Ntakhara Heeni Ninnaphwanela ‘Wilipelela’?

“Ntakhara himusuwenle nihiku eneraya erwe Apwiyanyu.”—MATEU 24:42.

MACIPO: 136, 129

NNII NIWERYE HAI OTITELELE OLIPELELA MOOHIPWACHA . . .

ovolowela wa Musaserya?

munepa wa elapo?

sooceecheya sahu?

1. Mphwanaphwanihe ntakhara heeni oryaaya wookhweleya olipelela elukuluku naari yeeyo eneereya moorukurerya mwahu. (Moone eruku yoopacerya.)

MUTHUKUMANO wa muceche waahaala opacerya. Muhooleli a nikupa aaya o tripuna nave aawaakhela phaama achu oothene. Ncipo nooruma naapacerya. Alipa oowiriyana yaasuwela wi eyo yaari elukuluku ya okiraathi. Awo yaaphwanela owiriyana ncipo naphaama, nave awo yaanaweherya miyaha saaya olociwa. Nyenya yaakhalavo akina yahaampwanche muhooleli naari yahaasuwela wi ncipo noopacerya oruma. Mwawiihiiha, awo hiyaasuwenle wi muthukumano waapacerya, nave nlelo yaamweeca moorukurerya naari ochekula ni asinthamwene aya. Mukhalelo ola onnooniherya yeeyo eneereya wakhala wi hanri oolipelela wa elukuluku naari wa yeeyo eneereya moorukurerya mwahu. Ela echu yookhweleya wa hiyo woona wi moohilekela enampacerya yaweereya etokotoko, nave nnaphwanela okhala awiirehererya ntakhara yeeyo. Yaweereya taani?

2. Ntakhara heeni Yesu aahaaleela oomuchara awe ariki “mwilipeleleke”?

² Yesu Kristu aahaalopola oomuchara awe vooloca sa ochuneya waya okhala oolipelela ni awiirehererya ntakhara ‘omala wa elapo.’ Owo aahaaleela: “Mukhale awilipelela ni awikosopa, ntakhara himusuwenle elukuluku ene.” Voocharela vaya, aaloca ni yaawo ikwaha sincipale: “Mwilipeleleke.” (Mateu 24:3; mwaalakhanye Marko 13:32-37.) Muchaka wa Mateu onnooniherya wi Yesu aahaalopola oomuchara awe vooloca sa yeela. Owo aaloca wa yaawo: “Vano mulipeleleke, ntakhara himusuwenle nihiku eneraya erwe Apwiyanyu.” Nave wanawiili aahaalopola: “Nyuwanotho mwirehererye, ntakhara elukuluku yeyo muhinupuwelanyu t’onereiye arwe Mwana a mutxhu.” Voocharela aahuulula: “Mwilipeleleke wona wi hamusuwenle nihiku nari elukuluku ene.”—Mateu 24:42-44; 25:13.

3. Ntakhara heeni ninnapwacha olopola wa Yesu?

³ Anamoona a Yehova annapwacha olopola Yesu ovanheiye. Noosuwela wi nnakhala mu “nihiku nomaliha” nave wi “ekoi etokotoko” enahaala opacerya moohilekela! (Daniyeli 12:4; Mateu 24:21) Hiiha ntoko Yesu aalohenryeiye, achu a Yehova annalaleerya michaka saphaama vooloca sa Omwene mu elapo yoothene. Mu elukuluku emohamoha, ninnoona ikhoco, ireca, mwaacikinye ni etala mmapuro mancipale. Wookhalavo ovuhana variyari va ikerexa ni wiiphana ni ohooxana ohintonko weereya. (Mateu 24:7, 11, 12, 14; Luka 21:11) Ninnaweherya elukuluku yeeyo Yesu onahaleiye orwa nave akhwaaniherye yookhwela ya Tiithi awe.—Marko 13:26, 27.

NIHIKU NINNAACAMELA!

4. (a) Ntakhara heeni ninnaphwanela ororomela wi Yesu oosuwela elukuluku Armaketo onahaleiye opacerya? (b) Naamwi nihisuwenle elukuluku ekoi etokotoko enahaalaaya opacerya, ntakhara heeni nnaroromelaahu?

