YAWEEREYA YA OKUMI

Yehova Onnakireeliha Mmuteko Awe

Elociwe ni Corwin Robison

Kaahiloca ni mutokweene wi kaari mu kariposo nthowa nawi nkaachuna owaniha. Miyaano kaahimukoha, “Onahaala okeerela yeela wanawiili?” Ela yaari ekwaha yanawiili kaarummwaaka okhala vamoha ni Akhoco a Estatu Unitu.

KIYARIWE mu 1926 o Krooksville, Ohio, Estatu Unitu. Apapa ni amama hiyaarino ekerexa, nyenya yaanileela hiyaano anamwane athanu nachaaru wi n’ye okerexa. Kaaya ekerexa Methotista. Kirino iyaakha 14, muhooleli aakivaha phatamari nthowa nawi kaanayawo okerexa mirunku soothene.

Mu elukuluku yeeyo, mwaacamani iichaniwa Margaret Walker, mmoha a Anamoona a Yehova, aapacerya waaxekurya amama nave aanaaleela vooloca sa Piipiliya. Nihiku nimoha kaalakelela okhala vamoha ni yaawo. Amama yuupuwelaka wi kaahaala owuukhula mu yoohuserya aya, yaakileela wi kikhumevo vaate. Nyenya kaaheererya owiriyana yeeyo yaathokororya aya. Mutheli owo amanle waaxekurya ikwaha sincipale, Margaret aakikoha, “Woosuwela nsina na Muluku?” Kaamwaakhula, “Muchu ori oothene oosuwela nsina—ti Muluku” Owo aaloca, “Omukuxe Piipiliya aa nave woone va Salumu 83:18.” Kaaheerano, nave kaasuwela wi nsina na Muluku ti Yehova. Kaachimakela wa asinthamwene aka nave kaaloca, “Mwaphiya owannyu ohiyu, mmuhule Piipiliya anyu va Salumu 83:18 wi moone nsina na Muluku.” Nyuwaano munamuloca wi kaapacerya olaleerya elukuluku yeele.

Kaamuhuserya Piipiliya nave kaapatisiwa mu 1941. Ohoolo waya, kaathanliwa wi keecihe yoohuserya ya liivuru ya muloko. Kaanaaceenyerya amama aka ni asinnaka wi erwe, nave oothene yaapacerya owiriyana yoohuserya ya liivuru yeeyo keecihaaka. Apapa, hiyoonihenre nchuno.

WIIKARIWA OWAANI

Kaavahiwa mirici sincipale mmulokoni, nave kaanawaakhela aliivuru ancipale yaalaleeryiwa ti Anamoona a Yehova. Nihiku nimoha Apapa, yaahaathonya aliivuru aka nave eloca: “Onnoona ichu soothene seiya? Kinachuna wi okumihere vaate, nave weyaano tho okhumevo.” Kaakhuma owaani nave kaakhala waacamela o Sanesville, Ohio, nave kaanakooka wi kaalipihe amusi aka.

Apapa yaaheererya waahiiha amama ophwanyeya mmithukumano. Ikwaha ikina vaavaa amama yaayaaya omithukumano, apapa yaanaakookiherya owaani. Nyenya amama yaanakhuma mukhora mukina nave yaanaya omuthukumano. Kaanaaleela amama: “Muhoove. Apapa anahaala ovelavela wookookihaani.” Mweelukuluku aya, Apapa yaamaala waahiiha, nave amama yaanaya mmithukumano mootaphuwa.

Vaavaa Exikola ya Orummwa Woomuluku yaapacenryaaya mu 1943, kaapacerya waavaha miyaha anaxikola mmuloko aka. Ekano kaakhenlaaka kimanle operekha nikupa naka noopacerya mu exikola yaakikhaviherya okhala namaloca aphaama.

OHIPAKA MAKUPA A ELAPO VARIYARI VA EKHOCO

Mu eyaakha ya 1944, variyari va ekhoco yanawiili, kaarummwa okhala vamoha ni akhoco. Kaarepela o Nipuro Ntokweene na Kolumbus, Ohio naarino murici wa waalikhela okumi. Nave tho kaaloca ni mutokweene wi nkaaphwanela okhala mukhoco. Aakeemererya oya owaani. Nyenya mahiku vakhaani, mutokweene mmoha aarwa owaani nave aloca, “Corwin Robison, koolamuleliwa woophara wi wawaleliwe mukalaposo.”

Ivinre isumana piili otripunali, muthoriha aaloca: “Kaari miyaano kaahaala woowalela okhala wookhala. Wookhalano echu yooloca?” Kaamwakhula: “Oocicimiheya, miyaano kaaphwanela wooniwa ntoko murummwa. Mikhora sa muchu ori oothene nipuro naka, nave kinalaleerya michaka yaphaama ya Omwene wa achu ancipale.” Muthoriha aaloca wa nikhuuru: “Muri vaava ohiya wi mulakelele waakhanle wi mmiravo ola murummwa naari hooye. Nyuwaano muri vaava wi muloce waakhanle wi oorepela o nikhuuru na akhoco naari hooye.” Ehaakhwanenle aminutu makhumi mararu, nikhuuru naaloca wi kaakhalano nthowa. Muthoriha aakithorihela owaleeliwa mu kariposo mu iyaakha thanu o Ashland, Kentucky.

