“Nnatxhuna Oya Weiwo ni Nyuwano”

“Nnatxhuna oya weiwo ni nyuwano, ntakhara nosuwela wi Muluku ori ni nyuwano.”—ZAKARIYA 8:23.

MACIPO: 65, 122

MUNANWERYA OTHARIHA?

Zakariya 8:23 onaakhwanela hai?

Akiristu oothanliwa aniisoona hai?—1 Korinto 4:6-8.

Ntakhara heeni hannaphwanela wuukhuwa ni waaca wa yaale analya ephaawu ni owurya eviinyu variyari va Mukonelo?—Aroma 9:11, 16.

1, 2. (a) Tiheeni Yehova aalonceiye wi yaahaala weereya mweelukuluku ahu? (b) Makoho taani anahaala waakhuliwa mmwaha yoola? (Moone eruku yoopacerya.)

YEHOVA aaloca wi mweelukuluku ahu, “mutxhu o Yuteya oni anàmphariwa oniveru wa ekuwo awe t’amalapo khumi a ilotxelo sòhiyana-hiyana eriki: Nnatxhuna oya weiwo ni nyuwano, ntakhara nosuwela wi Muluku ori ni nyuwano.” (Zakariya 8:23) Muchu o Yuteya onaweemelela yaale Muluku onaathanleiye ni munepa waweela. Awo tho anniichaniwa ntoko “Isarayele a Muluku.” (Galasya 6:16) Amalapo khumi anaweemelela yaale arino ewehereryo ya veelaponi yavathi. Awo aasuwela wi Yehova onnareeliha nikhuuru nenla na Akiristu oothanliwa nave anoona okhala ekari etokweene omurumeela Yehova vamoha.

² Moolikana ni mulipa a miririmu Sakariya, Yesu tho aaloca wi achu a Muluku yaahaala okhala awiiwanana. Owo aahaaromola yaale arino ewehereryo ya wirimu ntoko “muhuwo mukhani,” nave aahaaromola ale arino ewehereryo ya veelaponi yavathi ntoko “iputxeputxhe ikina.” Nyenya Yesu aaloca wi oothene yaahaala okhala “muhuwo mmoha” nave yaahaala omucharaka “mukukhuli [aya] mmoharu.” (Luka 12:32; Yohani 10:16) Woona wi arivo makhuuru meeli, annakhumelela makoho ala: (1) Apwanne achu a ipucepuche ikina annaphwanela osuwela masina a anna oothanliwa? (2) Anna oothanliwa aniisoona hai? (3) Wakhala wi muchu a muloko anyu onnapacerya opharihela ineneeryo sa Mukonelo, munaphwanela omukhalihaka mwawiihai? (4) Apwanne munaphwanela okhala awuukhuwa ni waaca wa achu anapharihela ineneeryo sa Mukonelo? Mwaha ola onahaala waakhula makoho yaala.

TI WOOCHUNEYA OSUWELA MASINA AYA?

3. Ntakhara heeni hori wooweryeya omusuwela yoowo onahaala opaka makupa a 144.000?

³ Apwanne achu a ipucepuche ikina annaphwanela osuwela masina a oothene yaale athanliwe ahanle veelaponi yavathi? Hooye. Ntakhara heeni? Nthowa nawi haavo onawerya osuwela phaama waakhanle wi awo anahaala omwaakhela phatamari aya.^[1] (Moone masu a vathi ookuchula.) Naamwi Muluku aawompe wi eye wirimu, awo anahaala omwaakhela phatamari aya pahiru yatitelela okhala oororomeleya. Satana oosuwela yeela, nave onnaapharihela “alipa a miririmu òwoka” wi “ewotothe.” (Mateu 24:24) Akiristu oothanliwa hanasuwela waakhanle wi anahaala omwaakhela phatamari aya ophiyerya elukuluku Yehova onahaaleiye waavaha eneneeryo wi awo toororomeleya. Yehova onavaha eneneeryo eyo va okhwa wawe naari ehaakumve opacerya ‘yohosa etokwene.’—Wupulula 2:10; 7:3, 14.

