Ireferensia Inaphwanyeya va Yoochariha ya Muthukumano Okumi ni Muteko Ahu Weekristu
1-7 A APIRILI
MUHAKHU WA MASU A MULUKU | 1 KORINTO 7-9
“Ociye—Yamahala”
(1 Korinto 7:32) Kaakhwela wi muhiipiwe murima. Muchu ohithenle oniipiwa murima ni ichu sa Apwiya, wi aahakalalihe Apwiya.
w11 15/1 ipaax. 17-18. epara. 3
Mpharihele Phaama Ociye Anyu
Mweeparipari, muchu ori muciye onnakhalano elukuluku yincipale nave ori ootaphuwa weera echu onachuneiye ompwaha yoole othenle naari otheliwe. (1 Kor 7:32-35) Iha miphurelo soohithariheya sinahaala omweeriha muciye wunnuwiha muteko awe wa olaleerya, waacererya osivela wawe wa mwaacamani ni opaka onthamwene woolipa ni Yehova. Mwawiihiiha, Akristu ancipale annasuwela mphurelo wa okhala muciye nave annalakelela okhala aciye, nyenya moovira wa elukuluku annuupuwela omwaasya oothelana aya. Wa akina, akhweya okhala aciye hiyaari yoolakelela aya woopaceryani, nnya, vaavaa mikhalelo saya saatoroken’yaaya, yaavekela vooloca sa yeeyo ni wuupuwelela mwawiiseela nave yoona wi, nnikhaviheryo na Yehova, yanwerya otoroka moonelo aya. Mwawiihiiha, yaaheemererya mikhalelo mivyaani nave elakelela okhala aciye.—1 Kor 7:37, 38.
(1 Korinto 7:33, 34) Nto muchu othenle oniipiwa murima ni ichu seelapo yeela ya vathi wi amuhakalalihe mwaariye, 34 nave onniikawanya. Muthiyana a muciye nari mwali, onniipiwa murima ni ichu sa Apwiya wi akhale aweela mmwiilini ni mwa Munepa. Nto ootheliwa, onniipiwa murima ichu seelapo yeela wi amuhakalalihe iyawe.
w08 15/7 epaax. 27 epara. 1
Miyaha sa Vasulu Sinarweela mu Ekaarata wa Akorinto
7:33, 34—Inaahiwa eheeni saalociwaka sa “ichu seelapo” hiiho mulopwana othenle naari muthiyana otheliwe anuukhuwaayano? Paulo aaloca sa ichu sinavolowela okumi, seiyo Akristu ari atheli anaphwanelaaya othokororya. Iho sinaphitaanyerya yoolya, ikuwo vamoha ni nipuro nookhalavo, nyenya tahi wi inalociwa ichu soonanara sa elapo yeela, Akristu anasepaaya.—1 Yoh 2:15-17.
(1 Korinto 7:37, 38) Nto, murima awe watikitheren’ye ahikhanlevo onampharela, aneera aweryaka, eereno ntoko otintaiye mmurimani mwawe, ahimuthelihe. Onneerano phaama. 38 Vaavaa, yoole onamutheliha mwali yoole onnerano phaama, nave yoole ohinamutheliha onnerano phaamasha.
w96 15/10 ipaax. 12-13 epara. 14
Ociye Onnavaha Ekari ya Omurumeela Yehova Ehirivo Yawuukhula
Mukristu yoowo ori muciye, nave anapharihela ociye awe wi aavye ichu sawawe mukhateiye haneerano “phaama” ompwaha Mukristu ootheliwa naari othenle. Owo onnatitelela okhala muciye ohiya “wa nthowa na Omwene,” nyenya nthowa na ichu sawawe mukhateiye. (Mat 19:12) Mulopwana naari muthiyana ori muciye aaphwanela wi ‘aniipiwa murima ni ichu sa Apwiya,’ wiipiwa murima “wi aahakalalihe Apwiya” ni “moophwanelela ohiya ni mirima miili.” Ela enataphulela ocicimiherya omurumeela Yehova ni Yesu ohirivo okawanyeya. Pahiru hiiha, yaale ari aciye tanahaalaaya owerya weerano “phaamasha” waapwaha ale ari ootheliwa naari athenle.
Mphwanye Muhakhu Woomunepani
(1 Korinto 7:11) Nto oomwi amwalanano, ahitheliweru; hooye, uuluule waataana ni aiyawe. Mulopwana tho ahimwalane ni amwaariye.
Sooleeliherya
Nyenya ilukuluku ikina anna naari arokora akina annalakelela omwalamwala naamwi ehiri mathowa a oraruwa. (1 Kor 7:11) Moone ichu sahaala omweeriha muchu omwalamwala ni oothelana awe:
• Ohivakulela echoko: Eyo eneereya wakhala wi mulopwana onnakhooca mmikhalelo soothene ovakulela echoko, ophiyerya wi echoko ehinakhalano yoolya naari ikhorowa.—1 Tim 5:8.
