Muhuserye Orweela wa Akapuro Oororomeleya a Yehova
Yehova ‘onakhwela wa weyano: wokololowa, wakhwela akhwà ni wiyeviha vamithoni va Muluku.’—MIKEYA 6:8.
MACIPO: 63, 43
MWAAHAALA WAAKHULA HAI?
Taani nnaphwanelaahu okhala oororomeleya?
Ntakhara moonelo wa Yonatani ni Tavite waari woohiya ni wa Apineeri?
Mikhalelo taani sinahaala onikhaviherya okhala oororomeleya wa Muluku, nave mwawiihai?
1, 2. Ti mwawiihai Tavite oonihenryeiye wi aari oororomeleya wa Muluku? (Moone eruku yoopacerya.)
SAWULI ni anakhoco awe 3.000 yaanamwaavya Tavite mu ntakhwa na o Yuteya wi emwiiphe. Nyenya ohiyu, Tavite ni alopwana awe yaaphiya va nipuro Sawuli ni anakhoco awe yaaryaayavo. Oothene yaamurupa, mwawiihiiha Tavite ni Apisayi yaaheeca mweephoole variyari va anakhoco nave emphwanya Sawuli. Apisayi aahi wa Tavite: “Okihiye kimuhomele vatxheyani ni nivaka nawe omoharu, kihulùnletho.” Nyenya Tavite hamweemerenrye omwiipha Sawuli. Owo aamwaakhula Apisayi ariki: “Tani onawerya omwipha òtxikitxheliwa a Apwiya nave akhale ahivahiwe ekoi?” Voocharela Tavite aamuleela: “Kinnàlipela Apwiya, Apwiya anène anammuphoreiha, naphiya nihiku nawe n’okhwa, nari aphoreihiwa mwekhotxoni.”—1 Samuwele 26:8-12.
2 Tavite aaniiwexexa tiheeni aachuneiye weera wi akhale oororomeleya wa Yehova. Owo aanasuwela wi aaphwanela omucicimiha Sawuli, nave huupuwenle omweerela yoonanara. Ntakhara heeni? Nthowa nawi Muluku aamuthanla Sawuli okhala mwene o Isarayeli. Olelo, hiiha ntoko khalai, Yehova onachuna wi akapuro awe oothene ekhale oororomeleya ni waacicimiha yaale oweemerenryeiye wi ekhaleno olamulelo.—Mwaalakhanye Mikeya 6:8.
3. Apisayi aari oororomeleya wa Tavite mmukhalelo taani?
3 Apisayi aanamucicimiha Tavite nthowa nawi aasuwela wi Muluku aamuthanla wi akhale mwene. Nyenya amanle okhala mwene, Tavite aapaka soocheka itokotoko. Aapaka mararuwo ni mwaara a Uriya nave aamuleela Yowabi wi Uriya iiphiwe mu ekhoco. (2 Samuwele 11:2-4, 14, 15; 1 Matharihelo 2:16) Yowapi aari munna a Apisayi, mwawiihiiha Apisayi aahiiwa yeeyo Tavite eenreiye, nyenya aatitelela omucicimiha Tavite. Mwawaaceererya, Apisayi aari muhooleli a anakhoco nave ahaala opharihela olamulelo ola wi akhale mwene, nyenya owo hantonko weera. Moohiyana, amurumeela Tavite nave aamukhapelela wa amwiicani awe.—2 Samuwele 10:10; 20:6; 21:15-17.
4. (a) Ti mwawiihai Tavite oreiye yootakiherya yaphaama ya oororomeleya wa Muluku? (b) Sootakiherya taani ikina nnahaalaahu othokororya?
