Apwanne Mawarelo Anyu Annamucicimiha Muluku?
“Mwereke sothene mmutxitximihaka Muluku.”—1 KORINTO 10:31.
MACIPO: 34, 61
MWAAHAALA WAAKHULA HAI?
Nlamulo na Mose nnii nnikhaviherye hai vaavaa nnapakaahu soolakelela vooloca sa yeeyo nnawehaahu ni yeeyo nnawaraahu?
Soorepa sa 1 Korinto 10:31 ni Filipi 2:4 inii ivolowele hai othanla wahu soowara?
Ntakhara heeni wuuliwa muru ti wookhweleya vaavaa nnapakaahu yoolakelela vooloca sa mawarelo ni ophwaneliwa?
1, 2. Ntakhara heeni Anamoona a Yehova aakhalano malakiheryo oophwanelela a soowara? (Moone eruku yoopacerya.)
EYORNALI ya Olanta yoothariha mukhalelo ahooleli a malapelo yaawanraaya mmithukumano saya. Eyo yooloca: “Muchu aanoona soowara soohiphwanelela, xaxaxa mu elukuluku yooviha.” Nyenya eyornali emohamoha yaaloca wi mukhalelo owo onnahiyana ni mukhalelo Anamoona a Yehova anawaraaya mmuthukumano aya wa muceche. Yaaloca tho wi amiravo ni alopwana atokweene yaanawara ikravata nave anahano ni athiyana atokweene yaanawara soowara soophwanelela. Anamoona a Yehova wiiliwiili annathamaleliwa mukhalelo anawaraaya. Murummwa Paulo aaloca wi soowara Akristu anawaraaya inaphwanela okhala ‘sohùliha muru nave sohisona,’ siri soophwanelela wa akapuro a Muluku. (1 Timóteo 2:9, 10) Naamwi Paulo aaloca sa athiyana, nlakiheryo nenla ninnaphariheleya wa alopwana Eekristu.
2 Malakiheryo aphaama a soowara tookhweleya wa hiyo ntoko achu a Yehova, nave tho tookhweleya wa Muluku nnamulapaahu. (Maphatxuwelo 3:21) Piipiliya onnahiya vanlakani wi Yehova, Mulamuleli a elapo yoothene, ookhalano malakiheryo a soowara onachuneiye wa akapuro awe. Mwawiihiiha, yeeyo nnathanlaahu wi niware henaphwanela onihakalaliha yeehu pahiru, nyenya, Yehova Mulamuleli a ikuru soothene.
3. Tiheeni nnahuseryaahu vooloca sa mawarelo orweela wa Nlamulo na Muluku wa Aisarayeli?
3 Mu Nlamulo na Mose, yaakhalamo malakiheryo yaakhapelela Aisarayeli ohivoloweliwa ni mukhalelo wa okumi wa maloko yaarukurenrye. Nlamulo naanooniherya wi Yehova onniica vatokovene soowara saahooniherya ohiyana variyari va mulopwana ni muthiyana. Olelo tho achu annawara mmukhalelo yoowo. (Mwaalakhanye Malamulo 22:5.) Moorweela wa nlamulo, ninnahuserya wi Yehova hanahakalala ni mawarelo anamweeriha mulopwana okhala ntoko muthiyana, anamweeriha tho muthiyana okhala ntoko mulopwana, naari aneeriha okhala woovila woona ohiyana variyari va mulopwana ni muthiyana.
4. Tiheeni eni yaakhaviherye Akristu opaka soolakelela saphaama vooloca sa mukhalelo wa owara?
4 Malakiheryo a Piipiliya anahaala onikhaviherya opaka soolakelela vooloca sa soowara. Malakiheryo yaala annaphariheleya moohipwacha elapo, makhalelo a nipuro nnakhalaahu naari sookhovelela sahu. Hiyaano hinnachuna yoorepela enooniherya mawarelo ari aweemereryeya ni ahineemereryeya. Nnaphwanela ochariha malakiheryo a Soorempwa, yaawo nlelo aneemererya owara soowara nnachunaahu. Hankooni nthokororye malakiheryo makina a Piipiliya anahaala onikhaviherya “othalela khwino okhwela wa Muluku, khwino saphama, khwino sosivela ni sawakhwanela” vaavaa nnalakelelaahu echu yoowara.—Aroma 12:1, 2.
“NINNISEMERERYIHA NTOKO AMULAPELI A MULUKU”
5, 6. Mawarelo ahu anahaala waavolowela hai akina?