⁴ Vaavaa nnayaahu o muthukumano wa muceche ninnasuwela elukuluku ya nikupa nri noothene nnahaalaaya opacerya. Nyenya ti yoovila wa hiyo osuwela phaameene ti liini ekoi etokotoko enahaalaaya opacerya. Ari veelaponi yavathi, Yesu aaloca: “Havo mutxhu onasuwela nihiku itxhu seiha inaphatxhuwaya.” (Mateu 24:36) Woona wi Yesu ti yoowo onahaala ohoolela ekhoco ya Armaketo, owo akhweya vano oosuwela ti liini ekhoco eyo enayaaya opacerya. (Wupulula 19:11-16) Nyenya hiyaano nlelo hansuwenle nihiku naari elukuluku ene makuchuwelo anahaala ophiya. Ti nthowa neni oryaaya woochuneya wa hiyo okhala awiilipelela. Yehova tolakelenle ti liini ekoi etokotoko enahaalaaya opacerya, nave nihiku nnamvira naacamelaka. “Elukuluku eyo enamphiya nave helekelà.” (Mwaalakhanye Habakukhi 2:1-3.) Ntakhara heeni nnaroromelaahu?

5. Mvahe yootakiherya enooniherya wi soolaiherya sa Yehova sinnaakhwanela mu elukuluku yoophwanelela.

⁵ Sooloherya sa Yehova sinnaakhwanela mu elukuluku yoophwanelela! Ntoko yootakiherya, muupuwele nihiku aawooponleiye achu awe o Yikuputu. Eyo yeeren’ye mu 14 a Nisani a eyaakha ya 1513 ehaakumve elukuluku ya Kristu. Ohoolo waya Mose aarepa vooloca sa nihiku nenle: “Txhiri nihiku yakhwanihaya miyakha ihe masana masese ni miyakha makhumi mararu atxhu a Apwiya yavinyawo w’Egipitu.” (Mukwaha 12:40-42) Mu 14 a Nisani a eyaakha ya 1943 ehaakumve elukuluku ya Kristu, iyaakha 430 ehakumve Aisarayeli woopoliwa, Yehova aalaiherya wi aahaala oreeliha nloko na Aparahamu. (Galasya 3:17, 18) Ohoolo waya, Yehova aaloca ni Aparahamu: “Wi nloko nawe nahawela wetxetxa elapo ya atxhu akina, nave nampakeliwa akapuro ni namuhosiwa ophiyerya miyakha masana masese.” (Maphatxuwelo 15:13; Saweriwa T’arummwa 7:6) Miyakha masana masese saapacenrye mu eyaakha ya 1913 ehaakumve elukuluku ya Kristu, vaavaa Isimayeli aapacenryeiye omuhoosa Isaki. Miyakha iho saamanle nihiku nenlo Yehova aawooponleiye Aisarayeli o Yikuputu. (Maphatxuwelo 21:8-10; Galasya 4:22-29) Chiryene, iyaakha masaneene oculi, Yehova aaloca nihiku eereiye awoopole achu awe!

6. Ntakhara heeni nnaroromelaahu wi Yehova onahaala owoopola achu awe?

⁶ Yosuwa aari mmoha a yaawo yoopoliwe o Yikuputu. Iyaakha sincipale ohoolo waya, owo aawuupuserya achu ariki: “Musuwele ni murimanyu wothene ni munepa anyu wothene, wi maroromeliho othene awerenleiyene Apwiya, Muluku anyu, hinavo nroromeloho nimoharu niheren’ye: Othene ahèreya.” (Yosuwa 23:2, 14) Yehova oolaiherya waavulusa achu awe mu ekoi etokotoko ni waavaha ekumi yoohimala mu elapo yahiihaano. Nave nnaphwanela ororomela wi yoolaiherya eyo enahaala waakhwanela. Wakhala wi ninnachuna okhala mu elapo yahiihaano, nnaphwanela okhala oolipelela.