4. Woona wi hori wooweryeya osuwela masina a anna oothene oothanliwa, ale a ipucepuche ikina enii ewerye hai “oya weiwo” naari weecano vamoha?

⁴ Woona wi hori wooweryeya osuwela masina a anna oothene oothanliwa ahanle veelaponi yavathi, mano ale a ipucepuche ikina enii ewerye hai “oya weiwo” naari weecano vamoha? Piipiliya onaloca wi amalapo khumi yaahaala ophara “oniveru wa ekuwo [ya muchu a Yuteya] eriki: Nnatxhuna oya weiwo ni nyuwano, ntakhara nosuwela wi Muluku ori ni nyuwano.” Naamwi yoorepa ela emulocaka Muyuuta mmoha, vaavaa enalocaaya “nyuwano” ikwaha piili, yoorepa ela enaaloca achu ancipale. Ela enataphulela wi muchu a Yuteya tahi muchu mmoha nyenya oneemelela nikhuuru noothene na Akiristu oothanliwa. Achu a ipucepuche ikina aasuwela yeela, nave annamurumeela Yehova vamoha ni nikhuuru nenla. Hori woochuneya osuwela nsina na muchu ti muchu a nikhuuru nenla ni omuchara mmoha ti mmoha a nikhuuru nenla. Yesu Muhooleli ahu, nave Piipiliya onnanleela wi pahiru nnaphwanela omucharaka yoowo.—Mateu 23:10.

AKIRISTU OOTHANLIWA ANAPHWANELA WIISOONAKA HAI?

5. Olopola taani oothanliwa anaphwanelaaya wuupuwelela, nave ntakhara heeni?

⁵ Anna oothanliwa anaphwanela wuupuwelela yoolopola enaphwanyeya mu 1 Korinto 11:27-29. (Mwaalakhanye.) Mukiristu oothanliwa onii alye hai ephaawu ni owurya eviinyu ‘mohiphwanelela’ va Mukonelo? Wakhala wi hanakhapelela onthamwene awe ni Yehova nave hari oororomeleya, vaavaa onaphariheleiye ineneeryo sa Mukonelo, owo hanooniherya ncicimiho. (Ahebri 6:4-6; 10:26-29) Yoolopola ela ennawuupuxerya ale oothanliwa wi anaphwanela otitelela okhala oororomeleya wi yaakhele “ntxhuwelo na witxhaniwa wa wirimu onrwa wa Muluku mwa Kristu Yesu.”—Filipi 3:13-16.

6. Akiristu oothanliwa anaphwanela wiisoonaka mwawiihai?

⁶ Paulo aahaaleela Akiristu oothanliwa: “Miyano kiri mukalaposo wa nthowa na Apwiya kinnovekani wi metxelo anyu ekhale òphwanelela witxhaniwa mwitxhaniwanyuno.” Awo aneerano mwawiihai? Paulo aathariha: “Ni wiyeviha wothene, ni opisa murima, ni nthìti; nvilelanaka mukina ni mukhwawe mokhwelani, òthokorerya okhapelela wiwanana onarwa wa Munepa nulutxelelana wa muretxele.” (Éfeso 4:1-3) Munepa waweela wa Yehova onnaakhaviherya okhala awiiyeviha ohiya awiirumiha. (Kolosi 3:12) Mwawiihiiha, awo hanuupuwela wi toophwanelela waapwaha akina. Awo aasuwela wi Yehova hanaavaha munepa waweela wawaaca opwaha onaavaheiye alapeli akina. Nave hanuupuwela wi ananwerya omwiiwexexa phaama Piipiliya ompwaha muchu mukina. Akiristu oothanliwa hanaawopa akina wi elyeeke ephaawu naari owurya eviinyu variyari va Mukonelo akhweya yoonaka wi awo tho aathanliwa. Moohiyana, awo tawiiyeviha nave asuwela wi pahiru Yehova tonanwopa muchu wi aye wirimu.

