Ntakhara Heeni Amuhuserya a Yesu Haniinanela Yoolya

Yohani Mpatisi oowaleliwa mukalaposo ovinyerya elukuluku Yesu omulyileiye Paskha a 30 E.K. Yohani onchuna wi amuhuserya awe ekhale amuhuserya a Yesu, nyenya tahi wi oothene anneerano yeeyo mu miyeeri soocharela Yohani amanle owaleliwa.

Vano, vaavaa onaacameleiye Paskha a 31 E.K., amuhuserya akina a Yohani annarwa wa Yesu nave annamukoha: “Nthowa na seni hiyo ni Afarisi nninanelahu yolya, eniha amuhuserya à ehinanelaka?” (Mateu 9:14) Afarisi aniinanela yolya ntoko muhapo wa malapelo. Ohoolo waya, Yesu onnapharihela niphwanaphwaniho nenlo Nfarisi mmoha oniseera awookololowa onavekeleiye: “Muluku kinnothamala, ntakhara nkiri ntoko achu akina . . . vasumanani kinninanela solya itila pili.” (Luka 18:11, 12) Moolikana, amuhuserya a Yohani anniinanela yoolya ntoko yookhovelela. Naari akhweya awo aniinanela yoolya nthowa na owaleliwa wa Yohani. Achu anniikoha ntakhara heeni amuhuserya a Yesu haniinanela yoolya, akhweya wi yooniherye othanana wa yeeyo eereliwe Yohani.

Yesu onnaakhula apharihelaka yootakiherya: “Onnawereyavo wi alipa òwompwela othela ekhale awunla, mulipa òthela ene aniha ari ni yawo? Nto anamurwa mahiku mulipa òthela onereiye avinyihiwevo, nave elukuluku yeyo anamwinanela yolya.”—Mateu 9:15.

Yohani aahimuloca Yesu ntoko mulipa oothela. (Yohani 3:28, 29) Mwawiiwanana ni yeeyo, vaavaa Yesu oreiye ni yaawo, amuhuserya awe hanaphwanela wiinanela yoolya. Ohoolo waya, vaavaa Yesu oneereiye akhwe, amuhuseryaawe anahaala othanana nave hekhalano nchuno na olya. Onahaalatho okhalavo matorokelo vaavaa oneereiye aviihiwe mookhwani! Voocharela awo heeni yiinaneleke yoolya nthowa na othanana.

Voocharela, Yesu onnaloca maphwanaphwaniho ala meeli: “Havo onasonela ekuwo esyani vekuwoni yakhalai, ntakhara ekuwo esyani ela enamutxutxha ekuwo yakhalai, nave wahuwa waya oni okhale otokotoko. Nari henaheliwa evinyu esyani mmikoroni sakhalai; hoye-hoye mikoro inamphuleya, nave evinyu enamuyeheya ni mikoro inammala muteko. Evinyu esyani enaheliwa mmikoro misyani.” (Mateu 9:16, 17) Tiheeni Yesu onachuneiye oloca?

Yesu onaakhaviherya amuhuserya a Yohani osuwela wi ahikhale ani aweherye wi amuhuserya a Yesu echariheke meerelo akhalai a Ayuta, hiiha ntoko muhapo wa wiinanela yoolya. Owo haarwenle omaliha naari okhapelela meerelo a malapelo amanle muteko, mukhalelo yoowo wa malapelo ohanle vakhaani omala. Malapelo Yesu onaceenyereiye tahi malapelo yaawo aniiwanana ni Ayuta arino sookhovelela sa achu. Hooye, owo haneererya osona ekuwo esyaani veekuwoni yakhalai naari ohela eviinyu esyaani mmukoroni wakhalai.