Nyuwo Amiravo, Mulipihe Nroromelo Nanyu
“Nroromelo ti . . . malipelelelo a itchu hiho sihinoneya.”—AHEBRI 11:1, NLAKANO NAHIHANO.
MACIPO: 41, 69
MWAAHAALA WAAKHULA HAI?
Ikaruma taani sa otholathola muneeraanyu mpharihele wi mulipihe nroromelo nanyu mwa Yehova?
Ntakhara heeni ti yaphaama omwaalakhanya Piipiliya anteero?
Tiheeni enahaala wookhaviheryaani vaavaa munalocaanyu ni akina sa Muluku ni soopatusiwa sawe?
1, 2. Tiheeni amiravo ancipale anamurumeela Yehova ikwaha ikina anachunaaya osuwela, nave ekano taani Piipiliya onavaheiye?
NTHAMWENE oosikola aaloca wa murokora mmoha o Krapretanya ariki: “Weyaano onakhala woona wi wookhalano mavyakelo weemererya wi Muluku ookhala.” Munna o Alemanya oorepa: “Ahusiha aka anoona miyaha sa Mpiipiliyani sa opatusiwa ntoko ithale. Nave awo yaachuna wi anasikola yeemereryeke mu othatuwa.” Murokora mmoha o Fransa ooloca: “Ahusiha oosikola waka annatepa ootikhiniheya voosuwela wi aakhalavo anasikola nlelo anamweemererya Piipiliya.”
2 Olelo achu ancipale haneemererya wi Muluku tonipatunse. Wakhala wi wa mmiravo onamurumeela Yehova naari onahuserya sa yoowo, ikwaha ikina onamuchuna osuwela mukhalelo onahaalaawe wooniherya wi owo ti Mpatusa ahu. Piipiliya onnanikhaviherya wuupuwela mwawiiseela vooloca sa yeeyo nniiwaahu naari nnaalakhanyaahu ni wuupuwelela. Masu a Muluku annaloca: “Osuwela onamoholaka.” Mwawiihai? Osuwela onahaala wookhaviherya okhooca muupuwelo watheru ni olipiha nroromelo naa mwa Yehova.—Mwaalakhanye Masiposipo 2:10-12.
3. Tiheeni nnahaalaahu othokororya mmwaha yoola?
3 Wi nikhaleno nroromelo noolipa mwa Yehova, nnaphwanela omusuwela phaama. (1 Timóteo 2:4) Mwawiihiiha vaavaa munamwaalakhanyaanyu Piipiliya ni soolaleeryiwa sahu, ti wookhweleyaxa omaala ni wuupuwelela yeeyo enalociwa. Mweererye wiiwexexa yeeyo munaalakhanyaanyu. (Mateu 13:23) Mwahuserya mmukhalelo yoola, munahaala ophwanya sawooniherya wi Yehova ti Mpatusa ahu nave wi Piipiliya onarweela wa yoowo. (Ahebri 11:1) Hankooni nthokororye mukhalelo wa weerano yeela.
MUNI MULIPIHE HAI NROROMELO NANYU?
4. Olikanela taani orivovo weemererya mu othatuwa ni weemererya mu opatusiwa? Vano tiheeni nnaphwanelaahu weera?
4 Akhweya muchu onamuloca wa nyuwaano: “Miyaano kineemererya mu othatuwa nthowa nawi masiyentista analoca wi eyo eparipari. Munii mmweemererye hai Muluku ahikhanlevo muchu otonko omoona?” Achu ancipale anuupuwela mmukhalelo yoola. Eparipari wi, haavo a hiyo otonko omoona Muluku naari onne echu epatusiwaka. (Yohani 1:18) Nyenya hanka vooloca sa achu aneemererya sa othatuwa? Awo tho aneemererya mwa echu ahintonkwaaya woona. Haavo siyentista naari muchu mukina onne okumi vyakala othatuwaka okhala mukina. Ntoko yootakiherya haavovo otonko woona enowa naari niphocokore nthatuwaka okhala mwaco naari echepo. (Yobi 38:1, 4) Mwawiihiiha oothene ahu nnaphwanela woona iparipari sene, wuupuwelela mwawiiseela, ni osuwela tiheeni ichu iho inooniheryaaya. Achu ancipale ahoona ichu mweelaponi “sisuwanyeiye” seiyo sinooniherya wi Muluku ookhala. Awo ‘annona phama’ wi owo Mpatusa, toowerya, nave wi owo ookhalano mikhalelo sootikhiniha.—Aroma 1:20, NN.