7, 8. Tiheeni Akiristu oothanliwa ahineeraaya, nave ntakhara heeni?

⁷ Naamwi oothanliwa yoonaka okhala ekari etokweene owompwa wi eye wirimu, awo hanaweherya ocicimihiwa mmukhalelo wavameekhaaya. (Éfeso 1:18, 19; mwaalakhanye Filipi 2:2, 3.) Aasuwela tho wi vaavaa Yehova aathanlileiye, owo heerinhe wi muchu mukina asuwele. Mwawiihiiha, Mukiristu oothanliwa hanatikhiniheya wakhala wi achu haneemererya wi owo oothanliwa. Owo onnuupuwela wi Piipiliya onnanlopola ohimweemererya mwawaakuveya yoowo onaloca wi ohaakhela murici wavameekhaaya woorweela wa Muluku. (Wupulula 2:2) Woona wi Mukiristu oothanliwa hanachuna wi athokororyiweke mmukhalelo wavameekhaaya, hanamuleela muchu onakumaneiyeno ekwaha yoopacerya wi owo oothanliwa. Akhweya hanamuleela muchu mukina. Owo tho hanavuwiha ichu seiyo onahaaleiye weera wirimu.—1 Korinto 1:28, 29; mwaalakhanye 1 Korinto 4:6-8.

⁸ Akiristu oothanliwa hanuupuwela wi anaphwanela okhalaka pahiru ni oothanliwa akina, ntoko nikhuuru na mapokha. Awo hanaavya okumana ni oothanliwa mukina wi echekuleke vooloca sa ekari aya naari wi emuhuserye Piipiliya ntoko nikhuuru. (Galasya 1:15-17) Muloko hiwaahaala okhala wawiiwanana waakhanle wi Akiristu oothanliwa anneerano yeela. Awo yaahaala okhalaka moovanyihana ni munepa waweela, yoowo onaakhaviherya achu a Muluku okhalano murecele ni wiiwanana.—Mwaalakhanye Aroma 16:17, 18.

MUNAPHWANELA WAAKHALIHAKA HAI?

9. Ntakhara heeni nnaphwanela okhalano ephoole mukhalelo nnaakhalihaahu yaale analya ineneeryo sa Mukonelo? (Moone ekaaxa “Osivela ‘Honera Etxhu Yohiphwanelela’.”)

⁹ Munaphwanela waakhalihaka hai anna ni arokora oothanliwa? Yesu aahaaleela oomuchara awe wi oothene yaari anna. Nave aaloca: “Yole onisunnuwiha, onarwa ayevihiwa; nave yole oniyeviha onarwa annuwihiwa.” (Mateu 23:8-12) Mwawiihiiha waahaala okhala woonanara omuthamala muchu, naamwi ari Mukiristu oothanliwa. Piipiliya onnaniceenyerya otakiherya nroromelo na atokweene a mmulokoni. Nyenya tho onnanlopola ohimoonaka muchu okhala muhooleli ahu. (Ahebri 13:7) Eparipari wi Piipiliya onnaloca wi akina annaphwanelela waakhela “ntxitximiho ntokotoko.” Awo annaphwanela nthowa nawi ‘annaphara phama muteko aya’ ni ‘oteteiwa ni nsu ni mahusiho,’ ohiya nthowa na okhala oothanliwa. (1 Timóteo 5:17) Wakhala wi ninnaacicimiha oothanliwa mmukhalelo woopwahererya, awo anahaala okhala awuukhuwa. Yawoopihaxa, naahaala oweeriha okhala awiirumiha. (Aroma 12:3) Haavo onachuna weera echu yeeyo yaahaala omweeriha Mukiristu oothanliwa opaka yoocheka yeela!—Luka 17:2.

