha yeeyo enahaala weereya, ninnamurumeela Tiithi ahu a wirimu moosivela ohiya mwa nrima. Piipiliya onnanooniherya wi hannaphwanela oweherya wi Yehova anikhapelele mmakacamiho oothene nave wi owo hanalakelela yeeyo enahaala weereya mu okumi ahu. Yehova osuwela wi ohakalala wahu honarweela mu osuwela soothene inahaala weereya omwaahiyu. Mweeparipari, ohakalala wahu onarweela mu okhalano ohoolela wa Yehova ni ochariha yoowo. (Yer. 10:23) Vaavaa nnaavyaahu ohoolela wa Yehova wi nipake soolakelela hinni nikhale awuukhuwaxa nuupuwelaka yeeyo enahala weereya. Ori ntoko nnaloca wi: “Yehova eemererya, nnamukhala akumi nave nnamweera ela naari ele.”—Tiy. 4:15.

15. Tiheeni nnasuwelaahu vooloca sa omwaahiyu?

¹⁵ Eparipari wi hannasuwela yeeyo enahaala weereya omwaahiyu, nyenya noosuwela wi Yehova ooniroromeliha ekumi yoohimala. Akina enahaala waakhela ekumi yeela wirimu, nave akina veelaponi yavathi. Noosuwela tho wi Yehova hanootha nave hiyaavo enahaala omuhiiha waakhwaniherya soororomeliha sawe soothene. (Titu 1:2) Ti yooworu pahi onaphwanela ‘olokoha sa muhoolo, nave ovinyerya mu ilukuluku sakhalaixa, ichu seiho nlelo sihaakumve weereya.’ Ichu soothene seiho Yehova aalonceiye wi saahaala weereya khalai mweeparipari saahaakhwanela. (Yes. 46:10) Nave soothene owo olonceiye wi inahaala weereya omwaahiyu inahaala tho waakhwanela. (Aro. 8:​35-39) Moohipwacha yeeyo eneereya mu okumi ahu, owo onnanivaha miruku, nlipiho ni owerya yoowo nnachunaahu wi niwerye ovilela. Hannakhwaru minikwa wi Yehova onahaala onikhaviherya ni onireeliha—Yer. 17:​7, 8.

HANNAWERYA WIIWEXEXA MOOMALELA MUKHALELO YEHOVA ONISUWENLEIYE

16. Tiheeni Yehova osuwenleiye mwa hiyaano yeeyo hiyaano nihinaweryaahu wiiwexexa moomalela? (Salmu 139:​1-6)

¹⁶ Mwaalakhanye Salmu 139:​1-6. Mpatuxa ahu oosuwela soothene vooloca sa hiyaano, nave ntakhara heeni nryaahuno mikhalelo sammoori soomwiilini ni sa mmuupuweloni. Owo onnanithokororya ilukuluku soothene. Ohiya pahiru owiriyana yeeyo nnalocaahu, owo onnawerya wiiwexexa moomalela yeeyo naachunaahu oloca. Yehova tho onnoona soothene nnapakaahu nave osuwela mathowa aneerinhe weera echu mmukhalelo wammoori. Mwene Tavite ahooniherya wi Yehova ori ootikitheryeya mwa hiyo wi anikhaviherye mu echu vyakala. Muniisoona hai osuwela wi Apwiya Ooweryaxa Woothene, Mpatusa a erimu ni elapo yoothene yavathi, onnooniherya opwacha otokweene wa mmoha ti mmoha a hiyo? Apwanne ela tahi yootikhiniha? Tavite aaloca ariki: “Osuwela ntoko yoola nkinawerya wiiwexexa. Ti wa vasuluxa ophiyerya wi nkinawerya ophwanya.”—Sal. 139:​6, enoota.

17. Ntakhara heeni onamukhala woovila wi hiyaano neemererye wi Yehova oonisuwela phaameene?

¹⁷ Wa nthowa na mukhalelo niphwiiwalaahu, sookhovelela sahu naari yeeyo neemereryaahu nihaakumve ohuserya eparipari, onamuneeriha okhala woovila omoonaka Yehova ntoko Tiithi oosivela onanipwacha hiyaano. Naari akhweya nnanwerya wuupuwela wi soohesa sahu sakhalai saari itokweenexa nave wi Yehova harwa achuna wi nikhale asinthamwene awe nave wi ori ocai wa hiyaano. Ophiyerya wi Tavite ikwaha ikina aniisoona hiihaa. (Sal. 38:​18, 21) Waakhanle wi mwa muchu yoowo oniilipixerya wi amuhakalalihe Yehova, mwiikohe: ‘Waakhanle wi Muluku ookisuwela phaama chiryene, ntakhara heeni owo onachuneiye wi kitoroke mukhalelo wa okumi onooneya ntoko wi ti waphaama wa miyo?’

18. Ntakhara heeni ti yaphaama weemererya wi Yehova oonisuwela opwaha hiyo aneene? (Moone tho iruku.)

¹⁸ Ti woochuneya weemererya wi Yehova oonisuwela phaameene onipwaha hiyo aneene nave wi owo onnoona ichu saphaama wa hiyaano seiyo nihinaweryaahu woona. Naamwi oonaka soohesa sahu, Yehova onnoona mukhalelo nniilipixeryaahu nave owo onnanisivela. (Aro. 7:15) Vaavaa nniiwexexaahu mweeparipari wi Yehova onnoona oowetha wahu, eyo ennanivaha ikuru nnachunaahu wi nimurumeele moororomeleya ni moohakalala.

19. Tiheeni nsuwenlaahu vooloca sa Yehova?

¹⁹ Noosuwela wi Yehova ti osivela. Hinnakhwa minikwa vooloca sa yeeyo. (1 Yoh. 4:8) Noosuwela wi soothene owo onanivekeiye nthowa nawi onnanisivela nave wi onchuna wi ichu ineeceleke phaama. Nave tho noosuwela wi Yehova onachuna wi niphwanye okumi woohimala. Wi eyo ekhale yooweryeya, owo oonivaha mukucho wa woopola. Yamahala yeela ennaniroromeliha wi moohipwacha ohiphaameya wahu nnanwerya omuhakalaliha Yehova. (Aro. 7:​24, 25) Nave tho noosuwela wi: “Muluku ti mutokweene opwaha murima ahu nave oosuwela ichu soothene.” (1 Yoh. 3:​19, 20) Yehova oosuwela soothene ntakhara hiyaano nave onnaroromela wi nnanwerya opaka seiyo onanivekeiye.

20. Ntakhara heeni hannaphwanela okhala awuukhuwaxa wa yeeyo nihisuwenlaahu?

²⁰ Yehova oonileela soothene seiyo nnaphwanelaahu oosuwela. Vaavaa nneemereryaahu mwawiiyeviha epontu yeela, hanikhala awuukhuwaxa ni ichu nihisuwenlaahu. Ohiya yeeyoru, nnaphwanela otikitheryeyaka mu ichu soochuneyaxa. Mwawiihiiha, ninnooniherya wi na achu awiiyeviha nave tho wi ninnamuroromela Yehova moomalela “yoole orino masuwelelo awaakhwanela.” (Yupu 36:4) Eparipari wi hannawerya wiiwexexa ichu ikina hiihaano, nyenya noosuwela wi Yehova onahaala otitelela onihusiha okhala wookhala. Eyo ti yaphaamaxa nthowa nawi hanrwa nihiya ohuserya ichu ivyaani vooloca sa Muluku ahu Aikuru Soothene.—Ekl. 3:11.