• Ohooxana: Wakhala wi mmoha a oothelana onnahooxiwa, akhweya moorweela wa omaniwa nave anoona wi ekumi awe eri va yawoopiha.—Gal 5:19-21.
• Wakhala wi mulopwana naari muthiyana haneemererya wi muchu mukina amurumeele Yehova. Nave eyo ehelaka va yawoopiha onthamwene wa muchu ni Yehova.—Saw 5:29.
(1 Korinto 7:36) Muchu oona wi mwanawe mwaamuthiyana, omwali awe onnavira anoona wi onnaphwanela otheliwa, eereno ntoko onakhweleleiye. Hanachekela, athelihiwe.
w00 15/7 epaax. 31 epara. 2
Nyuwaano Munanwerya Otitelela Okhalano Meecelo Aphaama mu Elapo Yoocapaheya
Mwawiihiiha, amiravo hanaphwanela othela naari otheliwa ehinnunwe elukuluku yeeyo soochuna sa opaka sa mwiikho inakhalaaya itokweene. Othela nlakano ntokweene, nave onachuneya okhala a miruku wi muchu akhale mwawiiwanana ni murici yoola. (Map 2:24) Ti yaphaama oweherya ophiyerya ‘omwali ovinre’ ela tiwi—elukuluku yeeyo soochuna inakhalaaya itokweene ophiyerya ovolowela meerelo a muchu. (1 Kor 7:36) Nave waahaala okhala olosowa otokweene wakhala wi Mukristu awunnuwelavo yoowo onachuna othela, oovolowela ocapaheya pahiru nthowa nawi hamoonne muchu oothelanano.
8-14 A APIRILI
MUHAKHU WA MASU A MULUKU | 1 KORINTO 10-13
“Yehova Toororomeleya”
(1 Korinto 10:13) Saweeha inoorweelaani ti sa achu oothene; nto Muluku toororomeleya nave haneemererya wi mweehiwe opwaha owerya wanyu. Muneehiwaanyu onarwa oothoonyeryaani woovuluwelavo wi muweryeke ovilela.
Makoho a Alipa Waalakhanya
Murummwa Paulo oorepa wi Yehova “hohiyani wi mwereryiwe opwaha ikuru sanyu.” (1 Kor 10:13) Apwanne ela enataphulela wi Yehova onnasuwela woosiilo ene elukuluku yeeyo nneeraahu nivilele nave voocharela athanla yaweeha enahaala onikhumelela?
▪ Waakhanle wi ela eparipari, nkuupuwelani mukhalelo eyo yaahaalaaya ovolowela okumi ahu. Ntoko yootakiherya, mwaana a munna mmoha aahiiheya. Atiithi awe yaathanana vancipale. Awo yaanikoha waakhanle wi Yehova aahoona yeeyo yaahaala weereya omwaahiyu nave aasuwela wi owo ni mwaariye yahaala owerya ovilela epahu yeela. Mu elapo yeela, ancipale a hiyo nnahaala okumanano makacamiho. Apwanne nnaphwanela ororomela wi Yehova onnavareryela ichu soothene sineereya muukumini mwahu?
Vaavaa nnathokororyaahu yoorepa ya 1 Korinto 10:13, nnahaala woona wi Piipiliya hanakhaviherya muupuwelo wawi Yehova onnasuwela elukuluku nnahaalaahu owerya ovilela nave alakelela yaweeha nnahaalaahu okumanano. Ntakhara heeni ninnaloca yeela? Hankooni nthokororye mathowa masese.
Noopacerya, Yehova ohaavaha achu othanla woochuna, otaphuwa opaka soothanla. Owo onachuna wi nipakeke soothanla sahu. (Malam 30:19, 20; Yos 24:15) Wakhala wi nnathanla opaka soolakelela sinamuhakalaliha Yehova, nnaphwanela omuroromela wi anihoolele. (Masi 16:9) Nyenya napaka soolakelela soonanara, nnahaala okhalano sookhumelela sene. (Gal 6:7) Vanonto, waakhanle wi Yehova onnathanla yaweeha nneeraahu nikumaneno, apwanne nahaala chiryene okhalano othanla woochuna?
Nanawiili, Yehova hanaciyelela “otakhaliwa” woothene yoowo ‘ohinamuthanla mutxhu.’ (Ekle 9:11) Muchu onamukumanano epahu nthowa nawi ori mu elukuluku ni mpuro woohiphwanelela. Yesu aahiloca sa epahu yeeyo yaawiiphale achu 18 vaavaa ixiri saakumuwenlaaya. Owo aahooniherya mookwakwaleya wi tahi Muluku aawiiphale. (Luka 13:1-5) Tahi woophwanelela wuupuwela wi ehaakumve weereya epahu, Muluku onnamusuwela taani onahaala okhala naari okhwa.
