Ntakhara Heeni Ninnaphwanela Othukumana Mmalapelo?

“Nave yámwikhalelaru . . . mwiyátáno [vamoha].”—SAWERIWA T’ARUMMWA 2:42, NN.

MACIPO: 20, 119

MPHARIHELAKA EKAAXA “MATHOWA A OPHIYA MMITHUKUMANO,” MUTHARIHE . . .

mithukumano ti saphaama wa hiyo mmukhalelo taani.

mukhalelo taani nnaakhaviheryaahu akina vaavaa nnaphiyaahu mmithukumano.

Yehova onoona hai vaavaa nnaphiyaahu mmithukumano.

1-3. (a) Akiristu anooniherya ha wi annasiveliwa othukumana vamoha? (Moone eruku yoopacerya.) (b) Tiheeni nnahaalaahu othokororya mmwaha yoola?

VAAVAA Korina aareiyeno iyaakha 17 sa oyariwa, amannya yaaphariwa nave ekerihiwa ocai wi yalapeke mmacani. Ohoolo waya, Korina tho aakuxiwa akerihiwa ocai, o Siperiya. Owo aalapa mmacani nave aakhalihiwa ntoko kapuro. Ikwaha ikina owo aanakinyeereriwa olapa vaate elukuluku ya nakhutu. Naamwi hiiha, Korina ni murokora mukina yaalakelela wi yaaphwanela weeravo echu wi ehiye emaca wi yathukumane ni muloko.

² Korina onnaloca: “Naahiya muteko ohiyu nave neeca n’yaaka o estasau mastatiya 25. Kompoiyu aavinnye woosiiselo, nave naaheeca iwora thanu nammoha nihikinthe nave naaheeca mastatiya khumi oya nipuro na mithukumano.” Korina aahakalala vancipale nthowa na opaka mukwaha yoola. Owo onnaloca: “Mmithukumano naamuhuserya Mulipeleli nave naahiipa macipo Oomwene. Yaari yaweereya yaalipinhe nroromelo nahu.” Arokora ala eeli yaakookela omaca evinre mahiku mararu, nave muhooleli a emaca haasuwenle wi yaapwahavo.

³ Achu a Yehova wiiliwiili annaavyaavya okhala vamoha. Ntoko yootakiherya, Akiristu oopacerya yaanasiveliwa othukumana vamoha mu omulapela Yehova ni ohuserya vooloca sa yene. (Saweriwa T’arummwa 2:42) Chiryene, nyuwaano tho munnasiveliwa oya mmithukumano. Nyenya moolikana ni anna ni arokora anyu oothene, akhweya enamukhala yoovila ophiya mmithukumano wiiliwiili. Akhweya munamuchuna olapa elukuluku yincipale naari okhalano ichu sincipale saweera naari wi mahiku oothene munakhala oovelavela. Vano, tiheeni enahaala onikhaviherya weera soothene nnaweryaahu wi niphwanyeye mmithukumano sahu?^[1] (Moone masu avathi omakuchuwelo.) Nnii naaceenyerye hai oohuserya ahu a Piipiliya ni akina wi ephiyeke mmithukumano sahu wiiliwiili? Mwaha ola onahaala othariha ntakhara heeni ophiya mmithukumano (1) ti yaphaama wa hiyo, (2) ennaakhaviherya akina, ni (3) ennamuhakalaliha Yehova.^[2]—Moone masu avathi omakuchuwelo.

