Muheemererye wi Soohesa sa Akina Sookwaculeni
Mutitelele ‘walevelela akhwinyu’ moomalela.—KOLOSI 3:13.
MACIPO: 121, 75
MWAAHAALA WAAKHULA HAI?
Ntakhara heeni marehereryo a Muluku tavameekhaaya?
Piipiliya onooniherya hai wi naachu oohiphaameya?
Tiheeni nnaphwanelaahu weera vooloca sa soohesa sahu ni sa akina?
1, 2. Piipiliya aalohenrye hai waaceereryeya wa achu a Yehova?
ORUKURERYA elapo, aakhalavo marehereryo arino achu anamusivela Yehova nave anachuna omurumeela. Achu awo ti Anamoona a Yehova. Naamwi ehesaka ni opaka ichu soonanara, Yehova onnaahoolela achu awe ni munepa waweela. Hankooni noone makhalelo makina onaahooleleiye.
2 Mu 1914, achu avakhaani ti yaamulapela Yehova. Olelo Yehova onnareeliha muteko wa olaleerya. Ntoko yookhumelela, ancipale annahuserya iparipari sa Mpiipiliyani nave annakhala Anamoona awe. Yehova onnathariha waaceereryeya wuuwu vaavaa aalonceiye: “Etxheko yoyevasa eni enakhalano atxhu ntxikhwi, nave etxheko ekhani enamukhala nloko nawatxa. Elukuluku yaphiya, miyano, Apwiya, kinamwera yeyo vohilekela.” (Isaiya 60:22) Olelo ninnawerya woona yooloherya ela yaakhwanelaka. Achu a Yehova ari ntoko nloko nawaaca. Chiryene, aakhalawo maloko mancipale orukurerya elapo ni achu avakhaani opwaha waaca wa Achu a Yehova.
3. Akapuro a Muluku anooniherya hai osivela?
3 Variyari va mahiku yaala ookuchula, Yehova onnaakhaviherya achu awe wi elipiherye osivelana waya mukina ni mukhwaawe. “Muluku ti okhwela [naari osivela]” nave awo annamutakiherya. (1 Yohani 4:8) Yesu aahaalamulela amuhuserya awe osivelana “mukina ni mukhweiye.” Owo tho aahaaleela: “Mwa yeyo atxhu othene anamusuwela wi muri amuhuserya aka, mwakhwelanà mukina ni mukhweiye.” Akapuro a Yehova annooniherya osivela yoola wa mukina ni mukhwaawe naamwi maloko ewanawanaka. Ntoko yootakiherya, ekhoco yanawiili ya elapo yoothene, achu awaakhwana 55.000.000 yaanyokiwa. Nyenya achu a Yehova hiyaamwiimphe muchu mmoharu mano mu ekhoco yeele. (Mwaalakhanye Mikeya 4:1, 3.) Ela yaahaakhaviherya ohikhalano “nthowa” nnikhami na achu oothene.—Saweriwa T’arummwa 20:26.
4. Ntakhara heeni waaceereryeya wa achu a Yehova ti wootikhiniha?
4 Achu a Muluku annatitelela waaceereryeya naamwi erino mwiicani akuru, Satana. Owo ti “muluku a elapo ela.” (2 Korinto 4:4) Satana tonahoolela marehereryo a olamulelo wa elapo yeela, hiiha ntoko michaka sa elapo, nave onnapharihela ichu seiya wi eererye omaaliha muteko wa olaleerya michaka yaphaama. Nyenya hanawerya omaaliha muteko ola. Satana oosuwela wi emuhalenle elukuluku yavakhaani, mwawiihiiha onnatitelela weererya onimaaliha omulapela Yehova.—Wupulula 12:12.
MUNAHAALA OKHALA OOROROMELEYA VAAVAA AKINA ANAPAKAAYA SOONANARA?