10. Munii mooniherye hai ncicimiho wa Akiristu oothanliwa?

¹⁰ Nnii nooniherye hai wi ninnaacicimiha yaale athanliwe ti Yehova? Hannaphwanela waakoha ti mwawiihai athanliwaaya. Ola mwaha wa muchu mukhateiye, yoowo nihinaphwanelaahu osuwela. (1 Tesalónika 4:11; 2 Tesalónika 3:11) Hannaphwanela tho waakoha asitiithi aya, amusi aya, asaaraya naari asiiyaya waakhanle wi awo tho aathanliwa. Muchu hanarava ewehereryo yeela moorweela wa makholo awe. (1 Tesalónika 2:12) Nnaphwanela tho osepa opaka makoho makina yaawo anahaala owuukhula akina. Ntoko yootakiherya, hannaphwanela omukoha murokora yoowo iyawe ori oothanliwa vooloca sa moonelo awe wa okhala veelaponi yavathi meekheiye ahiri ni iyawe. Opwaha soothene, nnaphwanela ororomela wi, Yehova onahaala ‘ovoniha sothene irino okumi.’—Salumu 145:16.

11. Nnaakiheya hai vaavaa nnasepaahu ‘wathamala atchu’?

¹¹ Wakhala wi hinnawoona anna oothanliwa ntoko tookhweleyaxa waapwaha akina, nnahaala wiisaakiha. Mwawiihai? Piipiliya onnanleela wi anamukhalavo “anna ówoka” mmulokoni elocaka wi aathanliwa. (Galasya 2:4, 5, Nlakalano Nahihano; 1 Yohani 2:19) Nave tho oothanliwa akina hekhala oororomeleya. (Mateu 25:10-12; 2 Pedro 2:20, 21) Wakhala wi ninnasepa okhala “awathamala atchu” hinaacharaka achu, ophitaanyerya yaale oothanliwa anna oosuweliwa naari anamurumeela Yehova opacerya khalai. Mwawiihiiha, wakhala wi aapheruwa nave ekhuma mmulokoni, hiniyeleela nroromelo nahu wa Yehova naari ohiya omurumeela.—Yuda 16, NN.

NINNAPHWANELA WUUKHUWA NI WAACA WAYA?

12, 13. Ntakhara heeni hannaphwanela wuukhuwa ni waaca wa yaale anapharihela ineneeryo sa Mukonelo?

¹² Moovira wa iyaakha sincipale, waaca wa yaale analya ineneeryo sa Mukonelo waanavukuwa. Nyenya hiihaanoru, awo annaaceereryeya. Apwanne nnaphwanela okhala awuukhuwa? Hooye. Hankooni nthokororye mathowa ene.

¹³ “Apwiya àhasuwela yale ari awaya.” (2 Timóteo 2:19) Moohiyana ni Yehova, anna yaawo anawaalakhanyerya achu analya ineneeryo sa Mukonelo hanamusuwela taani chiryene ori oothanliwa. Mwawiihiiha, waaca waya anaphitaanyerya yaale anuupuwela wi aathanliwa eniiha ehithanliwe. Ntoko yootakiherya, akina a yaawo yaarino yookhovelela ya olya ineneeryo iho, moovira wa elukuluku yaahiya. Akhweya akina yaakhalano ereca ya mmuupuweloni yoonaka wi anahaala olamulela ni Yesu wirimu. Chiryene, hannasuwela phaama achu akavi oothanliwa ahanle veelaponi yavathi.

14. Tiheeni Piipiliya onaloceiye sa waaca wa oothanliwa anahaala okhala veelaponi yavathi vaavaa yoohooxa etokotoko eneeraaya epacerye?