MITHUKUMANO TI SAPHAAMA WA HIYO

4. Othukumana vamoha onanikhaviherya hai ohuserya vooloca sa Yehova?

⁴ Mithukumano sinnanihusiha. Mithukumano soothene sinnanikhaviherya ohuserya sincipale vooloca sa Yehova. Ntoko yootakiherya, hiihaanoru noomuthokororya Liivuru aka a Miyaha sa Piipiliya mu Yoohuserya ya Piipiliya ya Muloko. Monne hai vaavaa naahusenryaahu mikhalelo Muluku oonihenryeiye mu waakhaliha achu oohiyana hiyana alociwe mu liivuru yoola? Hanka vooloca sa maakhulo oohakalaliha a anninyu ni arokora? Chiryene eyo yaaweerihaani omusivela vancipale Tiithi anyu a wirimu. Mmithukumano, ninnamuhuserya Piipiliya moorweela wa owiriyana miyaha, sawooniherya, ni owiriyana phaama vaavaa onaalakhanyiweiye Piipiliya. (Nehemiya 8:8) Nave nkuupuwelani ichu sincipale nnahuseryaahu isumana soothene vaavaa nnarehereryaahu waalakhanyiwa wa Piipiliya ni owiriyana yeeyo akina ahusenryaaya.

5. Mithukumano sinookhaviheryaani hai opharihela yeeyo munahuseryaanyu Mpiipiliyani wi murehererye mukhalelo wa olaleerya wanyu?

⁵ Mithukumano, sinnanihusiha opharihela yeeyo nihusenryaahu orweela Mpiipiliyani muukumini mwahu. (1 Tesalónika 4:9, 10) Ntoko yootakiherya, nyuwaano mwaakhalano yoohuserya ya Mulipeleli yaweerinheeni ochuna weera sincipale mmuteko wa Yehova, wi mwaaceererye mavekelo anyu, naari wi mmukhurumuwele munna naari murokora anyu? Mithukumano nnakhalaahuno variyari va esumana sinnanihusiha mukhalelo wa olaleerya michaka yaphaama ni mukhalelo wa waakhaviherya akina wiiwexexa eparipari orweela Mpiipiliyani.—Mateu 28:19, 20.

6. Mukhalelo taani mithukumano sahu sinanceenyeryaaya ni onilipiha?

⁶ Mithukumano sinnanceenyerya. Elapo ya Satana enneererya oceecheiha nroromelo nahu nave enaneeriha okhala awuukhuwa. Nyenya mithukumano sahu sinnanceenyerya nave sinnanilipiha otitelela omurumeela Yehova. (Mwaalakhanye Saweriwa T’arummwa 15:30-32.) Ikwaha ikina, ninnathokororya mukhalelo sooloherya sa Mpiipiliyani saakhwanenle. Ela enanwerya onikhaviherya ororomela mu soolaiherya sa Yehova sa omwaahiyu sinahaala waakhwanela. Annihu ni arokora annanceenyerya ohiya pahiru mmiyaha saya, nyenya tho vaavaa anavahaaya sooloca ni omuhakalaliha Yehova moorweela wa wiipha orweela va murima. (1 Korinto 14:26) Nave vaavaa nnalocaahu vamoha imanle mithukumano, ninnahakalala nthowa nawi nookhalano asinthamwene ancipale yaawo ananipwacha chiryene.—1 Korinto 16:17, 18.

7. Ntakhara heeni ti wookhweleya ophwanyeya mmithukumano sahu?

⁷ Mmithukumano, ninnaakhela nikhaviheryo na munepa waweela wa Muluku. Yesu onnapharihela munepa waweela wi ahoolele muloko. Chiryene, owo oonileela wi nnaphwanela ‘wiwaka etxhu Munepa onalèlaya [miloko].’ (Wupulula 2:7) Munepa waweela onanwerya onikhaviherya ovilela saweeha ni olaleerya moolipa murima. Onahaala tho onikhaviherya opaka soolakelela saphaama. Ti nthowa nene nnaphwanelaahu opaka yoothene nnaweryaahu wi niphwanyeye mmithukumano sahu nave naakhele nikhaviheryo na munepa waweela wa Muluku.

MMITHUKUMANO NINNAAKHAVIHERYA AKINA

8. Vaavaa annihu ananoonaaya mmithukumano nave ewiriyana maakhulo ni wiipa wahu, eyo enaakhaviherya hai? (Moone ekaaxa “Owo Wiiliwiili Aanakhala Phaama.”)