Naneeraru, muchu ti muchu a hiyo ookhalano ekari ya okhala oororomeleya wa Yehova. Satana olonce wi akapuro a Yehova anamurumeela Muluku wa nthowa na yeeyo onaavaheiye. Satana aahiloca wi hinni ntitelele ororomeleya wa Yehova wakhala wi nookumanano yaweeha. (Yobi 1:9-11; 2:4; Wup 12:10) Waakhanle wi Yehova onnanikhapelela mu saweeha sammoori, akhweya waahaala okhala wi Satana aalonce eparipari.
Naneexexe, Yehova hanateteiwa osuwela woosiilo ene ichu soothene sinahaala oniphacuwela omwaahiyu. Eparipari ti yawi, Yehova onnasuwela yeeyo enahaala weereya omwaahiyu wakhala wi oolakelela osuwela. (Isa 46:10) Nyenya Piipiliya onnaloca wi owo onnaathanlela osuwela ichu seiho inahaala weereya omwaahiyu. (Map 18:20, 21; 22:12) Yehova toosivela ni awookololowa, mwawiihiiha owo hanavolowela otaphuwa wahu opaka soothanla.—Malam 32:4; 2Kor 3:17.
Tiheeni Paulo aachuneiye oloca vaavaa aalonceiye wi “hohiyani wi mwereryiwe opwaha ikuru sanyu”? Va, Paulo aachuna oloca yeeyo Yehova oneereiye variyari va weehiwa, ohiya yaweeha ehaakumve ophiya. Wakhala wi ninnamuroromela Yehova, owo onahaala onikhaviherya mu saweeha vyakala mookumini mwahu. (Sal 55:23) Vano nnahaala othokororya mathowa meeli yaamweerinhe Paulo oloca yeela.
Nthowa noopacerya ti nawi, saweeha nnakumanaahuno “hipwahile mphimo womutxhu.” Woona wi nnakhala mu elapo yeela ya Satana, nnahaala okumanano makacamiho. Nyenya wakhala wi ninnamuroromela Yehova, nnanwerya ovilela saweeha seiyo ni otitelela okhala oororomeleya. (1 Ped 5:8, 9) Iciciri soopacerya sa 1 Korinto ecima 10, Paulo oorepa vooloca sa saweeha Aisarayeli yaaryaayano mutakhwani. (1 Kor 10:6-11) Yaale yaamuroromenle Yehova yaawerya ovilela saweeha seiye. Nyenya a Isarayeli akina hiyaamwiiwelenle Yehova. Awo hiyaatitelenle ororomeleya wa Yehova nthowa nawi hiyaamuroromenle yoowo.
Nthowa nanaawiili ti nawi “Muluku ti òroromeleya.” Ela enataphulela eheeni? Wakhala wi noovarerya mukhalelo Yehova onaakhapeleleiye akapuro awe ovinyerya khalai, chiri ninnoona wi owo onnaakhaviherya yaale anamukhwela nave “anatxhariha malamulo” awe. (Malam 7:9) Noohuserya wi Yehova mahiku oothene onnakhwaaniherya malakano awe. (Yos 23:14) Nnaphwanela ororomela wi (1) Yehova heemererya wi yaweeha vyakala ekhale yoowalamelasa wa hiyo, nave (2) owo onahaala ‘onivaha ikuru.’
Ti mwawiihai Yehova ‘onavaheiye ikuru’ yaale anamuroromela? Eparipari wi owo ookhalano owerya wa oviihavo yaweeha. Nyenya, muupuwele wi Paulo olonce wi Yehova “onamovahanitho ikuru wi n’werye ovilela.” Mwawiihiiha, Yehova onnanivaha ikuru wi niwerye otitelela okhala oororomeleya. Hankooni nthokororye mikhalelo mikina owo oneereiyeno yeela:
▪ Yehova “onnanihakalaliha mwa masoso ahu othene.” (2 Kor 1:3, 4) Owo onnamaaliha muupuwelo ahu ni murima ahu moorweela wa Piipiliya, munepa awe waweela ni mulapeli ororomeleya.—Mat 24:45; Yoh 14:16; Aro 15:4.
▪ Yehova onampharihela munepa awe waweela wi anihoolele. (Yoh 14:26) Munepa waweela onannikhaviherya wuupuwelela saweereya sa Mpiipiliya ni malakiheryo wi nipake soolakelela mwa miruku.
▪ Yehova onahaala waapharihela ankeelo awe wi enikhaviherye.—Ahe 1:13b
▪ Yehova onahaala waapharihela anna ni arokora wi enikhaviherye. Awo ananwerya onilipiha mwa yeeyo analocaaya ni anapakaaya.—Kol 4:11.