MUTITELELE OLIPELELA WI MVULUWE

7, 8. (a) Tuuvi waari muteko wa mulipeleli mu ilukuluku sakhalai, nave tiheeni enanihusihaaya? (b) Mvahe yootakiherya wa yeeyo yeeren’ye vaavaa alipeleli yaakonaaya omutekoni.

⁷ Nnamuhuserya yaweereya ya alipeleli yaawo yaalipelela ipooma mu ilukuluku sakhalai. Ipooma sincipale ophitaanyerya Yerusalemu, sarukureryiwa ni isiri itokotoko wi amwiicani ehiwerye ovolowa mpuwa. Alipeleli yaakhala vasulu wa isiri seiyo nave yaanawerya woona elapo ni moorukurerya wa epooma. Akina yaakhala vamukhorani sa epooma. Alopwana yaala yaaphwanela otitelela olipelela ohiyu ni othana, nave wakhala wi aawoona amwiicani, yaaphwanela waalopola achu mu epooma. (Isaiya 62:6) Awo yaanasuwela okhweleya waya okhala oolipelela ni ovarerya yeeyo yahaala weereya. Wakhala wi henreno, achu ancipale yaahaala okhwa.—Ezekiyeli 33:6.

⁸ Yosefu, yoowo orempe vooloca sa mwaha wa Ayuta, oothariha mukhalelo Aroma yaawenryaaya ovolowa mu Yerusalemu mu eyaakha ya 70 elukuluku ya Kristu. Alipeleli yaalipelela makupa a epooma yaarupa. Ntoko yookhumelela, akhoco o Roma yaawerya ovolowa mu epooma. Awo yaavolonwe mu nipuro na malapelo, yeeyela, nave etolosa makupa makina a Yerusalemu. Ala yaari makupa ookuchula a ekoi etokotoko yeeyo nloko na Ayuta yahoolenlaaya.

9. Tiheeni achu ancipale olelo ahinasuwelaaya?

⁹ Alamuleli ancipale olelo anakhapelela minlaano saya ni anakhoco nave ni mukhalelo mukina wa okhapelela epharihelaka ikhankoonya sa hiihaano. Alamuleli ala annawerya woona naari omoona muchu aahaala woopopiha elapo aya. Nyenya hanasuwela wi wookhalavo olamulelo wakuruxa wirimu yoowo onalamuleliwa ni Kristu Yesu. Olamulelo yoowo moohilekela onahaala owana ekhoco ni alamuleli oothene a veelaponi yavathi. (Isaiya 9:5, 6; 56:10; Daniyeli 2:44) Ninnaweherya ophiya wa nihiku nenlo nave ninnachuna okhala ooreheryeya. Mwawiihiiha nnaphwanela owiriyana phaama yooloherya ya Piipiliya ni otitelela omurumeela Yehova moororomeleya.—Salumu 130:6.

MUHIPHERUWE

10, 11. (a) Echu taani nnaphwanelaahu okhalano ephoole, nave ntakhara heeni? (b) Tiheeni enoolekechaani wi Musaserya onnaavolowela achu ohinachuna osuwela yooloherya ya Piipiliya?

¹⁰ Mmwaanyiherye mulipeleli yoowo olipelenle ohiyu woothene. Ohalaka vakhaani osavo, onakhala yoovila okhala oolipelela nthowa nawi ootepa ovelavela. Mmukhalelo mmohamoha, hiyaano nnakhala mmahiku ookuchula a elapo yeela. Vaavaa nnaacamelaahu omakuchuwelo, onamukhala woovila wa hiyo okhala oolipelela. Enahaala okhala echu yoothananiha wakhala wi hintitelenle olipelela! Hankooni nthokororye ichu inahaala oneeriha ohilipelela.

