Makoho a Alipa Walakhanya

Mu yawoona ya Esekiyeli, taani onamweemelela mulopwana aarino murupa wa mulipa oorepa ni alopwana athanu nammoha yaarino mithipo sawiiphano?

▪ Awo aneemelela owerya wa wirimu yaawo yaakhavihenrye otoloxiwa wa Yerusalemu nave anahaala tho otolosa elapo yoonanara ya Satana mu Armaketo. Ola wiiwexexa wahiihaano. Ntakhara heeni ti woochuneya?

Ehaakumve eyaakha ya 607 E.E.K., Yehova aamvaha Esekiyeli yawoona wa yeeyo yahaala weereya o Yerusalemu ahaakumve otoloxiwa. Mu yawoona, Esekiyeli aahoona ichu sincipale soonanara seereya o Yerusalemu. Voocharela aawoona alopwana athanu nammoha yaawo yaarino “mmatani mithipo sawiphano.” Aamoona tho mulopwana mukina “awanre sawèla” nave aakhalano “murupa wa mulipa òrepa.” (Ezekiyeli 8:6-12; 9:2, 3) Mulopwana owo aaleeliwe oya ‘wetxètxa epoma yothene o Yerusalemu nave apake eneneryo yolikana ni vayutxi va othene yale anikhupanyerya ni anahawa wa nthowa na sonanara seriwe mpoma mwemmo.’ Voocharela alopwana athanu nammoha ni mithipo sa wiiphano yaaleeliwa waanyoka achu oothene mu epooma yaale yahaarino eneneeryo. (Ezekiyeli 9:4-7) Tiheeni nnahuseryaahu orweela wa yawoona yeela, nave mulopwana ni murupa wa mulipa oorepa taani?

Esekiyeli aarino yawoona ela mu 612 E.E.K. Ela yaari yooloherya yaakhwanenle voopacerya sivinre iyaakha thanu vaavaa Yehova aaweemerenryeiye anakhoco o Paapulu wi yamutolose Yerusalemu. Mmukhalelo yoola, Yehova aahaapharihela Apaapulu wi yaalake achu awe oohiiwelela. (Yeremiya 25:9, 15-18) Nyenya hanka vooloca sa Ayuuta eekhaikhai yaawo yaaheemerenrye ichu soothene soonanara seereya mu epooma? Yehova aahaavulusa.

Mu yawoona, Esekiyeli hampakenle muchu eneneeryo, naari opaka makupa mu otolosiwa wa epooma. Moohiyana, yaari ankeelo yaamutolonse Yerusalemu. Mwawiihiiha yooloherya ennanivaha ekari ya woona yeeyo yeereya wirimu. Yehova aahaaleela ankeelo awe wi erehererye otolosiwa wa achu oonanara murima ni waavulusa achu eekhaikhai.a

Yooloherya ela enahaala tho waakhwanela omwaahiyu. Naanapharihela yooloherya ela nlocaka wi mulopwana ni murupa wa mulipa oorepa onaweemelela awoocihiwa yaawo nlelo anakhala veelaponi yavathi. Naanaloca tho wi achu anaheliwa eneneeryo wi evulusiwe vaavaa anawiriyanaaya ni weemererya michaka yaphaama nnalaleeryaahu. Hiihaanoru, nohoona wi onnachuneya otoroka mukhalelo wa othariha yooloherya ela. Noohuserya mu Mateu 25:31-33 wi Yesu ti yooworu onii aathorihe achu. Owo onahaala weerano omwaahiyu variyari va ekoi etokotoko. Mweelukuluku yeeyo, yaale enii ethorihiwe ntoko epucepuche anahaala ovuluwa, nave enii ethorihiwe ntoko ipuri anahaala otolosiwa.

Vano, tiheeni nnahuseryaahu mu yawoona ya Esekiyeli? Va nookhalano mahusiheryo mathanu:

(1) Yerusalemu ahaakumve otolosiwa, Esekiyeli, hiiha ntoko Yeremiya ni Yesaya, yaanaalopola achu sa yeeyo yaahaala weereya mu epooma. Awo yaari ntoko alipeleli. Olelo, Yehova onnapharihela nikhuuru nikhaani na awoocihiwa wi aahusihe achu awe ni waalopola akina ehaakumve opacerya ekoi etokotoko. Chiryene, achu oothene a Muluku, eyo ti wi, amulapeli akina a Kiristu, anakhaviheryaaya mmuteko yoola wa olopola.—Mateu 24:45-47.

(2) Esekiyeli, haahela eneneeryo yaale yaahaala ovulusiwa. Emohamoha tho achu a Muluku olelo. Awo pahiru anaalaleerya akina ni waalopola sa yeeyo enahaala weereya omwaahiyu. Muteko yoola wa olaleerya elapo yoothene onneeriwano nnikhaviheryo na ankeelo.—Wupulula 14:6.

(3) Yaale yaavulusiwe mu elukuluku ya Esekiyeli, hiyaarino eneneeryo vayuuci vaya. Olelo yaale anahaala ovulusiwa heeni ekhaleno tho eneneeryo. Tiheeni achu anaphwanelaaya weera wi evulusiwe mu ekoi etokotoko? Vaavaa anawiriyanaaya yoolopola, anaphwanela omutakiherya Kiristu, oveleela okumi aya wa Muluku, ni waakhaviherya anna a Kiristu moorweela wa olaleerya michaka yaphaama. (Mateu 25:35-40) Variyari va ekoi etokotoko, achu ala anahaala oheliwa eneneeryo, eyo ti wi, anahaala othanliwa wi evulusiwe.

(4) Mulopwana ni murupa onamweemelela Yesu. Variyari va ekoi etokotoko, Yesu onahaala ohela eneneeryo muloko mutokotoko vaavaa onahaaleiye waathoriha ntoko ipucepuche. Voocharela anahaala okhalano ekari ya okhala veelaponi ya vathi okhala wookhala.—Mateu 25:34, 46.b

(5) Olelo alopwana athanu nammoha ni mithipo sawiiphano, anaweemelela anakhoco a wirimu, yaawo anahooleliwa ni Yesu. Moohilekela awo anahaala otolosa maloko ni omaliha onanara woothene.—Ezekiyeli 10:2, 6, 7; Wupulula 19:11-21.

Mahusiheryo nihusenryaahu mu yawoona yeela annanikhaviherya ororomela wi Yehova hanii aatolose achu eekhaikhai vamoha ni amutakhali. (2 Pedro 2:9; 3:9) Mahusiheryo ala annanuupuserya tho wi muteko wa olaleerya mmahiku ahu, ti wookhweleya. Achu oothene anaphwanela owiriyana olopola makuchuwelo ahaakumve ophiya!—Mateu 24:14.

[Masu a vathi]