5 Murummwa Paulo aaveereliwa oloca nlakiheryo nookhweleya nnaphwanyeya mu 2 Korinto 6:4 (Mwaalakhanye.) Mukhalelo nnawaraahu onnarumiha michaka wa akina, nave achu ancipale anahaala okhalano muupuwelo vooloca sa hiyo moorweela wa mawarelo ahu. (1 Samuwele 16:7) Woona wi naakapuro a Muluku, nnaphwanela wiilipiserya vancipale ohiwara echu ehiri yoophwanelela naari nnachunaahu. Vaavaa nnapharihelaahu malakiheryo a Piipiliya, anahaala onikhaviherya osepa soowara soowomaanya, sawooneela, naari sinooniherya mwiikho. Eyo enataphulela wi nnaphwanela osepa soowara sinooniherya naari sinavuwiha makupa oovitheya a mwiili ahu. Hinnachuna wi akina ekhale awuukhuwa naari okhinyereryeya oweha okina nthowa na mukhalelo nnawaraahu.
6 Vaavaa nnakhalaahuno esipanti, nnawaraahu phaama, ni ophwaneliwa nave soowara sahu ikhala soohuuliha muru, achu anahaala onicicimiha vancipale ntoko akapuro a Yehova, Mulamuleli a ikuru soothene. Nave awo anahaala ochuna omusuwela Muluku nnamulapaahu, anamukhalano ncicimiho ntokweene ni marehereryo ahu, nave anahaala owiriyana michaka sahu soovulusa.
7, 8. Elukuluku taani nnaphwanelaahu owara yoowara yoophwanelela?
7 Mawarelo ahu annamvolowela Muluku ahu aweela, annihu ni arokora Eekristu ni achu mu ekulucu ahu. Nnaphwanela owara mmukhalelo onamucicimiha Yehova ni michaka nnalaleeryaahu. (Aroma 13:8-10) Yeeyo nnawaraahu ti yookhweleya xaxaxa vaavaa nnayaahu mmithukumano sahu Seekristu naari mmuteko woolaleerya. Nnaphwanela owara mmukhalelo ori woophwanelela wa achu anamulapela Muluku. (1 Timóteo 2:10) Mweeparipari soowara ikina inakhala soophwanelela mu nipuro nammoori hasikhala soophwanelela mu nipuro nikina. Mwawiihiiha, moohipwacha nipuro nnakhalaahu, ntoko Anamoona a Yehova nnaphwanela osepa waaphuca akina nthowa na mukhalelo nnawaraahu.
8 Mwaalakhanye 1 Korinto 10:13. Vaavaa nnayaahu mmithukumano mitokotoko, soowara sahu sinaphwanela okhala soohuuliha muru. Hinnaphwanela otakiherya mawarelo awunlaana a elapo. Naamwi muthukumano ohipacenrye ni vaavaa nnaavyaahu nipuro nookhalavo ntoko mu hoteli, nnaphwanela ororomela wi yoowara ahu ehipwahe makhero. Weerano hiiha nnahaala okhalano nthowa na wiirumiha ntoko Anamoona a Yehova, nave nnahaala okhalano ekari ya ovaha onamoona.
9, 10. Ntakhara heeni Filipi 2:4 onaphwanela ovolowela yeeyo nnawaraahu?
9 Mwaalakhanye Filipi 2:4. Ntakhara heeni ninnaphwanela wuupuwela vooloca sa mukhalelo mawarelo ahu anaavolowelaaya anna ni arokora ahu Eekristu? Nthowa nimoha ti nawi achu a Muluku anniilipiserya ochariha ekano ela: “Vanonto mwiphe sinawerihani sonanara sa vathiva: otxapaheya, sotxheka, okhwela sonanara.” (Kolosi 3:2, 5) Annihu akina ni arokora aachawa ocapaheya, nyenya akhweya annawaniha ni nchuno nenlo noonanara. Wakhala wi hinaano ephoole, mmukhalelo nnawaraahu enahaala oweeriha okhala woovila ochariha ekano ya Piipiliya ni owaniha soochuna seiyo. (1 Korinto 6:9, 10) Hiyaano hinnachuna weeriha wi owaniha waya okhale woovila, tahi yeeyo?
