Nyuwo Asitiithi, Mwaakhaviherye Anamwane Anyu Oteka Nroromelo
“Amiravo ni asimwali . . . Othene nyu mwatxitximihe Apwiya [Yehova].”—SALUMU 148:12, 13.
MACIPO: 88, 115
MWAAHAALA WAAKHULA HAI?
Ntakhara heeni oryaaya wookhweleya waasuwela phaama anamwane anyu?
Munii mpharihele hai masipelo wi mwaahusihe anamwane anyu?
Ntakhara heeni ti woochuneya opisa murima, olipiha nroromelo nanyu mwa Yehova, ni omveka wi oohooleleni?
1, 2. (a) Ntakhara heeni tahi yookhweya asitiithi waahusiha anamwane okhalano nroromelo wa Yehova, nave tuuvi ori mukhalelo mmoha asitiithi eneeraaya epharihele? (b) Miyaha taani misese nnahaalaahu othokororya mmwaha yoola?
MUTHELI mmoha o Fransa ooloca: “Ninnamweemererya Yehova, nyenya eyo henataphulela wi anamwane ahu anahaala omweemererya. Nroromelo tahi echu enaraviwa. Anamwane anakhalano vakhaani vakhaani.” Munna o Australiya oorepa: “Waakhaviherya anamwane anyu oteka nroromelo mmurimani mwaya nikacamiho ntokweene nyuwaano muneeraanyu mukhaleno.” Owo aahaaceererya: “Onamukhala woovila waakhula nikoho na mwaninyu ntoko aachuneleiyevo. Nave voocharela owo onahaala opaka nikoho nimohamoha! Naakhulo nenlo nimukhavihenrye mwaninyu olelo, hinikhala noophwanelela omeelo.” Vaavaa anamwane aninnuwaaya, asitiithi ancipale annoona wi ti woochuneya othariha wiiliwiili miyaha mimohamoha mmukhalelo wookhweya. Nave tho annoona wi ti woochuneya opharihela mikhalelo soohiyana wi yaahusihe anamwane aya omusivela Yehova.
2 Wakhala wi mwa tiithi, akhweya munnuupuwela waakhanle wi munanwerya waahusiha anamwane anyu omusivela Yehova ni otitelela omurumeela vaavaa aninnuwaaya. Elukuluku yeela, haavovo muchu oni awerye weerano eyo meekheiye. (Yeremiya 10:23) Ti nthowa neni nnachunaahu omuroromela Yehova wi anikhaviherye. Owo onnaavaha asitiithi ohoolela wawaaca. Munii mwaakhaviherye hai anamwane anyu? (1) Mwaasuwele awo phaama. (2) Mwaahusihe ichu vooloca sa Yehova seiyo iri mmurimani mwanyu. (3) Mpharihele masipelo. (4) Mveke munepa waweela nave mukhale oopisa murima ni anamwane anyu.
MWAASUWELE PHAAMA ANAMWANE ANYU
3. Asitiithi eni echarihe hai mukhalelo Yesu aahusinheiye amuhuserya awe?
3 Yesu wiiliwiili aanaakoha amuhuserya awe soororomela saya. (Mateu 16:13-15) Munanwerya ochariha yootakiherya awe. Vaavaa munakhalaanyu ni anamwane anyu naari munapharaanyu muteko vamoha, mwaakohe yeeyo anuupuwelaaya nave mwaahiye wi yooleeleeni moonelo aya. Apwanne annakhwa minikwa? Munna mmoha o Australiya a iyaakha 15 aaloca: “Apapa wiiliwiili yaanaloca ni miyo sa nroromelo naka nave yaanakikhaviherya wuupuwelela. Yaanakoha: ‘Tiheeni Piipiliya onaloceiye?’ ‘Apwanne weyaano onneemererya yeeyo onaloceiye?’ ‘Ntakhara heeni oneemereryaawe?’ Awo yaachuna wi kaakhule ni masu aka ohiya pahiru wuuluulela masu aya naari a amama. Woona wi kaaninnuwa, kaaphwanela waaceererya maakhulo aka.”