5. Ikaruma taani sa otholathola sinahaala onikhaviherya ohuserya vooloca sa othatuwa?
5 Wakhala wi noovarerya mweelaponi ni wuupuwelela mwawiiseela, nnanwerya woona wi ichu soothene ipatusiwe mmukhalelo wootikhiniha. “Ni wemererya [naari nroromelo] ninnasuwela” wi ookhala Mpatusa, naamwi ahooneyaka. Ninnasuwela wi ookhalano omuchu waphaama ni miruku sawaaca. (Ahebri 11:3, 27) Nnanwerya ohuserya sincipale vooloca sa ichu opatunseiye moorweela wa waalakhanya yeeyo masiyentista yoonnaaya. Sooleeliherya ikina sa seiyo sinaphwanyeya mu ikaruma sootholathola ntoko exilema As Maravilhas da Criação Revelam a Glória de Deus, iproxura A Vida — Teve um Criador? ni A Origem da Vida — Cinco Perguntas Que Merecem Resposta, ni liivuru Existe um Criador Que Se Importa com Você? Mu erevista Despertai!, sookhalamo miyaha sa okoha ni waakhula sa alipa oohuserya ni akina yaawo alonce ntakhara heeni vano annamweemererya Muluku. Nave miyaha siniichaniwa Teve um projeto? sinnaphitaanyerya sawooniherya sa asinama ni ichu ikina sa mweelaponi ntoko sootakiherya saphaama mmukhalelo masiyentista aneereryaaya otakiherya mukhalelo ichu iha inalapaaya.
6. Ikaruma sa otholathola sinookhaviheryaani hai?
6 Munna o Estatu Unitu yoowo orino iyaakha 19 ooloca sa iproxura piili iromoliwe osulu ariki: “Iho sinnatepa okihakalaliha. Koohuserya iproxura seiye ikwaha sincipale.” Murokora mmoha o Fransa oorepa: “Miyaha sinaloca Teve um projeto? sinnakitikhiniha! Iho sinnooniherya wi alipa oohuserya ananwerya opaka echu etakiheryaka soopatusiwa, nyenya ohiya ntoko ikhalenlaaya.” Makholo a nahano a iyaakha 15 o Afrika Oohico aaloca: “Echu yoopacerya nahano ahu onaalakhanyeiye wiiliwiili mu Despertai! mwaha onaloca sa ‘Okoha ni waakhula’.” Soolaleeryiwa seiya sinanwerya wookhaviheryaani tho woona sawooniherya wi Mpatusa ookhala, nave munahaala owerya osuwela ni okhooca mahusiheryo atheru. Nroromelo nanyu nnahaala olipa nave nnahaala okhala ntoko nroka nninnuwa mutakhwani mwa echaya yawuuma ni yoosareya maakha.—Yeremiya 17:5-8.
NROROMELO NANYU MU PIIPILIYA
7. Ntakhara heeni Muluku onachuna wi mpharihele owerya wanyu wa wuupuwela?
7 Apwanne ti woonanara wiipakela nikoho ntoko nla: ‘Ntakhara heeni kineemereryaaka yeeyo Piipiliya onaloceiye?’ Tahi yoonanara. Yehova hanachuna wi mweemereryeke ichu nthowa nawi akina anneemererya. Yene onachuna wi mpharihele “miruku, osuwela” wi mukhaleno masuwelelo a Piipiliya ni ophwanya sawooniherya wi chiri onarweela wa yoowo. Mwasuwela sincipale sa yeeyo onaloceiye, nroromelo nanyu mu Piipiliya nnahaala olipa. (Eklesiyaste 2:26; mwaalakhanye 1 Timóteo 2:4.) Mukhalelo mmoha wa omusuwela Piipiliya ori ohuserya miyaha sooluluwanya seiyo munachunaanyu osuwela.
8, 9. (a) Miyaha taani akina anasiveliwaaya ohuserya? (b) Akina anaphura hai vaavaa anuupuwelelaaya yeeyo anaalakhanyaaya?