⁸ Mmithukumano ninnakhalano ekari ya wooniherya osivela wahu ntakhara annihu ni arokora. Ancipale mmilokoni mwahu annahoolela makacamiho matokweene. Murummwa Paulo oorepa: “Nlipihaneke.” (Ahebri 10:24, 25) Nnamooniherya wi ninnaathokororya annihu moorweela wa othukumana vamoha wi nceenyeryane mukina ni mukhwaawe. Vaavaa nnayaahu mmithukumano, ninnooniherya wa annihu wi ninnachuna okhala vamoha, oloca ni yaawo nave wi ninnathokororya moonelo aya. Ninnaaceenyerya vaavaa anawiriyanaaya maakhulo ahu ni wiipa orweela mmurimani.—Kolosi 3:16.

9, 10. (a) Mutharihe mukhalelo masu a Yesu ari mu Yohani 10:16 ananikhaviheryaaya wiiwexexa ntakhara heeni ti wookhweleya othukumana ni annihu. (b) Wakhala wi ninnaphiya mmithukumano wiiliwiili, nnii nimukhaviherye hai muchu onakhoociwa ni amusi awe?

⁹ Vaavaa nnayaahu mmithukumano, ninnakhaviherya muloko okhala wawaataana. (Mwaalakhanye Yohani 10:16.) Yesu aahiilikanyiha ni mukukhuli nave oomuchara awe ni ipucepuche iri mu nikokani. Nkuupuwelani ela: Wakhala wi ipucepuche piili iri vamwaakoni, piili iri mmukotini, nave ekina eri nipuro nikina, apwanne ipucepuche seiye thanu siri mu nikokani? Hooye, nthowa nawi ipucepuche sinakhala vamoha nave inamuchara mukukhula. Moolikana, hannaphwanela okhala ocai ni annihu moorweela wa ohiphiya mmithukumano. Nnaphwanela othukumana wi nikhale makupa a “muhuwo mmoha” ni omuchara “mukukhuli mmoharu.”

¹⁰ Mithukumano sahu sinnanikhaviherya okhala awiiwanana ntoko emusi yoosivela. (Salumu 133:1) Akina a mmulokoni annakhoociwa ni amusi aya, asitiithi aya, asinna naari arokora aya. Nyenya Yesu aalaiherya waavaha emusi yaahaala waasivela ni waakhaviherya. (Marko 10:29, 30) Wakhala wi munnaphiya mmithukumano wiiliwiili, munahaala okhala ntoko tiithi, maai munna naari murokora a muchu a mmulokoni. Vaavaa nnuupuwelaahu sa yeela, nnachuna wooniherya owetha wahu wi niphwanyeye mmithukumano soothene.

NNAHAALA OMUHAKALALIHA YEHOVA

11. Mithukumano inanikhaviherya hai omvaha Yehova yeeyo enamphwanela?

¹¹ Mmithukumano, nnamvaha Yehova yeeyo enamphwanela. Woona wi owo Mpatusa ahu, nnaphwanela omuthamalela, omucicimiha ni omuhakalaliha. (Mwaalakhanye Wupulula 7:12.) Nnanwerya weerano hiiha mmithukumano vaavaa nnavekelaahu wa Yehova, ni omwiipela, ni oloca sa yoowo. Chiryene ela ekari yootikhiniha nryaahuno isumana soothene wi nimulapele Yehova!

12. Yehova onoona hai vaavaa nniiwelelaahu nlamulo nawe na ophwanyeya mmithukumano?

¹² Yehova tonipatunse, nave nnaphwanela omwiiwelelaka. Owo onnanilamulela wi ntitelele othukumana, xaxaxa vaavaa makuchuwelo anaacamelaaya. Mwawiihiiha vaavaa nniiwelelaahu nlamulo nenla, Yehova onnahakalala. (1 Yohani 3:22) Owo onnoona wi nookhalano nchuno na oya mmithukumano nave wi onnacicimiherya wiilipixerya wahu ophwanyeya weiwo.—Ahebri 6:10.