10 Vaavaa nnakhalaahu ni anna ni arokora ahu, ninnoopowa wa achu yaawo anavuwiha ocapaheya. Mukhalelo nnawaraahu onnareeriha onna ahu, moohipwacha waakhanle wi nri vamuthukumano naari nipuro nikina. Naamwi nri ootaphuwa othanla soowara, nookhalano murici wa owara soowara sineeriha okhala wookhweya wa akina okhapelela muupuwelo aya, masu ni meecelo aphaama vamiithoni va Muluku. (1 Pedro 1:15, 16) Osivela weeparipari “honera etxhu yohiphwanelela, honasya ophura waya.”—1 Korinto 13:4, 5.
YOOWARA YOOPHWANELELA MU ELUKULUKU NI NIPURO NOOPHWANELA
11, 12. Eklesiyaste 3:1, 17 onanikhaviherya hai okhala oophimelela?
11 Vaavaa akapuro a Muluku analakelelaaya echu yoowara, awo annasuwela wi “etxhu t’etxhu enaphatxuwa mw’elukulukuni mwaya.” (Eklesiyaste 3:1, 17) Ohiyana wa mapuro, ilukuluku, ni mikhalelo sinanwerya ovolowela mukhalelo wa owara. Nyenya malakiheryo a Yehova ta mahiku oothene naari hanatorokeya.—Malakiya 3:6.
12 Mu elukuluku yooviha, ennakhala yoovila osuwela waakhanle wi yoowara ahu ti yoophwanelela ni yoohuuliha muru. Anna ni arokora ahu annathamalela vaavaa nihinawaraahu soowara soowomaanya ni sawooneela. (Yobi 31:1) Nave tho, vaavaa nnayaahu ophareya naari nneekhaahu, yoowara ahu enaphwanela okhala yoohuuliha muru. (Masiposipo 11:2, 20) Naamwi achu ancipale mweelaponi yeekhaka ni yoowara yawooneela, nnaphwanela ovareryela wi yoothanla ahu eruuhe ncicimiho wa Muluku ahu aweela, Yehova.
13. Ntakhara heeni ekano enaphwanyeya mu 1 Korinto 10:32, 33 ennavolowela othanla wahu mawarelo?
13 Nookhalavo nlakiheryo nikina nookhweleya nnaphwanela ovolowela moonelo ahu wa othanla mawarelo. Nnaphwanela okhalano ephoole wi nihinyemule yawuupuxerya-ya-murima ya akina. (Mwaalakhanye 1 Korinto 10:32, 33.) Nookhalano murici wa osepa soowara seiya sinahaala owuukhula anna ni arokora ahu ni yaale ahinamurumeela Yehova. Murummwa Paulo oorepa: “Mutxhu ti mutxhu wa hiyano onnaphwanela omusiveliha mukhweiye wa yele eri yaphama wi amulipihe munroromeloni.” Paulo aahaaceererya nthowa neni: “Navetho Kristu hansye wisiveliha.” (Aroma 15:2, 3) Ntoko Yesu, nnaphwanela opakaka yookhwela ya Muluku ni waakhaviherya akina, woona wi echu yookhweleyaxa opwaha soochuna sahu. Mwawiihiiha hinni nthanle mawarelo eni yaahiihe achu owiriyana michaka sahu.
14. Asitiithi eni yaavyakihe hai anamwane aya omucicimiha Muluku?
14 Asitiithi ari Akristu aakhalano murici wa waahusiha anamwane aya ochariha malakiheryo a Piipiliya. Eyo enaphitaanyerya osuwela wi awo ni anamwane aya aakhalano murici wa omuhakalaliha Muluku moorweela wa mukhalelo anawaraaya ni ophwaneliwa woohuuliha muru. (Masiposipo 22:6; 27:11) Asitiithi eni yaavyakihe hai anamwane aya omucicimiha Muluku ahu aweela ni malakiheryo awe? Anaphwanela ovaha yootakiherya yaphaama wa anamwane aya. Nave awo tho anaphwanela waahusiha anamwane aya moosivela mukhalelo wa ophwanya soowara soophwanelela. Anamwane hanaphwanela othanla soowara pahiru nthowa nawi annachuna, nyenya echu yookhweleyaxa, anaphwanela othanla soowara seiho sinamucicimiha Yehova, Muluku yoowo nnamweemelelaahu.
