“Haweni, Mwahusihe Atxhu Othene”
“Haweni, mwahusihe atxhu othene mwapatisaka . . . , nave mwahusihaka wera sothene korummakani.”—MATEU 28:19, 20.
MACIPO: 141, 97
TI MWAWIIHAI ANAMOONA A YEHOVA ARYAAYA OOHIYANA VOOLOCA SA . . .
muchaka analaleeryaaya nave ntakhara heeni?
mukhalelo analaleeryaaya?
wunlaana wa muteko aya?
1, 2. Makoho taani anakhumelela orweela wa masu a Yesu anaphwanyeya mu Mateu 24:14?
YESU aaloherya wi mmahiku ookuchula, michaka yaphaama ya Omwene saahaala olaleeryiwa wa achu oothene. (Mateu 24:14) Ntoko Anamoona a Yehova, noosuweliwa elapo yoothene nthowa na muteko ahu wa olaleerya. Achu akina annasiveliwa ni muchaka nnalaleeryaahu, akina hanasiveliwano. Nyenya naamwi akina yaawo ehisiveliwaka ni muchaka ahu, awo annanicicimiha. Ti nthowa nene nnalocaahu wi ti yeehuru nnapaka muteko yoowo Yesu aalohenryeiye. Apwanne nookhalano mathowa aphaama a oloca hiiha? Mano, nnasuwela hai wi muteko ahu wa olaleerya ti yoowo Yesu aalohenryeiye?
2 Ikerexa sincipale sinnaloca wi sinnalaleerya muchaka yoowo Yesu aalohenryeiye. Nyenya olaleerya waya ori opaka miyaha okerexa, mu televisau, mu interneti naari wi pahiru anaaleela akina mukhalelo ahusenryaaya vooloca sa Yesu. Akina anoona wi waakhaviherya achu oothoiwa naari opaka muteko wa ikharari ntoko totore, mulipa a murece, naari ohusiha mukhalelo aya wa olaleerya. Apwanne miteko seiya, olaleerya yoowo Yesu aalonceiye?
3. Mwawiiwanana ni Mateu 28:19 ichu taani sese oomuchara a Yesu yaaphwanelaaya opaka?
3 Apwanne Yesu aachuna wi oohuserya awe yaaweheryeke achu orwa wa yaawo? Hooye! Amanle oviihiwa, Yesu aaloca ni oomuchara awe awaakhwana nsana ii: “Haweni, mwahusihe atxhu othene mwapatisaka . . . , nave mwahusihaka wera sothene korummakani.” (Mateu 28:19, 20) Mwawiihiiha ntoko oomuchara a Yesu, nnaphwanela weerano ichu sese. Nnaphwanela waapaka oohuserya, waapatisa ni waahusiha. Nyenya voopacerya, nnaphwanela oya waaphwanya achu. Mulipa oomwaalikhela Piipiliya oothariha: “Oyawo ori murici wa Mukiristu oothene opaka mukwaha wookhuveya naari woorakamela wi aalaleerye akina.”—Mateu 10:7; Luka 10:3.
4. Onavolowela eheeni okhala mulipa “awatotha atxhu”?
4 Tiheeni Yesu onaweheryeiye wa oohuserya awe? Apwanne onachuna wi muchu ti muchu alaleeryeke mukhateiye, naari wi onachuna wi ekhale ooreheryeya ntoko nikhuuru? Woona wi ti woovila muchu mmoha waalaleerya “atxhu othene,” oohuserya awe yaaphwanela okhala ooreheryeya ntoko nikhuuru. Ti yeeyo Yesu aachuneiye oloca vaavaa aawompeiye oohuserya awe wi ekhale “alipa awatotha atxhu.” (Mwaalakhanye Mateu 4:18-22.) Yesu haamuloca mulipa oomesa onampharihela coolo nave anaweherya wi ehopa emmirye. Moohiyana, ototha Yesu aaloceiye waavolowela opharihela mulapa wa ihopa. Mukhalelo ola wa ototha ihopa onachuneya muteko mutokweene, ooreheryeya nave achu ancipale elapeke vamoha.—Luka 5:1-11.
5. Makoho taani masese anaphwanela waakhuliwa, nave ntakhara heeni?
5 Wi naasuwele achu analaleerya michaka yaphaama olelo, ti woochuneya wiipakela makoho ala masese:
▪ Muchaka taani oomuchara a Yesu anaphwanelaaya olaleerya?
▪ Tuuvi onaphwanela okhala moonelo aya?
▪ Meerelo taani anaphwanelaaya opharihela?
▪ Muteko woolaleerya onaphwanela wunlaana hai nave ophiyerya liini?