¹⁴ Anahaala okhalavo awoocihiwa mmakupa mancipale vaavaa Yesu oneereiye arwe wi aakerihe wirimu. Piipiliya onnaloca wi Yesu “onamwarumiha ankelo awe . . . yopaka nipetxa ntokotoko, anamwathukumanya òthanliwa awe ovinya onapatxerya elapo ophiyerya omakutxhuwelo aya.” (Mateu 24:31) Piipiliya tho onnooniherya wi mmahiku ookuchula, veelaponi yavathi naahaala okhalavo nikhuuru nikhaani na oothanliwa. (Wupulula 12:17) Nyenya Piipiliya hanaloca waaca waya vaavaa eneeraaya epacerye yoohooxa etokotoko.

15, 16. Tiheeni nnaphwanelaahu osuwela vooloca sa 144.000 yaawo athanliwe ti Yehova?

¹⁵ Yehova tonalakelela elukuluku ya omuthanla muchu. (Aroma 8:28-30) Yehova aapacenrye waathanla Akiristu, Yesu amanle oviihiwa mookhwani. Enakhala ntoko mu nsana noopacerya, Akiristu oothene yaari oothanliwa. Iyaakha sincipale ohoolo waya, yaale yaaloca wi yaari Akiristu yaahiya omuchara Yesu. Naamwi hiiha, variyari va iyaakha seiye Yehova aahaathanla yaawo yaari Akiristu eeparipari. Awo yaari oolikana ni tiriku yoowo Yesu aalonceiye wi aahaala wunnuwa vamoha ni nthakathaka. (Mateu 13:24-30) Mmahiku yaala ookuchula, Yehova onnatitelela waathanla achu wi epake makupa a 144.000.^[2] (Moone masu a vathi omakuchulo.) Woona wi Muluku onnaathanla ehaakumve ophiya makuchuwelo, ninnaroromela wi owo oneerano yeeyo eri yaphaama. (Isaiya 45:9; Daniyeli 4:35; mwaalakhanye Aroma 9:11, 16.)^[3] (Moone masu a vathi omakuchulo.) Nnaphwanela okhalano ekaasoope wi nihikhale ntoko anamalapa yaale yaakanhe mukhalelo pwiya aya aamulinveiye yoole aalampe ewora emoha.—Mwaalakhanye Mateu 20:8-15.

¹⁶ Tahi wi oothene yaale arino ewehereryo ya wirimu annapaka makupa a “mulapeli òroromeleya ni awisuwela.” (Mateu 24:45-47) Hiiha ntoko mu nsana noopacerya, olelo Yehova ni Yesu anaapharihela achu vakhaani wi yaalyihe naari waahusiha achu ancipale. Yaari Akiristu vakhaani yaawo yaarempe Soorepa sa Ekiriki mu nsana noopacerya. Nave olelo, Akiristu oothanliwa vakhaani tarino murici wa waavaha yoolya achu a Muluku mu “elukuluku yoophwanelela.”

17. Tiheeni nihusenryaahu mmwaha yoola?

¹⁷ Tiheeni nihusenryaahu mmwaha yoola? Yehova oolakelela ovaha okumi woohimala veelaponi yavathi wa achu awe ancipale ni okumi wirimu wa yaale anahaala olamulela ni Yesu. Yehova onnaavaha nlivelo alapeli awe oothene, “mutxhu o Yuteya” ni “amalapo khumi,” nave onachuna wi oothene yiiweleleke malamulo mamohamoha ni okhala oororomeleya. Oothene anaphwanela okhala awiiyeviha. Oothene anaphwanela omurumeelaka vamoha mwawiiwanana. Nave oothene anaphwanela wiilipixerya okhapelela murecele mmulokoni. Vaavaa makuchuwelo anaacamelaaya, hankooni oothene ntitelele omurumeela Yehova ni omuchara Kiristu ntoko muhuwo mmoharu.