4. Ntakhara heeni ti wookhweleya opisa murima ni waakhula makoho a anamwane anyu? Mvahe yootakiherya.
4 Wakhala wi anamwane anyu haneemererya mwawaakuveya mahusiheryo a Mpiipiliyani, mukhale oopisa murima. Mwaakhaviherye ophwanya maakhulo a makoho aya. Tiithi mmoha aaloca: “Mucicimiherye makoho a anamwane anyu. Muhuupuwele wi makoho aya haanono esisapo, nave muhisepe mwaha nthowa nawi onnawuukhulaani.” Chiryene, ti yaphaama anamwane anyu woopakelaani makoho, woona wi anachuna wiiwexexa. Ophiyerya tho Yesu aanapaka makoho vaavaa aareiye mmiravo. (Mwaalakhanye Luka 2:46.) Mmiravo mmoha o Tinamarka aaloca: “Vaavaa kaalocaaka wi kinachuna osuwela waakhanle wi ekerexa ahu ti yeeparipari, asitiithi aka yaapisa murima—naamwi yaakhala awuukhuwa ni miyo. Awo yaahaakhula makoho aka oothene, empharihelaka Piipiliya.”
5. Naamwi okhalaka wi anamwane aakhalano nroromelo wa Yehova, tiheeni asitiithi anaphwanelaaya weera?
5 Mwaasuwele phaama anamwane anyu. Muhuupuwele wi aakhalano nroromelo mwa Yehova pahiru nthowa nawi annaya mmuteko woolaleerya ni mmithukumano. Mano, anoona hai vooloca sa Yehova, nave anoona hai vooloca sa Piipiliya? Mwiilipiserye wi musuwele waakhanle wi yookhalavo echu enaakacamiha okhala oororomeleya wa Yehova. Muloceke sa Yehova mahiku oothene vaavaa munalapaanyu ni aniinyu. Mwaavekelele anamwane anyu, mwakhala ni yaawo naari murivo mukhatiinyu.
MWAAHUSIHE ICHU VOOLOCA SA YEHOVA SEIYO SIRI MMURIMANI MWANYU
6. Vaavaa asitiithi anatitelelaaya ohuserya sa Yehova ni Piipiliya, eyo enaakhaviherya hai waahusiha anamwane aya?
6 Achu yaanasiveliwa onwiriyana Yesu nthowa nawi aanamusivela Yehova nave aasuwela phaama Soorempwa. Awo yaanoona wi Yesu aanaasivela tho. Mwawiihiiha awo yaananwiriyana phaama. (Luka 24:32; Yohani 7:46) Moolikana, wakhala wi anamwane anyu annoona wi munnamusivela Yehova, eyo enamwaakhaviherya tho omusivela. (Mwaalakhanye Malamulo 6:5-8; Luka 6:45.) Mwawiihiiha mutitelele omuhuserya Piipiliya mwawiiseela, ni waalakhanya soolaleeryiwa sahu moohihiyererya. Musuwele sincipale vooloca sa ichu Yehova opatunseiye. (Mateu 6:26, 28) Mwasuwela sincipale sa Yehova, munahaala owerya waahusiha anamwane anyu vooloca sa yoowo.—Luka 6:40.
7, 8. Vaavaa munahuseryaanyu echu vooloca sa Yehova, tiheeni munaphwanelaanyu weera? Asitiithi akina aneerano hai yeela?
7 Vaavaa munahuseryaanyu echu vooloca sa Yehova, mwaaleele anamwane anyu sa yeeyo muhusenryaanyu. Mweerekeno yeeyo elukuluku yoothene munakhalaanyu ni yaawo, ohiya pahiru vaavaa munarehereryaanyu mithukumano naari variyari va malapelo eechoko. Ti yeeyo mutheli o Estatu Unitu eenreiye. Awo yaanaloca sa Yehova ni anamwane aya vaavaa yoonaaya echu yooreera mweelaponi naari yaapuhaaya yoolya vamoha. Awo aaloca: “Naanawuupuserya anamwane ahu osivela weeparipari wa Yehova mu onivaha ichu soothene nnachunaahu.” Mutheli mmoha o Afrika Oohico onnasiveliwa oloca sa soopatusiwa vaavaa anamureheryaaya kapinka ni anahano aya eeli. Ntoko yootakiherya, awo annaloca sa mukhalelo wootikhiniha wa enuku okhala mwiri. Asitiithi yaaloca: “Neererya waakhaviherya anahano ahu ocicimiha okumi ni mapakeliwo aya ootikhiniha.”