Maakhulo a makoho ala anahaala onikhaviherya waasuwela yaawo anapaka muteko wa ovuluxa ikumi nave anahaala olipiha nchuno nahu na otitelela olaleerya.—1 Timóteo 4:16.
MUCHAKA ENE TUUVI?
6. Ntakhara heeni munnaphwanela ororomela wi Anamoona a Yehova tanalaleerya muchaka waphaama?
6 Mwaalakhanye Luka 4:43. Yesu aalaleerya “Mutxhaka Waphama wa omwene,” nave onachuna wi oohuserya awe yeerekeno emohamoha. Nikhuuru taani na achu nnalaleerya muchaka yoola wa achu oothene? Pahiru Anamoona a Yehova! Naamwi akina yaawo ahinasiveliwa ni hiyo, anneemererya. Ntoko yootakiherya, moone tiheeni phaatiri mmoha yoowo aakhanle mu ilapo soohiyanahiyana ntoko misiyonaario olonceiye wa Anamoona a Yehova. Elapo ti elapo, aavireiyewo aanaakoha Anamoona a Yehova tuuvi waari muchaka yaalaleeryaaya. Owo onnaloca: “Awo yaari alolo, pahiru yaavaha naakhulo nimohamoha: ‘Michaka yaphaama ya Omwene.’” Olelo masu a phaatiri ola annooniherya wi hiyaano tahi na alolo nyenya nri awiiwanana ntoko Akiristu eeparipari. (1 Korinto 1:10) Omwene wa Muluku muchaka mutokweene wa Mulipeleli Alaleyaka Omwene wa Yehova. Erevista ela ennaphwanyeya mu ilocelo 254 nave mweeri ti mweeri sinnapakiwa irevista waacamela 59.000.000, yeeyo enakaiwa mu elapo yoothene!
7. Nnasuwela hai wi ahooleli a ikerexa hanalaleerya muchaka waphaama?
7 Ahooleli a ikerexa hanalaleerya Omwene wa Muluku. Wakhala wi annaloca sa Omwene, ancipale a yaawo analoca wi echu eri mmurima mwa muchu. (Luka 17:21) Awo hanaahusiha achu wi Omwene olamulelo otikitheryiwe wirimu, olamuleliwaka ni Yesu. Moohiyana, awo wiiliwiili analoca sa Yesu mu Natale. Awo hanathariha wi Omwene onahaala omaliha makacamiho oothene a achu nave moohilekela onahaala oviihavo onanara woothene veelaponi yavathi. (Wupulula 19:11-21) Chiryene, ahooleli a ikerexa hanasuwela yeeyo Yesu onahaaleiye weera ntoko Mwene a Omwene wa Muluku. Nave woona wi haniiwexexa muchaka wa Yesu, awo tho haniiwexexa ntakhara heeni anaphwanelaaya olaleerya.
MOONELO TAANI NNAPHWANELAAHU OKHALANO VOOLOCA SA MUTEKO WOOLALEERYA?
8. Moonelo taani woonanara onakhumelela vooloca sa muteko woolaleerya?
8 Oohuserya a Yesu hanaphwanela olaleerya wi ekhaleno ikhorowa naari opaka ipa itokotoko. Yesu aaloca ariki: “Mwakhenle mahalene, nvaheketho mahalene.” (Mateu 10:8) Mwawiihiiha muteko wa olaleerya honaphwanela okhala maroca. (2 Korinto 2:17) Oohuserya a Yesu hanaphwanela oveka ikhorowa ntakhara muteko aya wa olaleerya. (Mwaalakhanye Saweriwa T’arummwa 20:33-35.) Naamwi mahusiho a Yesu eri ookwakwaleya, achu ancipale anaya okerexa anaweiwa mu oveka ikhorowa wi ekhapeleleno ekerexa ni waaliva mapastori aya ni anamalapa akina. Ntoko yookhumelela, ahooleli ancipale a ikerexa anakhala ooreela.—Wupulula 17:4, 5.
9. Anamoona a Yehova anooniherya hai wi anapaka muteko wa olaleerya ni moonelo waphaama?
9 Apwanne Anamoona a Yehova annaveka ikhorowa mu Empa ya Omwene naari mmithukumano saya sa muceche? Hooye! Muteko aya onakhaviheryiwa ni soovaha sa murima. (2 Korinto 9:7) Mu eyaakha evirale, Anamoona a Yehova aamaliha iwora macikhwi meeli elaleeryaka michaka yaphaama nave aheeciha soohuserya sa Piipiliya opwaha 9.000.000 mweeri ti mweeri. Awo hanaliviwa ntakhara muteko aya wa olaleerya nyenya anakhala oohakalala opharihela ikhorowa saya wi epakeno muteko yoola. Mulipa ootholathola ooloca sa muteko wa Anamoona a Yehova: “Yoolakelelaaya etokotoko ori olaleerya ni ohusiha.” Owo tho ooloca wi Anamoona a Yehova haanono ahooleli analiviwa ikhorowa. Vano wakhala wi hannalaleerya wi naakhele ikhorowa, moonelo taani nryaahuno? Ninniivaha opaka muteko yoola nthowa nawi ninnamusivela Yehova ni achu. Moonelo ola onnakhwaaniherya yooloherya enaphwanyeya mu Salumu 110:3. (Mwaalankhanye.)