Tiheeni nihusenryaahu orweela wa masu a Paulo anaphwanyeya mu 1 Korinto 10:13? Yehova hanathanla yaweeha nneeraahu nikumaneno. Nyenya nnaphwanela osuwela wi wakhala wi noomuroromela Yehova, nnanwerya ovilela yaweeha vyakala. Noosuwela wi Yehova wiiliwiili onahaala onivaha ikuru wi niwerye okhala oororomeleya wa yoowo.
(1 Korinto 10:13) Saweeha inoorweelaani ti sa achu oothene; nto Muluku toororomeleya nave haneemererya wi mweehiwe opwaha owerya wanyu. Muneehiwaanyu onarwa oothoonyeryaani woovuluwelavo wi muweryeke ovilela.
(1 Korinto 10:13) Saweeha inoorweelaani ti sa achu oothene; nto Muluku toororomeleya nave haneemererya wi mweehiwe opwaha owerya wanyu. Muneehiwaanyu onarwa oothoonyeryaani woovuluwelavo wi muweryeke ovilela.
Mphwanye Muhakhu Woomunepani
(1 Korinto 10:8) Nihiraruweke ntoko akina yeenraaya, emora ookhwa ene nihiku nimoha nenlo, amiile makhumi meeli ni amiile araru (23.000).
w04 1/4 epaax. 29
Makoho a Alipa Waalakhanya
Ntakhara heeni yoorepa ya 1 Korinto 10:8 enalocaaya wi Aisarayeli awaakhwana 23.000 yaakhwa nihiku nimoha nthowa na ocapaheya, eniiha yoorepa ya Namarepela 25:9 elocaka wi yaakhwile achu awaakhwana 24.000?
Sookhalavo ichu sincipale seiho seerinhe wi okhalevo ohiyana wa numero mu Soorepa seiha piili. Echu nnaphwanelaahu osuwela tiyawi numero neeparipari nri variyari va 23.000 ophiyerya 24.000 yeeyo yeerihe wi onakhala wooweryeya okookiherya oculi naari oyano ohoolo.
Moone mathowa makina. Murummwa Paulo ooloca yaweereya ya Aisarayeli eri o Sitim ntoko yoolopola wa Akristu o Korinto akhalai, epooma yeeyo yaasuweliwe ni meerelo aya a ocapaheya. Owo aarepa: “Nihiraruweke ntoko akina yeenraaya, emora ookhwa ene nihiku nimoha nenlo, amiile makhumi meeli ni amiile araru (23.000).” Aalocaka xaxaxa yaale yiiphiwe ni Yehova nthowa na opaka mararuwo, Paulo aaloca wi yaari 23.000.—1 Korinto 10:8.
Ecima 25 ya Namarepela, ennaloca wi “Aisarayeli yaahiiveleela omulapa muluku Paala a oPeyore, nave Apwiya yaananariwano.” Mwawiihiiha, Yehova aamuleela Mose wi awiiphe “asitokweene a achu yaala.” Nthowa na yeeyo, Mose aahaalamulela alipa oothoriha wi yeereno yeeyo. Wookuchulani, vaavaa Finiyasi eenreiyeno mwawaakuveya wi amwiiphe muisarayeli yoowo amuruuhale mmuxakalani mwawe muthiyana o Mitiyana, “epahu yaamala.” Yaweereya ela enakuchula elocaka wi “yaakhwa achu amiile makhumi meeli nasheshe.”—Nam 25:1-9.
Numero nnalociwa mu Namarepela, nnaphitaanyerya “asitokweene,” yaawo yiiphiwe ni alipa oothoriha vamoha ni yaawo yiiphiwe ni mwaneene Yehova. Asitokweene yaawo yiiphiwe ni alipa oothoriha woonaru yaanaphiyerya miili mmoha, yeerihaka wi ophitaanyerya yaale yiiphiwe ni Yehova enaakhwana 24. 000. Waakhanle wi atokweene ala yaapaka mararuwo naari opaka makupa mu ifesta naari akhweya waakhaviherya yaale yaapanke mararuwo, awo yaakhalano mathowa nthowa nawi “yaahiiveleela omulapa muluku Paala a oPeyore.”