8 Tiithi mmoha o Australiya aamukusa mwanawe a iyaakha khumi oya o nipuro anakuhiwawo makarakasa a asinama. Tiithi aapharihela elukuluku yeele wi amukhaviherye mwanawe olipiha nroromelo nawe ni okhalano sawooniherya wi Yehova ti Mpatusa. Owo aaloca: “Nohoona makarakasa a axinama awiichaniwa amonites ni trilobites. Ela ennanikhaviherya osuwela wi axinama awo yaari ooreera, ootikhiniha ni awaakhwanela, ntoko asinama a mahiku yaala. Mano, waakhanle wi ichu irino okumi sithatunwe orweela wa ichu ikhaani, ntakhara heeni asinama akhalai yaaryaaya awaakhwanela ntoko a mutano? Chiri ela yaari echu yaakitikhiniha vancipale nave kaamuhusiha mwanaka.”
MPHARIHELE MASIPELO
9. Ntakhara heeni ti waphaama opharihela masipelo? Nsipelo taani mai mmoha opharihenleiye?
9 Yesu wiiliwiili aanapharihela masipelo. Owo aanahusiha mahusiheryo ookhweleya moorweela wa oloca miyaha naari sootakiherya. (Mateu 13:34, 35) Vaavaa munapharihelaanyu masipelo, mweerihe wi anamwane anyu epharihele waanyiherya. Eyo enahaala waakhaviherya wuupuwela vooloca sa mahusiheryo munahusihaanyu, wi yiiwexexe phaama ni wuupuwelela seiyo. Awotho anahaala osiveliwa ohuserya. Ntoko yootakiherya, mai mmoha o Xapau aanachuna waahusiha maponkwe awe eeli wi mukhalelo Yehova opankeiye elapo yawooniherya wi onnanikhapelela. Ponkwe mmoha aarino iyaakha thanu nararu mukina aarino iyaakha khumi. Mwawiihiiha aapharihela nsipelo nenlo yaahaalaaya wiiwexexa mwawiiwanana ni iyaakha saya. Mmoha ti mmoha aamvahererya mukaka, esuukari ni chaaya. Voocharela aamveka mmoha ti mmoha ompaka chaaya ntakhara amannya. Owo onnathariha: “Awo yaampaka mweephoole. Vaavaa kaakonhaaka ntakhara heeni yampankaaya mweephoole, yaaloca wi yaachuna wi empake chaaya mmukhalelo aahaaleiye okisivela. Kaahaatharihela wi Muluku opanke elapo mmukhalelo mmohamoha—pahiru wi anikhapelele.” Maponkwe yaasiveliwa ohuserya hiiha, nave awo hantonko ocuwala!
10, 11. (a) Nsipelo taani munaphwanelaanyu opharihela wi nwooniherye anamwane anyu wi ookhalavo Mpatusa? (Moone eruku yoopacerya.) (b) Nsipelo taani mpharihenlaanyu?
10 Hanka nyuwaano, nsipelo taani mwaahaalaanyu opharihela wi nwooniherye anamwane anyu wi ookhalavo Mpatusa? Akhweya mwaahaala opaka epoolu ni mwaninyu mpharihelaka yoochariha. Mmutharihele okhweleya waya opharihela yoochariha. Voocharela mumvahe masa naari yawiima ekina, mwamala mmukohe: “Waasuwela wi masa ala aakhalano yoochariha?” Voocharela mukawanye masa veeri, nave mumvahe enuku. Mmutharihele wi enuku eyo enalikana ni yoochariha. Onnaphwanyeyamo sooleeliherya mukhalelo wa opaka masa. Nyenya sooleeliherya iho ti soovila othariha opwaha sooleeliherya sa opaka epoolu. Muloce: “Ookhala muchu orempe yoochariha ya opaka epoolu. Vanonto taani orempe yoochariha ya masa?” Wakhala wi mwaana tawunnuwelavo, munaphwanela omutharihela wi sooleeliherya sa opaka mwiri wa masa yoowo oniimiha amasa ancipale sinaphwanyeya mu DNA (ácido desoxirribonucleico) mpuwa mwa enuku. Munaphwanela tho omooniha iruku sinaphwanyeya mu eproxura A Origem da Vida — Cinco Perguntas Que Merecem Resposta ipaaxina 10 ophiyerya 20.