4 Tavite aari oororomeleya wa Yehova okumi awe woothene. Aareiye mmiravo, amwiipha Koliyati, yoowo aamunyemula Yehova ni Aisarayeli. (1 Samuwele 17:23, 26, 48-51) Vaavaa Tavite aareiye mwene, mulipa miririmu a Yehova Natani aamulaka owo ntakhara soocheka aapankeiye. Moohilekela Tavite aaheemererya yoocheka awe nave aacharuwa. (2 Samuwele 12:1-5, 13) Ohoolo waya, vaavaa Tavite uuluvanleiye, aavaha ichu saphaama wi akhaviherye otekiwa wa empa ya Yehova. (1 Matharihelo 29:1-5) Ti yawooneya wi naamwi Tavite aapanke soocheka mu okumi awe, owo haahiyerenrye okhala oororomeleya wa Muluku. (Salumu 51:4, 10; 86:2) Mmwaha yoola, nnahaala othokororya yootakiherya ya Tavite ni akina yaawo yaakhanle mu elukuluku yeele nave nihuserye ti mwawiihai nnahaalaahu okhala ororomeleya wa Yehova opwaha echu vyakala. Nave nnahaala othokororya mikhalelo mikina inahaala onikhaviherya weerano hiiha.
MUNAHAALA OKHALA OOROROMELEYA WA YEHOVA?
5. Tiheeni nnahuseryaahu orweela wa yoohesa ya Apisayi?
5 Vaavaa Apisayi aachuneiye omwiipha Sawuli, owo eererya okhala oororomeleya wa Tavite. Nyenya woona wi Tavite aasuwela wi yaahaala okhala yoonanara omwiipha “òtxikitxheliwa a Apwiya,” owo hamweemerenrye Apisayi omwiipha mwene. (1 Samuwele 26:8-11) Ela ennanihusiha echu yoochuneyaxa: Vaavaa nnalakelelaahu taani yoowo nnachunaahu okhala oororomeleya voopaceryani, ti woochuneya wuupuwela malakiheryo taani a Mpiipiliyani anahaala onikhaviherya.
6. Naamwi weemereryeyaka okhala oororomeleya wa mmusi naari nthamwene ahu, ntakhara heeni nnaphwanela okhalano kasope?
6 Ti yawooneya wi ti wookhweya okhala oororomeleya wa muchu nnamusivelaahu, ntoko nthamwene naari muchu a veemusini. Nyenya woona wi naachu oohiphaameya, muupuwelo ahu onanwerya onihuweliha. (Yeremiya 17:9) Vano wakhala wi muchu nnamusivelaahu onnapaka ichu soonanara nave ahiya eparipari, nnaphwanela wuupuwela wi ti woochuneya okhala oororomeleya wa Yehova opwaha echu vyakala.—Mwaalakhanye Mateu 22:37.
7. Ti mwawiihai murokora mmoha aareiye oororomeleya wa Muluku mu nikacamiho.
7 Wakhala wi muchu a veemusini vanyu ohiikariwa mmulokoni, munaphwanela wooniherya wi muri oororomeleya wa Yehova. Ntoko yootakiherya, nihiku nimoha amannya Aana, yaawo yiikariwe mmuloko, yaamwiichana Aana ni telefoni wi emuleele wi yaanachuna omuxekurya. [1] (Moone masu a vathi ookuchula.) Amannya Aana yaaloca wi yaari oohica nthowa nawi amusi yaanakhooca waalociha. Aana ahooniherya moonelo woohica, nave aaloca wi aahaala waarepela ekaarata. Ahaakumve orepa ekaarata, Aana aahuupuwelela malakiheryo a Piipiliya. (1 Korinto 5:11; 2 Yohani 9-11) Voocharela, va ekaarata, aathariha mmukhalelo waphaama wi amannya ti yaawo yahin’ye emusi vaavaa yaachenkaaya nave ehicharuwa. Aana aahaaleela amannya wi mukhalelo mmoha waahaala oweeriha okhala oohakalala wanaawiili waari omukookela Yehova.—Tiyako 4:8.
8. Mikhalelo taani sinahaala onikhaviherya okhala oororomeleya wa Muluku?
8 Akapuro oororomeleya a Muluku mmahiku a Tavite yaari tho awiiyeviha, eepewe ni oolipa murima. Hankooni noone ti mwawiihai mikhalelo iha inahaalaaya onikhaviherya okhala oororomeleya wa Yehova.