5. Ntakhara heeni mweelukuluku aya akina annaphoreiha murima ahu? (Moone eruku yoopacerya.)
5 Akapuro a Muluku annahuserya wi echu yookhweleyaxa ori omusivela Muluku ni achu akina. Yesu aaloca: “‘Wakhweleke Apwiya Muluku-à ni ikuru sà sothene. Nla nri nlamulo ntokotoko ni nopatxerya. Nlamulo nanawili nnalikani ni nopatxerya, ti nla: omukhwele mukhwa-à ntoko onikhwelawe.’” (Mateu 22:35-39) Nyenya Piipiliya onnooniherya wi achu oothene anayariwa oohiphaameya ntoko yookhumelela ya yoocheka ya Aatamu. (Mwaalakhanye Aroma 5:12, 19.) Mwawiihiiha, mweelukuluku aya akina mmulokoni akhweya anamuloca naari opaka echu enaphoreiha murima ahu. Vaavaa ela eneereyaaya, tiheeni nnahaalaahu weera? Omusivela wahu Yehova onahaala okhala woolipa? Nnahaala okhala oororomeleya wa yene ni achu awe? Piipiliya onnanleela sa akapuro akina a Yehova yaawo yaalonce ni yeenre ichu saaphoreihale akina. Hankooni noone tiheeni nnahuseryaahu orweela wa yeeyo yeeren’ye ni yaawo.
6. Mmukhalelo taani Heli aahenseiye waalaka anamwane awe?
6 Ntoko yootakiherya, Heli aari namukucho a Isarayeli, nyenya anamwane awe apiili hiyiiwelela malamulo a Yehova. Piipiliya onnaloca: “Ana a Heli yàri ònanara murima; hiyàsuwela Apwiya.” (1 Samuwele 2:12) Heli aanasuwela wi anamwane awe yaanatepa opaka ichu soonanara. Naamwi hiiha, owo haalaka mwawaakhwanela. Mweelukuluku aya, Yehova aamulaka Heli ni anamwane awe apiili. Ohoolo waya, hineemereryiwe nloko na Heli orumeela ntoko anamukucho. (1 Samuwele 3:10-14) Mwaakhanle elukuluku ya Heli nave musuwela wi owo aanaweemererya anamwane awe opaka ichu soonanaraxa, mwaahaala okwaculeya? Mukhalelo ola waahaala oceecheiha nroromelo nanyu wa Yehova ni omaala omurumeela?
7. Soocheka taani itokotoko Tavite aapankeiye, nave tiheeni Muluku eenreiye sa yeeyo?
7 Tavite aakhalano mikhalelo saphaama, nave ti nthowa nene Yehova aamusiveleiye vancipale. (1 Samuwele 13:13, 14; Saweriwa T’arummwa 13:22) Nyenya, naamwi hiiha Tavite aapaka ichu soonanara. Vaavaa Uriya aakeleiye owaniha ekhoco, Tavite aararuwa ni mwaara a Uriya, Pati-sepa, nave arupala. Tavite haachuna wi muchu asuwele yeeyo enreiye. Mwawiihiiha aamwiichaniha Uriya wi amoone nave voocharela aheererya omulekecha wi arowe owannyawe. Tavite aaweherya wi Uriya ahaala ophitaana ni Pati-sepa nave achu yaahaala wuupuwela wi Uriya taari tiithi a mwaana. Nyenya Uriya aakhooca orowa. Mwawiihiiha Tavite aalakelela wi Uriya anyokiwe mu ekhoco. Nthowa na soocheka sawe itokotoko, Tavite ni emusi awe yaahooxeya vancipale. (2 Samuwele 12:9-12) Nyenya Yehova aammorela ikharari nave aamulevelela. Owo aasuwela wi Tavite aanachuna opaka yeeyo yaari yaphaama. (1 Mamwene 9:4) Waakhanle wi mwaakhala elukuluku yeeyo, mwaahaala woona hai vooloca sa yeeyo Tavite eenreiye? Mwaahaala omaala omurumeela Yehova?