8 Akina annasiveliwa ohuserya sooloherya sa Mpiipiliyani. Naari wi awo anasiveliwa olikanyiha saweereya sa Mpiipiliya ni miyaha seiyo alipa oohuserya analocaaya. Ntoko yootakiherya, muthokororye Maphatxuwelo 3:15. Yehova aavanhe yooloherya yeela yookhweleya Atamu ni Hava emanle ommwareela ni mukhalelo awe wa olamulela. Ela ti yoopacerya wa sooloherya sincipale sa Mpiipiliyani, sinanikhaviherya wiiwexexa mukhalelo Omwene wa Muluku onahaalaaya wooniherya wi olamulelo wa Muluku ti waphaama ni mukhalelo onahaalaaya omaliha makacamiho oothene. Vanonto, munii muhuserye hai yooloherya ya Maphatxuwelo 3:15? Munaphwanela orepela soorepa sa Piipiliya seiyo sinathariha mukhalelo yooloherya ela yaahaalaaya waakhwanela. Voocharela mwaavyaavye osuwela ti liini soorepa iho irepiwaaya nave murehererye phaama. Moohilekela munahaala osuwela wi anamarepa a Piipiliya yaakhanle mu ilukuluku soohiyana nyenya muchu ti muchu orempe echu yeeyo yeerinhe wi yooloherya ekhale yookhweya wiiwexexa. Ela enahaala wookhaviheryaani osuwela wi awo yaahooleliwa ni munepa waweela.—2 Pedro 1:21.
9 Munna mmoha o Alemanya aahuupuwela vooloca sa mukhalelo liivuru ori oothene a Mpiipiliyani onathariheiye sa Omwene. Owo aaloca: “Eparipari, wi alopwana 40 tamurempe Piipiliya. Nave ancipale a yaawo yaakhanle mu ilukuluku soohiyana, nave hiyaasuwelanne.” Murokora mmoha o Australiya aanahuserya mwaha wa Mulipeleli nave aahuserya olikanela wa Paskha ni Maphatxuwelo 3:15 ni Mesiya.[1] (Moone masu avathi omakuchuwelo.) Owo aarepa: “Ohuserya mmukhalelo yoola waahula miitho aka woona wi Yehova tootikhiniha. Wuupuwela marehereryo yaala wa Aisarayeli ni waakhwaniheryeya waya mwa Yesu chiri yaakitikhiniha. Mweeparipari kaamaala nave kuupuwelela mwawiiseela yooloherya ya Paskha!” Ntakhara heeni murokora ola onneiye hiiha? Owo aanuupuwelela mwawiiseela yeeyo aalakhanyeiye nave aahiiwexexa phaama. Eyo yaanamukhaviherya olipiha nroromelo nawe ni omwaacamela Yehova.—Mateu 13:23.
10. Ororomeleya wa anamarepa a Piipiliya onalipiha hai nroromelo nahu mwa Piipiliya?
10 Muupuwele tho vooloca sa ororomeleya wa alopwana yaawo amurempe Piipiliya. Awo yaanaloca eparipari nave hiyoova weerano hiiha. Anamarepa a mahiku yaale pahiru yaarepa ichu saphaama sa nloko naari ahooli aya. Nyenya alipa miririmu a Yehova harempe pahiru ichu saphaama, nyenya tho ichu soonanara seiyo Aisarayeli ni mamwene aya yeeraaya. (2 Matharihelo 16:9, 10; 24:18-22) Ophiyerya oromola soohesa saya ni sa akapuro akina a Muluku. (2 Samuwele 12:1-14; Marko 14:50) Munna mmoha mmiravo o Krapretanya, aaloca: “Ororomeleya ntoko yoola ti woorameya. Ela ennaaceererya omuroromela wahu Piipiliya wi onarweela wa Yehova.”
11. Tiheeni enanlekecha wi Piipiliya onarweela wa Muluku?
11 Vaavaa achu aneemereryaaya wi Piipiliya ahooleleke okumi aya, awo annoona sookhumelela saphaama. Eyo ennaalekecha wi Piipiliya onarweela wa Muluku. (Mwaalakhanye Salumu 19:8-12.) Murokora mmoha o Xapau oorepa: “Vaavaa emusi aka yaapharihelaaya mahusiheryo a Piipiliya, naanatepa ohakalala. Naanakhalano murecele, waataana, ni osivela.” Piipiliya ohaakhaviherya ancipale osuwela wi ichu ikina awo yaaroromelaaya saari satheru. (Salumu 115:3-8) Piipiliya onnaahoolela achu omuroromela Yehova,yoowo ori Muluku a ikuru soothene, nave oolaiherya omwaahiyu waphaama. Mmukhalelo mukina, akina yaawo analoca wi Muluku hakhanle annapaka soophwaniherya ntoko muluku aya. Akina analoca wi achu ananwerya ororomeliha omwaahiyu waphaama, nyenya wakhala wi noovarerya yeeyo anapakaaya ovinyerya khalai, nnahaala woona wi awo hanawerya omaliha makacamiho ari mweelaponi.—Salumu 146:3, 4.