13, 14. Mmikhalelo taani nnamwaacamelaahu Yehova ni Yesu mmithukumano?

¹³ Vaavaa nnayaahu mmithukumano, nnooniherya wi ninnachuna omwaacamela Yehova vamoha ni Mwanawe. Mmithukumano, ninnamuhuserya Piipiliya ni ohuserya yeeyo Yehova onachuneiye wi nipake ni mukhalelo nnaphwanelaahu okhala. (Isaiya 30:20, 21) Ophiyerya wi vaavaa achu akina ahinamurumeela Yehova anaphiyaaya mmithukumano, annasuwela wi Muluku tonanihoolela. (1 Korinto 14:23-25) Yehova onnahoolela mithukumano sahu ni munepa awe waweela, nave soothene nnahuseryaahu sinarwa wa yoowo. Mwawiihiiha vaavaa nnayaahu mmithukumano, ninnawiriyana yeeyo Yehova onaloceiye, woona mukhalelo onansiveleiye, nave ninnamwaacamela yene.

¹⁴ Yesu, Muru wa Muloko, ooloca: “Vava aneraya ethukumanevo atxhu eli nari araru mwa nsina naka, miyo kiri veriyari vaya.” (Mateu 18:20) Piipiliya tho onnaloca wi Yesu “onetxa veri va” miloko. (Wupulula 1:20–2:1) Chiryene, Yehova ni Yesu ari variyari va hiyo nave annanilipiha mmithukumano sahu. Nkuupuwelani mukhalelo Yehova onooneiye vaavaa onawooneiyeeni mweeraka soothene munaweryaanyu wi mmwaacamele yene ni Mwanawe!

15. Ophwanyeya mmithukumano nnooniherya hai wi ninnachuna omwiiwelela Muluku?

¹⁵ Vaavaa nnayaahu mmithukumano, ninnooniherya wi nnachuna omwiiwelela Yehova. Yehova hananikhinyeererya opaka yeeyo onaloceiye. (Isaiya 43:23) Vaavaa nnathanlaahu wiiwelela nlamulo nawe na ophwanyeya mmithukumano, ninnooniherya wi ninnamusivela nave ninneemererya wi owo tonaphwanelela onileela echu ya opaka. (Aroma 6:17) Ntoko yootakiherya, tiheeni nnahaalaahu weera wakhala wi muchu nnamulapaahu onnanilapiha vancipale ophiyerya wi nihinawerye ophwanyeya mmithukumano wiiliwiili? Akhweya alamuleli annaloca wi wakhala wi muchu onnathukumana wi amulapele Yehova, owo onahaala oliva ikhorowa sincipale, onamvolowa mukalaposo, naari onamulakiwa ni echu vyakala naamwi eri yawoopiha. Naari akhweya nnapaka echu ekina ohiya oya mmithukumano. Mmikhalelo seiya, nnaphwanela olakelela echu yaweera. (Saweriwa T’arummwa 5:29) Nyenya ikwaha soothene nnathanlaahu omwiiwelela Yehova, ninnamuhakalaliha.—Masiposipo 27:11.

MUTITELELE OTHUKUMANA NI ANNINYU

16, 17. (a) Nnasuwela hai wi mithukumano saari sookhweleya wa Akiristu a nsana noopacerya? (b) Munna Xorxe Kanka oona hai mithukumano Seekiristu?

¹⁶ Emanle othukumana vamoha mu Pentekoste a 33, Akiristu yaatitelela othukumana wi emulapele Yehova. Awo “yámwikhalelaru mùhusiha wa arummwa ni mwiyátáno.” (Saweriwa T’arummwa 2:42, NN ) Nave hiyaahin’ye othukumana vamoha naamwi yiikariwa ni alamuleli o Roma ni ahooleli o Yuteya. Naamwi waari woovila, achu oothene yaatitelela othukumana.