Vooloca sa masu awi “yaahiiveleela,” liivuru mmoha ooloca wi masu ala ananwerya otaphulela “opaka onthamwene ni muchu.” Aisarayeli naari nloko niiveleenle wa Yehova, nyenya vaavaa ‘yiiveleenlaaya wa muluku Paala a oPeyore,’ yaananariha nlakano naya na wiiveleela wa Muluku. Ivinrevo iyaakha 700 ohoolo waya, moorweela wa mulipa a miririmu Oseya, Yehova aaloca sa Aisarayeli ariki: “Yaaphiyalaaya oPaala-Peyore, yaahiiveleela weerano sawuuliha muru, emulapaka Paala, ekhala oothanyeya ntoko muluku yoole atheru yaamukhwelaaya.” (Ose 9:10) Oothene yaawo yenreno yeela yaanaphwanela waakhela othoriha wa Muluku. Ti nthowa nene Mose aawuupuxenryeiye anamwane a Isarayeli: “Muhoona ni miitho anyu yeeyo Apwiya yeenraaya oPaala-Peyore. Apwiya Muluku anyu yaahaatolosha aIsarayeli akhwiinyu oothene yaawo yaamuchara muluku Paala a oPeyore.”—Malam 4:3.
(1 Korinto 11:5, 6) Muthiyana oothene onavekela naari olaleerya mwa miririmu ahihuruwenle muru onnanyemula muru awe, onakhala wi ocemme mphati. 6 Hiiha, muthiyana aahichuna ohuruwela muru awe, acemeru mphati. Nto waahimuulihaka muru okwaserya nari ocema, ahuruweleru.
(1 Korinto 11:10) Hiiha muthiyana onnaphwanela olamulelaka muru awe wa nthowa na ankeelo.
Makoho a Alipa Waalakhanya
Apwanne mulaleeryi amwaamuthiyana onnaphwanela owariha muru wakhala wi oneeciha yoohuserya ya Piipiliya ari ni mulaleeryi amwaamulopwana?
▪ Mmwaha “Makoho a Alipa Waalakhanya” mu Mulipeleli 15 a Yulyu a 2002, yaalociwa wi murokora onaphwanela owariha muru wakhala wi oneeciha yoohuserya ya Piipiliya ari ni mulaleeryi amwaamulopwana, moohipwacha aari oopatisiwa naari hooye. Omanle othokororyiwa mwaha yoola yohooneya wi ti woophwanelela opaka matorokelo.
Wakhala wi mulaleeryi amwaamulopwana yoowo onamuhoola murokora va yoohuserya ya Piipiliya oopatisiwa, murokora owo chiryene onaphwanela owariha muru. Mwawiihiiha owo onnooniherya ncicimiho wa marehereryo a Yehova a ohoolela mmuloko Weekristu ntakhara wi oneerano murici yoowo onamphwanela munna. (1 Kor 11:5, 6, 10) Moohiyana, owo onaphwanela omveka munna wi eecihe yoohuserya wakhala wi onnawerya weerano.
Mmakupa makina, wakhala wi murokora yoowo orino yoohuserya ya Piipiliya yootikitheryeya onahooliwa ni mulaleeryi amwaamulopwana oohipatisiwa yoowo ohiri iyawe, haanono murici wa mu Soorempwa wa owariha muru. Naamwi hiiha yawuupuxerya-ya-murima ya akina akhweya enahaala oweeriha owariha muru naamwi mmukhalelo yoola.
22-28 A APIRILI
MUHAKHU WA MASU A MULUKU | 2 KORINTO 14-16
“Muluku Onahaala Okhala ‘Soothene wa Oothene’”
(1 Korinto 15:24, 25) Vaavaa anarwa ephiya makuchuwelo, yoowo aveleenle omwene wa Muluku, wa Atiithi, amalinhe olamula woothene, owerya woothene ni ikuru soothene. 25 Onnaphwanela wi Kristu alamuleke ophiyerya aakunhe amwiicani awe oothene vathi va manaani awe.
w98 1/7 epaax. 21 epara. 10
“Mwiicani Ookuchulela Onii Amalihiwe ti Okhwa”
“Makuchuwelo,” anaahiwa makuchuwelo a olamulelo wa Kristu wa iyaakha ikonto, vaavaa Yesu, awiiyeviha ni ooromeleya, oneereiye aveleele omwene wa Atiithi awe. (Wup 20:4) Yoochuna ya Muluku, yawi “atikitherye mwa Kristu” ichu soothene enahaala waakhwanela. (Éfe 1:9, 10) Yoopacerya, Kristu onahaala ‘omaliha olamula woothene, owerya woothene ni ikuru soothene’ ihiniiwanana ni Otokweene naari yoochuna ya Muluku. Ela ennavolowela sincipale ohiya pahiru waatoloxa oonanara mu Armaketo. (Wup 16:16; 19:11-21) Paulo aaloca: “Kristu alamuleke ophiyerya aakunhe amwiicani awe oothene vathi va manaani awe. Mwiicani ookuchulela oni amalihiwe ti okhwa.” (1 Kor 15:25, 26) Eparipari, sookhumelela soothene sa yoocheka ya Atamu sinahaala omalihiwa. Nave voocharela Muluku onahaala waaruuha yaale ari “mmahiyeni” wi ekookele okhala akumi.—Yoh 5:28.