YEHOVA AAKIKHAPELELA MUKALAPOSO

Kaamaliha isumana piili soopacerya mukariposo o Kolumbus, Ohio, nave kimanle okirihiwa mukalaposo mwaka o Ashland, Kentucky kaakhala mwemmo nihiku naka noopacerya. Kaavekela wa Yehova: “Nkinachuna okhala mukalaposo mu iyaakha thanu. Nave nkinasuwela yeeyo kinaphwanelaaka weera.”

Nihiku noocharela, Amulipeleli yaakihiya. Kaamwaacamela muchu mukina aawaleliwe, aarino makhata oorakama, nave vamoha napacerya ovarerya vaate orweela va exanela. Owo aakikoha, “Ntakhara heeni oryaawe vaava, mukhuveya?” Miyaano kaaloca, “Ka mmoha a Anamoona a Yehova.” Owo aahi, “Eparipari? Vano ntakhara heeni oryaawe vaava?” Miyaano kaahimwaakhula, “Anamoona a Yehova hanawana ekhoco nave hanawiipha achu.” Owo aaloca, “Yoowalenle mukariposo nthowa nawi honachuna owiipa achu. Akina anawaleliwa nthowa na owiipha achu. Onoona wi eyo ti yaphaama?” Miyaano kaamwaakhula, “tahi yaphaama.”

Voocharela owo aaloca, “Mu iyaakha 15 kaari mukalaposo ekina, weiwo kaalakhannyaaka soolaleeryiwa sanyu.” Kimanle owiriyana yeeyo kaavekela, “Yehova mukikhaviherye wi mulopwana ola akhale makupa aka.” Mu elukuluku emohamoha, mulipa owaaleliwa mukina, iichaniwa Paulo, aaloca: “Wakhala wi mmoha a yaala oohootannya, weyano pahiru okhuwele. Kinahaala owookocha.” Mwawiihiiha elukuluku yoothene kimalinhaaka weiwo nkintonko okhalano nikacamiho ni nikhuuru noothene na alipa oowaleliwa awaakhwana 50.

Vaavaa ahooleli yaakikerinhaaya mukalaposo ya o Ashland, kaahaapwanya anna akina awiichwelavo yaari weiwo. Awo ni akina yaakikhaviherya wi kititelele omwaacamela Yehova. Yaakikawela nikupa na omwaalakhanya Piipiliya, nave naanarehererya makoho ni maakhulo ntakhara mithukumano seiyo niichanaahu nravo na Piipiliya. Naari mu ekwartu etokweene saarivo minli mmapuro oothene. Aakhalavo munna aaphwanela orehererya ikulucu sahu. Owo aanakileela: “Robison, weyaano woothanliwa ntakhara munli nkana ni munli nkana.” Muchu yoowo oni athanleliwe munli ola ekulucu aa ti yeeyo. Ororomele wi woomulaleerya ahaakumve opwahavo.”Ti hiiha naalaleeryaahu.

YEEYO KAAPHWANNYAAKA KIMANLE OKHUMA MUKALAPOSO

Mu eyaakha ya 1945 yaamala ekhoco yanawiili, nyenya kaari mukalaposo elukuluku vakhaani emanle ekhoco. Miyaano kaanathananela amusi aka, ntakhara apapa yaaloca wi: “Kaariki kikhale ootaphuwa ntakhara weyaano, kinaphwanela oweerela echu amusi akina.” Kimanle ohuleliwa, kaatepa ohakalala. Achu athanu napiili a amusi aka yaanaya mmithukumanoni nave mmoha a arokora aka aapatisiwa, moohipwacha wiikara wa apapa.

Vaavaa yaapacenryaaya ekhoco o Koreya mu 1950, kaalamuleliwa okhala ni anakhoco wanaawiili. Yaakileela orepela wanawiili o nipuro Ntokweene na Akhoco. Mutokweene mmoha amanle waalikhela mukhalelo aka aaloca, “Weyaano waakhalano nipuro naphaama mu nikhuuru naa.” Miyaano kaahaakhula, “Eyo ti yaphaama, nyenya nkinayawo okhoconi.” Kaapharihela masu a 2 Timóteo 2:3 nave kaaloca, “Miyaano ka mukhoco a Kiristu.” Evinrevo elukuluku amaanle, owo aaloca, “Weyaano onanwerya ohiya.”

Ohoolo waya, kaawiriyana muthukamano wa awiiveleela ntakhara muteko wa o Peteli waapakiwe o muthukumano wa ekulucu, o Sinsinnati, Ohio. Munna Milton Henschel aanileela wi o Peteli waakhalawo othowa wa anna yaachuna olapa mwakuru ntakhara Omwene. Kaarepela yooveka ya opeteli nave keemereryiwa. Kaapacerya orumeela o Brooklyn mu Akostu a 1954, nave kinarumeela weiwo ophiyerya olelo.