¹¹ Musaserya onnaahuweliha achu. Owo “mutokwene a elapo ela.” Yesu ahaakumve okhwa, awuupuserya oomuchara awe eparipari yeela ikwaha chaaru. (Yohani 12:31; 14:30; 16:11) Musaserya onnapharihela ikerexa wi aahuwelihe achu. Ti nthowa neni ancipale olelo ahineemereryaaya sooloherya sa Piipiliya seiyo sinooniherya wi makuchuwelo a elapo yeela ahaacamela. (Sofoniya 1:14) Mwawooneya, Satana “otxiyela miruku saya.” (2 Korinto 4:3-6) Ntoko yookhumelela, vaavaa nneereryaahu waaleela achu wi makuchuwelo a elapo yeela ahaacamela nave wi Kristu onnalamulela, ancipale hanachuna owiriyana. Wiiliwiili awo annaloca, “nkinachuna.”

12. Ntakhara heeni hinnaphwanela omuhiya Musaserya wi anihuwelihe?

¹² Naamwi ancipale ehichunaka osuwela sooloherya sa Piipiliya, hannaphwanela weemererya wi moonelo aya oniceecheihe. Noosuwela ochuneya waya okhala oolipelela. Paulo aaloca wa annawe: “Othene nyuwo mòsuwela phamene wi nihiku na Apwiya” ninnaphiya. Owo aahaaceererya: “Nni nrwe ntoko mpava, ohiyu.” (Mwaalakhanye 1 Tesalónika 5:1-6.) Yesu oonilopola: “Khalani òwehererya, wona wi muhisuwelaka, Mwana a mutxhu t’onereiye aphiye.” (Luka 12:39, 40) Moohilekela Satana onahaala waahuweliha achu yuupuwelaka wi wookhalavo ‘witxhala’ veelaponi. Voocharela, nihiku na Yehova nnahaala ophiya mootutusa nave awo anahaala otolosiwa. Hanka vooloca wa hiyaano? Naachunaka okhala ooreheryeya vooloca sa nihiku nenlo ni ohihuwelihiwa ni echu vyakala, nnaphwanela okhala “awilipelela.” Ti nthowa neni nnaphwanelaahu waalakhanya Masu a Muluku mahiku oothene ni wuupuwelela yeeyo Yehova onanleeleiye.

13. Munepa wa elapo onaavolowela hai achu, nave nnii nsepe hai yawoopiha yeela?

¹³ Munepa wa elapo onnavolowela muupuwelo wa achu. Ancipale olelo anoona wi hanaphwanela omusuwela Muluku. (Mateu 5:3) Opwaha yeeyo, awo annapharihela elukuluku ni ikuru saya wi ephwanye ichu sincipale elapo enavahaaya. (1 Yohani 2:16) Nave tho, opwaha khalai, aakhalavo mathatelo oohiyanahiyana yaawo anaalekecha achu nave anaaceenyerya osiveliwa soopuha ni yoochuna vyakala anakhalaayano. (2 Timóteo 3:4) Ichu seiho sinnaaweiha achu wa yeeyo eri yookhweleyaxa, nave haanuupuwela vooloca sa waataana waya ni Muluku. Ti nthowa neni Paulo awuupusenreiye Akristu wi yaaphwanela ‘ovinya mwikhoveni’ moorweela wa ohipharihela ikumi saya ntakhara soochuna saya.—Aroma 13:11-14.

14. Olopola taani nnaphwanyaahu mu Luka 21:34, 35?

¹⁴ Hiyaano nnachuna wi munepa wa Muluku ovolowele muupuwelo ahu, ohiya munepa wa elapo. Moorweela wa munepa awe, Yehova onnanikhaviherya wiiwexexa phaama yeeyo enahaala weereya. (1 Korinto 2:12)^[1] (Moone masu a vathi ookuchula.) Nyenya nnaphwanela okhalano ephoole. Naamwi iri ichu ikhaani inanwerya oniweiha omurumeela Yehova. (Mwaalakhanye Luka 21:34, 35.) Akina akhweya anamunileela wi nri oolosowa weemererya wi nnakhala mmahiku ookuchula a elapo yeela. (2 Pedro 3:3-7) Nyenya hannaphwanela weemererya wi awo eniceecheihe. Nookhalano yawooniherya yookwakwaleya yawi makuchuwelo ari vakhiviru. Wakhala wi ninnachuna wi munepa wa Muluku onivolowele, nnaphwanela ophiyaka mmithukumano moohihiyererya vamoha ni annihu.

