Oyariwa wa Yesu—Woowi Nave Liini?

Sesar Akustu mulamuleli o Roma, onnalamulela wi muchu ti muchu onaphwanela orepeliwa. Mwawiihiiha Yosefe ni Mariya anaphwanela opaka mukwaha wi eye epooma Yosefe oyariweiyewo, epooma yo Petelehemu, ohico wo Yerusalemu.

Achu ancipale eri o Petelehemu wi erepeliwe. Nipuro Yosefe ni Mariya anaphwanyaaya wi ekhalemo munikholani, mwemmo onakhapeleliwamo apuuru ni asinama akina. Yesu onayariwa mwemmo. Mariya onnamuhuruwela ni ikuwo nave onnamwaatelela mmwaaceyani, nipuro nenlo onakuhiwamo yoolya ya asinama.

Muluku aahoona wi Sesar Akustu aahipaka nlamulo na orepeliwa. Ntakhara heeni? Nthowa nawi eyo yaaheeriha wi Yesu ayariwe o Petelehemu, epooma ya nikholo nawe Mwene Tavite. Soorempwa saahiloherya wi yaahaala okhala epooma yeeyo aahaala oyariwawo Mulamuleli aaroromelihiwe.—Mikeya 5:1.

Chiryene ola ohiyu wookhweleyasa! Okuwani, ekamaama ennooneya variyari va nikhuuru na akukhula. Ola ovuwa wa Yehova! Munkeelo mmoha onnaloca wa akukhula: “Muhòve, kinoruhelani mutxhaka mutokotoko wohakalala, ni oni wahakalalihe atxhu othene: mòyareliwa olelo, opoma wa Davide, Nvulusa, ori Kristu Pwiya. Eneneryo awe ti yela: munamumphwanya mwana mukhani, akhuneliwe ni ekuwo ni ataleliwe mmwatxeyani onalyamo imope.” Moohilekela, ankeelo ancipale annarwa nave annaloca: “Ovuwa wa Muluku osulu, muretxele vathi wa atxhu onakhweleiye.”—Luka 2:10-14.

Vaavaa ankeelo anakhumaayavo, akukhula annaloca wa yaawo yaawo: “Hankoni, n’ye o Betlehemu wi none etxhu ephatxun’wewo, Apwiya Muluku ansuwelin’haya.” (Luka 2:15) Awo annapwaha mwawaakuveya nave annaphwanya nikwiya hiiha ntoko ankeelo yaaloncaaya. Vaavaa akukhula analocaaya yeeyo ankeelo yaaleenlaaya, oothene anawiriyana vooloca sa yeeyo annatikhiniheya. Mariya onnathamalela sooloca soothene nave onnuupuwelela mmurimani mwawe.

Achu ancipale olelo aneemererya wi Yesu oyariwe mu 25 a Tesempuru. Nyenya mmakupa o Petelehemu, Tesempuru elukuluku yeepula ni yooriirya. Mu ekwaha ekina mucharapo onnooneya. Mu elukuluku yeeyo ya eyaakha, akukhula hekaawenrye okhala vanlakani vene ohiyu ni asinama aya. Navetho, hiyaahaala okhala yoophwanelela mulamuleli o Roma waalamulela achu yaawo yaammwarenle wi epake mukwaha mu elukuluku ya epula wi yarepeliwe. Mwawooneya, Yesu oyariwe mu Otupuru.