MUKHALELO WA OVAANELA NI AKINA
12, 13. Nnii niwerye hai oloca ni akina sa opatusiwa naari Piipiliya?
12 Vaavaa munalocaanyu sa opatusiwa naari sa Piipiliya ni akina, voopacerya musuwele yeeyo onaroromeleiye. Muupuwele wi akina yaawo aneemererya mu othatuwa anneemererya tho wi Muluku ookhala. Awo analoca wi owo opharihenle othatuwa wi apatuse ichu soothene ikhanle. Akina aneemererya wi othatuwa echu yeeparipari woona wi onahusihiwa osikola. Nave akina hanamweemererya Muluku nthowa nawi ari oonanariwa ni ekerexa. Mwawiihiiha, voopacerya mmukohe yeeyo oneemereryeiye nave ntakhara heeni. Voocharela mmuwiriyane phaama yeeyo onaloceiye. Mweerano hiiha, owo onahaala owiriyana yeeyo muneeraanyu muloce.—Tito 3:2.
13 Wakhala wi muchu ooloca wi moolosowa nthowa na weemererya wi ookhala Mpatuxa, mwaahaala omwaakhula hai? Moocicimiheya mumveke muchu owo wi aloce moonelo awe sa opacerya wa okumi. Muloce wi waakhanle wi ekumi erimuthatuwa, ichu iho sithatunwe saahaala owerya okhalano mikhalelo soolikana ni ichu soopacerya. Alocaka sa mwaha yoola, muhuserya mmoha aathariha wi waahaala okhala woochuneya wi ichu iho sithatunwe ikhaleno (1) nrapala wi nikhuneele mwiili, (2) owerya wa ophwanya ikuru inavaha okumi, (3) sooleeliherya vooloca sa makhalelo aya a vaate ni munnuwelo, ni (4) owerya orelana naari waaceererya sooleeliherya iho. Owo aahaaceererya: “Ti wootikhiniha munnuwelo aya ophiyerya tho ikumi ikhaani.”
14. Mukhalelo taani wookhweya munaphwanelaanyu opharihela vaavaa munatharihaanyu sa opatusiwa?
14 Vaavaa munatharihaanyu sa opatusiwa, munaphwanela opharihela mukhalelo wookhweya ovaanela yoowo Paulo aapharihenleiye. Owo oorepa: “Empa yòkhalano otenke, nave namateka a sothene ti Muluku.” (Ahebri 3:4) Mweeparipari empa yookhalano mwaneene nave etekiwe ni muchu. Chiri ichu ikhanle, seiyo siri soovilaxa othariha opwaha empa, sookhalano mwaneene nave sipakiwe ti Muluku. Munaphwanela tho opharihela soolaleeryiwa sahu. Murokora mmoha aaloca ni mwaamulopwana yoowo aheemererya wi Muluku ookhala. Owo aamvaha iproxura piili siromoliwe woopaceryani, nave voovira esumana emoha, owo aaloca: “Vano kinneemererya wi Muluku ookhala.” Mwaamulopwana owo aapacerya omuhuserya Piipiliya nave ohoolo waya akhala munnihu.
15, 16. Tiheeni nnaphwanelaahu weera nihaakumve omutharihela muchu wi Piipiliya onarweela wa Muluku? Nave tiheeni nnaphwanelaahu wuupuwelelaka?
15 Wakhala wi muchu onnakhwa minikwa vooloca sa Piipiliya, munii muwerye hai ovaanela ni muchu yoowo? Ntoko eromoliwaaya, voopacerya mmukohe yeeyo onaroromeleiye. Nave tho, musuwele yeeyo enamusivela ovaanela. (Masiposipo 18:13) Wakhala wi onasiveliwa ni siyensiya, mmoonihe sootakiherya sa Mpiipiliyani inooniherya wi saalociwaka miyaha sa siyensiya Piipiliya teeparipari. Wakhala wi onasiveliwa ni miyaha, muromole yaweereya enalociwa mu aliivuru a miyaha nave mmoonihe mukhalelo Piipiliya aalohenryeiye yaweereya yeeyo iyaakha sincipale muculi ehaakumve weereya. Achu akina anahaala woowiriyanaani wakhala wi moowooniha echu Mpiipiliyani yeeyo enahaala okhaviherya ekumi aya, ntoko ekano enaphwanyeya mu Mwaha wa Vamwaakoni.
