MWAHA WOOHUSERYA 37
NCIPO 114 “Mukhale Òvilela”
Mukhalelo Waphaama wa Waakhulela Ohookololowa
“Owo aanaweherya wookololowa, nto waariwo ohookololowa.”—YES. 5:7, TNM.
IPONTU SA VASULU
Nnahaala ohuserya yeeyo Yesu eenreiye vaavaa aawooneiye akina ekhalihiwaka moohookololowa nave tho nnahaala ohuserya mukhalelo nnahaalaahu omutakiherya.
1-2. Achu enaakhulela hai vaavaa akina naari awo enakhalihiwaaya moohookololowa, nave tiheeni nnahaalaahu othokororya?
NNAKHALA mu elapo yoohookololowa. Achu ancipale olelo annakhalihiwa moohookololowa. Awo annakhalihiwa hiihaa nthowa nawi toohaawa, nthowa na weiwo anakhumaayawo, ohiyana wa ikoore naari wa mathowa makina. Achu ancipale annahooxeya nthowa nawi alipa aanakoso ooreela naari alamuleli anuukhuwa pahiru mu ophwanya ikhorowa. Saweera seiha soohookololowa sa achu sinnanivolowela oothene ahu.
2 Tahi yootikhiniha wi achu ancipale toonyeenyeya wa nthowa na ohookololowa yoowo enoonaaya mu elapo yeela. Oothene ninnachuna okhala mu elapo nnahaalaahu okhala ookhapeleleya ni okhalihiwaka mwawookololowa. Achu akina anneererya orehererya makacamiho yaawo anoonaaya mulaponi naari mu epooma aya. Awo annavaanyihana ni alamuleli vamoha ni malamulo naari annaathanla ahooleli a ipoliitika yaawo anaroromeliha orehererya makacamiho. Mwawiihiiha, ntoko Akristu ninnahusihiwa ‘ohipaka makupa a elapo’ ni owehereryaka Omwene wa Muluku omalihavo ohookololowa woothene. (Yoh. 17:16) Naamwiihiiha, ti woowereya okhala oothanana—ophiyerya okhala oonyeenyeya—vaavaa nnamoonaahu muchu akhalihiwaka moohookololowa. Nnanwerya wiikoha: ‘Tiheeni kinaphwanelaaka weera wakhala wi eyo yoheereya? Apwanne yookhalavo echu kinaphwanelaaka weera hiihaano vooloca sa ohookololowa?’ Wi naakhule makoho yaala, voopacerya nnahaala ohuserya mukhalelo Yehova ni Yesu anoonaaya vooloca sa ohookololowa.
YEHOVA NI YESU ENNIICA OHOOKOLOLOWA
3. Ntakhara heeni ti yawiiwexexeya okhala onyeenyeya nthowa na ohookololowa? (Yesaya 5:7)
3 Piipiliya onnathariha nthowa nene nihinasiveliwaahu okhalihiwa moohookololowa. Owo onnathariha wi Yehova onipatunxe moolikana ni yoowo nave wi owo “onnasivela wookololowa ni ekhaikhai.” (Sal. 33:5; Map. 1:26) Owo hanaakhaliha moohookololowa akina nave owo hanachuna wi achu ekhalihaneke moohookololowa! (Malam. 32:3, 4; Mik. 6:8; Sak. 7:9) Ntoko yootakiherya, mu elukuluku ya mulipa a miririmu Yesaya, Yehova aahiiwa “okhuwela wa ohooxeya” wa Aisarayeli ancipale yaawo yaakhalihiwa moohookololowa ni Aisarayeli akhwaaya. (Mwaalakhanye Yesaya 5:7, TNM.) Yehova aahaalaka yaawo yaatitelela ohiiwelela Nlamulo nawe ni yaakhaliha akina moohookololowa.—Yes. 5:5, 13.