11 Asitiithi ancipale annaalakhanya ni anamwane aya miyaha sa Despertai! sinaloca Teve um Projeto? Wakhala wi anamwane aya akhaani, asitiithi ananwerya othariha sooleeliherya mmukhalelo wookhweya. Ntoko yootakiherya, mutheli mmoha o Tinamarka aalikanyiha maceeke ni ipalame. Awo yaaloca: “Maceeke analikana ni ipalame. Nyenya apwanne maceeke annapuramela mooce wi ekhumemo maceeke makhaani? Apwanne apalame annachuna nipuro nooreheryiwa wi ekayevo? Nave hanka vooloca sa oruma wa nceeke ni wiipa wa epalame? Vano taani orino mavyakelo—muchu opanke maceeke naari Mpatusa a ipalame?” Vaavaa munavaanelaanyu ni anamwane anyu ni waapakela makoho, munnaakhaviherya opharihela osuwela ni “miruku” ni olipiha nroromelo naya wa Yehova.—Masiposipo 2:10-12.
12. Munii mpharihele hai masipelo wi mmuhusihe mwaninyu wi soothene Piipiliya onaloceiye ti seeparipari?
12 Munnaphwanela opharihela masipelo wi mmuhusihe mwaninyu wi soothene Piipiliya onaloceiye ti seeparipari. Ntoko yootakiherya, muthokororye Yobi 26:7. (Mwaalakhanye.) Muhaaleele pahiru wi sooleeliherya siri mu eciciri yeela sinarweela wa Yehova. Moohiyana, mwaakhaviherye opharihela waanyiherya waya. Muloce wi mmahiku a Yobi haavo eemererya wi elapo eri vasiiyoni vene. Awo yuupuwela wi eri vasulu va echu vyakala ntoko mphirya naari nluku. Mu elukuluku yeele haavo aarino sawooniherya wi elapo eri vasiiyoni vene, woona wi hiyaarivo ekhankoonya wi evareryiweno. Nihusiheryo ti nla, naamwi Piipiliya arepiwe khalai, owo teeparipari nthowa nawi onarweela wa Yehova.—Nehemiya 9:6.
MWAAHUSIHE OKHWELEYA WAYA OHOOLELIWA NI PIIPILIYA
13, 14. Asitiithi eni yaahusihe hai anamwane aya wiiwelela yeeyo Piipiliya onaloceiye?
13 Ti wookhweleya waahusiha anamwane anyu wi anahaala okhala oohakalala wakhala wi anniiwelela yeeyo Piipiliya onaloceiye. (Mwaalakhanye Salumu 1:1-3.) Ntoko yootakiherya, munaphwanela waaveka anamwane anyu wi yaanyiherye wi anaya okhalaka o evilivili. Awo annachuna waathanla achu wi yakhalekeno weiwo. Mwamala mwaakohe, “Achu a mukhalelo taani mwaahaalaanyu waakusa wakhala wi munnachuna wi mwaphiya mwiiwananeke phaama?” Wookuchulani, mmwaalakhanye Galasya 5:19-23 wi ewoone achu a mukhalelo taani Yehova onaachuneiye mu elapo evyaani.
14 Mmukhalelo yoola, munahaala waahusiha anamwane anyu mahusiheryo meeli ookhweleya. Noopacerya, Yehova onnanihusiha mukhalelo wa okhalano ekumi yoohakalala hiihaano ni murecele ni achu akina. Nanaawiili, onnanihusiha mukhalelo wa okhala mu elapo evyaani. (Isaiya 54:13; Yohani 17:3) Munaphwanela tho owooniherya anamwane anyu mukhalelo Piipiliya onaakhaviheryeiye annihu. Ntoko yootakiherya, mwaavye yaweereya ya okumi mu soolaleeryiwa sahu, akhweya mu miyaha sa Mulipeleli sinaloca “A Bíblia muda a vida das pessoas.” Naari wi mmukohe muchu a muloko anyu wi ooleeleeni vamoha ni anamwane anyu mukhalelo Piipiliya aamukhavihenryeiye opaka matorokelo matokotoko wi amuhakalalihe Yehova.—Ahebri 4:12.