8. (a) Murummwa Petro ohense hai okhwaaniherya masu awe? (b) Petro amanle ohesa, ntakhara heeni Yehova aatitelela ompharihela?
8 Yootakiherya ekina ya Mpiipiliyani ti murummwa Petro. Yesu aamuthanla wi akhale murummwa. Naamwi hiiha, ikwaha ikina, Petro aanaloca nave aaneera ichu soohiphwanelela. Ntoko yootakiherya, Petro aaloca wi naamwi akinaku ekwaculiwe miyaano hooye. (Marko 14:27-31, 50) Nyenya Yesu amanle ophariwa, arummwa oothene, ophitaanyerya Petro yaamuhiya yene. Voocharela, ikwaha raru Petro aaloca wi hamusuwenle Yesu. (Marko 14:53, 54, 66-72) Nyenya, Petro aatepa othanana ni yeeyo eenreiye. Mwawiihiiha Yehova aamulevelela nave aatitelela ompharihela. Mwaakhanle muhuserya a Yesu nave musuwela yeeyo Petro eenreiye, mwaahaala otitelela omuroromela Yehova?
9. Ntakhara heeni munnaroromela wi Muluku teekhaikhai mahiku oothene?
9 Orweela wa sootakiherya seiya, nohoona wi akapuro akina a Yehova yaapaka ichu soonanara nave yaahaakwaculiha akina. Wakhala wi eyo yoheereya olelo, tiheeni munaphwanelaanyu weera? Munahaala omaala oya mmithukumano naari omunyanyala Yehova ni achu awe moomalela? Naari munahaala wuupuwela wi Yehova ta ikharari nave wi onnaweherya wi muchu acharuwe? Nyenya sinnakhalavo ilukuluku muchu opanke yoocheka etokotoko ohiniisooneiye okhalano nthowa mwa yeeyo eenreiye. Munahaala ororomela wi Yehova oosuwela nave wi onahaala weeravo echu mweelukuluku aya? Wi owo tho onanwerya omviihamo muchu mmulokoni wakhala woochuneya? Munnaroromela wi Yehova mahiku oothene onapaka yeeyo eri yaphaama ni yeekhaikhai?
MUTITELELE OROROMELEYA
10. Tiheeni Yesu iiwexenxeiye vooloca sa yoocheka ya Yuutasi Iskariyooti ni Petro?
10 Mpiipiliyani, ninnaalakhanya vooloca sa ancipale yaatitelenle okhala oororomeleya wa Yehova ni achu awe naamwi akina yaapaka soocheka itokotoko. Yesu yootakiherya yaphaama. Amanle ovekela ohiyu woothene avekaka nikhaviheryo wa Tiithi awe, owo aahaathanla oohuserya 12. Mmoha a yaawo ari Yuutasi Iskariyooti, yoowo voocharela aamutuminhe. Nave tho murummwa Petro aaloca wi haamusuwenle Yesu. (Luka 6:12-16; 22:2-6, 31, 32) Yesu haamukhupannye Yehova, naari oohuserya vaavaa yaamunyeenyeihaaya. Yesu aatitelela omwaacamela Tiithi awe ni okhala oororomeleya wa yoowo. Ntoko yookhumelela, Yehova amvaha phatamari moorweela wa omviiha mookhwani ni voocharela ompaka okhala Mwene a Omwene wa wirimu.—Mateu 28:7, 18-20.
11. Tiheeni Piipiliya aalohenryeiye vooloca sa akapuro a Yehova mmahiku yaala?
11 Yootakiherya ya Yesu ennanihusiha wi nikhale oororomeleya wa Yehova ni achu awe. Nave nookhalano mathowa aphaama a weerano yeeyo. Ninnawerya woona wi Yehova onnaahoolela akapuro awe mu elukuluku yeela yookuchula. Onnaakhaviherya olaleerya eparipari veelaponi yoothene, nave ti yaaworu pahi aneerano muteko yoowo. Awo tho ari awaataana ni oohakalala woona wi Yehova tonaahusiha. Yehova aathariha eyo vaavaa aalonceiye: ‘Òroromeleya aka anamukhuwelaka nuhakalala ni yitxhànle mmurimani mwaya.’—Isaiya 65:14.