4. Ti mwawiihai Yesu onooneiye vaavaa muchu onakhalihiweiye moohookololowa? (Moone tho eruku.)
4 Hiiha ntoko Yehova, Yesu onnasivela wookololowa nave onniica ohookololowa. Mu ekwaha emoha variyari va muteko awe woolaleerya veelaponi yavathi, owo aahimoona mulopwana oorakala ntata. Yesu aahimoriwano ikharari nave aahimpenuxa ntata nawe, nyenya vaavaa ahooleli a malapelo yoonnaaya yeeyo, yaahikhala oonyeenyeya. Awo yaahiloca wi Yesu aananariha nlamulo na Sapata, awo hiyaapwanche wi mulopwana owo vano haahooxeya. Yesu oonne hai mukhalelo aya wawaakhulela? Owo ‘aathanana nthowa na wuuma waya murima.’—Mar. 3:1-6.
Ahooleli a malapelo mu elukuluku ya Yesu yaanaakhaliha moohookololowa achu, nyenya Yesu aanaasivela achu ni aanaakhaviherya (Moone eparakrafu 4)
5. Ntakhara heeni hannaphwanela okhala asara vaavaa echu yoonanara eneereyaaya?
5 Woona wi Yehova ni Yesu enniica ohookololowa, tahi yoonanara tho hiyaano wiicaka ohookololowa. (Aef. 4:26) Nyenya nnaphwanela ovareryela esara ahu ni wuupuwela wi haniwerya ovinyihavo makacamiho. Wakhala wi nootitelela okhala oonyeenyeya mu elukuluku yincipale, nnanwerya okhala awiiceliwa naari okhala awuukhuwaxa. (Sal. 37:1, 8; Tiy. 1:20) Mwawiihiiha, tiheeni nnaphwanelaahu weera vaavaa hiyaano nnakhalihiwaahu moohookololowa? Nnanwerya ohuserya sincipale orweela wa yootakiherya ya Yesu.
MUKHALELO YESU AAHOOLENLEIYE OHOOKOLOLOWA
6. Ohookololowa taani waari wawuunlaana vaavaa Yesu aareiye veelaponi yavathi? (Moone tho eruku.)
6 Yesu ohoona ohookololowa otokweene vaavaa aaryeiye veelaponi ya vathi. Owo aahoona mukhalelo achu yaahooxiwaaya ni ahooleli a malapelo. (Mat. 23:2-4) Owo tho aahoona mukhalelo alamuleli o Roma yaakhalihaaya achu moonanaraxa. Ayuta ancipale yaachuna otaphuwa mu olamulelo wo Roma. Ophiyerya wi akina yaahipaka makhuuru yaawo yaawanne ni Aroma. Nyenya, Yesu haapanke makupa a nikhuuru nri noothene nenlo naawanne wi ntoroke olamulelo. Nave vaavaa aasuwenleiye wi achu yaachuna omweera mwene, Yesu aahiivalaanya wa yaawo.—Yoh. 6:15.
Yesu aahivalaanya ni achu vaavaa yaachunaaya omweera mwene (Moone eparakrafu 6)
7-8. Ntakhara heeni Yesu haaweerenrye omalihavo makacamiho veelaponi yavathi? (Yohani 18:36)
7 Vaavaa aaryeiye veelaponi ya vathi, Yesu haawivoliihenrye mu epolitika wi eererye orehererya makacamiho yaawo ooneiye. Ntakhara heeni? Nthowa nawi owo aahisuwela wi achu hiyaanono owerya naari mavyakelo awiilamulela mukhataaya. (Sal. 146:3; Yer. 10:23) Awo tho hiyaano mavyakelo a omalihavo mitathaari sa ohookololowa: Satana ni ohiphaameya. Elapo enalamuleliwa ni Satana, Musaserya, yoopatuxiwa yoomunepani ya wiipha yoowo onapharihela olamulelo awe wi akhoromanye wookololowa. (Yoh. 8:44; Aef. 2:2) Naamwi achu aphaama hewerya orehererya makacamiho a elapo yeela woona wi ilukuluku soothene henawerya opaka yeeyo eri yaphaama.—Ekl. 7:20.
8 Yesu aahisuwela wi pahiru Omwene wa Muluku tonahaala omalihavo makacamiho ni yeeyo tho enatannya. Wa nthowa nenla, owo aahimaliha elukuluku ni ikuru sawe “alaleeryaka ni alokohaka michaka saphaama sa Omwene wa Muluku.” (Luka 8:1) Owo aahaaroromeliha yaale yaari “oovoliwa ni a nthanana nthowa na ochuna wookololowa” wi makuchuwelo a makhwankwa ni ohookololowa enamphiya. (Mat. 5:6, ni enoota; Luka 18:7, 8) Mwawiihiiha, hiwaavo olamulelo wa achu onahaala opaka matorokelo yaala. Pahiru Omwene wa Muluku tonahaala weerano, nave Omwene wa Muluku “honapaka makupa a elapo yeela.”—Mwaalakhanye Yohani 18:36.