15. Tiheeni eni yookhaviheryeeni waahusiha anamwane anyu?
15 Mpharihele waanyiherya wanyu wi mwaahusihe anamwane anyu mahusiheryo anahaala waahakalaliha ni waaphara murima. Muupuwelele mikhalelo soohiyana wi mwaakhaviherye osiveliwa ohuserya sa Yehova ni omwaacamela yoowo. Nave mutitelele weerano hiiha vaavaa awo aninnuwaaya. Tiithi mmoha aaloca: “Muhivelavele weererya mikhalelo mivyaani sa oloca miyaha sa khalai.”
MVEKE MUNEPA WA YEHOVA NAVE MUKHALE OOPISA MURIMA NI ANIINYU
16. Vaavaa munaahusihaanyu anamwane, ntakhara heeni ti wookhweleya okhala oopisa murima? Asitiithi akina anooniherya hai opisa murima?
16 Nnikhaviheryo na munepa waweela wa Yehova, anamwane anyu ananwerya okhalano nroromelo noolipa. (Galasya 5:22, 23) Nyenya enahaala oviravo elukuluku wi nroromelo naya nikhale noolipa. Mwawiihiiha, mukhale oopisa murima ni aniinyu, nave mutitelele waahusiha. Tiithi mmoha o Xapau yoowo orino ponkwe ni nahano, ooloca: “Mwaaraka ni miyaano naanamaliha elukuluku yincipale vamoha ni anamwane ahu. Ovinyerya eri akhaani, kaanaahusiha mu aminutu 15 mahiku oothene, pahiru nkaahusiha mmahiku a mithukumano Seekristu. Aminutu khumi nathanu hiyaari awaaca wa hiyo naari wa anamwane.” Ooweherya ekulucu oorepa: “Kaaryaaka mmiravo, kaanakhalano makoho mancipale naari okhwa minikwa kahaaweryaaka oloca. Voovira wa elukuluku, mancipale a yaala yaamala mmithukumano naari variyari va malapelo eechoko naari mu yoohuseryaaka. Ti nthowa nene oryaaya wookhweleya asitiithi otitelela waahusiha.”
17. Ntakhara heeni ti wookhweleya asitiithi olipiha nroromelo naya? Ti mwawiihai mai ni tiithi o Permuta yaakhavihenryaaya anamwane aya aasithiyana okhalano nroromelo wa Yehova?
17 Mweeparipari, aniinyu anahaala ohuserya sincipale vaavaa anoonaaya wi nyuwaano mookhalano nroromelo noolipa wa Yehova. Awo anahaala woonaka yeeyo muneeraanyu. Mwawiihiiha mutitelele olipiha nroromelo nanyu. Mweerihe wi anamwane anyu yooneke mukhalelo Yehova oriye ookhweleya wa nyuwaano. Ntoko yootakiherya, mai ni tiithi o Permuta vaavaa yaakumanaaya ni makacamiho, awo yaanavekela ni anamwane aya aasithiyana nave yaanamveka Yehova wi aahoolele. Yahaaceenyerya tho anamwane aya opaka nivekelo naya. “Naamuleelatho mwanihu mwaamuthiyana awunnuwelavo, nriki: ‘Omuroromele Yehova moomalela, otitelele okhala ooweiwa mmuteko wa Omwene, nave ohitepe okacamiheya.’ Vaavaa ooneiye sookhumelela sene, owo aanasuwela wi Yehova aananikhaviherya. Ela yaamukhaviherya olipiha nroromelo nawe mwa Muluku ni Piipiliya.”
18. Tiheeni asitiithi ahinaphwanelaaya ocuwala?
18 Asitiithi nyuwo, muhicuwale wi hamunaphwanela waakhinyererya anamwane anyu okhalano nroromelo. Murici anyu ori waala ni ohela maahi, nyenya pahiru Yehova tonawerya winnuwiha. (1 Korinto 3:6) Mwawiihiiha mulape mwakuru wi mwaahusihe anamwane anyu vooloca sa yoowo, ni oveka munepa waweela wi waakhaviherye okhalano nroromelo. Munaphwanela ororomela wi Yehova onahaala oreeliha miteko sanyu soothene.—Éfeso 6:4.
[Yooleeliherya va epaaxina 27]
Muloceke sa Yehova mahiku oothene vaavaa munalapaanyu ni anamwane anyu
[Yooleeliherya va epaaxina 28]
Mwaaleele anamwane anyu yeeyo munahuseryaanyu vooloca sa Yehova