[Endnotes]

[Ekaaxa va epaaxina 27]

Osivela “Honera Etxhu Yohiphwanelela”

Murummwa Paulo aarepa: “Okhwela ti wovilela, ti wa orèra murima. Hiwano nrima. Honìthamala, nari honìkuseryerya. Okhwela honera etxhu yohiphwanelela, honasya ophura waya.” (1 Korinto 13:4, 5) Ninneera “etxhu yohiphwanelela” vaavaa nnalocaahu moosama, ni ohaacicimiha akina. Moohiyana, vaavaa nnaasivelaahu anna, ninnathokororya moonelo aya nihaakumve oloca echu.

Nnahaala wooniherya wi ninnaacicimiha yaale anahoolela marehereryo a Yehova moorweela wa mukhalelo nnaakhalihaahu. Ikwaha ikina, anna oosuweliwa annaxekurya muloko ahu naari ophiya va muthukumano mutokweene. Anamukhala ooweherya aweeceeca, Mapetelita, anna a Nikhuuru na Efiliyale naari a Nikhuuru Noolamulela. Chiryene, ninnachuna wooniherya ncicimiho wa yaawo ni asaaraya, nave eyo ti yaphaama. Hinnachuna okhala ntoko Tiyotrefe yoowo aahaawaakhela anna yaawo yaaxekurya muloko awe nthowa nawi haarino ncicimiho. (3 Yohani 9, 10) Nave naamwi niwaakhelaka phaama anna yaala, apwanne onanweryeya ohooniherya ncicimiho? Ela eneereya hai?

Naamwi nsiveliwaka okhalano vamoha naari ochekula ni anna yaala ananixekurya, hinooniherya ncicimiho wakhala wi nnaakhaliha ntoko achu oovuwa. Ntoko yootakiherya, apwanne yaahaala okhala yaphaama okumiha iruku nihaavenke naari ehisuwelaka, akhweya elyaaka naari epakaka echu ekina? Waahaala okhala woophwanelela waaveka wi erepe nsina naya mu liivuru ahu naari Mpiipiliyani mwahu? Apwanne nnaphwanela ovuwiha iruku nikuminhaahu ni yaawo? Meerelo yaala yaahaala omvolowela hai muchu yoowo onaphiya va muthukumano ekwaha yoopacerya? Wakhala wi ninnaasivela annihu, hineera echu ntoko yeela. Moohiyana, ninnaacicimiha nthowa nawi noosuwela ntakhara heeni ananixekuryaaya ni wiilipixerya waya ntakhara hiyaano.

Tiheeni enahaala onikhaviherya osuwela mukhalelo wa waakhaliha annihu? Yoopacerya, muupuwele wi nnaphwanela oruuha ncicimiho wa Yehova. (Wupulula 4:11) Yanawiili, nuupuwele wi naamwi ori waphaama waacicimiha anna yaala ni asaaraya, hannaphwanela waakhalihaka ntoko achu oovuwa. Awo anachuna okhalihiwaka ntoko anna. (Mateu 23:8) Yaneeraru, nuupuwele wi Yesu oonihusiha ariki: “Sothene seiyo munakhwelanyu wi atxhu ewerelekeni, nyuwotho nwereleke.” (Mateu 7:12) Wakhala wi ninnuupuwelela ichu seiya, nnahaala wooniherya osivela ni osepa weera “etxhu yohiphwanelela.”

[Ekaaxa va epaaxina 26]

MASU ATHARIHIWE

Amalapo khumi “annaya weiwo” naari weeca ni Muyuuta: Achu a ipucepuche sikina annamurumeela Yehova vamoha ni oothanliwa, nyenya hanawoona awo ntoko ahooleli aya naari waavaha ncicimiho ntokweene naari waathokororya vancipale. Moohiyana, awo annaacicimiha oothanliwa nave annaakhaliha ntoko anna ni arokora

[Eruku va epaaxina 25]

Munaphwanela omukhalihaka hai yoowo onalya ineneeryo sa Mukonelo? (Moone iparakrafo 9-11)