MMUTAKIHERYE YESU VAAVAA MUNAHOOLELAANYU OHOOKOLOLOWA
9. Tiheeni enoolekechaani wi pahiru Omwene wa Muluku tonahaala omaliha ohookololowa woothene?
9 Nnakhala “mmahiku ookuchula” a elapo yeela, mwawiihiiha, aakhalavo makacamiho mancipale opwaha vaavaa Yesu aareiye veelaponi yavathi. Nyenya ntoko mu elukuluku ya Yesu, yaawo enatannya makacamiho ti Satana ni achu yaawo enamuchara. (2 Tim. 3:1-5, 13; Wup. 12:12) Hiiha ntoko Yesu, noosuwela wi pahiru Omwene wa Muluku onahaala otoloxa nikacamiho noopacerya, Satana, nave tho onahaala omalihavo onanara woothene. Woona wi ninnakhaviherya Omwene wa Muluku, hannavaanyihana naari waaroromela alamuleli wi emalihe ohookololowa. Moone yaweereya ya murokora mmoha awiichaniwa Estasiya.a Ahaakumve ohuserya eparipari, Estasiya wiiliwiili aaneeca mphironi ampakaka manifestu ntakhara ohookololowa. Nyenya owo aahipacerya okhwa minikwa vooloca sa yeeyo aapakeiye. Owo ooloca: “Vaavaa kampakaaka manifestu kaaniikoha waakhanle wi kiri mmakupa oophwanelela. Vano kinakhaviheryaaka Omwene wa Muluku, koosuwela wi kiri mmakupa oophwanelela. Koosuwela wi Yehova onahaala omaliha makacamiho oothene, echu yeeyo miyaano kihinaweryaaka opaka.”—Sal. 72:1, 4.
10. Mwawiiwanana ni Mateyu 5:43-48, ntakhara heeni hanneererya otoroka malamulo ni olamulelo? (Moone tho iruku.)
10 Achu ancipale olelo ennapwexereryana ni makhuuru yaawo eneererya otoroka olamulelo. Mwawiihiiha, ancipale a yaawo annakhala oonyeenyeyaxa ophiyerya wi ehiniiwelela malamulo nave ennaaphoreiha akina, mwawiihiiha, tahi yeeyo Yesu onihusinheiye opaka. (Aef. 4:31) Munna mmoha awiichaniwa Jeffrey ooloca: “Miyaano koosuwela wi vaavaa achu enampakaaya manifestu, mwawaakuveya awo enanwerya okhalaxa asara ophiyerya opacerya onyaanya ichu ni wiiya, nave ophiyerya tho ophoreihana mukina ni mukhwaawe.” Mwawiihiiha, Yesu onnanihusiha waakhaliha achu oothene moosivela, naamwi yaale ehiniiwanana ni hiyaano naari yaale enaniikara. (Mwaalakhanye Mateyu 5:43-48.) Ntoko Akristu, ninnapaka owetha wahu wi nsepe echu vyakala ehiniiwanana ni yootakiherya yeeyo Yesu otikithenryeiye wa hiyaano.
Nnaphwanela okhala oolakelela wi nihipake makupa a elapo (Moone eparakrafu 10)