12. Nnaphwanela woonaka hai soohesa sa akina?
12 Hiyaano chiryene na achu oohakalala nthowa nawi Yehova onnanihoolela ni onikhaviherya opaka ichu saphaama. Moohiyana, achu a elapo ya Satana haanono ohakalala ni ewehereryo yeeparipari ya omwaahiyu. Waahaala okhala okhamiruku omuhiya Yehova ni achu awe nthowa nawi muchu mmulokoni ooloca naari oheera echu ehiri yawookololowa! Opwaha yeeyo, nnaphwanela otitelela okhala oororomeleya wa Yehova ni ochara ohoolela wawe. Nnaphwanela tho ohuserya mukhalelo nnahaalaahu woonaka soohesa sa akina.
TIHEENI MUNAPHWANELAANYU WEERA?
13, 14. (a) Ntakhara heeni nnaphwanelaahu okhala oovilelana? (b) Yoororomeliha taani nnaphwanelaahu wuupuwelaka?
13 Tiheeni munaphwanelaanyu weera wakhala wi anninyu aaloca naari aapaka echu ehoosivenleeni? Piipiliya onnavaha ekano ela: “Ohakuveleke onyènyeya mmurimani mwà, ntakhara esara enakhala mw’alolo.” (Eklesiyaste 7:9) Oothene ahu naachu oohiphaameya nave ninnahesa. Mwawiihiiha, muhiweherye wi annihu elukuluku yoothene anahaala olocaka ni weera ichu sawookololowa. Nave tho heniphuriha echu otitelela wuupuwelela soocheka saya. Wakhala wi ninnatitelela weerano, moohilekela nnahaala oyeleela ohakalala mmuteko wa Yehova. Voopwahaxa, nroromelo nahu wa yoowo, nnahaala okukuceya, nave nnamuhiya marehereryo a Yehova. Voocharela, nnamuhiya omurumeela Yehova naari oyeleela ewehereryo ya okhala mu elapo ya hiihaano.
14 Vano, tiheeni enahaala wookhaviheryaani otitelela omurumeela moohakalala naamwi akina epakaka ichu seiyo sinookwaculaani? Elukuluku yoothene muupuwele yoororomeliha awe yoohakararyiha: “Miyano kinampaka erimu esyani ni elapo yavathi esyanitho. Atxhu hekupuwelaru itxhu ivinré hikupuweliwaru mano.” (Isaiya 65:17; 2 Pedro 3:13) Yehova onahaala woovahaani mareeliho yaala wakhala wi mootitelela okhala oororomeleya wa yoowo.
15. Tiheeni Yesu olonceiye wi nipake vaavaa akina anahesaaya?
15 Mweeparipari, hiyaano nlelo hanri mu elapo yahiihaano. Mwawiihiiha wakhala wi muchu oonikwacula, nnaphwanela wuupuwelela mwa yeeyo Yehova onachuneiye wi nipake. Ntoko yootakiherya, Yesu ooloca: “Mwalevelela atxhu sotxheka saya, Atithinyu ari wirimu anamolevelelanitho. Nto, mwahinalevelelà atxhu, Atithinyutho hiyolevelelani sotxheka sanyu.” Nave vaavaa Petro aamukonheiye Yesu waakhanle wi nnaphwanela olevelela “itila thanu na pili” Yesu aamwaakhula ii: “Nkinolèla wi omulevelele itila thanu na pili, nto kinnolèla wi omulevelele itila makhumi mathanu nameli wulùlela vathanu na pili.” Yesu oonihusiha wi nnaphwanela waalevelela akina ikwaha soothene.—Mateu 6:14, 15; 18:21, 22.