NNAPHWANELA OKHALA AWIIYEVIHA
9. Ntakhara heeni Apineeri aaheererya omwiipha Tavite?
9 Mwaana a Sawuli Yonatani ni muhooleli a anakhoco o Isarayeli, Apineeri, yaamuleela Tavite wi amuruuhele Mwene Sawuli muru wa Koliyati. Yonatani aakhala nthamwene a Tavite ni oororomeleya wa yoowo. (1 Samuwele 17:57–18:3) Nyenya Apineeri haari. Chiryene, ohoolo waya aamukhaviherya Sawuli, yoowo aachuna omwiipha Tavite. (1 Samuwele 26:1-5; Salumu 54:3) Oopiili, Yonatani ni Apineeri yaasuwela wi Muluku aachuna wi Tavite akhale mwene oocharela o Isarayeli. Nyenya Sawuli amanle okhwa, Apineeri haamukhavinherye Tavite. Opwaha yeeyo, owo aheererya omweera mwaana a Sawuli Isiposeti okhala mwene. Ohoolo waya, akhweya Apineeri aachuna wiiseera mwene, akhweya yaari yeeyo yaamweerihe oraruwa ni mwaara a Sawuli. (2 Samuwele 2:8-10; 3:6-11) Ntakhara heeni Yonatani ni Apineeri yaakhalano moonelo woohiyana vooloca sa Tavite? Nthowa nawi Yonatani aari oororomeleya wa Yehova nave aari awiiyeviha nyenya Apineeri haari.
10. Ntakhara heeni Apusaloni haari oororomeleya wa Muluku?
10 Apusaloni, mwaana a Mwene Tavite, haari oororomeleya wa Muluku nthowa nawi haari awiiyeviha. Owo aanachuna okhala mwene, mwawiihiiha aatekiha “ekharo yetxihiwa ti ikavalo, àkhalanotho atxhu makhumi mathanu.” (2 Samuwele 15:1) Owo aahaalekecha Aisarayeli ancipale wi ekhale oororomeleya wa yene. Ophiyerya wi aaheererya owiipha atiithi awe, naamwi aasuwenle wi Yehova taamwenre Tavite mwene o Isarayeli.—2 Samuwele 15:13, 14; 17:1-4.
11. Tiheeni nnahuseryaahu orweela wa yaweereya ya Mpiipiliyani vooloca sa Apineeri, Apusaloni ni Paruki?
11 Wakhala wi muchu haniiyeviha nave onnachuna okhalano olamulelo, onakhala woovila ororomeleya wa Muluku. Chiryene, ninnamusivela Yehova, nave hinnachuna okhala a nrima ni oonanara murima ntoko Apineeri ni Apusaloni. Nyenya nnaphwanela okhalano kasope wi nihikhaleno nchuno na okhalano ikhorowa sincipale naari muteko nnoonaahu wi ti wookhweleyaxa. Ela enahaala opahula onthamwene ahu ni Yehova. Ekwaha ekina, Paruki, namarepa a Yeremiya, aanachuna ichu saamuthowa nave haari oohakalala omurumeela Muluku. Voocharela Yehova aamuleela Paruki ariki: “Elukuluku vakhani kinammwarya yele kitenkaka ni kinamphola yele kànlaka mwelaponi mothemwene, nave weyano onaloha wera itxhu itokotoko? Ohìwoke.” (Yeremiya 45:4, 5) Paruki aamwiiwelela Yehova. Nave hiyaano tho nnaphwanela omwiiwelela, ntakhara moohilekela owo onahaala otoloxa elapo ela yoonanara.