11. Ntakhara heeni ikwaha ikina onanwerya okhala woovila omutakiherya Yesu?
11 Naamwi nsuwelaka wi Muluku onahaala orehererya moomalela ohookololowa, nnanwerya woona okhala woovila omutakiherya Yesu vaavaa nnakhalihiwaahu moohookololowa. Moone yeeyo yeeren’ye ni Janiya yoowo aakhalihiwe moohookololowa nthowa na ekoore ya mwiili awe. Owo ooloca: “Kaari oonyeenyeya. Yeeyo achu yaalocaaya yaanakeeriha okhala oothanana nave kaachuna wi achu yaale yaalakinwe. Mwawiihiiha, kaahuupuwela okhaviheryaka nikhuuru naawaniha moovaanyihana ni nthalu. Kuupuwela wi weerano yeeyo waari mukhalelo mmoha wookhapeleleya wa wooniherya esara aka.” Moovira wa elukuluku, Janiya aahiiwexexa wi aanaphwanela opaka matorokelo. Owo ooloca: “Kaahoona wi, ohiya omuroromela Yehova, kaahipacerya weemererya yeeyo achu yaalocaaya ni waaroromela yaawo. Mwawiihiiha, kaahilakelela ohiya makhuuru ntoko yaala ni ohiya ohiivoliiherya wanaawiili mu ichu ntoko seiha.” Naamwi nikhalakano esara vaavaa nnakhalihiwaahu moohookololowa, nnaphwanela okhalano ekaasoope wi nivareryele esara ahu nave mu ilukuluku soothene hannapaka makupa a elapo.—Yoh. 15:19.
12. Ntakhara heeni ninnaphwanela okhalano ekaasoope wa yeeyo nnaalakhanyaahu, nnoonaahu naari nnawiriyanaahu?
12 Tiheeni enahaala onikhaviherya otitelela okhala oomaaleleya vaavaa nnakhalihiwaahu moohookololowa? Echu emoha nnaphwanelaahu weera ori okhalano ekaasoope wa yeeyo nnaalakhanyaahu, nnoonaahu naari nniiwaahu. Saweereya ikina sa mu interneti sinnalociwa wi saatikhinihe achu ni okhupanyaka olamulelo. Ikwaha sincipale maxornalista enanwerya oloca muupuwelo aya, ohiya yeeyo ene yeeren’ye. Naamwi niwiriyanne yoolokoha eyo eri yeeparipari vooloca sa ohookololowa, apwanne otikitheryeya wa yeeyo enanwerya onikhaviherya chiryene? Mweeparipari, waakhala wi ninnamaliha elukuluku yincipale naawiriyanaka anotiisiya yaala, nnanwerya okhala awukhuwaxa, oothanana ni asara. (Mas. 24:10) Ophiyerya wi nnanwerya omaala okuha Omwene wa Muluku mu nipuro noopacerya mu okumi ahu ni ocuwala wi pahiru Omwene wa Muluku tonahaala omaliha makacamiho oothene.
13. Ti mwawiihai omwaalakhanya Piipiliya onanikhaviheryaaya vaavaa nnawoonaahu achu ekhalihiwaka moohookololowa?
13 Okhalano yookhovelela yaphaama ya omwaalakhanya Piipiliya ni wuupuwelela enanwerya onikhaviherya owaniha ni ohookololowa. Murokora mmoha awiichaniwa Alia aahikhala oothanana vaavaa aawooneiye achu akina yaakhalihaka moonanara akhwaaya. Owo aahikhala oonyeenyeya nthowa nawi yaale yaapaka soonanara hiyaalakiwa. Owo ooloca: “Kaanaphwanela wiikoha: ‘Apwanne kinneemererya chiryeene wi Yehova onahaala orehererya makacamiho yaala?’ Yaari elukuluku yeela kaamwaalakhannyaaka Yupu 34:22-29. Iversikulu seiha saahikuupuxerya wi Yehova onnoona ichu soothene. Owo oosuwela phaameene mukhalelo wa waathoriha achu, nave pahiru owo onanwerya orehererya makacamiho oothene okhala wookhala.” Nlelo niweheryaka Omwene wa Muluku oruuha wookololowa weeparipari, nnaphwanela ovilela ni ohookololowa hiihaano. Mwawiihai?
TIHEENI NNAPHWANELAAHU WEERA HIIHAANO?
14. Tiheeni nnaphwanelaahu weera wi nihikhaviherye ohookololowa wa elapo yeela? (Akolose 3:10, 11)
14 Haniwerya otoroka mukhalelo achu anaakhalihaaya akina, nyenya nnaphwanela ororomela wi ninnaakhaliha phaama akina. Hiiha ntoko nihusenryaahu, ninnamutakiherya Yesu nooniheryaka osivela. Osivela yoola, onnaniceenyerya waakhalihaka akina ni ncicimiho, ophiyerya tho yaale anapaka ichu moohookololowa. (Mat. 7:12; Aro. 12:17) Yehova onnahakalala vaavaa nnaakhalihaahu phaama oothene mooreera murima ni mwawookololowa.—Mwaalakhanye Akolose 3:10, 11.