16. Yootakiherya taani yaphaama Yoosefe onihiyenryeiye?
16 Yootakiherya ya Yoosefe ennanihusiha mukhalelo wa weera vaavaa akina ananchekelaaya. Yoosefe ni munnawe mukhaani yaari anamwane eeli pahiru a Yakopo ni Rakele. Yakopo aakhalano anamwane akina khumi, nyenya aanamusivela vancipale Yoosefe opwaha oothene. Ela yaaweeriha omukhalela nrima Yoosefe. Chiryene, awo yaatepa omwiica ophiyerya omutumiha ntoko kapuro, nave aakerihiwa o Yiikuputu. Simanle iyaakha sincipale, mwene o Yiikuputu aamweera Yoosefe muchu anaawiili oowerya mu epooma nthowa na otikhiniheya ni miteko saphaama sa Yoosefe. Ohoolo waya, asinna a Yoosefe yaarwa o Yiikuputu wi ethume soolya wa nthowa na etala. Vaavaa yaamonnaaya Yoosefe, awo hiyaamusuwela, nyenya yene aanaasuwela. Naamwi yaamukhalinhe moonanara, owo haalanke. Moohiyana owo aaweererya wi asuwele waakhanle wi aatoroka moonelo aya moomalela. Vaavaa Yoosefe aasuwenleiye wi awo yaatoroka moonelo aya, owo aahaaleela wi aari munnaya. Ohoolo waya aahaahakararya nave aloca: “Vanonto muhòve etxhu. Miyano kinamòkhapelelani nyuwano ni ahimanyu.”—Maphatxuwelo 50:21.
17. Tiheeni munaphwanelaanyu weera vaavaa akina anoochekelaayaani?
17 Woona wi achu oothene annahesa, muupuwele wi nyuwaano tho munanwerya waachekela akina. Mwawiihiiha wakhala wi moomunyeenyeiha muchu, mucharihe ekano ya Piipiliya. Mumveke wi ooleveleleni, nave mweererye opaka murecele ni yoowo. (Mwaalakhanye Mateu 5:23, 24.) Hiyaano ninnasiveliwa vaavaa akina ananilevelelaaya. Mwawiihiiha nnaphwanela weerano emohamoha wa yaawo. Kolosi 3:13 onnanleela: “Mukhale òvilela ni akhwinyu, nave mulevelelaneke wakhalavo nthowa ni mukhwinyu. Ntoko Apwiya olevelenlayani, ni nyuwotho mwaleveleleke akhwinyu.” Wakhala wi chiryene ninnaasivela annihu, hinni nikuhe mathowa vooloca sa echu yeeriwe khalai. (1 Korinto 13:5) Nave wakhala wi ninnaalevelela akina, Yehova onahaala onilevelela tho. Mwawiihiiha vaavaa akina anahesaaya, nnaphwanela waamorela ikharari hiiha ntoko Tiithi ahu, Yehova, oreiye aikharari ni hiyaano.—Mwaalakhanye Salumu 103:12-14.
[Yooleeliherya va epaaxina 24]
Nnaphwanela ororomela wi Yehova mahiku oothene onapaka yeeyo eri yaphaama ni yeekhaikhai
[Yooleeliherya va epaaxina 25]
Waahaala okhala okhamiruku omuhiya Yehova ni achu awe nthowa nawi muchu mmulokoni ooloca naari oheera echu ehiri yawookololowa
[Ekaaxa va epaaxina 26]
MASU ATHARIHIWE
Ninnakhala oororomeleya wa Yehova ni achu awe: Vaavaa akina anahesaaya, hannaphwanela ohiya othukumana naari onyanyala muloko. Moohiyana, ninnaroromela wi Yehova tonahoolela muloko nave wi mahiku oothene oneerano yeeyo eri yaphaama. Nave tho, nikhale oolakelela waalevelela akina, hiiha ntoko Yehova onanleveleleiye