(1 Korinto 15:26) Mwiicani ookuchulela oni amalihiwe ti okhwa.
kr epaax. 237 epara. 21
Omwene Onneera Yoochuna ya Muluku Veelaponi Yavathi
Vano hanka vooloca sa sookhumelela sa ireca seiho iri sawunlaana, ntoko yootakiherya—okhwa? Okhwa “mwiicani [ahu ] ookuchulela,” yoowo onaavootha achu oothene oohiphaameya. (1 Kor 15:26) Mano apwanne okhwa mwiicani awoopihaxa wa Yehova? Moone yeeyo Isaiya aalohenryeiye: “Apwiya anammirya okhwa, ohikhale mahiku oothene; Pwiyaka onamvuta miithori wiithoni wa achu oothene.” (Isa 25:8) Nyuwaano munnawerya waanyiherya elukuluku yeeyo? Ohirivo ovitha miruchu, mahiye, naari miithori a othanana! Nyenya moohiyana ni yeeyo—sinahaala okhalavo miithori sa ohakalala vaavaa Yehova onahaaleiye waakhwaniherya yoolaiherya awe ya waaviiha alipa ookhwa wi ekookele okhala akumi! (Mwaalakhanye Isaiya 26:19.) Wookuchulani, makhwaca oothene atannyiwe ni okhwa anahaala ovola.
(1 Korinto 15:27, 28) Tiwi, mmutikitheryela soothene wi alamuleleke. Nto vooloca wi soothene inalamuleliwa ti yoowo, onniweyavo wi hanaahiwa mwaneene Muluku okhanle tomvanhe Kristu olamula. 28 Vaavaa mwaana oneereiye analamulela soothene, yoowo onamwiiveleela wi alamuleliweke ti Atiithi yaawo amvanhe olamulela seiye soothene, wi Muluku akhale soothene wa oothene.
w12 15/9 epaax. 12 epara. 17
Murecele mu Iyaakha Masanaru Khumi—ni Oya Ohoolo
Hiwaavo mukhalelo mukina wa oloca makuchuwelo yaala oohakalaliha opwaha masu ala: “Muluku akhale soothene wa oothene.” Eyo enataphulela eheeni? Muupuwele elukuluku yeeyo mu emaca ya Eteni, Atamu ni Eva yaaryaaya awiiwanana ni emusi ya Yehova mu elapo yoothene. Yehova, Mutokweene a Elapo yoothene, aanalamulela mukhateiye soopatuxiwa soothene, ankeelo ni achu. Awo yaanawerya ochekula ni yooweene, omurumeela ni waakhela mareeliho awe. Owo aari “soothene wa oothene.”
Mphwanye Muhakhu Woomunepani
(1 Korinto 14:34, 35) athiyana emaaleke mmuthukumanoni elukuluku yeele, ntakhara honaphwanela wi eloceke. Ecicimiheryeke ntoko malamulo analocelaaya. 35 Yaakhwelaka ohuserya echu, yaakoheke asiiyaya owaani; ntakhara ti yawuuliha muru athiyana oloca hiihaale mmulokoni.
w12 1/9 epaax. 9, ekaaxa
Apwanne Paulo Orimwaawatiiherya Athiyana Oloca?
Murummwa Paulo aarepa: “Athiyana emaaleke mmuthukumanoni.” (1 Kor 14:34) Tiheeni owo achuneiye oloca ni masu yaala? Apwanne owo achuna wooniherya wi athiyana hanasuwela echu? Hooye. Mweeparipari, ikwaha sincipale aahiloca sa ohusiha woophwanelela wa athiyana. (2 Tim 1:5; Tito 2:3-5) Mu ekaarata awe wa a Korinto, Paulo aavaha miruku ohiya pahiru wa athiyana nyenya wa oothene mmulokoni yaarino yamahala ya oloca mu ilocelo ni oloherya wi “emaaleke” vaavaa Mukristu mukina aaloceiye. (1 Kor 14:26-30, 33) Ntoko athiyana akina Eekristu yaanatepa ohakalala nthowa na nroromelo naya ophiyerya enamukwatelela mulipa ooloca mwaha wi epake nikoho, hiiha ntoko yaaryaaya yookhovelela mu elapo yeele. Wi esepe okwatelelana wuuwu, Paulo aahaaceenyerya athiyana wi yaaphwanela “yaakoheke asiiyaya owaani.”—1 Kor 14:35.