12. Mooniherye ntakhara heeni hannaphwanela okhala oororomeleya wa Muluku nniiha nrino nrima.
12 Taniyeli, munna o Mexiko, aakhalano yoolakelela ya taani aahaaleiye okhala oororomeleya. Owo aachuna omuthela mwali ahaamulapela Yehova. Taniyeli onnaloca: “Kaatitelela omurepela michaka naamwi kaari mmuteko wa opiyoneero.” Nave voocharela aahoona wi aari a nrima opaka echu yeeyo aachuneiye. Owo haakhala oororomeleya wa Yehova, nave aanachuna okhala awiiyeviha. Mwawiihiiha aaloca ni mutokweene vooloca sa mwali yoowo. Taniyeli onnathariha: “Owo aakikhaviherya wi kaariki kikhale oororomeleya wa Muluku, kaaphwanela omaala omurepela michaka. Kimanle opaka mavekelo ni wunla, ti yeeyo kenraaka. Moohilekela, ohakalala waka mu orummwa waahaaceereryeya.” Vano Taniyeli ookhalano mwaariye onamusivela Yehova, nave anarumeela ntoko ooweherya a ekulucu.
OROROMELEYA WA MULUKU ONNANIKHAVIHERYA OKHALA APHAAMA
13. Ti mwawiihai Natani aareiye oororomeleya wa Muluku ni Tavite vaavaa Tavite aachenkeiye?
13 Wakhala wi nri oororomeleya wa Yehova, nnahaala tho okhala oororomeleya wa akina ni waakhaviherya mmukhalelo waphaama. Mulipa miririmu Natani aakhala oororomeleya wa Yehova nave tho ni Tavite. Amanle omuthela mwaara a mulopwana mmoha nave amwiipha mulopwana owo, Yehova aamurumiha Natani wi amulake Tavite. Natani aari oolipa murima nave aamwiiwelela Yehova. Nyenya owo aaheerano mwa miruku nave aaloca ni Tavite mwaphaama. Aachuna omukhaviherya Tavite wiiwexexa ophiyerya mweeryo taani soocheka sawe saaraaya sitokotoko. Mwawiihiiha owo aaloca ethale ya mulopwana ooreela yoowo aakunxe epucepuche emoha ya mulopwana oohaawa. Vaavaa Tavite aawiriyanneiye ethale ela, aatepa onyeenyeya sa yeeyo mulopwana ooreela eenreiye. Natani aamuleela: “Mulopwana yowo ti weyano!” Tavite aasuwela wi aamuchekela Yehova.—2 Samuwele 12:1-7, 13.
14. Ti mwawiihai munahaalaanyu okhala oororomeleya wa Yehova ni nthamwene anyu naari muhima?
14 Nyuwaano tho munanwerya okhala oororomeleya voopacerya ni Yehova ni okhala oororomeleya wa akina moorweela wa okhala eepewe. Ntoko yootakiherya, nyuwaano munnawerya osuwela wi munna oopaka yoocheka etokotoko. Akhweya munamuchuna okhala oororomeleya wa yene, xaxaxa wakhala wi nthamwene naari muhima. Nyenya nyuwaano tho moosuwela wi ti wookhweleya okhala oororomeleya wa Yehova. Hiiha ntoko Natani, mmwiiwelele Yehova nyenya munooniherya eepewe ni munninyu. Mmuleele wi aaveke nikhaviheryo wa atokweene nave wi owo onaphwanela waaleela moohilekela. Wakhala wi haalenle, munaphwanela waaleela atokweene. Mweerano hiiha, munakhala oororomeleya wa Yehova. Nave mu elukuluku emohamoha, munakhala eepewe ni munninyu nthowa nawi atokweene anahaala omukhaviherya okhalano wanawiili onthamwene waphaama ni Yehova. Awo anahaala omulaka moopixa murima ni mwaphaama.—Mwaalakhanye Onamukutxho 5:1; Galasya 6:1.
NNACHUNA OLIPA MURIMA WI NIKHALE OOROROMELEYA WA MULUKU
15, 16. Ntakhara heeni Kusai aanachuna okhala oolipa murima wi akhale oororomeleya wa Muluku?