¹⁷ Olelo tho akapuro a Yehova, annathamalela ntakhara mithukumano nave annapuha moorweela wa oyawo. Xorxe Kanka, aari mu Nikhuuru Noolamulela mu iyaakha opwaha 22, ooloca: “Wa miyaano, othukumana ni anna echu yoohakalalihaxa muukumini nave ehime ya nceenyeryo. Onnakisivela okhala oopacerya ophiya mu Empa ya Omwene ni okhala ookuchula okhuma wakhala wooweryeya. Kinnatepa opuha vaavaa kinalocaaka ni achu a Muluku. Vaavaa kinakhalaaka ni yaawo kinoona wi kiri owaani ni amusi aka, mu parataiso oomunepani.” Owo aahaaceererya: “Muupuwelo aka ni nchuno naka ori ophwanyeya mmithukumano.”

18. Munoona hai mithukumano sahu, nave tiheeni mulakelenlaanyu weera?

¹⁸ Nyuwaano tho munnoona mmukhalelo yoola wa omulapela Yehova? Wakhala wi ti hiiha, mutitelele weera soothene munaweryaanyu wi mukhale ni anninyu mmithukumano, naamwi okhalaka woovila. Mmooniherye Yehova wi munnoona ntoko Mwene Tavite, yoowo aalonce: “Kinnakhwela empa munakhalanyumo ni nipuro onakhalamu ovuwa wanyu.”—Salumu 26:8.

[Masu a vathi]

[Yooleeliherya va epaaxina 16]

Mithukumano sahu sinnaceenyerya nave sinnanilipiha otitelela omurumeela Yehova

[Ekaaxa va epaaxina 17]

OWO WIILIWIILI AANAKHALA PHAAMA

“Moothananiha, waakhala woovila oya mmithukumano nthowa na makacamiho a ekumi. Nyenya vaavaa kaalakelela oyawo, kaanahakalala opuha yoolya yoomunepani Yehova aareherenryeiye. Naamwi karwa kiicelaka nikutha, murima, vamoha ni neekothokotho, wiiliwiili kaanakookela owaani koonaka phaama opwaha vaavaa kaaphiyaaka.”

“Vaavaa kaawiriyannaaka ncipo 68, ‘Nivekelo na Kapuro Awuukhuwa,’ niipiwe mmulokoni mwahu, kaahinla. Naatepa oreera! Ikhankoonya saka soowaruni saanawiriyana nsu na muchu ori oothene, nave miyaano kaanachariha. Chiryene kaatepa osiveliwa kaaryaaka weiwo!”—Xorxe a iyaakha 58 sa oyariwa.

[Yooleeliherya va epaaxina 19]

Yehova onnoona wi nookhalano nchuno na oya mmithukumano nave wi onnacicimiherya wiilipixerya wahu ophwanyeya weiwo

[Ekaaxa va epaaxina 18]

MATHOWA A OPHIYA MMITHUKUMANO

1. Ninnahusihiwa ni Yehova.

2. Ninnalipiheya.

3. Ninnaakhela nikhaviheryo na Munepa wa waweela wa Muluku.

4. Ninnakhalano ekari ya wooniherya wi ninnaasivela annihu ni arokora.

5. Ninnakhala awaataana ni annihu.

6. Ninnamvaha Yehova yeeyo enamphwanela.

7. Ninnooniherya wi nnachuna waataana ni Yehova vamoha ni Mwanawe.

8. Ninnooniherya wi ninnachuna omwiiwelela Yehova.

[Ekaaxa va epaaxina 20]

MASU ATHARIHIWE

Ninnathukumana vamoha mmalapelo: Ninnamusivela Yehova nave nnachuna omwiiwelela, mwawiihiiha ninnasiveliwa omuthamala vamoha ni annihu. Mmithukumano sahu, ninnavekela, ninnamwiipela, ninnaloca sa yoowo nave weerano hiiha ennamuhakalaliha Yehova