MEERELO TAANI ANAPHWANELA OPHARIHELIWA?
10. Meerelo taani a olaleerya yaaphariheliwe ni Yesu vamoha ni oohuserya awe?
10 Meerelo taani Yesu ni oohuserya awe yaapharihenlaaya wi elaleerye? Awo yaaya voothevene yaahaalaaya waaphwanyavo achu. Ntoko yootakiherya, awo yaanalaleerya muramphani ni omusika. Awo tho yaanawaavya achu mu ichoko saya. (Mateu 10:11; Luka 8:1; Saweriwa T’arummwa 5:42; 20:20) Olaleerya empa ni empa waari mukhalelo wooreheryeya wa waaphwanya achu oothene.
11, 12. Vaavaa ikerexa sinalaleeryaaya michaka saphaama, wiilipixerya waya onahiyana hai ni Anamoona a Yehova?
11 Apwanne achu a ikerexa satheru analaleerya michaka saphaama hiiha ntoko Yesu? Wiiliwiili, ahooleli annaliviwa vaavaa anaperekhaaya mwaha wa achu aya. Ahooleli ala hanaapaka oohuserya, nyenya pahiru anaavyaavya waakhapelela achu yaale aryaayano. Ikwaha ikina, anneererya waaceenyerya achu aya wi yalaleerye. Ntoko yootakiherya, mu eyaakha ya 2001, Papa João Paulo II aarepa ekaarata wi achu a ekerexa yaaphwanela olaleerya Michaka ni okhalano mvai hiiha ntoko Paulo, yoowo aalonce: “Òtakhaliwa ti miyo kahinalaleya mutxhaka waphama.” Voocharela Papa aaloca wi muteko ola wa olaleerya onaphwanela weeriwano ohiya pahiru ni achu arino mavyakelo, nyenya ni achu oothene a ekerexa. Nyenya, achu vakhaani ti yaacharinhe nceenyeryo nla.
12 Hanka vooloca sa Anamoona a Yehova? Ti yaawo pahiru analaleerya wi Yesu onnalamulela ntoko Mwene ovinyerya 1914. Annamwiiwelela Yesu nave annahela mu nipuro noopacerya muteko wa olaleerya muukumini mwaya. (Marko 13:10) Liivuru Pillars of Faith—American Congregations and Their Partners ooloca wi wa Anamoona a Yehova, olaleerya ti wookhweleyaxa. Owo ooloca wi vaavaa anaaphwanyaaya achu oovoliwa, oothanana, ni areca, awo anneererya waakhaviherya, nyenya hanacuwala yoolakelelaaya etokotoko ori olaleerya vooloca sa okuchuwa wa elapo ela ni waahusiha achu wi evulusiwe. Anamoona a Yehova annatitelela olaleerya muchaka ola nave anachariha meerelo a Yesu ni oohuserya awe.
MUTEKO WOOLALEERYA WAAHAALA WUNLAANA HAI NAVE OPHIYERYA LIINI?
13. Muteko woolaleerya waahaala wunlaana hai?
13 Yesu aaloca wi oomuchara awe yaahaala olaleerya ni ohusiha michaka yaphaama “mwelaponi yothene.” Awo yaalamuleliwa ‘wahusiha atxhu othene.’ (Mateu 24:14; 28:19, 20) Ela enooniherya wi michaka yaphaama saaphwanela olaleeryiwa veelaponi yoothene.
14, 15. Tiheeni enooniherya wi Anamoona a Yehova tanaakhwaniherya yooloherya ya Yesu vooloca sa wunlaana wa muteko woolaleerya? (Moone eruku yoopacerya.)
14 Pahiru Anamoona a Yehova tanaakhwaniherya yooloherya ya Yesu wi michaka yaphaama silaleeryiwe veelaponi yoothene. Ntakhara heeni nnalocaahu yeela? O Estatu Unitu aakhalawo ahooleli a ikerexa awaakhwana 600.000, eniiha eriwo Anamoona a Yehova 1.200.000 yaawo analaleerya michaka yaphaama mu elapo yeele. Elapo yoothene, aakhalavo maphaatiri a Katolika 400.000, nyenya Anamoona a Yehova opwaha 8.000.000 annalaleerya michaka yaphaama mu ilapo 240. Chiryene Anamoona a Yehova annalaleerya michaka yaphaama veelaponi yoothene, muteko yoowo onnamvuwiha ni omuhakalaliha Yehova!—Salumu 34:1; 51:15.