15 Kusai aari mmoha a asinthamwene oororomeleya a Mwene Tavite. Vaavaa achu yaachunaaya omweera Apusaloni mwene, Kusai aachuna okhala oolipa murima wi akhale oororomeleya wa Tavite ni Muluku. Owo aasuwela wi Apusaloni aarwa o Yerusalemu ni anakhoco awe nave Tavite aachawa. (2 Samuwele 15:13; 16:15) Nyenya tiheeni Kusai eenreiye? Apwanne aamuhiya Tavite nave amukhaviherya Apusaloni? Hooye. Naamwi Tavite aari awuuluvala nave achu ancipale yaachuna omwiipha, Kusai aakhala oororomeleya wa Tavite ntakhara wi Yehova aamuthanla okhala mwene. Mwawiihiiha Kusai aaya o Mwaako Olivera wi akumane ni Tavite.—2 Samuwele 15:30, 32.
16 Tavite aamveka Kusai wi akookele o Yerusalemu nave akhale ntoko nthamwene a Apusaloni wi awerya omulekecha Apusaloni owiriyana miruku sawe ohiya sa Aitofeli. Kusai aari oolipa murima nave aaveleela okumi awe wi amwiiwelele Tavite ni okhala oororomeleya wa Yehova. Tavite aavekela wi Yehova amukhaviherye Kusai, nave ti yeeyo yeeren’ye. Apusaloni aanwiriyana Kusai ohiya Aitofeli.—2 Samuwele 15:31; 17:14.
17. Ntakhara heeni ninnachuna olipa murima wi nikhale oororomeleya?
17 Nnachuna okhala oolipa murima wi nikhale oororomeleya wa Yehova ni omwiiwelela owo ohiya weera yeeyo ahima ahu, asinthamwene a muteko naari alamuleli anachunaaya wi neere. Ntoko yootakiherya, naamwi ovinyerya woonamwaneni, Taro o Xapau, aaneera soothene wi ahakalalihe asitiithi awe. Owo aanawiiwelela nave aari oororomeleya wa yaawo, ohiya pahiru nthowa na okhala mwaana, nyenya nthowa nawi aanasivela. Nyenya vaavaa aapacenryeiye ohuserya ni Anamoona a Yehova, asitiithi awe yaachuna wi ahiye. Ela yaamuthananiha, nave yaari yoovila wa yene waaleela wi aalakelela oya omithukumanoni. Taro onnaloca: “Awo yaatepa onyeenyeya ophiyerya wi voovira wa iyaakha yaanakihiiha waaxekurya. Kavekela wi kilipe murima wi kihikookele muculi ni yoolakelela aka. Vano moonelo aya woomaaleleya, nave kinnawerya waaxekurya moohihiyererya.”—Mwaalakhanye Masiposipo 29:25.
18. Yoohuserya ela yookhavihenryeeni hai?
18 Ntoko Tavite, Yonatani, Natani ni Kusai, nnachuna okhala oohakalala moorweela wa okhala oororomeleya wa Yehova. Hinnachuna okhala ntoko Apineeri ni Apusaloni yaawo yahaari oororomeleya. Ti yeeparipari wi naachu oohiphaameya nave ninnahesa. Nyenya hankooni nooniherye wa Yehova wi okhala oororomeleya wa yoowo echu yookhweleyaxa mu okumi ahu.
[Masu a vathi]
^ [1] (eparakrafo 7) Masina makina aatorokiwa.
[Yooleeliherya va epaaxina 21]
Ti wookhweleya okhala oororomeleya wa Yehova opwaha echu vyakala
[Yooleeliherya va epaaxina 24]
Vaavaa munamvekaanyu munninyu wi aveke nikhaviheryo wa atokweene, munakhala eepewe wa yene ni oororomeleya wa Yehova
[Ekaaxa va epaaxina 25]
MASU ATHARIHIWE
Wakhala wi nri oororomeleya ni awiiyeviha, nnahaala opaka ichu ohiya ntoko nnachunelaahu nyenya yeeyo Yehova onachuneiye wi neere
Wakhala wi nri oororomeleya ni eepewe, nnahaala weererya waakhaviherya akina, nave nnahaala waakhaliha mmukhalelo Yehova onachuneiye
Wakhala wi nri oororomeleya ni oolipa murima, nnahaala omwiiwelela Yehova naamwi nikacamiheyaka naari nikhalaka a woova