MPHARIHELE OTHANLA WOOCHUNA MWAMIRUKU
15. Tiheeni enahaala onikhaviherya opaka soothanla sa miruku?
15 Piipiliya ohoolela woophara muteko oni anikhaviherye opaka soothanla sa miruku sinahaala omucicimiha Muluku. Naamwi hiiha, yeeyo nnawaraahu ennooniherya soochuna sahu. Mukhalelo wa mawarelo nnachunaahu ni soowara nnathumaahu sinamukhala soohiyana ni sa akina. Nyenya elukuluku yoothene soowara sahu sinaphwanela okhala saphaama, soohuuliha muru, soophwanelela, ni saweemereryiwa vanipuroni.
16. Ntakhara heeni wiilipiserya ti woochuneya wi niware phaama?
16 Tahi echu yookhweya ophwanya yoowara yoohuuliha muru ni yoophwanelela. Mapuro mancipale anatumiha soowara sihinaahiyaniha alopwana ni athiyana. Mwawiihiiha onamuchuneya ovira elukuluku yincipale ni wiilipiherya wi muchu aphwanye esaaya, evistiitu, epaaco, naari othanla ekasako ni kaalasa ahiri oowomanyeeya. Nyenya anna ni arokora ahu anahaala woona ni othamalela wiilipiserya wahu owara yoowara yeeyo eri yaphaama ni yoophwanelela. Nave opwaha soothene, nnahaala omuhakalaliha Tiithi ahu oosivela awirimu.
17. Apwanne anna annaphwanela ophuwa ipweto?
17 Ti yoophwanelela anna ophuwa ipweto? Mu Nlamulo na Mose yaari yoochuneya alopwana ophuwa ipweto. Naamwi hiiha, Akristu hanalamuleliwa ochariha Nlamulo nenlo. (Onamukutxho 19:27; 21:5; Galasya 3:24, 25) Mu sookhovelela ikina, ipweto soorehereryiwa phaama sinneemereryiwa, nave hinnaahiiha achu owiriyana michaka sahu. Ophiyerya wi anna akina arino mirici aakhalano ipweto. Naamwi hiiha, anna akina annalakelela ohiphuwa ipweto. (1 Korinto 8:9, 13; 10:32) Mu sookhovelela ni mapuro makina, ophuwa ipweto tahi wawunlaana nave honeemereryiwa wa Anamoona a Yehova. Mweeparipari, wakhala wi munna ookhalano enahaala omuhiiha oruuha ncicimiho wa Muluku nave onahaala okhalano “murala.”—1 Timóteo 3:2, 7 Nlakano Nahihano; Aroma 15:1-3.
18, 19. Mikeya 6:8 onanikhaviherya hai?
18 Ninnahakalala vatokovene Yehova ohinivaha soorepela sa soowara ni ophwaneliwa. Opwaha yeeyo, oonivaha othanla woochuna wi nipake soolakelela inathipeleya mmalakiheryo a Piipiliya. Mwawiihiiha vaavaa nnapakaahu soolakelela sahu vooloca sa mawarelo ni ophwaneliwa, nooniherye wi ninnachuna owara mmukhalelo woohuuliha muru vaavaa nnamurumeelaahu Muluku ahu.—Mikeya 6:8.
19 Mweeparipari ninnasuwela wi Yehova taweela nave wi malakiheryo awe ohoolela waphaama wa hiyo. Wakhala wi naachu awiiyeviha, nnahaala ochariha malakiheryo awe mu okumi ahu. Wiiyeviha onahaala tho onikhaviherya ocicimiha moonelo ni miruku sa akina.
20. Mawarelo ni ophwaneliwa wahu oni waavolowele hai akina?
20 Mawarelo ahu anaphwanela wooniherya vanlakani wi na akapuro a Yehova. Yehova ookhalano malakiheryo a vasulu, nave ninnahakalala ochariha. Anna ni arokora ahu annathamaleliwa nthowa na ophwaneliwa ni meecelo aya aphaama. Awo annaalekecha achu ni michaka soovulusa sa Piipiliya ni omuruuhela Yehova ncicimiho ni ohakalala. Vaavaa nnapakaahu soolakelela sa miruku vooloca sa yoowara, nnahaala otitelela omuruuhela ncicimiho Mmoha yoowo oniiwariha “otokwene ni ovuwa.”—Salumu 104:1, 2.
[Yooleeliherya va epaaxina 15]
Vaavaa nnakhalaahuno esipanti, nnawaraahu phaama, ni ophwaneliwa nave soowara sahu ikhala soohuuliha muru, achu anahaala onicicimiha vancipale ntoko akapuro a Apwiya Yehova, Mwene a ikuru soothene
[Yooleeliherya va epaaxina 17]
Malakiheryo a Yehova wiiliwiili hanatorokeya