(1 Korinto 15:53) Tiwi onnakhweleya wi mwiili ola wawuuca, oware ohuuca, ni mwiili ola wookhwa, oware ohikhwa.
it-2 epaax. 393
Ohuuca
Hiiha ntoko Yesu mu oviihiwa wawe, awoocihiwa anahaala oviihiwa, ohiya pahiru ntoko soopatuxiwa soomunepani wi yaakhele ekumi yoohimala, nyenya tho wi yaakhele ohuuca ni ohikhwa. Emanle okhala, ni orumeela moororomeleya, ni okhwa mu mwiili wa omuchu yoowo ori wawuuca, awo annaakhela mwiili woomunepani woohuuca, hiiha ntoko murummwa Paulo onooniheryeiye mookwakwaleya mu 1 Korinto 15:42-54. Mwawiihiiha, ohikhwa onooniherya mukhalelo wa okumi aryaayano, ekumi eni ehirwe ekuchuwe, nyenya masu awi ohuuca anathoonyerya mwiili yoowo Muluku onavaheiye, mwiili yoowo ohinahaala onanara, wuuca, naari ocakanela. Mwawiihiiha, Muluku ohaavaha owerya wa okhala mwa yaawo meekhaaya, ehiweheryaka nikhaviheryo na echu ekina, hiiha ntoko eneereyaaya ni soopatuxiwa ikina, soomwiilini ni soomunepani. Ela yawooniherya yawi Muluku onnaaroromela vancipale. Nyenya mukhalelo owo wa okumi honeeriha wi awo ehinahooleliwa ti Muluku; wa yaawo, hiiha ntoko muru aya, Kristu Yesu, annatitelela opaka yookhwela ya Atiithi aya ni wiiwelela ohoolela waya.—1Kor 15:23-28; moone mwaha imortalidade; alma.
29 A APIRILI–5 A MAIYU
MUHAKHU WA MASU A MULUKU | 2 KORINTO 1-3
“Yehova—ti ‘Muluku Onanlipiha mu Sothene’”
(2 Korinto 1:3) Acicimihiwe Muluku, tiithi a Apwiyaahu Yeesu Kristu, tiithi a ikharari ni Muluku onanlipiha mu soothene!
“Mwinleke ni Yawo Aninla”
Tiithi ahu tho oosivela aahisooseya waayeleela achu aasiveleiye, ntoko murummwa awe Aparahamu, Isaki, Yakopo, Mose, Mwene Tavite ni akina. (Nam 12:6-8; Mat 22:31, 32; Saw 13:22) Piipiliya onnooniherya wi Yehova chiryene onnaweherya elukuluku yeeyo onahaaleiye waaviiha achu yaala oororomeleya. (Yobi 14:14, 15) Mu elukuluku yeeyo, awo anahaala ohakalala ni opuha ekumi yoophaameya. Yehova aahisooseyatho va okhwa wa Mwanawe oopacerya. Piipiliya onaloca wi Yesu aari ‘mwana òkhweleyasa’ a Muluku. (Mat 3:17) Chiri hannawerya waanyiherya osooseya wa Yehova omoona Mwanawe akhwaaka.—Yoh 5:20; 10:17.
(2 Korinto 1:4) Yoowo onanlipiha mu sookacamiha sahu soothene, wi niweryeke waalipiha tho oothene yaale anakacamiheya ni olipa weiwo nnaakhelaahu wa Muluku.
“Mwinleke ni Yawo Aninla”
Enamukhala yoovila osuwela echu ya oloca wa muchu yoowo onathanana. Nyenya Piipiliya onnaloca wi “malotxelo a anamiruku, t’openusa.” (Masi 12:18) Ancipale annaphwanya masu a waahakalaliha akina moorweela wa eproxura Quando Morre Alguém Que Amamos. Wiiliwiili echu yookhaviheryaxa nnaphwanelaahu opaka ori ‘winla ni yawo aninla.’ (Aro 12:15) Kapi, yoowo aiyawe akhwile, onnaloca wi ikwaha ikina mukhalelo mmoha onooniheryeiye moonelo awe ori moorweela wa winla. Owo onnaacererya: “Ti hiiha kinaakhelaaka nihakalaliho vaavaa asinthamwene aninlaaya ni miyo. Mu elukuluku yeeyo, nkiniisoona okhala meekhaaka mu othanana waka.”
Mphwanye Muhakhu Woomunepani
(2 Korinto 1:22) Aneeyerya eneneeryo yooneera awawe ahela mmurimani mwahu Munepa awe, ntoko mweemesheryo.