15. Tiheeni yeeren’ye ni Petro, Yakopo ni Yohani, nave eyo enii yeereye hai ni hiyo?

¹⁵ Sooceecheya sahu sinneeriha okhala woovila olipelela. Yesu aahiiwexexa wi achu toohiphaameya nave wi aakhalano sooceecheya. Muupuwele vooloca sa yeeyo yeeren’ye ohiyu ahaakumve okhwa. Naamwi Yesu aari oophaameya, aasuwela wi aariki atitelele okhala oororomeleya, aaphwanela ovekela wa Tiithi awe wi amukhaviherye. Yesu aahaaveka oomuchara awe Petro, Yakopo ni Yohani wi ekhale oolipelela vaavaa aavekeleiye. Nyenya oomuchara awe hiyaasuwela okhweleya waya okhala oolipelela. Awo yaari oovelavela nave yaarupa. Yesu tho aari oovelavela, nyenya aakhala oolipela nave aavekela wa Tiithi awe. Oomuchara yaaphwanela tho ovekelaka mu elukuluku yeeyo.—Marko 14:32-41.

16. Mwawiiwanana ni Luka 21:36, Yesu onihusinhe hai ‘wiwehererya’?

¹⁶ Tiheeni enii enikhaviherye ‘wiwehererya’ ni okhala ooreheryeya ntakhara nihiku na Yehova? Nnaphwanela okhalano nchuno ntokweene na opaka yeeyo eri yawookololowa. Nave henaakhwanela weerano yeeyoru. Mahiku vakhaani Yesu ahaakumve okhwa, aahaaleela oomuchara awe wi yaaphwanela otitelela oveka wi Yehova aakhaviherye. (Mwaalakhanye Luka 21:36.) Naariki nikhale oolipelela mmahiku yaala ookuchula, nnaphwanela ovekela moohihiyererya wa Yehova.—1 Pedro 4:7.

MWILIPELELEKE

17. Nnii nroromele hai wi nri oorehererya wa yeeyo enahaala weereya omwaahiyu?

¹⁷ Yesu oolonce wi makuchuwelo anahaala orwa “elukuluku yeyo mohinupuwelanyu.” (Mateu 24:44) Mwawiihiiha nnaphwanela okhala ooreheryeya ilukuluku soothene. Ela tahi elukuluku ya weererya okhalano mukhalelo wa okumi yoowo elapo ya Satana enalocaaya wi onnaruuha ohakalala. Muupuwelo owo ori ntoko oloha. Opwaha yeeyo, moorweela wa Piipiliya, Yehova ni Yesu annanleela mukhalelo oni onikhaviherye okhala oolipelela. Hankooni nipwache sooloherya sa Piipiliya ni mukhalelo inakhwaanelaaya. Nave tho nnaphwanela omwaacamela Yehova ni okuha Omwene vanipuro noopacerya mu ikumi sahu. Neerano hiiha nnahaala okhala ooreheryeya vaavaa makuchuwelo eneeraaya ephiye. (Wupulula 22:20) Nnamvuluwa wakhala wi noheerano hiiha!

[Masu a vathi]

[Yooleeliherya va epaaxina 11]

Yehova tolakelenle ti liini ekoi etokotoko enahaalaaya opacerya

[Yooleeliherya va epaaxina 14]

Hiyaano nnachuna wi munepa wa Muluku ovolowele muupuwelo ahu, ohiya munepa wa elapo

[Ekaaxa va epaaxina 15]

MASU ATHARIHIWE

Otitelela olipelela: Opwacha sooloherya sa Piipiliya, xaxaxa seiye sinanikhaviherya osuwela yeeyo enahaala weereya mmahiku ookuchula. Noosuwela wi makuchuwelo ahaacamela nave naariki nivuluwe, nnaphwanela omwaacamela Yehova ni otitelela omurumeela.

Munepa wa elapo: Owerya onavolowela muupuwelo wa achu ni meecelo analikana ni a Satana ni masololo awe. Owerya yoowo onnaweeriha achu okhala a nrima ni weerano ichu moovuhana ni yeeyo Muluku onachuneiye wi yeere