Murici wa Okhala Muhuserya a Kristu

Yesu oovaha mahusiheryo asisapo vaavaa aalyeiye vaate va muhooleli a Afarisi. Vaavaa Yesu onatiteleleiye mukwaha awe ayaaka o Yerusalemu, muloko mutokweene onnamuchara. Ntakhara heeni? Apwanne anachuna okhala amuhuserya awe eeparipari, moohipwacha yeeyo enakhweleya wa yaawo?

Vamukwahani, Yesu onnaloca echu yeeyo ehinaasivela akina a yaawo: “Mutxhu onakhwela okitxhara miyo, ahahiyale atithinya, amannya, amwariye, anawe, asinnawe ni ekumi awe, hanawerya okhala muhuseryaka.” (Luka 14:26) Nyenya tiheeni owo onachuneiye oloca ni masu yaala?

Yesu hanaloca wi oothene yaale anakhala oomuchara awe anaphwanela owiica ahima aya. Moohiyana, owo onachuna oloca wi awo aphwanela omukhwela vancipale Yesu waapwaha ahimaaya, ohikhala ntoko mulopwana a niphwanaphwaniho nawe va yoolya yoowo aakhoonce nwopelo wookhweleya nthowa na othela. (Luka 14:20) Nikholo na Ayuta Yakopo aaloca wi ‘hàmukhwelasa’ Liya nave aamukhwela Rakele, yooniheryaka wi aamukhwelasa Rakele ompwaha murokora awe Liya.—Mapacereryo 29:31.

Moone wi Yesu olonce wi muhuserya awe aaphwanela wiica “ekumi awe.” Ela enataphulela wi muhuserya eeparipari onaphwanela omukhwela Yesu opwaha onasiveleiye ekumi awe, ophiyerya wiiveleela oyeleela ekumi awe wakhala woochuneya. Mweeparipari, okhala muhuserya a Kristu murici mutokweene. Tahi echu muchu onaamooneiye opaka, ahipacenre wuupuwelela.

Okhala muhuserya onavolowela ohooxeya ni wiikariwa, ntakhara wi Yesu ooloca: “Mutxhu onakitxhara miyo ahitxukhunle [mwiri] awe, hanawerya okhala muhuseryaka.” (Luka 14:27) Chiryene, muhuserya eeparipari a Yesu onaphwanela okhala ooreheryeya ohooxiwa hiiha ntoko Yesu aakumanneiyeno. Ophiyerya wi Yesu aahiloca wi yene aahaala okhwa mmatani mwa amwiicani awe.

Mwawiihiiha muloko yoowo onapaka mukwaha ni Yesu onnaphwanela waalikhela moopwacha yootaphulela ya okhala muhuserya a Kristu. Yesu onnaaceenyerya ni niphwanaphwaniho nla. Owo onnaloca: “Eparipari tani wa nyuwo akhwelaka oteka mutxontxo ahipatxerya okirathi wi asuwele ikhorowa onayeiye oyeha ni upuwele ariki awerye omalihano? Ehereye wi athipenle ahiwerye omaliha.” (Luka 14:28, 29) Mwawiihiiha, muchu ahaakumve okhala muhuserya a Yesu, yaale ari vamoha ni yoowo va mukwahani eyaaka o Yerusalemu anaphwanela okhalano yoolakelela ya waakhwaniherya phaama murici owo. Yesu onnacicimiherya muupuwelo owo nniphwanaphwaniho nikina:

“Mwene tani oni akhwelaka owana ekhotxo ni mwene mukina, ahipatxeryà waweha akhotxo awe matxikhwi khumi, yaweryaka owana ni ole mukina onarwa ni akhotxo matxikhwi makhumi meli? Vohiyana vaya, ahiweryaka owana ekhotxo ni mwene mukina, asuwelaka wi àri worakama, onamurumihela nan’wope wi anveke muretxele. Hihatho mmoha wa nyuwo oni ahihiye sothene oreiyeno, hanawerya okhala muhuseryaka.”—Luka 14:31-33.

Mweeparipari, tahi wi Yesu onaloca pahiru ni muloko yoola onamuchara mmuxeweni. Oothene yaawo anahuserya sa Kristu anaphwanela opaka ni murima woothene yeeyo onaloceiye hiihaano. Ela enataphulela wi awo anaphwanela ovaha echu eri yoothene aryaayano ichu haya ophiyerya tho naari ikumi saya wakhala wi annachuna okhala amuhuserya awe. Ela echu ya wuupuwelela ni ovekela ntakhara yeela.

Vano Yesu onnakumiherya vaate mwaha yoowo aahusinheiye va Mwaha awe wa Vamwaakoni vaavaa aalonceiye wi amuhuserya awe “makha a elapo.” (Mateu 5:13) Enooneya wi owo aataphulela wi naari maakha nalyiwa anakhala ookhapeleleya, arummwa awe onnaakhapelela ovoloweliwa ni achu, waakhapelela omunepani ni minkhela soocapaheya. Vano vaavaa orummwa awe onaphiyaaya omakuchuwelo onnaloca: “Màkha t’aphama. Nto awo yahinasiva, anakòkiheriwa hai osiva waya?” (Luka 14:34) Alipa oowiriyana awe annasuwela wi maakha makina yaaphwanyeya ohoolo waya yaari ooriipiheya ootakaanyiheryana ni ichu sa mulaponi nave achu hanaacela opharihela muteko.

Mwawiihai Yesu onnooniherya wi naamwi yaale ari arummwa wa elukuluku yincipale hanaphwanela ohiya yoolakelelaaya wi eceecheye. Waakhanle wi ela yoheereya, arummwa yaahaala okhala oohichuneyaxa ntoko maakha yaawo ayelenle osiva waya. Elapo yaahaala owiica. Opwaha yeeyo awo yaahaala oyeleela mahala a Muluku ophiyerya tho wi yaahaala onyemuliha nsina nawe. Yesu aceenyeryaka ochuneya waya osepa yookhumelela yeela, onnaloca ariki: “Ori ni maru awiwano, iwe.”—Luka 14:35.