Makoho a Alipa Waalakhanya
“Eneneeryo” ni “mweemesheryo” seiho Akristu awoocihiwa anaakhelaaya wa Muluku tiheeni?—2 Kor 1:21, 22
▪ Mweemesheryo: Mwawiiwanana ni liivuru mmoha, masu a Ekiriki vooloca sa “mweemesheryo” yaawo anaphwanyeya mu 2 Korinto 1:22 ti “masu oophwanelela yaawo anaphariheliwa mmiyaha sa othoriha ni maroca” yeeyo enataphulela “elivelo yoopacerya, okhapelela, mavolowelo, echu enahiiwa ntoko nroromeliho, nroromeliho nlo naari ntoko yoolivela yoopacerya wa epreso yoothene ya othuma echu nave yaanavaha nroromeliho wi muchu owo aahaala okhalano echu eyo, naari wi aahaala waakhwaniherya nlakano nawe.” Vooloca sa awoocihiwa ni munepa waweela, Yehova onnaavaha awo mweemexeryo naari nroromeliho wa nchuwelo naya na omwaahiyu. Nyenya nlivelo nawaakhwanela naari nchuwelo, ninnalociwa mu 2 Korinto 5:1-5 ntoko mwiili woomunepani yoowo ohinuuca. Nave tho enavolowela yamahala ya ohikhwa.—1 Kor 15:48-54.
Mu elocelo ya Ekiriki yahiihaano, nsu nrino yootaphulela yoolikana ntoko “mweemesheryo” annaphariheliwa tho aahiwaka aneeli a mulipa awaakamela. Olikanyiha iwo ti woophwanelela, woona wi awoocihiwa anahaala opaka makupa a mwaara oosiphela a Kristu.—2 Kor 11:2; Wup 21:2, 9.
▪ Eneneeryo: Mmahiku akhalai, eneneeryo naari eseelo yaanaphariheliwa ntoko asinatura yoowo ooniherya ophwanelela wa okhalano echu, mwaneene a echu, naari wi yooniherya wi naapakiwa nlakano. Moolikana, Akristu awoocihiwa annaakhela eneneeryo, naari ovahiwa eneneeryo yoosiphela ni munepa ntoko oothanliwa a Muluku. (Éfe 1:13, 14) Nyenya pahiru awo anaakhela eneneeryo yookuchula mu elukuluku vakhaani ehaakumve okhwa eri oororomeleya wa Muluku naari elukuluku vakhaani ehaakumve yoohooxa etokotoko.—Éfe 4:30; Wup 7:2-4.
(2 Korinto 2:14-16) Athamaliwe Muluku, yoowo onanihoola noonihaka ovootha wa Kristu mahiku oothene, oonihaka mwa hiyo muhiriri woomusuwela yoowo, mmapuro oothene. 15 Wa Muluku hiyo nri muhiriri wawunkhela phaama wa mukucho wa Kristu mwa yaale anavulushiwa ni yaale anarimeela. 16 Wa yaale anarimeela, muhiriri wookhwa, onaakeriha wookhwani; nto wa yaale anavulushiwa, muhiriri wookumi, onaakeriha wookumini. Hiihaa taani onaphwanela ophara muteko si yoola?
w10 1/8 epaax. 23
Nyuwaano Mwaanasuwela?
Tiheeni murummwa Paulo aareiyeno mmuupuweloni vaavaa aalonceiye masu awi “noonihaka ovootha”?
▪ Paulo oorepa ariki: “Muluku . . . onanihoola noonihaka ovootha wa Kristu mahiku oothene, oonihaka mwa hiyo muhiriri woomusuwela yoowo, mmapuro oothene. Wa Muluku hiyo nri muhiriri wawunkhela phaama wa mukucho wa Kristu mwa yaale anavulushiwa ni yaale anarimeela. Wa yaale anarimeela, muhiriri wookhwa, onaakeriha wookhwani; nto wa yaale anavulushiwa, muhiriri wookumi, onaakeriha wookumini.”—2 Kor 2:14-16.
Murummwa Paulo aaloca sa meerelo yaawo yeeriwa o Roma wi acicimihiwe mutokweene a anakhoco nthowa na waavootha wawe amwiicani awe. Mu ilukuluku seiho, ichu soothene anakhoco yaakuxaaya vamoha ni alipa oophariwa yaaneesihiwa vanlakani vene, nave imope saanakuxiwa wi sapakiwe mukucho eniiha achu emwiipelaka mutokweene a anakhoco ni anakhoco awe nthowa na ovootha waya. Amanle ocicimihiwa mutokweene a anakhoco ni anakhoco awe, achu yaanaya opaha mikucho, nave akhweya alipa oophariwa yaaniiphiwa.
Opharihela masu oolikanyiha awi “noonihaka ovootha wa Kristu,” onataphulela okhalano okumi naari okhwa, “akhweya enathipeleya mu meerelo yaawo yeeriwa o Roma a opaka mikucho variyari va ochapela,” mwawiiwanana ni liivuru The International Standard Bible Encyclopedia. “Wunkhela wa mikucho waataphulela ovootha, nave ela yaanawuupuxerya alipa oophariwa wi akhweya yahaala wiiphiwa.”