Ntakhara Heeni Anamoona a Yehova Hanachapela Mahiku a Oyariwa?

Anamoona a Yehova hanachapela mahiku a oyariwa nthowa nawi ninnaroromela wi ifesta iho sinnamunanara Muluku. Naamwi Piipiliya ahiwaatiihaka ochapela mahiku a oyariwa, owo onnanikhaviherya waalikhela saweereya sa mahiku yaawo ni wiiwexexa moonelo wa Muluku vooloca sa ifesta iho. Muthokororye mathowa masese ni malakiheryo a Mpiipiliya.

1. Ochapela mahiku a oyariwa orino mapacereryo atheru. Mwawiiwanana ni liivuru Funk & Wagnalls Standard Dictionary of Folklore, Mythology, and Legend, (Tisiyonaariyu a Folkolore, Mihapo ni Ithale a Wiina ni Wagnalls)ochapela wene wuuwu opacenrye orweela wa sookhovelela sawi mu nihiku na oyariwa muchu, “ovolowela ni minepa soonanara saanakhalano ekari ya waananariha yaale yaapakeliwa efesta ya nihiku na oyariwa” nave wi “ophiya wa asinthamwene ni masu a othamaleliwa waanaakhaviherya okhala phaama wa efesta.” Liivuru The Lore of Birthdays (Mihapo sa Mahiku a Oyariwa) aaloca wi khalai, orepela nihiku na oyariwa waari “wookhweleya wi esuwele echu eni eweereyele omwaahiyu” yaathipeleya mu “ichu sa malavi ni sooloha.” Liivuru yoola aahaaceererya wi “sookhovela sawunlaana ti sawi iveela sa nihiku na oyariwa sookhalano owerya wa wiisaaciherya wi sipake sookhwela saya.”

   Nyenya Piipiliya, onniica opharihela wiisaaciherya, ehako, onamulosiwe, naari “mikina si seiya.” (Malamulo 18:14; Galasya 5:​19-​21) Mweeparipari, nthowa nimoha namweerinhe Muluku wiica epooma yakhalai yo Papulo, yaari wi achu yaari awiisaaciherya, yoowo ori mukhalelo wa ehako. (Isaiya 47:11-​15) Anamoona a Yehova hanakhala awuukhuwa ni otholathola mapacereryo a muhapo ti muhapo; nto vaavaa Soorempwa inavahaaya sooleeliherya sookwakwaleya ntoko sa onamulosiwe, hiyaano ninnachariha.

2. Akristu Oopacerya Hiyaachapela Mahiku a Oyariwa. Liivuru The World Book Encyclopedia (Ensiklopetiya Liivuru a Mweelaponi)olonce wi “awo yoona ochapela nihiku na oyariwa na muchu okhala yookhovelela yatharu.” Piipiliya onnooniherya wi arummwa ni akina yaawo yaahusihiwe ti Yesu yaahivaha yootakiherya yeeyo oothene yaaphwanelaaya ochariha.​—2 Tesalónika 3:6.

3. Nihiku nimoha na ochapela Akrsitu anavekiwaaya otitelela wuupuwelela, tahi nihiku na oyariwa, nto na okhwa wa Yesu. (Luka 22:17-​20) Ela tahi yootikhiniha nthowa nawi Piipiliya onnaloca wi “nihiku nookhwa ti nooreera opwaha nihiku nooyariwa.” (Eklesiyaste 7:1) Omakuchuwelo wa okumi awe veelaponi yavathi, Yesu aahipaka nsina naphaama vamiithoni va Muluku, eerihaka okhala nookhweleya nihiku na okhwa opwaha nihiku na oyariwa wawe.​—Ahebri 1:4.

4. Piipiliya hatonko waaleela alapeli a Muluku ochapela nihiku na oyariwa. Tahi wi erimviihiwamo Mpiipiliyani, nthowa nawi owo onnaloca sa mahiku meeli a ooyariwa yaachapeliwe ni achu yahaamulapela Muluku. Nyenya, mu saweereya soopiili sinalociwa mmukhalelo woonanara.​—Mapacereryo 40:20-​22; Marko 6:​21-​29.

Apwanne anamwane a Anamoona a Yehova anniisoona okhala ooyeleela ochapela mahiku a oyariwa?

Moolikana ni alipa ooyara oothene, Anamoona a Yehova annooniherya waasivela waya anamwane aya variyari va iyaakha, ophitaanyerya waavaha samahala ni okhalano elukuluku ya othata ni opuha. Awo anneererya ochara yootakiherya yoophaameya ya Muluku, yoowo onaavaha ichu saphaama anamwane awe nihiku vyakala. (Mateu 7:​11) Anamwane a Anamoona a Yehova hanisoona okhala ooyeleela, ntoko sooloca iha inooniheryaaya:

• “Ti yaphaama waakhela yamahala mu elukuluku wahaaweheryaawe.”​—Tammy, a iyaakha 12.

• “Naamwi kihaakhelaka samahala mu nihiku na oyariwa waka, makholo aka nlelo annakithumela samahala mu ilukuluku ikina. Kinnasiveliwano nthowa nawi echu kahaaweheryaaka.”​—Gregory, a iyaakha 11.

• “Munuupuwela wi aminutu akhumi, epoolu ekhaani ni ncipo sinnapaka efesta? Waaphwanela orwa owaani ni woone efesta yeeparipari okhala waya!”​—Eric, a iyaakha 6.