15. Nni naakhaviherye hai achu vooloca sa yeeyo Piipiliya onahusiheiye?
15 Mukhalelo mmoha woochuneya wa waakhaviherya achu ori waahusiha vooloca sa Yehova. Ntakhara heeni nnalocaahu yeela? Nthowa nawi “masuwelelo a Yehova” enanwerya omutatuxa muchu yoowo woopaceryani aari oowali ni a nlala okhala muchu ooreera murima ni oosivela murecele. (Yes. 11:6, 7, 9, TNM) Ahaakumve ohuserya eparipari, mulopwana awiichaniwa Jemal aahipwexereryana nnikhuuru nenlo naawaninhe wi ntoroke olamulelo mu elapo aya woona wi uupuwela wi olamulelo owo waari woonanara. Owo ooloca: “Nyuwaano hanwerya waatoroka achu orweela ni ikuru. Nkaatoroken’ye orweela ni ikuru, nyenya kitoroken’ye orweela wa iparipari sa Mpiipiliyani seiyo kihusenryaaka.” Jemal aahihuserya mathowa oophwanelela a omaala owaniha. Mwawiihiiha, vaavaa nnaahusihaahu achu eparipari ya Mpiipiliyani, nnanwerya waakhaviherya omaala opakaka ichu seiho sinahaala waaphoreiha akina.
16. Ntakhara heeni nyuwaano munnachuna waaleela achu vooloca sa Omwene wa Muluku?
16 Hiiha ntoko Yesu, ninnachunaxa waaleela achu wi Omwene wa Muluku onahaala omalihavo makacamiho oothene okhala wookhala. Ewehereryo yeela enanwerya waalipiha yaale ekhalihiwe moohookololowa. (Yer. 29:11) Estasiya, yoowo oromoliwe woopaceryani onnathariha: “Ohuserya eparipari wookikhaviherya ohoolela ohookololowa yoowo koonnaaka ni kipankaaka. Yehova onnapharihela muchaka wa Mpiipiliyani wi avahe nihakararyo.” Wi mulokohe muchaka woohakararya wa Mpiipiliyani vooloca sa omala wa ohookololowa, nyuwaano munaphwanela okhala ooreheryeya phaama. Wakhala wi nyuwaano moosuwela phaama yeeyo Piipiliya onaloceiye vooloca sa ohookololowa, munanwerya ororomelaxa mahusiheryo yaala, nave tho munanwerya waahusiha akina oxikola naari omutekoni ntakhara heeni nnahooxeyaahu nave wi Yehova onahaala omalihavo ohookololowa woothene.b
17. Ti mwawiihai Yehova onanikhaviheryeiye vaavaa nnakhalihiwaahu moohookololowa?
17 Noosuwela wi nlelo nnahaala ohoolelaka ohookololowa vaavaa Satana onatiteleleiye okhala “mulamuleli a elapo yeela.” Ophiyerya owo ‘iikariwe’ hiyaano hanikhala nihirino nikhaviheryo ni ewehereryo. (Yoh. 12:31) Orweela mu Soorempwa, Yehova onnanihusiha ntakhara heeni wookhalavo ohookololowa, ni mukhalelo oniisoneiye vaavaa onanooneiye nihooxeyaka. (Sal. 34:17-19) Moorweela wa Yesu, Yehova onnanihusiha mukhalelo wawaakhulela ohookololowa yoowo nnoonaahu olelo ni mukhalelo Omwene awe onahaala omalihavo ohookololowa pahiru mu ekwaha emoha. (2 Pet. 3:13) Ntitelele opaka eri yoothene nnaweryaahu wi nlaleerye michaka saphaama sa Omwene mwa mvai, niweheryaka mwa nchuno elukuluku yeeyo elapo enahaalaaya osareya “ekhaikhai ni wookololowa.”—Yes. 9:7, TNM.
NCIPO 158 Enamweereya Moohilekela!
a Masina makina aatorokiwa.
b Mmoone tho apentisi 1, ipontu 24-27 mu eproxura Waasivela Achu—Waapaka Oohuserya.