16 Muupuwele, hinnachuna waakhulana ni achu. Nnachuna wi esiveliweke ovaanela ni hiyo ni ohuserya sa Piipiliya. Mwawiihiiha mpake makoho moocicimiheya, nave voocharela nwiriyane phaama. Vaavaa munamuleelaanyu muchu soororomela sanyu, muloce moosivela, xaxaxa wakhala wi muchu owo tawunnuwelavo opwaha nyuwaano. Wakhala wi munnaacicimiha akina, awo tho anahaala woocicimihaani. Nave anahaala okhala ootikhiniheya wi nyuwaano mookhalano muupuwelo waphaama vooloca sa yeeyo muneemereryaanyu naamwi nlelo muri mmiravo. Mwa yeeyo, wakhala wi muchu onachuna pahiru waakhulana naari oweeraani mulolo, muhimwaakhule.—Masiposipo 26:4.
MWAAVYE IPARIPARI SA PIIPILIYA NI OLIPIHA NROROMELO NANYU
17, 18. (a) Tiheeni eni yookhaviheryeeni olipiha nroromelo nanyu mu Piipiliya? (b) Nikoho taani nnahaala waakhuliwa mmwaha onacharela?
17 Nnanwerya osuwela mahusiheryo ookhweleyaxa a Piipiliya, nyenya ninnachuna sincipale wi nikhaleno nroromelo noolipa. Nnaphwanela waavya ni osuwela iparipari soovitheya, hiiha ntoko onavyiwaaya muhakhu woovitheya. (Masiposipo 2:3-6) Mukhalelo mmoha wa olipiha nroromelo nanyu ori omwaalakhanya Piipiliya anteero. Mweererye omwaalakhanya mu eyaakha emoha. Ti yeeyo yaamukhavihenrye mulipa aweeceeca mmoha omwaacamela Yehova vaavaa aareiye mmiravo. Owo aaloca: “Echu emoha yaakikhavihenrye othamalela wi Piipiliya Masu a Muluku waari omwaalakhanya Piipiliya anteero. Miyaha sa Piipiliya kaahusenryaaka kiri mmiravo saakikhaviherya.” Nyuwaano tho, mpharihele ikaruma sa otholathola muryaanyuno mu elocelo anyu wi sookhaviheryeeni wiiwexexa yeeyo munaalakhanyaanyu. Akhweya mookhalano Watchtower Library em DVD, Watchtower ONLINE LIBRARY, Índice das Publicações da Torre de Vigia, naari Guia de Pesquisa para Testemunhas de Jeová.
18 Asitiithi nyuwo, opwaha echu vyakala, munaphwanela waahusiha anamwane anyu sa Yehova. Vanonto munii mwaakhaviherye hai okhalano nroromelo noolipa mwa Yehova? Mwaha onacharela onahaala oloca makhalelo a weerano.
[Masu a vathi]
^ [1] (eparakrafo 9) Mulipeleli 15 a Tesempuru a 2013 (a ekunya).
[Yooleeliherya va epaaxina 24]
Moocicimiheya mwaakohe achu yeeyo aneemereryaaya nave voocharela mwaawiriyane phaama yeeyo analocaaya
[Ekaaxa va epaaxina 25]
MASU ATHARIHIWE
Mpharihele osuwela wi mukhaleno nsuweliho na Piipiliya: Mmwaalakhanye Piipiliya anteero mukhatiinyu. Muupuweleleke yeeyo munaalakhanyaanyu wi moone waakhanle wi mohiiwexexa. Musuwele mukhalelo yoorepa munaalakhanyaanyu enalikanelaaya ni soorepa ikina mmanlaanyu waalakhanya. Munaphwanela tho waalakhanya sooleeliherya mu soolaleeryiwa sahu vooloca sa yoorepa eyo naari mwaha wa Piipiliya. Voocharela mmaale nave muupuwelele mukhalelo yooleeliherya eyo enoolekechaayaani wi Yehova Mpatusa ahu nave wi Piipiliya onarweela wa yoowo