Wiiliwiili kinnakhalano muteko muncipale o Peteli. Variyari va iyaakha, koolapa ni maakina a okumiha soolaleeryiwa ni mu ikupweete, koolapa ntoko mekaaniku, ni miteko mikina. Nave tho koolapa mu Ipa sa Mithukumano Mitokweene o Epooma ya Nova York.

Kinnasiveliwa ni marehereryo o Peteli ntoko othokororya yoorepa ya nihiku ni Yoohuserya ya Mulipeleli ya emusi, ni olaleerya vamoha ni muloko. Vaavaa muchu onuupuweleleiye vooloca sa yeela, iha ichu seiyo emusi yoothene ya Anamoona a Yehova anaphwanelaaya weeraka moohihiyererya. Vaavaa asitiithi ni anamwane anathokororyaaya yoorepa ya nihiku vamoha, okhalano malapelo eechoko, ophwanyeya mmithukumanoni sa muloko, ni olaleerya mwa mvai michaka yaphaama, oothene a veemusini anahaala otitelela omwaacamela Yehova.

Kinnakhalano asinthamwene ancipale o Peteli ni mmulokoni. Akina yaari awoocihiwa nave aaya wirimu. Akina hiyaari awoocihiwa. Nyenya akapuro oothene a Yehova toohiphaameya ophitaanyerya Mapetelita. Waakhala wi hanniiwanana ni munna, wiiliwiili kinneererya opaka murecele. Kinnuupuwela yoorepa ya Mateu 5:23, 24 ni mukhalelo nnaphwanelaahu omaliha ohiiwanana wahu. Tahi yookhweya oloca “mukikhurumuwele,” nyenya ohiiwanana woothene onamalihiwa mmukhalelo yoola.

SAPHAAMA SINAKHUMELELA MMUTEKO AKA

Olelo kinalaleerye vakhaani mmuteko wa empa ni empa nthowa na iyaakha saka, nyenya nkinakookela muculi. Koohuserya vakhaani elocelo ya Mantarim ya Exiina nave kinnahakalala owaacamela analoca Exiina mu mphiro. Woosiselo okina kinnakawa irevista 30, naari 40.

Kinnaaxekurya wanawiili a Xiina! Nihiku nimoha namwali ooreera aatheya wa miyaano vaavaa aavireiye va nipuro waatumihiwavo sawiima. Miyaano kaahitheya tho nave kimvaha Mulipeleli ni Despertai! mu Exiina. Owo aakusa nave aakileela nsina nawe, Katie. Elukuluku yoothene Katie aakooneiye, aanarwa oloca ni miyo. Kaamuhusiha masina a sawiima ni makukhu mu Enklesi, nave owo anuuluulela masina yaawo wa miyo. Kaamutharihela soorepa sa Piipiliya, nave owo aamweemererya liivuru Piipiliya Onahusiha. Ivinre isumana vakhaani, nkaamoona.

Miyeeri ohoolo waya, kaahimvaha irevista namwali mukina aavira va nipuro waatumihiwavo sawiima, nave owo aahaakhela. Mu esumana yoocharela, aakiichana mu telefone nave aaloca, “Nyuwaano munnaloca Exiina.” Miyaano kaaloca, “Nkimusuwenle muchu o Xiina.” Nyenya owo aatitelela, mwawiihiiha kaamukusa telefone nave kaaloca, “Ti miyaano Robison.” Muchu owo aaloca ariki, “Robby, ti miyaano Katie. Koochikela o Xiina.” Miyaano kaamukoha, “o Xiina?” Katie aahaakhula, “Aai. Robby nyuwaano moomusuwela namwali oovanheeni nunturu na telefone? Owo ti murokoraka. Nyuwaano mookihusiha ichu sincipale saphaama. Kinnoovekaani wi mmuhusihe mmukhalelo mmohamoha mukihusinhaanyu.” Miyaano kaahi, “Kinahaala weerano ophiyerya kinaweryelaakavo. Kinnoothamalela okileela nipuro oryaawevo.” Voocharela, kaaloca ni murokora a Katie mu ekwaha yookuchula. Kinnaroromela wi moohipwacha weiwo aryaayawo asimwali yaale eeli, anahaala ohuserya sincipale vooloca sa Yehova.

Koomurumeela Yehova mu iyaakha 73, nave kinnahakalala woona wi ookikhaviherya ohipaka makupa a elapo ni ororomeleya mukalaposo. Nave tho, asinnaka annakileela wi awo annalipiheya vaavaa aniikariwaaya ni apapa ehikookelaka muculi. Mwawiihiiha, Amama ni annaka athanu nammoha ophitaanyerya arokora aka aapatisiwa. Ophiyerya wi mukhalelo wa apapa waakukuceya vakhaani, nave yaanaya mmithukumano ehaakumve okhwa.

Muluku akhwela, amusi ni asinthamwene aka akhwile anahaala oviihiwa mookhwani mu elapo evyaani. Nkaanyiheryani ohakalala nnahaalaahu okhalano omurumeela Yehova vamoha ni yaale nnaasivelaahu!a—Moone masu a vathi.

[Nsu na vathi]