15 Ntoko Anamoona a Yehova, yoolakelelaahu ori olaleerya michaka yaphaama wa achu ancipale wakhala wooweryeya ehaakumve makuchuwelo ophiya. Wi nipake muteko yoola, onachuneya otaphulela ni waapaka aliivuru ancipale, irevista, itrataato, ni miyaha sa muthukumano wa muceche ni miwopelo sa Mukonelo mu ilocelo soopwaha 700. Ninnaavaha achu mahaleene. Pahiru mu eyaakha evirale, noopaka soolaleeryiwa sinathipeleya Mpiipiliyani sawaakhwana mapilyau 4,5. Nohaapaka a Piipiliya Tradução do Novo Mundo da Bíblia Sagrada awaakhwana 200.000.000 mu ilocelo 130. Mu site ahu sinnaphwanyeyamo miyaha mu ilocelo opwaha 750. Pahiru Anamoona a Yehova tanapaka muteko yoola wootikhiniha.
16. Nnasuwela hai wi Anamoona a Yehova aakhalano munepa wa Muluku?
16 Muteko woolaleerya onahaala otitelela ophiyerya liini? Yesu aaloca wi michaka yaphaama saaphwanela olaleeryiwa ophiyerya omakuchuwelo. Ntoko Anamoona a Yehova, nnanwerya ovilela mmuteko wa olaleerya ophiyerya nihiku noomaliherya, pahiru woona wi nookhalano munepa waweela wa Yehova. (Saweriwa T’arummwa 1:8; 1 Pedro 4:14) Achu akina anaya okerexa akhweya anamuloca: “Hiyaano nookhalano munepa waweela.” Nyenya apwanne ananwerya opaka muteko yoowo Anamoona a Yehova anapakaaya variyari va mahiku yaala ookuchula? Makhuuru makina anneererya olaleerya ntoko hiyaano, nyenya ohoolo waya awo annapwata. Akina anniivaha olaleerya, nyenya mu elukuluku vakhaani. Akina tho annalaleerya empa ni empa, nyenya awo hanalaleerya michaka yaphaama ya Omwene. Mwawiihiiha awo hanapaka muteko yoowo Yesu opacerinheiye.
MMAHIKU AHU TAANI ANALALEERYA MICHAKA YAPHAAMA?
17, 18. (a) Ntakhara heeni nnaroromelaahu wi Anamoona a Yehova ti yaaworu analaleerya michaka yaphaama ya Omwene olelo? (b) Onii oweryeye hai wi ntitelele mmuteko yoola?
17 Mano taani analaleerya michaka yaphaama ya Omwene olelo? Pahiru Anamoona a Yehova! Nnasuwela hai? Ntakhara wi nnalaleerya michaka saphaama, michaka saphaama sa Omwene. Ninnawaavya achu mmuteko ahu wa olaleerya, mwawiihiiha nnapharihela meerelo aphaama. Nookhalano moonelo waphaama vaavaa nnalaleeryaahu, eyo ti wi, ninnamusivela Yehova ni achu. Muteko ahu wa olaleerya ti wawunlaana, nthowa nawi nnalaleerya achu maloko oothene ni ilocelo soothene. Nave nnahaala otitelela olaleerya michaka yaphaama ya Omwene ophiyerya omakuchuwelo!
18 Mweeparipari ti wootikhiniha woona muteko woohakalaliha achu a Yehova anapakaaya wi elaleerye michaka saphaama variyari va mahiku yaala ookuchula. Nyenya nnawerya hai weerano muteko woothene yoola? Murummwa Paulo oothariha: “Wona wi ti Muluku onalapiha mwa nyuwo otxhuna ni wera ntoko onakhweleiye.” (Filipi 2:13) Ninnaroora wi Yehova atitelele onivaha ikuru vaavaa nniilipixeryaahu olaleerya michaka yaphaama!—2 Timóteo 4:5.
[Ekaaxa va epaaxina 17]
MASU ATHARIHIWE
Wunlaana wa muteko wa olaleerya onaahiwa omwaramwaxeye wa muteko wa olaleerya michaka yaphaama orukurerya elapo ni maloko oothene. Onavolowela waaca wa Anamoona elaleeryaka michaka yaphaama, waaca wa soolaleeryiwa sinaphwanyeyamo muchaka ene, ni waaca wa ilocelo sinaphariheliwa wi olaleeryiwe muchaka owo
[Eruku va epaaxina 15]
Nnalaleerya voothevene anaphwanyeyavo achu (Moone eparakrafo 10)